ᑕᖅᕿᐅᓚᐅᖅᑐᒥᑦ, ᐃᓚᒋᔭᐅᔪᑦ ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᒃᑯᓐᓄᑦ ᑐᕌᓐᑐᒧᙵᐅᓚᐅᖅᑐᑦ ᐱᖃᑎᒋᓂᐊᕐᓗᒍ ᑕᐃᕕᑎ ᕿᑎᖅᖠᖅ ᑐᓂᔭᐅᓂᐊᖅᑎᓪᓗᒍ ᐱᓗᒍᓗ PDAC 2025 ᓯᑰᑲᒻ ᔨᒻ ᐃᓕᑕᕆᔭᐅᔾᔪᑎ. ᐃᓄᐃᑦ ᐃᓚᐅᔪᓂᑦ ᐃᓚᓚᐅᖅᑐᑦ ᑕᐃᕕᑎ ᐅᕕᖓᔮᖅ, ᕉᓯ ᐅᓗᔪᒃ, ᐊᒻᒪᓗ ᓚᕖᓂᐊ ᐳᕋᐅᓐ ᐃᓚᐅᑉᓗᓂ ᑕᐃᕕᑎᐅᑉ ᓄᓕᐊᖓ, ᓲᓯ ᕿᑎᖅᖠᖅ, ᐊᒻᒪᓗ ᐸᓂᖓᑦ ᓯᐅᕆᓐ ᕿᔪᒃ.

ᐃᖏᕐᕋᔭᖕᓂᖅ ᓂᕆᐅᓇᙱᑦᑐᒥᑦ ᐱᒋᐊᓚᐅᖅᑐᖅ ᑕᐃᕕᑎᐅᑉ ᓄᓕᐊᖓᓄᑦ, ᓲᓯ ᕿᑎᖅᖠᖅ, ᐱᖅᑐᔪᖕᓂᖓᓄᑦ ᑎᖕᒥᓲᑦ ᓄᖅᖃᖓᓚᐅᕐᒪᑕ ᑭᖑᕙᕆᐊᖅᓯᒪᑉᓗᑎᒡᓘᓐᓃᑦ. ᑎᖕᒥᓲᖃᙱᑦᑐᖅ? ᓈᒻᒪᒃᑐᖅ! ᓲᓯ ᑎᑭᑦᑐᖕᓇᓚᐅᖅᑐᖅ ᑎᑭᕋᕐᔪᐊᕐᒥᑦ ᑲᖏᖅᖠᓂᕐᒧᑦ ᓯᑭᑑᒃᑰᖅᖢᓂ, ᐃᕐᓂᖓ ᒪᓚᑲᐃ ᓯᑭᑑᖅᖢᓂ. ᑖᒻᓇ ᒪᕐᕉᖕᓄᑦ ᐊᒻᒪᓗ ᐃᑲᕐᕋᐅᑉ ᓇᑉᐸᖓᓂ ᐃᖏᕐᕋᔭᖕᓂᕆᔭᖓ ᐃᓕᑕᕆᔭᐅᔾᔪᑎᓃᖃᑕᐅᔪᖕᓇᖅᑎᑦᑎᓚᐅᖅᑐᖅ.

2,280 ᑭᓛᒥᑕᐃᑦ ᐱᐊᓂᖕᒪᑕ ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᑲᑎᒪᔨᐊᓛᑦ ᑐᙵᓱᒃᑎᑕᐅᓚᐅᖅᑐᑦ ᑐᕌᓐᑐᒥᑦ ᐊᒡᓃᑯᒃᑯᑦ ᐊᖓᔪᒃᖡᑦ ᐊᐅᓚᑦᑎᔨᖏᓐᓄᑦ ᐊᒻᒪᓗ ᓄᓇᕗᒻᒥᑦ ᓯᕗᓕᖅᑎᓄᑦ. ᑐᑭᖃᖅᑐᒃᑯᑦ ᐅᖃᓪᓗᕆᒃᓴᐅᑎᓚᐅᖅᑐᑦ ᐊᒻᒪᓗ ᑲᑎᒪᑉᓗᑎᒃ, ᐅᑉᓗᕈᒥᑕᖅᖢᑎᒡᓗ ᐅᔭᕋᒃᑕᕆᐊᓂᑦ ᓄᓇᓕᖕᒥᑦ ᐱᓕᕆᖃᑎᒌᒃᑐᓕᕆᔨᓂᑦ, ᖃᐅᔨᑎᑦᑎᑉᓗᑎᒃ ᐃᓱᒪᒋᔭᖏᓐᓂᒃ ᐊᒡᓃᑯᒃᑯᑦ ᐋᖅᕿᖃᑎᒌᖕᓂᕐᒧᑦ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎᖓᓄᑦ. ᐃᓚᐅᖃᑕᐅᓚᐅᖅᑐᑦ ᓂᐱᓕᐅᖅᑕᐅᔪᓂᑦ ᐃᓐᓇᕆᔭᐅᔪᓂᒃ ᑐᓴᖅᓴᐅᑎᑦᑎᓂᕐᒥᑦ ᐅᑭᐅᖅᑕᖅᑑᑉ ᐃᓱᐊᓂᑦ ᑐᓴᖅᓴᐅᑎᑕᐅᔪᖅ-ᒥᑦ, ᑕᐃᕕᑎ ᕿᑎᖅᖠᖅ, ᑕᐃᕕᑎ ᐅᕕᖓᔮᖅ, ᓚᕖᓂᐊ ᐳᕋᐅᓐ, ᐊᒻᒪᓗ ᕉᓯ ᐅᓗᔪᒃ ᐅᓂᑉᑳᖃᑦᑕᓚᐅᖅᖢᑎᒃ ᐊᑐᖅᓯᒪᓂᑯᖏᓐᓂᑦ ᐊᒻᒪᓗ ᑕᐅᑐᒐᕆᔭᖏᓐᓂᑦ. ᐳᔾᔫᑦ ᑯᓱᒐᖅ, ᐊᖓᔪᖅᖄᖅ ᓄᓇᕗᒻᒥᑦ ᐱᓕᕆᓂᐅᔪᓄᑦ, ᐃᒃᓯᕙᖃᑕᐅᓚᐅᖅᑐᖅ ᐃᓐᓇᕆᔭᐅᔪᓂᑦ ᑐᓵᔨᐅᑉᓗᓂ.

ᐃᓕᑕᕆᔭᐅᔾᔪᑎᑖᖅᑐᑦ ᐅᓐᓄᒍᒥᑕᕐᓂᖅ ᖁᕕᐊᓲᑎᖃᕐᓂᐅᓚᐅᖅᑐᖅ, ᑕᐃᕕᑎ ᐃᓕᑕᕆᔭᐅᔾᔪᑎᑖᖅᖢᓂ ᐊᒻᒪᓗ ᓇᖏᖅᓯᑉᓗᑎᒃ ᐸᑦᑕᒃᑐᖅᑕᐅᑉᓗᓂ. ᖁᕕᐊᓇᑦᑎᐊᓚᐅᖅᑐᖅ ᑲᑎᖃᑎᖃᒃᑲᓐᓂᕐᒪᑕ ᓱᓵᓐ ᓕᒃᑭᓕᐅᒥᑦ, ᐃᑲᔪᑦᑎᐊᓚᐅᖅᑐᖅ ᐱᓕᕆᐊᖓ ᓴᖅᕿᑦᑎᓂᕐᒥᒃ ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᓂᑦ, ᐅᔾᔨᕐᓇᑦᑎᐊᓚᐅᖅᑐᖅ ᑲᑎᒪᔪᓗᒃᑖᓂᑦ.

[ᓇᕿᓪᓗᒍ ᐅᓇ ᑕᐅᑐᖕᓂᐊᕐᓗᒍ ᑕᐃᕕᑎᐅᑉ 2025-ᒥᑦ ᓯᑰᑲᒻ ᔨᒻ ᐃᓕᑕᕆᔭᐅᔾᔪᑎᑖᖅᑎᓪᓗᒍ ᐊᔾᔨᓕᐅᖅᑕᐅᔪᖅ ᐊᐅᓚᔪᖅ]

ᓇᓗᓇᐃᖅᓯᓂᕐᒧᑦ ᐅᖃᓪᓚᒃᑎᓪᓗᒍ, ᑕᐃᕕᑎ ᐅᖃᓚᐅᖅᑐᖅ ᖁᔭᓕᓂᕆᔭᖓᓂᑦ ᐃᓐᓇᕆᔭᐅᔪᓄᑦ, ᐱᓕᕆᖃᑎᒋᔭᖏᓐᓄᑦ, ᐊᒻᒪᓗ ᖃᑕᙳᑎᖏᔭᖓᓄᑦ, ᐅᖃᐅᓯᕆᑉᓗᒍ ᐱᒻᒪᕆᐅᓂᖓᑕ ᐃᓚᓕᐅᑎᔭᐅᓂᖏᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐱᒻᒪᕆᐅᔪᖅ ᐊᐅᓛᖅᑎᑦᑎᓂᕐᒧᐊᖅᑕᐅᑎᓪᓗᒋᑦ, ᑕᑯᒃᓴᐅᑎᓪᓗᒋᑦ ᓯᓚᑐᓂᖏᑦ ᐊᒻᒪᓗ ᓴᙱᓂᕆᔭᖏᑦ ᐃᓄᐃᑦ ᓄᓇᓕᖏᑦ.

ᐃᖅᖃᐅᒪᓇᖅᑐᒥᑦ ᑐᕌᓐᑐᒧᙵᓯᒪᓚᐅᖅᖢᑎᒃ, ᑭᑐᓗᒃᑖᑦ ᐊᖏᕐᕋᑦᑎᐊᓚᐅᖅᑐᑦ ᐊᒻᒪᓗ ᐅᑎᖅᓯᒪᓕᖅᑐᑦ ᐱᒻᒪᕆᐅᔪᒥᒃ ᐱᓕᕆᐊᖓᓐᓄᑦ, ᐱᑦᑕᐅᓂᖅᓴᒥᑦ ᓯᕗᓂᒃᓴᖃᖅᑎᓐᓂᐊᕐᓗᒋᑦ ᐃᓄᐃᑦ ᓄᓇᕗᒻᒥᐅᑕᐅᔪᑦ. ᑕᐃᕕᑎᐅᑉ ᐃᓕᑕᕆᔭᐅᔾᔪᑎᑖᖓ ᐃᑲᔪᖅᑐᐃᓂᕐᒧᑦ ᐃᓄᖕᓄᑦ ᐱᒻᒪᕆᐅᒋᔭᐅᔪᓂᑦ, ᐱᖅᖁᓯᕆᔭᐅᔪᒥᒃ ᐊᓯᐅᔨᑦᑕᐃᓕᓂᕐᒧᑦ, ᐊᒻᒪᓗ ᐊᔪᙱᑦᑎᒃᑯᑦ ᐱᕙᓪᓕᐊᓂᕐᒧᑦ ᐱᔪᒥᓇᖅᑎᑦᑎᓂᖃᐃᓐᓇᖅᑐᖅ ᐊᒻᒪᓗ ᐱᑦᑕᐅᔪᒥᒃ ᐊᓯᐊᙳᖅᓯᓂᖃᕐᓂᕐᒧᑦ. ᐊᑕᐅᑦᑎᒃᑯᑦ ᐊᒡᓃᑯᒃᑯᓪᓗ, ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᑲᑎᒪᔨᐊᓛᒃᑯᓪᓗ ᐱᕙᓪᓕᐊᑎᑦᑎᔪᒪᔪᑦ ᐱᑦᑕᐅᓂᖅᓴᒥᒃ ᓯᕗᓂᒃᓴᖃᕐᓂᐊᕐᓗᑎᒃ ᓄᓇᓖᑦ ᐊᐅᓛᖅᑎᑦᑎᕝᕕᒋᔭᑉᑎᖕᓂᑦ.