ᐊᒡᓃᑯᒃᑯᑦ ᐱᔾᔪᔾᔨᔨᐅᖃᑦᑕᖅᓯᒪᔪᑦ ᑭᕙᓪᓕᕐᒥᑦ ᓱᓇᑐᐃᓐᓇᓕᕆᓂᕐᒥᒃ ᑲᑎᑎᑦᑎᓂᕐᒥᒃ ᑕᐃᒪᙵᓂᑦ 2014-ᒥᑦ, ᐊᕐᕌᒍᑕᒫᖅ ᐋᖅᑭᒃᓱᖅᑕᐅᖃᑦᑕᖅᑐᖅ ᑭᕙᓪᓕᕐᒥᑦ ᓱᓇᑐᐃᓐᓇᓄᑦ ᐃᓕᓐᓂᐊᖅᑎᑦᑎᔨᓄᑦ (KSEC).  ᐊᑐᓂ ᓄᓇᓖᑦ ᑭᕙᓪᓕᕐᒥᑦ ᐊᐅᓪᓚᖅᑎᑦᑎᔪᖕᓇᖃᑦᑕᖅᑐᑦ ᓯᑕᒪᓂᒃ ᖁᑦᑎᖕᓂᖅᓴᒥᑦ ᐃᓕᓐᓂᐊᖅᑎᓂᒃ ᐊᒻᒪᓗ ᐃᓕᓐᓂᐊᖅᑎᑦᑎᔨᒥᒃ ᑭᒡᒐᖅᑐᐃᓗᑎᒃ, ᑖᑉᑯᐊᓗ ᐃᓚᐅᖃᑕᐅᓕᖅᖢᑎᒃ ᓱᓇᑐᐃᓐᓇᓕᕆᓂᕐᒧᑦ ᐊᒻᒪᓗ ᐱᖅᑯᓯᕆᔭᐅᔪᓂᒃ ᖃᓄᐃᓕᐅᕈᓘᔭᕐᓂᕐᒥᒃ ᐃᓄᐃᑦ ᐃᓐᓇᕆᔭᖏᓐᓂᒃ ᐱᖃᑎᖃᕐᓗᑎᒃ ᐊᒻᒪᓗ ᓱᓇᑐᐃᓐᓇᓕᕆᓂᕐᒧᑦ ᐃᓕᓐᓂᐊᖅᑎᑦᑎᔨᓂᒃ ᑖᑉᑯᓄᙵ ᐃᓕᓐᓂᐊᖅᑎᑕᐅᓗᑎᒃ.  ᐃᓅᔪᑦ ᐃᓅᖃᑎᒌᖕᓂᕐᒧᑦ ᐃᒃᐱᒋᓂᕆᔭᖏᑦ (ᐅᖃᐅᓯᐅᖃᑦᑕᕐᒥᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐃᒃᐱᒋᓂᕆᔭᐅᔪᑦ – ᑕᑯᓗᒍ ᓴᓂᕌᓃᑦᑐᖅ) ᑕᐅᑐᒐᐅᓗᐊᖃᑦᑕᖅᑐᑦ ᐱᓇᓱᐊᕈᓯᕐᒥᑦ ᐊᒻᒪᓗ ᐱᐊᓂᒃᑯᑎᒃ ᑲᑎᑎᑕᐅᓯᒪᔪᑦ ᐃᓕᓐᓂᐊᖅᑏᑦ ᒪᕐᕉᖕᓂᒃ ᖁᑦᑎᖕᓂᖅᓴᒧᑦ ᐃᓕᓐᓂᐊᕐᓂᕐᒧᑦ ᐃᓚᓯᕝᕕᐅᖃᑦᑕᖅᖢᑎᒃ.

ᓲᖅᑲᐃᒻᒪ, ᓂᐅᕕᖅᑕᐅᔪᑦ ᐊᑐᖅᑕᐅᓂᐊᖅᑐᑦ ᐊᒻᒪᓗ ᑎᖕᒥᓲᒃᑰᕐᓂᖏᑦ ᐃᓕᓐᓂᐊᖅᑏᑦ ᑭᕙᓪᓕᓗᒃᑖᕐᒥᑦ ᐊᔾᔨᐅᖏᑦᑐᖅ ᐃᓕᓐᓂᐊᕐᓂᕐᒧᑦ ᐊᑐᕐᓂᖃᕐᓂᕐᒧᑦ ᐊᑭᑐᔪᒻᒪᕆᐅᖃᑦᑕᖅᑐᖅ.  ᐊᒡᓃᑯᒃᑯᑦ ᑐᓂᕐᕈᑎᖃᖃᑦᑕᖅᑐᑦ 10-ᒥᑦ 20-ᐳᓴᓐᑎᒧᑦ KSEC-ᑯᑦ ᑮᓇᐅᔭᖃᖅᑎᑕᐅᓂᖏᓐᓄᑦ, ᐃᓚᒋᔭᐅᑉᓗᓂ ᒐᕙᒪᒃᑯᓐᓂᑦ ᑐᓂᕐᕈᑕᐅᔪᓄᑦ ᐊᓯᖏᓐᓂᓪᓗ ᐱᔾᔪᔾᔨᔨᐅᔪᓄᑦ, ᑲᑎᑎᑕᐅᓂᖅ ᑲᔪᓯᔪᖕᓇᖁᑉᓗᒍ ᐃᓕᓐᓂᐊᖅᑏᑦ ᐃᓚᐅᖃᑕᐅᑎᓪᓗᒋᑦ ᑭᕙᓪᓕᕐᒥᑦ.  ᑐᓂᓯᖃᑦᑕᕐᒥᔪᒍᑦ ᐱᕝᕕᐅᔪᓂᒃ ᐃᓚᐅᖃᑕᐅᔪᓄᑦ ᐊᒻᒪᓗ ᐃᓕᓐᓂᐊᖅᑎᓪᓗᒋᑦ ᐃᓕᓐᓂᐊᖅᑏᑦ ᐱᔾᔪᑎᖃᖅᑐᓂᒃ ᓱᓇᑐᐃᓐᓇᓕᕆᓂᕐᒥᒃ ᕿᒥᕐᕈᓂᕐᒧᑦ, ᐅᔭᕋᒃᑕᕆᐊᓕᕆᓂᕐᒧᑦ ᐊᒻᒪᓗ ᓄᓇᓕᕆᓂᕐᒥᒃ, ᑕᐅᑐᒃᑕᑉᑎᖕᓂᑦ ᐃᓕᓐᓂᐊᖅᑎᓪᓗᒋ ᑭᖑᕚᖑᕙᓪᓕᐊᔪᑦ ᒪᒃᑯᒃᑐᐃᑦ ᐱᒻᒪᕆᐅᓂᖓᓄᑦ ᐃᓚᒋᔭᐅᑉᓗᓂ ᐱᓂᐊᕐᓂᕆᔭᑉᑎᖕᓄᑦ ᖃᓄᐃᖏᑦᑐᒥᒃ ᐱᕙᓪᓕᐊᓂᕐᒧᑦ.

2018-ᒥᑦ ᓱᓇᑐᐃᓐᓇᓕᕆᓂᕐᒧᑦ ᑲᑎᑎᑦᑎᓂᖅ ᓯᑎᐱᕆ ᐱᒋᐊᓵᖅᑎᓪᓗᒎᓚᐅᖅᑐᖅ ᐃᒡᓗᓕᒑᕐᔪᖕᒥᑦ.  ᓄᓇᒦᖦᖢᑎᒃ ᐱᒻᒪᕆᐅᔪᖅ ᓄᓇᕗᒻᒥ ᐱᖅᑯᓯᕆᔭᐅᔪᒧᑦ ᐃᓚᒋᔭᐅᓗᓂ, ᐊᒻᒪᓗ ᐊᕙᑎ ᐱᒻᒪᕆᐅᔪᒥᒃ ᐊᑐᖅᑕᐅᖃᑦᑕᖅᑐᖅ ᐱᖅᑯᓯᕆᔭᖓᓂᒃ ᐋᖅᑭᒃᓯᒪᑉᓗᓂ ᑕᒪᑐᒧᙵ ᐃᓕᓐᓂᐊᕐᓂᕐᒧᑦ.  ᑮᑦᓕᓐ ᐳᕉᓪ, ᐊᒡᓃᑯᒃᑯᓐᓄᑦ ᐃᓐᓇᕐᓂᒃ ᐃᓕᓐᓂᐊᖅᑎᑦᑎᔨ ᐃᓚᐅᓚᐅᖅᑐᖅ ᐅᑭᐅᖑᔪᖅ ᐅᖃᖅᖢᓂᓗ: “KSEC-ᑯᑦ ᐱᐅᔪᒻᒪᕆᐊᓗᖕᒥᒃ ᐱᓕᕆᐊᖃᖃᑦᑕᖅᑐᑦ ᐃᓕᓐᓂᐊᖅᑎᑦᑎᓂᕐᒥᒃ ᐃᓚᐅᖃᑕᐅᑎᑦᑎᑉᓗᓂ ᓱᓇᑐᐃᓐᓇᓕᕆᓂᕐᒧᑦ ᐊᒻᒪᓗ ᐱᖅᑯᓯᕆᔭᐅᔪᒥᒃ.  ᐅᑭᐅᖑᔪᖅ ᑲᑎᑎᑕᐅᔪᑦ ᑕᐅᑐᒐᖃᓚᐅᖅᑐᑦ ᖃᔭᖅᑐᑲᑕᖕᓂᕐᒥᒃ, ᐊᑐᖅᑕᐅᖃᑦᑕᖅᑐᑦ ᐊᓐᓂᖅᑐᖃᖅᐸᑦ ᐃᖢᐊᖅᓴᐃᓂᕐᒧᑦ, ᐊᒻᒪᓗ ᔩᐲᓴ-ᒥᒃ ᐃᖏᕐᕋᔭᒡᓗᑎᒃ ᐊᔪᙱᓐᓂᖃᓕᕐᓂᐅᔪᓂᒃ.  ᐃᓕᓐᓂᐊᖅᑏᑦ ᐃᒐᑎᑕᐅᖃᑦᑕᓚᐅᕐᒥᔪᑦ ᖁᓪᓕᕐᓂᒃ ᐊᑐᖅᖢᑎᒃ ᐊᒻᒪᓗ ᐊᑐᕐᓂᖃᓕᕐᓗᑎᒃ ᐱᓕᕆᖃᑎᒌᖕᓂᕐᒥᒃ ᐃᒐᒡᒎᑎᓪᓗᒋᑦ,” ᐅᖃᖅᑐᖅ ᑮᑦᓕᓐ.  “ᐱᐅᔪᒻᒪᕆᐊᓘᓚᐅᖅᑐᖅ ᑕᑯᑉᓗᒋᑦ ᐃᓕᓐᓂᐊᖅᑏᑦ ᐊᑐᖅᑐᑦ ᓄᑖᓂᒃ ᐊᑐᓚᐅᖅᓯᒪᙱᑕᖏᓐᓂᒃ, ᐃᓕᑦᑎᑉᓗᑎᒃ ᓄᑖᓂᒃ ᐊᔪᙱᓐᓂᖃᓕᕐᓂᐅᔪᓂᒃ ᐊᒻᒪᓗ ᐱᖃᓐᓈᕇᓕᕐᓂᐅᔪᓂᒃ ᐊᑯᓂᐅᔪᒧᑦ.  ᖁᕕᐊᓱᑦᑎᐊᓚᐅᖅᑐᖓ ᐃᑲᔪᕈᖕᓇᓚᐅᕋᒪᑦ ᐃᓕᓐᓂᐊᖅᑎᓂᒃ ᐱᓇᓱᐊᕈᓯᐅᑉ ᐃᓱᐊᓂᑦ”.

ᐅᑭᐅᖑᔪᖅ, ᓴᕆᒪᓱᓚᐅᕐᒥᔪᒍᑦ ᖃᐅᔨᑎᑦᑎᓂᕐᒥᒃ ᓯᕗᓪᓕᖅᐹᑦᑎᐊᕐᒥᑦ ᐊᒡᓃᑯᒃᑯᑦ ᓯᕗᓕᐅᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᒃ, ᐃᓕᓐᓂᐊᖅᑎᒧᑦ ᑕᑯᒃᓴᐅᑎᑦᑎᔪᖅ ᐱᕙᓪᓕᐊᓂᖃᕐᓂᕐᒧᑦ ᐊᒻᒪᓗ ᓯᕗᓕᐅᖅᑎᐅᓂᖏᓐᓄᑦ ᐊᔪᙱᓐᓂᖃᕐᓂᕐᒧᑦ, ᐊᑐᖅᑕᐅᑉᓗᓂ ᐃᓄᐃᑦ ᖃᐅᔨᒪᔭᑐᖃᖏᑦ ᓇᐅᒃᑯᓗᒃᑖᖅ ᑲᑎᑎᑕᐅᓯᒪᔪᑦ ᖃᓄᐃᓕᐅᕐᓂᖏᓐᓄᑦ ᐊᒻᒪᓗ ᓯᕗᓪᓕᖅᐸᐅᑎᑦᑏᓐᓇᖅᖢᓂ ᐃᓚᒋᔭᖏᓐᓂᒃ.  ᒧᐊᒐᓐ ᖃᑯᖅᑎᓐᓂᖅ ᑲᖏᖅᖠᓂᕐᒥᐅᑕᖅ ᓵᓚᒃᓴᓚᐅᖅᑐᖅ ᐃᓕᑕᕆᔭᐅᔾᔪᑎᒥᑦ, ᐅᑯᐊᖑᓚᐅᖅᑐᑦ ᑐᐱᖅ, ᓯᓂᒡᕕᒃ ᐊᒻᒪᓗ ᖁᓪᓕᖅ.  ᑐᓂᔭᐅᓚᐅᖅᑐᖅ ᓵᓚᒃᓴᕈᓯᐊᖓᓂᑦ ᓄᕕᐱᕆ 6-ᒥᑦ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥᑦ, ᒫᓃ ᐅᓗᔪᒃ ᐃᓕᓐᓂᐊᕐᕕᖕᒥᑦ.  ᐱᖃᑎᒋᔭᐅᓚᐅᖅᑐᖅ ᐊᖓᔪᖅᑳᖏᓐᓄᑦ, ᑕᐃᕕᑎ ᐊᒻᒪᓗ ᒍᕋᑎ ᖃᑯᖅᑎᓐᓂᖅ, ᐊᒻᒪᓗ ᓱᓇᑐᐃᓐᓇᓕᕆᓂᕐᒧᑦ ᐃᓕᓐᓂᐊᖅᑎᑦᑎᔨᖓ, ᒫᒃ ᐱᐅᓴᓐ, ᐃᓚᐅᖃᑕᐅᓚᐅᖅᑐᖅ ᑲᑎᑎᑕᐅᔪᓂᑦ.  ᒧᐊᒐᓐ ᓴᕆᒪᓱᓚᐅᖅᑐᖅ ᐱᐊᓂᒃᑕᖓᓄᑦ ᐊᒻᒪᓗ ᖁᕕᐊᓱᒃᖢᓂ ᐱᓚᐅᕐᒪᑦ ᒪᖃᐃᖃᑦᑕᕐᓗᓂ ᐊᑐᕐᓂᐊᖅᑕᖏᓐᓂᒃ!

ᓯᕗᓂᒃᓴᖓ ᐊᒡᓃᑯᒃᑯᑦ ᑐᓂᓯᖃᑦᑕᕐᓂᐊᖅᑐᑦ ᓯᕗᓕᐅᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᒃ ᐃᓚᒋᔭᐅᓗᓂ KSEC-ᑯᑦ ᓱᓇᑐᐃᓐᓇᓕᕆᓂᕐᒧᑦ ᑲᑎᑎᑦᑎᓂᖓᓐᓄᑦ.  2019-ᒥᑦ ᑲᑎᑎᑦᑎᓂᕐᒧᑦ ᐊᑐᖅᑕᐅᓂᐊᖅᑐᖅ “ᑕᖕᒫᕐᓂᖅ ᐱᒻᒪᕆᒡᓗᒍ” ᐊᒻᒪᓗ ᐅᑭᐅᖑᔪᖅ ᖃᒪᓂᑦᑐᐊᕐᒥᐅᓂᐊᖅᑐᖅ.  ᐃᑲᔪᕐᓂᕆᔭᕗᑦ ᐊᒻᒪᓗ ᐃᓚᐅᖃᑦᑕᕐᓂᕆᔭᕗᑦ ᑕᒪᒃᑯᓇᓂ ᐊᔾᔨᐅᖏᑦᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ ᐱᕕᖃᕐᓂᐅᔪᓂᒃ ᐃᑲᔪᖁᔭᕗᑦ ᑭᖑᕚᖑᔪᓄᑦ ᓄᓇᓕᕆᓂᕐᒧᑦ ᐊᒻᒪᓗ ᐅᔭᕋᒃᑕᕆᐊᓕᕆᓂᕐᒧᑦ ᑭᕙᓪᓕᕐᒥᑦ!

ᐃᓅᔪᑦ ᐃᓅᖃᑎᒌᖕᓂᕐᒧᑦ ᐃᒃᐱᒋᓂᖏᑦ (ᖃᐅᔨᒪᔭᐅᖕᒥᔪᖅ ᐃᒪᓐᓇ ᐃᓄᐃᑦ ᖃᐅᔨᒪᔭᑐᖃᖏᑦ ᐅᕝᕙᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐃᒃᐱᒋᓂᖃᕐᕕᐅᔪᑦ)

ᓄᓇᕗᒻᒥ ᒐᕙᒪᒃᑯᑦ

ᐱᒋᐊᕐᓂᖓᓐᓂᑦ 1999-ᒥᑦ, ᒐᕙᒪᕗᑦ ᒪᓕᒃᑎᑕᐅᓯᒪᔪᑦ ᐃᓅᔪᑦ ᐃᓅᖃᑎᒌᖕᓂᕐᒧᑦ ᐃᒃᐱᒋᓂᕆᔭᖏᓐᓄᑦ. ᒪᓕᒃᑎᑕᐅᔪᒍᑦ ᓱᓕ ᑖᑉᑯᓂᙵᑦ ᒪᓕᒐᐅᔪᓂᒃ ᐱᓕᕆᐊᖃᖅᑎᓪᓗᑕ ᐊᒃᓱᕈᕐᓇᕆᔭᑉᑎᖕᓂᑦ ᐊᒻᒪᓗ ᓯᕗᒻᒧᒋᐊᖅᑎᓪᓗᑕ ᐊᑕᐅᑦᑎᒃᑯᑦ ᖃᐅᒪᓂᐅᓂᖅᓴᐃᔪᒧᑦ ᓯᕗᓂᒃᓴᒧᑦ:

  • ᐃᓅᖃᑎᒌᑦᓯᐊᕐᓂᖅ: ᐃᒃᐱᒍᓱᒡᕕᖃᕐᓂᖅ ᐊᓯᖏᓐᓂᒃ, ᐱᖃᑎᒌᒃᑐᒃ ᒪᕐᕉᒃ ᐊᒻᒪᓗ ᐊᓯᖏᓐᓂᒃ ᐃᓄᖕᓂᒃ ᑲᒪᓂᖅ.
  • ᑐᙵᓇᕐᓂᖅ: ᐊᑐᕐᓗᓂ ᐱᐅᔪᒥᒃ ᐃᓅᓯᖃᕐᓂᕐᒥᒃ ᐅᒃᑯᐃᖓᓗᓂ ᐊᒻᒪᓗ ᐃᓚᐅᖃᑕᐅᓗᓂ ᐊᓯᖏᓐᓄᑦ.
  • ᐱᔨᑦᓯᕐᓂᖅ: ᐱᔨᑦᑎᕐᓗᓂ ᐊᒻᒪᓗ ᐱᖃᖅᑎᑦᑎᓗᓂ ᐱᔭᕆᐊᖃᖅᑕᖏᓐᓂᒃ ᖃᑕᙳᑎᒋᔭᑉᑕ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᖕᒧᑦ.
  • ᐋᔩᖃᑎᒌᖕᓂᖅ: ᐃᓱᒪᓕᐅᕆᓂᖅ ᐅᖃᓪᓚᖃᑎᒌᒃᖢᓂ ᐊᒻᒪᓗ ᐊᑕᐅᓯᕐᒥᒃ ᐊᖏᕈᑎᖃᕐᖢᓂ.
  • ᐱᓕᒻᒪᒃᓴᕐᓂᖅ/ᐱᔭᕆᐅᖅᓴᓂᖅ: ᐊᔪᙱᓐᓂᖅᑖᖅᐸᓪᓕᐊᑉᓗᓂ ᖃᐅᔨᓴᕐᓂᒃᑯᑦ, ᐅᖃᐅᔾᔭᐅᖃᑦᑕᕐᓂᒃᑯᑦ, ᐊᑐᖅᓯᒪᓂᒃᑯᑦ, ᐊᒻᒪᓗ ᐱᓇᓱᖕᓂᒃᑯᑦ.
  • ᐱᓕᕆᖃᑎᒌᓐᓂᖅ/ᐃᑲᔪᖅᑎᒌᓐᓂᖅ: ᐱᓕᕆᖃᑎᒌᖕᓂᒃᑯᑦ ᐊᑕᐅᓯᕐᒥᒃ ᐱᔾᔪᑕᐅᔪᒥᒃ.
  • ᖃᓄᖅᑑᕐᓂᖅ: ᓄᑖᓂᒃ ᐃᓱᒪᒃᓴᖅᓯᐅᖃᑦᑕᕐᓂᒃᑯᑦ ᐊᒻᒪᓗ ᐱᕝᕕᐅᖃᑕᐅᔪᖕᓇᕐᓂᒃᑯᑦ.
  • ᐊᕙᑎᑦᑎᓐᓂᒃ ᑲᒪᑦᓯᐊᕐᓂᖅ: ᐃᒃᐱᒍᓱᖕᓂᒃᑯᑦ ᐊᒻᒪᓗ ᑲᒪᓂᒃᑯᑦ ᓄᓇᒥᒃ, ᓂᕐᔪᑎᓂᒃ ᐊᒻᒪᓗ ᐊᕙᑎᒥᒃ.