ᑎᐅᕆᒃ ᐆᕐᕕᓐ ᐊᕙᑎᓕᕆᔨᙳᖅᓴᓂᖓ ᐊᒻᒪᓗ ᐱᕈᖅᐸᓪᓕᐊᓂᖃᕈᒪᓂᖓ ᖃᐅᔨᑎᑦᑎᔪᖅ ᐊᓯᐊᙳᖅᓯᓂᕐᒧᑦ ᓴᙱᓂᖃᕐᓂᖓ ᐱᕕᖃᕐᓂᕐᒥᒃ ᐊᒻᒪᓗ ᐱᓕᕆᐊᖃᕈᒪᓂᕐᒥᒃ. ᐱᒋᐊᕐᕕᖓᓂᑦ ᑲᖏᖅᖠᓂᕐᒥᑦ ᐃᓕᓐᓂᐊᕐᓂᕐᓄᑦ ᐊᒻᒪᓗ ᐱᕈᖅᐸᓪᓕᐊᓂᖃᕈᒪᓂᕐᒧᑦ, ᑎᐅᕆᒃ ᐅᓂᑉᑳᖓ ᑕᑯᑎᑦᑎᔪᖅ ᐅᑎᕈᖕᓇᕐᓂᕐᒥᒃ, ᐊᒃᓱᕉᑎᖃᕐᓂᕐᒥᒃ, ᐊᒻᒪᓗ ᐱᔪᒪᓂᖃᕐᓂᕐᒥᒃ ᓄᓇᓕᖓᓄᑦ ᐊᒻᒪᓗ ᐱᖅᖁᓯᑐᖃᕆᔭᖓᓄᑦ.

ᐱᔾᔪᑎᖓ, ᐱᔪᒪᓂᕆᔭᖓ, ᐊᒻᒪᓗ ᐱᑎᑦᑎᓂᖓ

ᐱᒋᐊᓚᐅᖅᑐᖅ ᐊᐅᔭᒃᑯᑦ ᐱᓕᕆᑎᑕᐅᔪᖕᓇᓚᐅᕐᓂᖓᓂᑦ ᐊᓯᐊᙳᖅᓯᑉᓗᓂ ᐃᓅᓯᖓᓂᑦ. “ᐊᐅᔭᒃᑯᑦ ᐱᓕᕆᐊᒃᓴᖅᓯᐅᓚᐅᖅᑐᖓ ᐱᖃᓐᓈᒪ ᖃᐅᔨᑎᒻᒪᖓ ᐱᓕᕆᐊᒃᓴᒥᑦ ᑭᒡᓕᐅᔪᓂᒃ ᐃᓂᒋᔭᐅᔪᓄᑦ ᖃᐅᔨᓴᐃᓗᖓ ᐃᖃᓗᒃᐱᖕᓂᑦ ᐊᒻᒪᓗ ᐅᑎᕐᓗᖓ ᓄᓘᔮᓄᑦ ᐱᑦᑕᐅᑦᑎᐊᖅᑐᒦᑦᑐᖅ ᕿᑭᖅᑖᓗᖕᒥᑦ,” ᑎᐅᕆᒃ ᐃᖅᖃᐅᒪᔪᖅ. ᐃᖃᓗᖃᑦᑕᕐᓂᖅ ᐊᒻᒪᓗ ᑲᑎᑦᑎᓂᖅ ᓈᓴᐅᑎᓂᒃ/ᑎᑎᖅᖃᓂᒃ ᓄᓇᑦᑎᐊᕙᐅᑦᑎᐊᖅᑐᒥᑦ ᐱᒋᐊᕈᒪᓂᖃᓕᖅᑎᑦᑎᓚᐅᖅᑐᖅ ᐊᕙᑎᓕᕆᓂᕐᒧᑦ ᐊᒻᒪᓗ ᒪᕐᕉᖕᓂᒃ ᐅᑭᐅᓄᑦ ᐃᓕᓐᓂᐊᓕᖅᖢᓂ ᐃᓕᑕᕆᔭᐅᔾᔪᑎᑖᕐᓂᐊᕐᓗᓂ ᐊᕙᑎᓕᕆᔨᐅᓂᕐᒧᑦ ᐃᖃᓗᖕᓂᑦ.

ᐊᐅᔭᒃᑯᑦ ᐱᓕᕆᐊᖃᕐᓂᖅ ᐊᖏᔪᒥᒃ ᐱᑎᑦᑎᓚᐅᖅᑎᓪᓗᒍ ᑎᐅᕆᒃ ᐱᓕᕆᐊᕐᒧᑦ ᐊᑉᖁᑎᒋᔭᖓᓂᑦ, ᐊᓯᖏᑦ ᐊᑐᕐᓂᑯᒋᔭᖏᑦ ᐊᒻᒪᓗ ᐃᓄᐃᑦ ᐱᔾᔪᑕᐅᓚᐅᕐᒥᔪᑦᑕᐅᖅ ᐃᓱᒪᓕᐊᕆᓚᐅᕐᓂᖓᓄᑦ. ᑭᓯᐊᓂ, ᐃᓕᑕᕆᔭᐅᔾᔪᑎᑖᖅᐸᓪᓕᐊᓂᖓ ᐱᑎᑕᐅᔪᑑᓚᐅᖏᑦᑐᖅ ᐱᒻᒪᕆᐅᔪᒥᒃ ᐱᒋᐊᖅᑎᑦᑎᔪᒥᒃ; ᑎᐅᕆᒃ ᓇᓗᓇᐃᖅᑕᖏᑦ ᖃᑕᙳᑎᖏᑦ, ᐱᓗᐊᖅᑐᒥᑦ ᐊᓈᓇᖓ ᐊᒻᒪᓗ ᓇᔭᖓ, ᐃᑲᔪᖃᑦᑕᐃᓐᓇᓚᐅᕐᓂᖏᑦ ᐊᒻᒪᓗ ᐃᑲᔪᖅᑐᐃᖃᑦᑕᕐᓂᖏᑦ.

ᐃᓕᓐᓂᐊᕐᓂᕐᒧᑦ ᐃᑲᔫᑎᒧᑦ ᐱᕕᖃᕐᓂᖅ

ᐊᕗᓐᓂᕕᒃ 2023-ᒥᑦ, ᔪᐊᓂ ᑎᓇᒥ, ᐃᓅᖃᑎᒌᓕᕆᓂᕐᒧᑦ ᓯᕗᓕᖅᑎ ᐊᒡᓃᑯᒃᑯᓐᓂᑦ, ᓄᓇᕗᒻᒥᑦ ᓯᓚᑦᑐᖅᓴᕐᕕᖕᒧᙵᐅᓚᐅᖅᑐᖅ ᐃᓕᓐᓂᐊᖅᑎᓄᑦ ᐅᖃᐅᓯᕆᑉᓗᒋᑦ ᐱᓕᕆᐊᒃᓴᓄᑦ ᐱᕕᖃᖅᑎᑦᑎᓃᑦ. ᐃᓚᒋᔭᐅᓚᐅᖅᑐᖅ ᑎᐅᕆᒃ, ᐃᓚᐅᖃᑕᐅᔪᒪᑦᑎᐊᖅᖢᓂ ᐃᓕᓐᓂᐊᖅᑎᑕᐅᑎᓪᓗᒋᑦ. ᔪᐊᓂ ᖃᐅᔨᓚᐅᖅᑐᖅ ᐱᔪᒪᓂᖃᕐᓂᖓᓂᒃ ᐊᒡᓃᑯᒃᑯᑦ ᑐᕌᖓᔪᖏᓐᓄᑦ ᐊᒻᒪᓗ ᓇᓗᓇᐃᓚᐅᖅᑕᖓ ᑕᒪᓐᓇ. ᐅᖃᐅᓯᕆᓚᐅᖅᑕᖓ ᑎᐅᕆᒃ ᐊᔪᙱᑦᑐᒻᒪᕆᐊᓘᖕᒪᑦ, ᐱᓪᓗᕆᒃᑑᑉᓗᓂ, ᐊᒻᒪᓗ ᐃᓕᓐᓂᐊᕈᑎᒥᑦ ᐊᖏᔪᒥᒃ ᑲᒪᑦᑎᐊᕐᓗᓂ. ᑕᑯᒃᓴᐅᑎᑦᑎᓚᐅᕐᒥᔪᖅ ᓄᓇᓕᖕᒥᑦ ᐱᔨᑦᑎᕋᕈᒪᓂᕆᔭᖓᓂᑦ, ᐱᒋᐊᖅᑎᑦᑎᓂᖃᑦᑎᐊᓚᐅᖅᖢᓂ ᐃᓱᒪᓕᐊᖏᓐᓄᑦ.  ᐆᒃᑐᓚᐅᖅᑐᖅ ᐊᒻᒪᓗ ᑐᓂᔭᐅᑉᓗᓂ ᑲᔪᓯᓯᒪᐃᓐᓇᕐᓂᖅ ᐃᓕᓐᓂᐊᖅᑎᓄᑦ ᐃᑲᔫᑎᒥᒃ ᑐᓂᔭᐅᔪᒥᒃ ᐊᒡᓃᑯᒃᑯᓐᓂᑦ ᒪᒃᑯᒃᑐᐃᑦ ᐅᔭᕋᖕᓂᐊᕐᓂᕐᒥᒃ ᐊᔪᙱᓐᓂᖅᑖᕐᓂᕐᒧᑦ ᐃᓕᓐᓂᐊᖅᑎᓄᑦ ᐃᑲᔫᑎ ᑮᓇᐅᔭᖓᑦᑎᒍᑦ.

ᐃᖅᖃᐅᒪᑉᓗᓂ ᐊᑐᖅᓯᒪᓂᑯᒋᔭᖓᓂᑦ, ᑎᐅᕆᒃ ᖃᐅᔨᑎᑦᑎᓚᐅᖅᑐᖅ ᖁᔭᓕᓂᖓᓂᒃ ᑮᓇᐅᔭᓄᑦ ᐃᑲᔪᖅᑕᐅᓚᐅᕐᒪᑦ ᐃᓕᓐᓂᐊᖅᑎᓄᑦ ᑮᓇᐅᔭᓄᑦ ᐃᑲᔫᑎᒃᑯᑦ, ᑕᐅᑐᒐᖃᕈᖕᓇᖅᖢᓂ ᐃᓕᓐᓂᐊᕈᑎᖏᓐᓂᑦ ᑮᓇᐅᔭᓄᑦ ᐊᔪᕐᓇᕈᑎᓂᒃ ᐊᒃᓱᕈᕈᑎᖃᙱᓪᓗᓂ.  “ᐅᖁᒪᐃᒃᓴᕐᓂᖅ ᓲᕐᓗ ᐲᓚᐅᖅᑐᖅ,” ᐃᖅᖃᐅᒪᔪᖅ. ᐃᓚᒋᔭᐅᑉᓗᓂ, ᐃᓕᓐᓂᐊᖅᑎᓄᑦ ᐃᑲᔫᑎ ᐱᒋᐊᖅᑎᑦᑎᓚᐅᕐᒥᔪᖅ ᓇᓗᙱᓐᓂᖃᕐᓂᖓᓂᒃ ᐊᒻᒪᓗ ᖃᐅᔨᑎᑦᑎᑉᓗᓂ ᐱᕈᖅᐸᓪᓕᐊᓂᕐᒧᑦ ᐱᔪᒪᔭᖏᓐᓂᒃ ᐱᒋᐊᕆᐊᖃᕐᓂᖓᓂᑦ.

ᒪᒃᑯᒃᑐᐃᑦ ᐅᔭᕋᖕᓂᐊᕐᓂᕐᒥᒃ ᐊᔪᙱᓐᓂᖅᑖᕐᓂᕐᒧᑦ ᑐᕌᖓᔪᖅ

ᑎᐅᕆᒃ ᐅᓂᑉᑳᖓ ᖃᐅᔨᑎᑦᑎᔾᔪᑕᐅᖕᒥᔪᖅ ᐃᓚᒋᔭᐅᔪᓂᒃ ᑐᕌᒐᐅᔪᓄᑦ ᒪᒃᑯᒃᑐᐃᑦ ᐅᔭᕋᖕᓂᐊᕐᓂᕐᒥᒃ ᐊᔪᙱᓐᓂᖅᑖᕐᓂᕐᒧᑦ ᑐᕌᖓᔪᒥᑦ, ᐋᖅᕿᒃᓯᒪᔪᑦ ᑮᓇᐅᔭᒃᑯᑦ ᐃᑲᔪᖅᑕᐅᓂᐊᕐᓗᑎᒃ ᐃᓕᓐᓂᐊᖅᑏᑦ ᐱᓕᕆᐊᖅᑖᕈᒪᔪᑦ ᐅᔭᕋᒃᑕᕆᐊᓕᕆᓂᕐᓂᑦ. ᐊᒡᓃᑯᒃᑯᑦ ᓴᕆᒪᓱᒃᑐᑦ ᐱᓕᕆᖃᕐᒪᑕ ᒪᒃᑯᒃᑐᐃᑦ ᐅᔭᕋᖕᓂᐊᕐᓂᕐᒥᒃ ᐊᔪᙱᓐᓂᖅᑖᕐᓂᕐᒧᑦ ᑐᕌᖓᔪᒥᑦ ᐊᒻᒪᓗ ᐊᐅᓚᑕᖓᑦ ᑲᔪᓯᓯᒪᐃᓐᓇᕐᓂᖅ ᐃᓕᓐᓂᐊᖅᑎᓄᑦ ᐃᑲᔫᑎ ᐱᓕᕆᖃᑎᒌᖕᓂᒃᑯᑦ. ᔪᐊᓂ ᐅᖃᖅᑐᖅ, “ᐃᓕᓐᓂᐊᖅᑎᓄᑦ ᐃᑲᔫᑎ ᐋᖅᕿᒃᓯᒪᔪᖅ ᓄᓇᕗᒻᒥᑦ ᐃᓕᓐᓂᐊᖅᑎᓄᑦ, ᑐᓂᔭᐅᖃᑦᑕᖅᑐᖅ ᐊᕐᕌᒍᑕᒫᒃᑯᑦ ᖁᑦᑎᖕᓂᖅᓴᒧᑦ ᓯᓚᑦᑐᖅᓴᕐᕕᖕᒥᑦ ᐅᔭᕋᒃᑕᕆᐊᓕᕐᓂᕐᒥᒃ ᐃᓕᓐᓂᐊᖅᑎᓄᑦ.”

ᐊᒡᓃᑯᒃᑯᑦ ᓯᕗᓪᓕᖅᐸᐅᑎᖃᑦᑕᖅᑕᖏᑦ ᐃᑲᔪᖃᑦᑕᕐᓂᖏᑦ ᐊᒻᒪᓗ ᖃᓄᐃᓕᐅᖅᑎᑦᑎᓂᖏᑦ ᐊᔪᙱᓐᓂᖅᑖᖅᐸᓪᓕᐊᔪᓄᑦ. ᑲᒻᐸᓂᒃᑯᑦ ᐱᓕᕆᑎᑦᑎᑉᓗᑎᒃ ᐃᓕᓐᓂᐊᖅᑎᑦᑎᖃᑦᑕᖅᑐᑦ ᐱᓕᕆᓗᑎᒃ ᐃᓕᑦᑎᕙᓪᓕᐊᓂᐊᕐᓗᑎᒃ, ᐊᑐᖅᖢᒋᑦ ᐱᒻᒪᕆᐅᔪᑦ ᐊᑐᕐᓂᑯᖃᓕᕐᓂᕐᒥᒃ. ᐊᒻᒪᓗ, ᐊᒡᓃᑯᒃᑯᑦ ᐋᖅᕿᒃᓱᐃᓂᐊᖅᑐᑦ ᑲᑎᑎᓐᓂᐊᕐᓗᒋᑦ ᐊᑯᓂᐅᔪᒥᒃ ᐃᓕᓐᓂᐊᖅᑐᓂᒃ ᐱᓕᕆᐊᒃᓴᓄᑦ, ᑐᕌᒐᖃᕐᓗᑎᒃ ᐃᓂᐅᔪᓂᒃ ᐱᓕᕇᓐᓇᕐᓗᑎᒃ ᐱᓕᕆᐊᒃᓴᓄᑦ ᐊᔪᕐᓇᙱᒃᑳᖓᑦ.

ᐱᕈᖅᐸᓪᓕᐊᓂᖃᕐᓂᕐᒧᑦ ᐱᓕᕆᐊᑦ

ᐃᓕᓐᓂᐊᖅᑎᓂᒃ ᑮᓇᐅᔭᓄᑦ ᐃᑲᔫᑎ ᓴᙱᒃᑎᒋᐊᖅᓯᑐᐃᓐᓇᙱᑦᑐᖅ ᑎᐅᕆᒃ ᐃᓕᓐᓂᐊᕐᓂᖓᓂᑦ ᑭᓯᐊᓂ ᐱᒋᐊᖅᑎᑦᑎᖕᒥᔪᖅ ᐱᕈᖅᐸᓪᓕᐊᓂᖃᕈᒪᓂᖓᓄᑦ. ᐱᑎᓚᐅᖅᑕᖓ ᖃᐅᒪᔪᖅ ᐊᕙᑎᓕᕆᓂᕐᒧᑦ ᓕᒥᑎᑦ, ᐊᐅᓚᑕᐅᔪᖅ ᑕᐅᑐᒐᖃᕐᓂᖓᓄᑦ ᐃᑲᔪᕐᓂᐊᕐᓗᒋᑦ ᐃᓄᐃᑦ ᖃᐅᔨᓇᓱᒃᑐᓕᕆᔪᐅᔪᑦ ᐊᒻᒪᓗ ᐃᓚᐅᓗᒋᑦ ᐱᖅᖁᓯᒃᑯᑦ ᓯᓚᑐᓂᖅ ᐊᕙᑎᒥᒃ ᖃᐅᔨᓴᐃᓂᕐᒧᑦ. “ᑐᕌᒐᕆᔭᕗᑦ ᑐᙵᕕᖃᖅᑎᑦᑎᓂᐊᕐᓗᑕ ᐃᓄᖕᓂᑦ ᖃᐅᔨᓇᓱᒃᑐᓕᕆᓂᕐᒧᑦ ᐱᓕᕆᐊᖏᓐᓂᑦ,” ᑎᐅᕆᒃ ᐅᖃᒃᑲᓐᓂᖅᑐᖅ. ᑐᕌᒐᕆᔭᖓ ᐋᖅᕿᒃᓱᕐᓗᒍ ᐊᕙᑎ ᐃᓄᐃᑦ ᐆᒪᔪᓕᕆᔨᐅᔪᑦ ᐊᒻᒪᓗ ᐊᕙᑎᓕᕆᔨᐅᔪᑦ ᓯᕗᓕᖅᑎᐅᓗᑎᒃ ᐱᓕᕆᐊᓄᑦ ᐱᓯᒪᑦᑎᐊᖅᑐᓂᒃ ᐱᖅᖁᓯᑐᖃᖏᓐᓂᑦ. ᖃᐅᒪᔪᖅ ᐊᕙᑎᓕᕆᓂᕐᒧᑦ ᓕᒥᑎᑦ ᑲᒪᔨᐅᔪᖅ ᐃᓄᖕᓄᑦ ᑎᑭᐅᑎᔪᖕᓇᕐᓂᐊᕐᓗᑎᒃ ᐱᔪᒪᔭᖏᓐᓄᑦ ᐊᒻᒪᓗ ᐱᑦᑕᐅᔪᒥᒃ ᐊᓯᐊᙳᖅᓯᓂᖃᕐᓗᓂ ᓄᓇᓕᖏᓐᓂᑦ.

ᐱᒻᒪᕆᐅᔪᑦ ᐃᓕᑕᐅᔪᑦ ᐊᒻᒪᓗ ᐊᔪᙱᓐᓃᑦ

ᐃᓕᓐᓂᐊᕐᓂᖓᒍᑦ, ᑎᐅᕆᒃ ᐱᓕᕆᐊᕐᒥᑦ ᖃᐅᔨᒪᓂᖃᓕᑐᐃᓐᓇᓚᐅᖏᑦᑐᖅ ᑭᓯᐊᓂ ᐱᒻᒪᕆᐅᔪᓂᒃ ᐃᓅᓯᕐᒥᑦ ᐃᓕᑦᑎᓂᕐᓂᒃᑕᐅᖅ ᐱᓚᐅᖅᑐᖅ. ᑎᐅᕆᒃ ᐅᒃᐱᕈᓱᒃᑐᖅ ᑲᔪᓯᓯᒪᓂᖅ ᐊᒻᒪᓗ ᐊᔾᔨᒌᖓᔪᒃᑯᑦ ᐱᒻᒪᕆᐅᖕᒪᑕ. “ᐱᕕᖃᕐᓂᒃᑯᑦ ᐊᒻᒪᓗ ᐱᕕᖃᖅᑎᑦᑎᓗᓂ ᐊᒻᒪᓗ ᐱᓇᓱᖕᓂᒃᑯᑦ ᐱᒻᒪᕆᐅᒋᔭᕐᓄᑦ ᐋᖅᕿᒃᓱᐃᖃᑦᑕᖅᑐᖅ ᐃᓕᖅᖁᓯᕆᔭᖕᓂᑦ,” ᖃᐅᔨᑎᑦᑎᔪᖅ ᑎᐅᕆᒃ.

ᓯᕗᒻᒧᑦ ᑕᐅᑐᒃᖢᓂ, ᑎᐅᕆᒃ ᐱᑦᑕᐅᔪᒥᒃ ᐊᒃᑐᖅᓯᓂᖃᕈᒪᔪᖅ ᓄᓇᕗᒻᒧᑦ ᐅᖓᑖᓄᓪᓗ. ᐅᖃᐅᔾᔨᓂᖓ ᐃᓄᖕᓄᑦ ᐊᔪᙱᓐᓂᖃᓕᕈᒪᔪᓂᒃ ᓇᓗᓇᙱᑦᑐᖅ: “ᐱᔪᒪᔭᐃᑦ ᓇᓂᓗᒍ ᐊᒻᒪᓗ ᑲᑉᐱᐊᓱᖕᓂᖃᙱᓪᓗᑎᑦ. ᐊᒥᓱᓂᒃ ᐱᕕᒃᑕᖃᖅᑐᖅ ᓄᓇᕗᑉᑎᖕᓂᑦ,” ᐃᑲᔪᖅᑐᐃᑉᓗᓂ ᐅᖃᒃᑲᓐᓂᖅᑐᖅ. ᐅᖃᒃᑲᓐᓂᖅᑐᖅ ᐱᒻᒪᕆᐅᓂᖓ ᐃᓕᓐᓂᐊᖅᓯᒪᓂᖅ ᐊᒻᒪᓗ ᐱᓕᕆᓂᑯᖃᕐᓂᖅ ᐊᒻᒪᓗ ᐅᒃᐱᕈᓱᒃᑐᖅ ᐊᓂᒎᑎᓂᕐᒥᒃ ᑐᓗᖅᑕᕈᑕᐅᖅᖃᐅᑕᐅᓚᐅᖅᑐᓂᒃ ᐊᖏᔫᔪᓄᒃ ᑎᑭᐅᑎᔪᑦ.

ᓇᖕᒥᓂᖃᖅᑐᓂᒃ ᐃᑲᔫᑏᑦ

ᑎᐅᕆᒃ ᐃᓚᐅᓕᓵᓚᐅᖅᑐᖅ ᓇᖕᒥᓂᖃᖅᑐᓂᒃ ᐃᑲᔫᑎᒧᑦ ᐊᒡᓃᑯᒃᑯᓐᓂᙶᖅᑐᒥᑦ, ᖃᓄᐃᓕᐅᖅᑎᑦᑎᔪᖅ ᐊᒻᒪᓗ ᐃᑲᔪᖃᑦᑕᖅᑐᖅ ᑕᐃᒪᐅᔪᓂᒃ ᓇᖕᒥᓂᖃᖅᑐᓄᑦ, ᓇᖕᒥᓂᖅᑖᕈᒪᔪᓄᑦ, ᐊᒻᒪᓗ ᓄᑖᓂᒃ ᐱᓕᕆᐊᓂᒃ ᕿᓂᖅᑐᓄᑦ. ᐱᓕᕆᐊᒃᓴᖅ ᑐᓂᓯᔪᖅ ᖃᐅᔨᒪᓂᖃᖅᑐᓄᑦ ᐃᑲᔪᖃᑦᑕᖅᑐᓂᒃ ᐅᑭᐅᖅᑕᖅᑐᒦᑦᑐᓂᒃ ᐊᔾᔨᒌᙱᑦᑑᑎᓂᒃ ᐱᔾᔪᑎᓕᖕᓄᑦ ᐊᒻᒪᓗ ᐊᒃᓱᕈᕐᓇᐅᑎᓄᑦ ᐃᑲᔪᕐᓂᐊᖅᑐᓂᒃ ᐋᖅᕿᒃᓱᖅᓯᒪᑉᓗᑎᒃ ᐃᓚᐅᖃᑕᐅᔫᑉ ᐱᔭᕆᐊᓕᖏᓐᓄᑦ.  ᑐᕌᒐᕆᔭᐅᓗᐊᖅᑐᖅ ᑲᒪᔭᖃᕐᓂᐊᕐᓗᓂ ᐃᓂᐅᔪᒥᒃ ᐅᕝᕙᓘᓐᓃᑦ ᐊᖏᒡᓕᒋᐊᕐᓗᒋᑦ ᓇᖕᒥᓂᖃᖅᑐᑦ ᐃᑲᔪᕐᓗᒋᑦ ᒪᓕᒐᓕᕆᓂᕐᒥᑦ ᐱᔾᔪᑎᖃᖅᑐᑦ, ᓴᖅᕿᑎᑦᑎᓂᕐᒧᑦ ᖃᓄᖅᑑᕈᑎᓂᒃ, ᐊᒻᒪᓗ ᑮᓇᐅᔭᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ. ᐊᒡᓃᑯᒃᑯᑦ ᐃᑲᔪᕈᒪᔪᑦ ᐊᔪᙱᑦᑐᒃᑯᑦ ᐱᕈᖅᐸᓪᓕᐊᓂᕐᒥᒃ ᐱᕙᓪᓕᐊᓂᕐᒧᑦ ᐃᑲᔪᕐᓂᐊᖅᑐᓂᒃ ᐊᒥᓲᓛᖑᔪᓂᒃ ᐃᓄᖕᓂᑦ. ᑕᐃᒪᓐᓇᐃᖃᑦᑕᖅᑐᒍᑦ ᐃᑲᔪᖅᖢᒋᑦ ᓇᖕᒥᓂᖃᖅᑐᑦ ᐱᕙᓪᓕᐊᓂᖏᓐᓄᑦ ᐃᓕᓐᓂᐊᖅᑎᑦᑎᓂᒃᑯᑦ, ᐃᑲᔪᕐᓗᒋᑦ, ᐊᒻᒪᓗ ᓇᖕᒥᓂᖅ ᐱᓕᕆᐊᖃᕐᓂᕐᒧᑦ ᐊᔪᕈᖕᓃᖅᓴᐃᓂᒃᑯᑦ ᐃᓄᐃᑦ ᐊᒻᒪᓗ ᐃᓄᐃᑦ ᓇᖕᒥᓂᖅ ᐱᓕᕆᐊᖃᖅᑐᑦ ᐱᕕᖃᖅᑎᓐᓂᐊᕐᓗᒋᑦ ᑭᕙᓪᓕᕐᒥᑦ ᐱᓕᕆᐊᓄᑦ.  ᑎᐅᕆᒃ ᒫᓐᓇᓵᖑᓚᐅᖅᑐᖅ ᐆᒃᑐᓚᐅᖅᑐᖅ ᐊᑕᐅᓯᕐᒧᑦ ᐊᒡᓃᑯᒃᑯᑦ ᑐᕌᖓᔪᖏᓐᓄᑦ ᐊᒻᒪᓗ ᓵᓚᒃᓴᓚᐅᖅᑐᖅ! ᐊᐅᔭᖅ, ᑲᒻᐸᓂᖓ ᖃᐅᔨᒋᐊᖃᑦᑕᓂᕐᒧᑦ ᑐᕌᖓᔪᖃᕐᓂᐊᖅᑐᖅ ᒪᕐᕉᓗᒋᑦ ᐱᓕᕆᐊᒧᑦ ᐅᑎᖅᑕᖅᑑᖕᓂᑦ, ᐊᑐᓂ 6-ᓂᑦ 8-ᓄᑦ ᐃᓄᖕᓂᑦ ᐱᓕᕆᔨᖃᕐᓗᑎᒃ ᐱᓕᕆᐊᕐᒥᑦ ᐱᓕᕆᖃᑕᐅᖃᑦᑕᕐᓂᐊᕐᓗᑎᒃ.

ᑎᐅᕆᒃ ᐱᓕᕆᐊᖓ ᑕᑯᒃᓴᐅᑎᑦᑎᔪᖅ ᐱᔪᒪᓂᖃᕐᓂᖓᓂᑦ, ᑲᔪᓯᓯᒪᔪᖕᓇᕐᓂᕐᒥᒃ, ᐊᒻᒪᓗ ᓄᓇᓕᖕᒥᑦ ᐱᕈᖅᐸᓪᓕᐊᓂᖃᖅᑎᑦᑎᓂᕐᒥᒃ. ᐱᒋᐊᖅᓯᒪᔪᖅ ᓄᑕᐅᓛᖑᔪᖅ ᐱᓕᕆᐊᖓᓂᒃ ᐊᒡᓃᑯᒃᑯᑦ ᑐᕌᖓᔪᖓᓄᑦ, ᖃᐅᔨᑐᐃᓐᓇᖏᑦᑐᖅ ᐱᔪᒪᔭᖏᓐᓂᑦ ᑭᓯᐊᓂ ᐱᒋᐊᖅᑎᑦᑎᔪᖅ ᐱᕕᖃᖅᑎᑦᑎᓂᕐᓂᒃ ᐊᓯᖏᓐᓄᑦ ᐃᓄᖕᓂᑦ ᓄᓇᓕᖓᓂᑦ.