ᐅᑭᐅᓂᑦ ᖃᑉᓯᐊᕐᔪᖕᓂᑦ ᐊᔪᕈᖕᓃᖅᓴᓚᐅᖅᖢᓂ ᐃᓕᓐᓂᐊᖅᖢᓂᓗ, ᐊᐳᖅᑎᓐᓈᖅᑐᒥᑦ ᐱᓕᕆᔨ ᒌᑉᕆᐅ ᐅᓛᔪᒃ ᑎᑭᐅᑎᔪᖅ ᐱᓕᕆᐊᖓᑕ ᖄᖓᓄᑦ.  ᐱᓕᐅᕆᓂᕐᒧᑦ ᐱᖁᑎᓂᒃ ᐊᐅᓚᑦᑎᔨᐅᓕᖅᑐᖅ ᐊᒻᒪᓗ ᐊᔪᙱᓕᖅᖢᓂ ᐊᐅᓚᑦᑎᓂᕐᒧᑦ RH120 ᐳᐊᕆᑎᓕᖕᒥᑦ – ᐊᖏᓛᖑᖃᑕᐅᔪᖅ ᐊᒻᒪᓗ ᐊᔪᕐᓇᓛᖑᑉᓗᓂ ᐱᖁᑎ ᓄᓇᕐᔪᐊᕐᒥᑦ ᐅᔭᕋᒃᑕᕆᐊᖅᑐᓕᕆᓂᕐᒥᑦ.

ᑭᓯᐊᓂ ᖁᕕᐊᓱᖕᓂᖅ ᐊᒻᒪᓗ ᐃᓕᑕᖅᓯᓂᖅ ᓄᖅᑲᙱᑦᑐᖅ ᑕᐃᑲᓂ.  ᒌᑉᕆᐅ ᓯᕗᓪᓕᖅᐸᐅᔪᖅ ᐃᓅᑉᓗᓂ ᐱᓕᕆᔨ ᑎᑭᐅᑎᓂᕐᒧᑦ ᖁᑦᑎᓛᕐᒧᑦ ᐱᓕᕆᐊᕐᒧᑦ ᐅᔭᕋᒃᑕᕆᐊᕐᒥᑦ ᐱᓕᕆᐊᕐᒧᑦ ᐊᑉᖁᑎ ᑐᕌᖓᔫᑎᑉᑎᖕᓂᑦ – ᓄᑖᓕᕆᓂᕐᒧᑦ ᐋᖅᑭᒃᑕᐅᓯᒪᔪᖅ ᐊᐳᖅᑎᓐᓈᖅᑐᒥᑦ ᐱᕙᓪᓕᐊᔪᓕᕆᔨᒃᑯᓐᓂᑦ ᐃᑲᔪᐃᓂᕐᒧᑦ ᖁᕐᕙᕆᐊᖅᑎᑦᑎᓂᖅ ᐱᓕᕆᐊᖓᓐᓂᒃ ᐃᓅᔪᓄᑦ.

ᑐᕌᖓᔪᖅ ᑐᓂᓯᖃᑦᑕᖅᑐᖅ ᑭᒡᓕᖃᖅᑐᓂᒃ ᐊᔪᙱᓐᓂᖃᖅᑐᓄᑦ ᐅᕝᕙᓘᓐᓃᑦ ᐃᓕᓐᓂᐊᕐᓂᕐᒥᒃ ᐱᕕᖃᖅᑎᖦᖢᒋᑦ ᓯᕗᒻᒧᒋᐊᕐᓂᕐᒧᑦ ᐱᓕᕆᐊᖓᓐᓂᒃ ᐃᓕᑕᖅᓯᑉᓗᑎᒃ ᐱᕈᖅᐸᓪᓕᐊᔾᔪᑎᒋᔭᕆᐊᖃᖅᑕᖏᓐᓂᒃ ᐊᒻᒪᓗ, ᐊᑯᑉᓕᖅᓯᒪᔪᑎᒍᑦ ᐱᓕᕆᓂᑯᖓᑦᑎᒍᑦ, ᐊᔪᕈᖕᓃᖅᓴᓂᖅ ᐊᒻᒪᓗ ᐊᔪᙱᓐᓂᖅᑖᕐᓂᖃᕐᓂᒃᑯᑦ, ᐊᔪᙱᓕᖃᑦᑕᖅᑐᑦ ᑎᑭᐅᑎᓂᕐᒧᑦ ᑐᕌᒐᕆᔭᖏᓐᓄᑦ.  ᑕᐃᒪᙵᓂᑦ 2012-ᒥᑦ ᐱᒋᐊᕐᒪᑕ, ᐅᔭᕋᒃᑕᕆᐊᕐᒥᑦ ᐱᓕᕆᐊᖃᕐᓂᕐᒧᑦ ᐊᑉᖁᑎ ᑐᕌᖓᔪᖅ ᐊᒥᓱᙳᖅᐸᓪᓕᐊᔪᑦ ᐱᐊᓂᒃᓯᒪᔪᖃᓕᖅᑐᑦ ᐅᑭᐅᑕᒫᑦ ᐊᒻᒪᓗ ᐱᓕᕆᔨᑖᖃᑦᑕᕈᖕᓇᖅᓯᔪᒍᑦ ᐃᓚᖏᓐᓄᑦ ᐃᓂᐅᔪᓄᑦ, ᓲᕐᓗ ᐅᓯᑲᑦᑕᖕᓂᕐᒧᑦ ᓄᓇᒃᑰᕈᑎᓂᒃ ᐊᖁᒃᑎᐅᓂᕐᒧᑦ, ᐃᓅᔪᓄᐃᓐᓇᕐᓚᖕᓂᑦ.

ᒌᑉᕆᐅᒧᑦ, ᐃᓚᐅᓕᓚᐅᖅᑐᖅ ᐊᒡᓃᑯᒃᑯᓐᓂᑦ 2012-ᒥᑦ, ᐊᐅᓚᑦᑎᔨᙳᖅᐸᓪᓕᐊᓂᖓ RH120 ᐳᐊᕆᑎᓕᖕᒥᑦ ᐊᕐᕕᓂᓕᖕᓄᑦ ᐅᑭᐅᓄᑦ ᑕᐃᑯᙵᒃᓴᓚᐅᖅᑐᖅ ᐊᒻᒪᓗ 10,000 ᐃᑲᕐᕋᐃᑦ ᐅᖓᑖᓄᑦ ᐊᔪᕈᖕᓃᖅᓴᑉᓗᓂ.  ᒫᓐᓇ ᐱᓕᕆᐊᖓᓄᑦ ᐃᓂᒋᔭᖓ ᐃᓇᖐᖃᑦᑕᖅᖢᓂ ᐱᓕᐅᕆᓂᕐᒧᑦ ᐱᖁᑎᓂᒃ ᐊᐅᓚᑦᑎᔨᐅᓂᕐᒧᑦ ᐊᒻᒪᓗ ᐃᓚᒋᔭᐅᔪᓂᒃ ᐱᖁᑎᓂᒃ ᐊᐅᓚᑦᑎᔨᐅᖃᑦᑕᕐᒥᔪᖅ ᐅᔭᕋᒃᑕᕆᐊᕐᒥᑦ.

ᒌᑉᕆᐅ ᐅᖃᖅᑐᖅ ᓴᕆᒪᓱᒃᑐᖅ ᓯᕗᓪᓕᖅᐸᐅᑉᓗᓂ ᐃᓅᑉᓗᓂ ᐱᓕᕆᔨ ᑎᑭᐅᑎᒐᒥ ᖁᑦᑎᓛᒧᑦ ᐃᓂᐅᔪᒧᑦ ᐊᐅᓚᑦᑎᓂᕐᒥᒃ ᐳᐊᕆᑎᓕᖕᒥᑦ.  “ᐃᓚᐅᓕᕋᒪ ᐊᒡᓃᑯᒃᑯᓐᓂᑦ ᐅᓯᑲᑦᑕᐅᑎᒥᒃ ᓄᓇᒃᑰᕈᑎᒥᒃ ᐊᖁᒃᑎᐅᑉᓗᖓ, ᐱᔪᒪᓚᐅᖅᑕᕋ ᐊᐅᓚᓪᓗᒍ ᐳᐊᕆᑎᓕᒃ ᐊᐅᓚᖃᑦᑕᓕᖅᑕᕋ ᐊᖏᔫᖕᒪᑕ ᐅᓯᓕᖅᑐᐃᖃᑦᑕᖅᑐᑦ ᓄᓇᒃᑰᕈᑎᓂᒃ ᐱᐊᓚᔪᐊᓗᒃᑯᑦ,” ᐅᖃᖅᑐᖅ ᒌᑉᕆᐅ.  “ᐱᔪᒪᓚᐅᖅᑕᕋ ᐱᙳᖅᓯᒪᓕᖅᑐᖅ.”

ᐅᖃᖅᖢᓂᓗ, “ᐃᓅᔪᓗᒃᑖᑦ ᐃᓚᐅᓕᖁᔭᒃᑲᑦ ᐊᔪᕈᖕᓃᖅᓴᓂᕐᒧᑦ ᑐᕌᖓᔪᕐᒧᑦ ᑖᒻᓇ ᐃᓚᐅᑉᓗᒍ.  ᑭᓯᐊᓂ ᖃᐅᔨᒪᔭᐅᓕ, ᑕᒃᐸᐅᙵᖅᐸᓪᓕᐊᕋᐅᔭᕐᓇᖅᑐᖅ ᓱᓇᙳᕈᒪᑉᓗᓂ, ᐅᑕᖅᑭᑦᑎᐊᕆᑦ ᐱᐊᓂᒃᖢᓂ ᐃᓱᐊᓄᑦ ᖁᕕᐊᓇᖃᑦᑕᖅᑐᖅ.”

ᒌᑉᕆᐅ ᓄᑖᒥᒃ ᐱᔪᒪᓂᖃᓕᖅᑐᖅ – ᐃᓚᒋᔭᐅᔪᓄᑦ ᐱᖁᑎᓂᒃ ᐃᓱᒪᑕᕆᔭᐅᓕᕐᓗᓂ ᐊᒡᓃᑯᒃᑯᓐᓂᑦ.

ᐃᓕᑦᑎᒃᑲᓐᓂᕈᒪᓂᖃᖅᐲᑦ ᐱᓕᕆᐊᖅᑖᕐᓂᕐᒧᑦ?  ᑕᑯᒋᐊᕐᓗᒍ ᓄᓇᕗᒻᒥᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᒃᐳᑦ.

ᓱᓇᐅᕙ ᐳᐊᕆᑎᓕᒃ?

 ᒌᑉᕆᐅ ᐅᓛᔪᒃ ᐊᔪᙱᓐᓂᖃᓕᖅᑐᖅ ᐊᐅᓚᑦᑎᓗᓂ ᐊᖏᓛᖑᖃᑕᐅᔪᒥᒃ ᐊᒻᒪᓗ ᐊᔪᕐᓇᓛᖑᔪᖅ ᐱᖁᑎᑦ ᓄᓇᕐᔪᐊᕐᒥᑦ ᐅᔭᕋᒃᑕᕆᐊᓕᕆᓂᕐᒥᑦ – RH120 ᐳᐊᕆᑎᓕᒃ.  ᖃᓄᖅ ᐊᖏᑎᒋᕙ RH120?

  • ᐊᐅᓛᕈᑎᖓᑕ ᐅᖁᒪᐃᓐᓂᖓ 326 ᑕᓐ-ᖑᔪᖅ ᐊᒻᒪᓗ ᑕᑭᑎᒋᔪᖅ ᐊᐅᓚᑦᑎᔨᐅᑉ ᐃᔨᖓᑕ ᐃᓂᐊᓂᑦ 21.3 ᐃᑎᒐᐃᑦ ᓄᓇᐅᑉ ᖁᓛᓂᑦ
  • ᐳᐊᕆᑎᖓ, ᖃᓗᓯᕝᕕᐊᓘᓐᓃᑦ, ᐊᖏᓂᖓ ᒪᕐᕉᓪᓗᐊᖕᓂᒃ ᓯᐅᕋᖅᑕᐅᑎᓂᒃ ᓄᓇᒃᑰᕈᑎᓂᒃ ᖃᓕᕇᓕᖓᓗᑎᒃ ᐊᒻᒪᓗ ᐃᓂᖃᕈᖕᓇᖅᑐᖅ 6 cubic yards/34 ᑕᓐ-ᓂᒃ
  • RH120 ᓯᑕᒪᐃᖅᑕᕐᓗᓂ ᑕᑕᑦᑎᔪᖕᓇᖅᑐᖅ ᐊᖏᔪᒥᒃ 150 ᑕᓐ-ᓂᒃ ᐅᓯᔪᖕᓇᖅᑐᒥᒃ ᓄᓇᒃᑰᕈᑎᒥᒃ.