ᐅᓐᓄᒃᓴᖓᓂᑦ ᓄᕐᕋᐃᑦ 1, ᑕᓯᕐᔪᐊᕐᒥᑦ ᓄᓇᓕᐊᓛᖅ ᐆᒻᒪᓚᐅᖅᑐᖅ ᑭᑉᔭᐃᖅᐸᓗᒃᑐᓄᑦ, ᐃᕙᓗᒥᑦ ᒥᖅᖁᑎᒧᐊᖅᓯᔪᓄᑦ ᐊᒻᒪᓗ ᐃᒡᓚᖅᐸᓗᒃᑐᓄᑦ ᕿᑎᒡᕕᖕᒥᑦ.  ᐋᓕᓴᓐ ᐊᒡᓃᑯᒃᑯᑦ ᕿᑎᒃᑐᓕᕆᔨᖓᑦ, ᐱᓕᕆᓯᒪᔪᖅ ᑲᑎᑎᓐᓂᐊᕐᓗᒋᑦ ᓄᓇᓕᖕᒥᐅᑕᐃᑦ ᑲᖏᖅᖠᓂᕐᒥᑦ ᐱᖅᖁᓯᕆᔭᐅᔪᒥᒃ ᖃᓄᐃᓕᐅᖅᑎᑦᑎᓂᕐᒧᑦ ᐅᔭᕋᒃᑕᕆᐊᕐᒥᑦ ᐱᓕᕆᖃᑎᖏᑦ ᐃᓚᐅᔪᖕᓇᕐᓂᐊᕐᓗᑎᒃ ᖃᓄᐃᓕᐅᖅᑎᑦᑎᓂᕐᒧᑦ ᐊᒻᒪᓗ ᐃᓕᑦᑎᕝᕕᒋᓗᒋᑦ ᐃᓄᐃᑦ. ᐋᖅᕿᒃᓱᐃᖃᑎᒋᔭᖓ, ᐃᐊᒪ ᑕᑎ, ᐃᓐᓇᕆᔭᐅᔪᖅ ᑲᖏᖅᖠᓂᕐᒥᑦ, ᐱᖅᖁᓯᑐᖃᓂᑦ ᐱᓯᒪᔪᖅ ᐊᒻᒪᓗ ᖃᐅᔨᒪᓂᖃᖅᖢᓂ ᐱᖅᖁᓯᕆᔭᐅᔪᒃᑯᑦ ᐊᑐᖅᑕᐅᕙᒃᑐᓂᑦ ᐊᒻᒪᓗ ᐱᒻᒪᕆᐅᓯᒪᔪᖅ ᐋᖅᕿᒃᓱᖅᑕᐅᕙᓪᓕᐊᓂᖓ ᖃᓄᐃᓕᐅᕐᓂᐅᔪᖅ. ᐊᑕᐅᑦᑎᒃᑯᑦ, ᐱᓕᕆᖃᑎᒌᓚᐅᖅᑐᑦ ᒥᖅᓱᕐᓂᕐᒧᑦ ᐅᓐᓄᒃ ᖃᓄᐃᓕᐅᕐᓂᑐᐃᓐᓇᐅᖏᒻᒪᑦ – ᖁᕕᐊᓲᑎᖃᕐᓂᐅᔪᖅ ᐱᖅᖁᓯᕐᒧᑦ, ᓱᓇᓕᐅᕆᓂᕐᒧᑦ, ᐊᒻᒪᓗ ᓄᓇᖅᖃᑎᒌᑦ ᑲᑎᓐᓂᖏᓐᓄᑦ.

ᐅᓐᓄᒃᓴᖑᓂᐊᖅᑐᖅ ᐱᖅᖁᓯᕐᒧᑦ ᐊᒻᒪᓗ ᓄᑖᓂᒃ ᐃᓕᓐᓂᐊᕐᓃᑦ

ᐱᒋᐊᕈᑕᐅᔪᒪᓚᐅᖅᑐᖅ ᐅᓐᓄᒃᓴᒃᑯᑦ ᒥᖅᓱᕐᓂᕐᒧᑦ ᐃᓂᑖᖅᑎᑦᑎᓂᐊᕐᓗᓂ ᑕᓯᕐᔪᐊᕐᒥᑦ ᐱᓕᕆᔨᓂᑦ ᐊᒻᒪᓗ ᓄᓇᓕᖕᒥᐅᑕᖅ ᐃᓄᖕᒥᑦ ᑲᑎᓪᓗᑎᒃ ᐊᒻᒪᓗ ᖁᕕᐊᓲᑎᒋᓗᒋᑦ ᐱᖅᖁᓯᒃᑯᑦ ᒥᖅᓱᒐᐅᓲᓂᑦ. ᒥᖅᓱᖅᑎᑦᑎᓂᖅ ᐋᖅᕿᖅᖃᐅᑕᐅᓚᐅᖅᑐᖅ, ᐱᔭᐅᑉᓗᓂ ᐱᖅᖁᓯᖅ ᒥᖅᓱᖃᑦᑕᕐᓂᖅ ᐱᒻᒪᕆᐅᓂᖓᓄᑦ ᐃᓄᐃᑦ ᐱᖅᖁᓯᖓᓐᓂᑦ. ᐊᐱᖅᓱᖅᑕᐅᖕᒪ ᐋᓕᓴᓐ ᐅᖃᓚᐅᖅᑐᖅ ᒥᖅᓱᕐᓂᖅ ᐊᒃᑐᐊᑦᑎᐊᖅᑐᖅ ᐃᓄᐃᑦ ᐃᓅᓯᖏᓐᓄᑦ, ᐊᔪᙱᓐᓂᖅ ᑐᓂᔭᐅᑉᖢᓂ ᑭᖑᕚᖏᓐᓄᑦ, “ᐊᓐᓄᕌᓕᐅᕆᓂᑐᐃᓐᓇᐅᖏᑦᑐᖅ; ᐱᔾᔪᑎᖃᖅᑐᖅ ᐅᓂᑉᑳᖃᑦᑕᕐᓂᕐᒥᒃ, ᐸᐸᑦᑎᓂᖅ ᐱᖅᖁᓯᕆᔭᐅᔪᒥᒃ ᐊᒻᒪᓗ ᑭᓇᐅᓂᕐᒧᑦ.”

ᐅᓐᓄᒃᓴᖅ ᐱᒋᐊᓚᐅᖅᑐᖅ ᐃᓕᓐᓂᐊᖅᑎᑦᑎᓂᕐᒥᑦ ᐱᑕᖃᐅᖅᖢᓂ ᐊᔾᔨᒌᙱᑦᑐᓂᑦ ᐊᔪᙱᓐᓂᐅᑉ ᓇᓃᓐᓂᕆᔭᖏᓐᓂᑦ, ᐱᒋᐊᓕᓵᖅᑐᓂᑦ ᒥᖅᓱᕐᓂᕐᒧᑦ ᒥᖅᓱᕐᓂᖃᕐᓂᖅᓴᐅᔪᓄᑦ ᐃᓚᐅᖃᑕᐅᔪᑦ ᐱᓕᕆᐊᕆᓂᐊᕐᓗᒋᑦ ᒥᖅᓱᒐᖏᑦ ᑭᓯᕐᒥᐅᕐᓗᑎᒃ. ᐃᐊᒪ ᖃᐅᔨᒪᓂᖃᑦᑎᐊᖅᑐᖅ ᒥᖅᓱᖅᑎᐅᑉᓗᓂ ᓄᓇᓕᖕᒥᑦ ᐊᒻᒪᓗ ᑲᒪᒋᓗᒍ ᒥᖅᓱᖅᑎᑦᑎᓂᖅ, ᖃᐅᔨᒪᓂᕆᔭᓂ ᑐᓂᓚᐅᖅᑕᖓ ᐊᒻᒪᓗ ᐊᑐᖅᑕᐅᕙᒃᑐᓂᒃ ᐱᔪᒪᓂᖃᑦᑎᐊᖅᖢᓂ ᐊᒻᒪᓗ ᕿᓄᐃᕐᓵᕐᓂᖃᖅᖢᓂ. ᓇᖕᒥᓂᕆᔭᖏᓐᓂᑦ ᐳᐊᓘᖕᓄᑦ ᐆᒃᑑᑎᓂᑦ ᓇᒃᓴᓚᐅᖅᑐᖅ ᐅᕙᒍᑦ ᐊᑐᕐᓂᐊᕐᓗᑎᒍᑦ, ᐆᒃᑑᑏᑦ ᐊᔾᔨᒌᖃᑦᑕᙱᑦᑐᑦ ᐊᑯᓐᓂᖏᓐᓂᑦ ᖃᑕᙳᑎᒌᑦ ᐃᓄᐃᑦ ᐱᖅᖁᓯᖓᓐᓂᑦ ᐊᒻᒪᓗ ᐱᔭᐅᖃᑦᑕᖅᑐᑦ ᑭᖑᕚᖏᓐᓄᑦ.

ᓄᓇᓕᖕᒥᐅᑦ ᑐᓴᖅᑎᑦᑎᔪᑦ ᐅᖃᖅᑐᑦ ᐊᒻᒪᓗ ᖃᓄᐃᓕᓂᐅᔪᑦ

ᑐᓴᕐᕕᐅᔪᑦ ᐃᓚᐅᔪᓂᑦ ᐱᑦᑕᐅᑦᑎᐊᓚᐅᖅᑐᑦ, ᐊᒥᓱᐃᑦ ᖃᐅᔨᑎᑦᑎᑉᓗᑎᒃ ᖁᕕᐊᒋᓂᕋᖅᖢᒍ ᐃᓚᐅᖃᑕᐅᔪᖕᓇᕐᓂᖏᓐᓂᒃ ᐱᖅᖁᓯᒃᑯᑦ ᖃᓄᐃᓕᐅᖅᑎᑦᑎᓂᕐᒥᑦ ᑕᒪᐃᓐᓂᑦ ᐃᓕᓐᓂᐊᖅᑎᑦᑎᓂᐅᑉᓗᓂ ᐊᒻᒪᓗ ᖁᕕᐊᓇᖅᑑᑉᓗᓂ. ᖁᕕᐊᒋᓚᐅᖅᑕᖏᑦ ᐃᓂᖃᖅᑎᑕᐅᖕᒪᑕ ᐃᓕᓐᓂᐊᖅᑎᑕᐅᓂᕐᒧᑦ ᐱᓐᓂᑯᒋᔭᐅᔪᓂᒃ ᒥᖅᓱᕐᓂᕐᒧᑦ ᐊᑐᖅᑕᐅᕙᒃᑐᓂᑦ ᐊᒻᒪᓗ ᑲᑎᓐᓂᖃᕐᓗᑎᒃ ᐱᖅᖁᓯᖓᓐᓄᑦ ᐊᒻᒪᓗ ᐃᓄᖕᓄᑦ ᑕᒡᕙᓃᑦᑐᓂᑦ.

ᓄᓇᓕᖕᒥᑦ ᐃᓄᐃᑦ ᐃᓚᐅᔪᑦ ᐱᔪᒪᓂᖃᑦᑎᐊᓚᐅᖅᑐᑦᑕᐅᖅ. “ᐃᒃᐱᖕᓇᓚᐅᖅᑐᖅ ᖁᕕᐊᓲᑎᖃᕐᓂᕐᒥᒃ ᐱᓯᒪᔭᑐᖃᑉᑎᖕᓂᑦ,” ᐊᑕᐅᓯᖅ ᐅᖃᖅᑐᖅ. “ᑕᑯᑉᓗᓂ ᖃᑉᓗᓈᓂᑦ ᓄᓇᓕᐅᑉ ᓯᓚᑖᓂᕐᒥᐅᑕᓂᒃ ᐱᔪᒪᓂᖃᖅᑐᓂᒃ ᐱᖅᖁᓯᕆᔭᑉᑎᖕᓂᑦ ᐃᒃᐱᖕᓇᑦᑎᐊᖅᑕᖅᑐ.”

ᐱᓕᕆᖃᑎᒌᖕᓂᐅᔪᖅ ᐅᔾᔨᕐᓇᓗᐊᓚᐅᖅᑐᖅ. ᐋᓕᓴᓐ ᐅᖃᖅᑐᖅ, “ᐊᒥᓱᐃᑦ ᐃᓄᐃᑦ ᐃᓚᐅᓚᐅᖅᑐᑦ, ᐊᒻᒪᓗ ᑕᐃᒪᓐᓇᐃᒐᔪᒃᑐᑦ ᐱᖅᖁᓯᕆᔭᐅᔪᒃᑯᑦ ᖃᓄᐃᓕᐅᕐᓂᖅᑕᖃᖅᑎᓪᓗᒍ. ᑕᒡᕙᓂ, ᐊᒥᓱᓂᒃ ᖃᓄᐃᓕᐅᖅᑎᑦᑎᓂᕐᒧᑦ ᑐᕌᖓᔪᖃᖅᑐᒍᑦ ᓵᓚᒃᓴᕋᓱᒃᑐᓂᑦ ᐊᖑᑏᑦ ᑕᐃᒪᓐᓇᐃᓕᐅᕈᒪᖕᒪᑕ. ᓴᖅᕿᑦᑎᓇᓱᒃᑐᖓ ᑭᓯᐊᓂ ᓱᓇᓕᐅᕆᖃᑦᑕᕐᓂᖃᖅᑐᓂᒃ. ᐃᓄᐃᑦ ᐃᓚᐅᓕᕌᖓᑕ, ᖃᐅᔨᓕᖃᑦᑕᖅᑐᑦ, ‘ᐆ, ᑕᒪᓐᓇ ᐱᐅᔪᒻᒪᕆᐊᓗᒃ’. ᐱᔭᕆᐊᖃᑦᑎᐊᓚᐅᖅᑕᕋ.” ᐱᕕᖃᖅᑎᑦᑎᑉᓗᓂ ᐃᓄᐃᑦ ᐃᓚᐅᔪᖕᓇᕐᓂᖏᓐᓄᑦ ᓱᓇᓕᐅᕆᓂᕐᒧᑦ ᐃᑲᔪᐃᓂᖃᑦᑎᐊᖅᑐᖅ.”

ᐃᖅᖃᐃᒪᓐᓇᖅᑐᑦ ᐊᒻᒪᓗ ᓂᕆᐅᒋᔭᐅᓚᐅᖏᑦᑐᑦ

ᐊᓯᖓᑦ ᐅᔾᔨᕐᓇᓚᐅᖅᑐᖅ ᓂᕆᐅᒋᔭᐅᖏᑦᑐᖅ ᐅᓂᑉᑳᖅᑐᐊᕐᓂᖅ ᐅᓐᓄᖃᖅᑎᑕᐅᑎᓪᓗᒋᑦ. ᐃᓄᐃᑦ ᒥᖅᓱᖅᑎᓪᓗᒋᑦ ᐳᐊᓗᓕᐊᖏᓐᓂᑦ, ᐅᓂᑉᑳᖃᑦᑕᓚᐅᖅᑐᑦ ᒥᖅᓱᖅᐸᓚᐅᕐᓂᖏᑦᑕ ᒥᒃᓵᓄᑦ ᐊᒻᒪᓗ ᐅᓂᑉᑳᖅᑐᐊᖅᑐᖃᐅᖅᖢᓂ ᒥᖅᓱᖅᑎᓪᓗᒋᑦ, ᓴᖅᕿᑦᑎᓚᐅᖅᑐᖅ ᑐᙵᓇᕐᓂᕐᒥᒃ ᐊᒻᒪᓗ ᐃᓚᐅᖃᑕᐅᓂᕐᒥᑦ ᑭᑐᓗᒃᑖᓄᑦ ᐱᐅᒋᔭᐅᓚᐅᖅᖢᓂ.

ᐅᔾᔨᕐᓇᓚᐅᖅᑐᖅ ᐅᓐᓄᒃᓴᒥᑦ ᓂᕆᐅᒋᔭᐅᖏᑦᑐᖅ ᖃᑉᓯᐅᓂᖏᑦ ᐊᖑᑏᑦ ᐃᓚᐅᖃᑕᐅᔪᑦ. “ᓂᕆᐅᓚᐅᖏᑦᑐᖓ ᑕᐃᒪᓐᓇᑎᒋ ᐊᒥᓲᑎᒋᔪᓂᒃ ᐊᖑᑎᓂᒃ ᐃᓚᐅᓂᐊᖅᑐᓂᒃ,” ᐋᓕᓴᓐ ᐅᖃᖅᑐᖅ ᐊᓕᐊᓇᐃᒋᑉᓗᒋᑦ. “ᐊᕐᓇᐃᓐᓇᓗᐊᖑᖃᑦᑕᖅᑐᑦ ᑕᒡᕙᓂ, ᑭᓯᐊᓂ ᒫᓐᓇᐅᔪᖅ (ᑕᑯᒃᓴᐅᔪᑦ ᐊᔾᔨᒥᑦ), ᐊᖑᑏᓐᓇᕐᓚᐅᓚᐅᖅᑐᑦ. ᐃᓱᒪᓚᐅᖅᑐᖓ ᐱᑦᑎᐊᕙᐅᓂᖓᓄᑦ ᑕᒪᕐᒥᓗᒃᑖᕐᓚᒃ ᒥᖅᓱᕐᓂᕐᒥᑦ ᖃᐅᔨᒪᓂᖃᙱᑦᑎᐊᓚᐅᕐᒪᑕ, ᑭᓯᐊᓂ ᐆᒃᑐᕋᓱᓚᐅᖅᑐᑦ.” ᐊᓯᐊᙳᕐᓂᐅᔪᖅ ᐊᖑᑎᑕᖃᐅᕐᓂᖅ ᐃᓚᓯᓚᐅᖅᑐᖅ ᐊᔾᔨᐅᖏᑦᑐᒥᑦ ᐊᒻᒪᓗ ᐃᓚᐅᑎᑦᑎᓂᕐᒥᒃ ᒥᖅᓱᕐᓂᕐᒧᑦ ᐅᓐᓄᒋᔭᐅᔪᒧᑦ, ᓯᖁᒥᑦᑎᔪᖅ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᑦ ᑕᐅᑐᒐᐅᔪᒥᒃ ᐊᒻᒪᓗ ᐃᖕᒥᖕᓄᑦ ᐃᑲᔪᖅᑐᕋᐅᑎᓂᖃᖅᖢᓂ ᐊᒻᒪᓗ ᕿᒥᕐᕈᓂᕐᒥᑦ.

ᐊᑐᖃᑦᑕᕐᓂᖅ ᐃᓚᐅᑎᑦᑎᓂᕐᒥᒃ ᐊᒻᒪᓗ ᐸᕐᓇᐃᓂᕐᒥᒃ ᓯᕗᓂᒃᓴᒧᑦ

ᐅᓐᓄᒋᔭᐅᔪᖅ ᒥᖅᓱᖅᑎᑦᑎᓂᕐᒧᑦ ᑕᓯᕐᔪᐊᕐᒥᑦ ᐊᔪᙱᓐᓂᖅᑖᕐᓂᕐᒧᑦ ᐃᓕᓐᓂᐊᖅᑎᑦᑎᓂᐅᑉ ᐅᖓᑖᓅᓚᐅᖅᑐᖅ; ᑲᑎᑎᑦᑎᓂᖃᓚᐅᖅᑐᖅ ᐊᔾᔨᒌᙱᑦᑑᑎᓂᒃ ᐃᓄᖕᓂᑦ ᓄᓇᓕᖕᒥᐅᖃᑎᒌᖑᔪᓂᑦ. ᐊᑐᓚᐅᖅᑐᖅ ᑲᑎᑎᑦᑎᓂᖃᕐᓂᕐᒥᒃ ᐊᒻᒪᓗ ᐃᖕᒥᖕᓄᑦ ᐃᒃᐱᒍᓱᒡᕕᖃᖃᑎᒌᖕᓂᕐᒥᒃ, ᑕᑯᒃᓴᐅᑎᑦᑎᑉᓗᓂ ᖃᓄᐃᓕᐅᖅᑎᑦᑎᓂᕐᓂᑦ ᓲᕐᓗ ᒥᖅᓱᖅᑎᑦᑎᓂᕐᒥᒃ ᐊᖏᔪᒥᒃ ᐱᑎᑦᑎᔪᖕᓇᖅᑐᖅ ᓄᓇᓕᖕᒥᐅᑦ ᑲᑎᒪᓂᖏᓐᓄᑦ.

ᐋᓕᓴᓐ ᐊᒻᒪᓗ ᐃᐊᒪ, ᒥᖅᓱᖅᑎᑦᑎᓂᕐᒧᑦ ᐋᖅᕿᒃᓱᐃᔩᒃ, ᐃᑲᔪᑦᑎᐊᓚᐅᖅᑐᑦ ᒥᖅᓱᖅᑎᑦᑎᓂᕐᒧᑦ ᐅᓐᓄᒋᔭᐅᔪᖅ ᐱᐊᓂᑦᑎᐊᕐᓂᖓᓄᑦ. ᐋᓕᓴᓐ ᐱᔪᒪᓂᕆᔭᖓ ᓱᓇᓕᐅᕆᓂᕐᒥᒃ ᑕᓯᕐᔪᐊᕐᒥᑦ ᓄᓇᓕᐊᓛᒧᑦ ᐊᒻᒪᓗ ᐃᐊᒪᐅᑉ ᐊᒃᑐᐊᓂᖃᑦᑎᐊᕐᓂᕆᔭᖓ ᐃᓄᖕᓄᑦ ᑲᖏᖅᖠᓂᕐᒥᐅᑕᓄᑦ ᓴᙱᔪᒥᒃ ᐊᔪᙱᓐᓂᖃᖅᑎᑦᑎᓚᐅᖅᑐᖅ. ᐱᓕᕆᐊᖏᑦ ᐱᐅᓯᒋᐊᖅᓯᑐᐃᓐᓇᖏᑦᑐᑦ ᐃᓚᐅᖃᑕᐅᔪᑦ ᐃᓅᓯᖏᓐᓂᒃ ᑭᓯᐊᓂ ᐱᒋᐊᖅᑎᑦᑎᔾᔪᑕᐅᔪᖅ ᓯᕗᓂᒃᓴᒥᑦ ᖃᓄᐃᓕᐅᖅᑎᑦᑎᓂᐅᓂᐊᖅᑐᓄᑦ. ᐸᕐᓇᐃᓂᖃᓕᐊᓂᒃᑐᑦ ᐋᖅᕿᒃᓱᐃᒃᑲᓐᓂᕐᓂᐊᕐᓗᑎᒃ ᓱᓇᓕᐅᕆᓂᕐᒧᑦ ᐅᓐᓄᒋᔭᐅᔪᓂᒃ, ᐊᒥᓲᓂᖅᓴᓂᒃ ᐊᔾᔨᒌᙱᑦᑑᑎᓂᒃ ᐱᑕᖃᐅᕐᓗᓂ ᐊᔪᙱᓐᓂᕆᔭᐅᔪᓂᒃ ᖃᓄᐃᓕᐅᖅᑎᑦᑎᓂᕐᓂᑦ ᐊᒻᒪᓗ ᐃᑲᔪᖅᑐᐃᓗᓂ ᐊᒥᓲᓂᖅᓴᐃᑦ ᐃᓚᐅᖃᑕᐅᖁᓗᒋᑦ.

ᐊᔾᔨ: ᓴᐅᒥᒃᖠᕐᒥᑦ ᑕᓕᖅᐱᒃᖠᕐᒧᑦ, ᐋᓕᓴᓐ ᑭᐅᓪᐹᑐᕆᒃ ᐊᒻᒪᓗ ᐃᐊᒪ ᑕᑎ, ᐅᓐᓄᒋᔭᐅᓂᐊᖅᑐᒥᒃ ᐋᖅᕿᒃᓱᐃᔪᑦ

 

ᐱᐊᓂᒃᐸᓪᓕᐊᓂᕐᒥᑦ, ᒥᖅᓱᖅᑎᑦᑎᓂᕐᒧᑦ ᐅᓐᓄᖃᖅᑎᑦᑎᓂᖅ ᑕᓯᕐᔪᐊᕐᒥᑦ ᒥᖅᓱᕐᓂᑐᐃᓐᓇᐅᓚᐅᖏᑦᑐᖅ ᐳᐊᓘᖕᓂᑦ; ᖁᕕᐊᓲᑎᖃᕐᓂᐅᓚᐅᖅᑐᖅ ᓄᓇᖅᖃᑎᒌᖑᓂᕐᒥᑦ, ᓱᓇᓕᐅᕆᓂᕐᒥᒃ, ᐊᒻᒪᓗ ᑲᑎᙵᓂᕐᒥᑦ. ᑲᑎᑎᑦᑎᓚᐅᖅᑐᖅ ᐃᓄᖕᓂᑦ ᑐᑭᖃᑦᑎᐊᖅᑐᒃᑯᑦ, ᐃᖅᖃᐅᒪᓇᖅᑐᓕᐅᕆᑉᓗᓂ ᐊᒻᒪᓗ ᐱᑕᖃᖅᑎᑦᑎᑉᓗᓂ ᐃᓚᐅᑎᑦᑎᓂᕐᒥᒃ ᐊᒻᒪᓗ ᐃᑲᔪᖅᑐᐃᓂᕐᒥᒃ. ᐊᔪᙱᑦᑎᐊᕐᓂᕆᔭᖓ ᐅᓐᓄᒋᔭᐅᔪᒧᑦ ᓇᓗᓇᐃᖅᓯᔪᖅ ᐱᑦᑕᐅᔪᒃᑯᑦ ᐊᒃᑐᖅᓯᓂᖃᕈᖕᓇᕐᓂᖏᑦ ᑕᐃᒪᓐᓇᐃᑦᑐᑦ ᑕᒪᐃᓐᓄᑦ ᐱᓕᕆᔨᓄᑦ ᐊᒻᒪᓗ ᓄᓇᓕᖕᒥᐅᑕᓄᑦ, ᐊᑉᖁᓯᐅᕆᔪᖅ ᑲᑎᑎᑦᑎᒃᑲᓐᓂᕐᓂᕐᒥᒃ ᐊᒻᒪᓗ ᐃᓚᐅᖃᑕᐅᑎᓪᓗᒍ ᑕᓯᕐᔪᐊᖅ.