ᓴᒡᒐᕉᑦ 8-ᒥᑦ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᖁᕕᐊᓲᑎᖃᓚᐅᖅᑐᖅ ᑎᑭᐅᑎᓯᒪᓂᕐᒥᒃ ᐅᒃᑯᐃᖅᑕᐅᑉᓗᓂ ᓄᑖᙳᖅᑎᖅᑕᐅᓯᒪᔪᖅ ᐃᓄᐃᑦ ᓂᕿᖏᓐᓄᑦ ᐃᒐ – ᐊᑐᖅᑕᐅᔪᒃᓴᐅᑕᐅᔪᖅ ᐅᔭᕋᒃᑕᕆᐊᕐᒥᑦ ᐃᓄᐃᑦ ᐱᖅᖁᓯᖏᓐᓄᑦ  ᐊᒻᒪᓗ ᖃᓄᐃᓕᐅᖃᑦᑕᕐᓂᖏᓐᓄᑦ. ᐊᔾᔨᐅᖏᑦᑐᖅ ᖃᓄᐃᓕᐅᕈᑕᐅᓂᖅ, ᐊᑕᐅᑦᑎᒃᑰᓚᐅᖅᖢᓂ ᓄᓇᕗᑦ ᐅᑉᓗᖓᓂᑦ, ᓇᓗᓇᐃᖅᓯᔪᖅ ᐊᓯᐊᙳᖅᑎᖅᑕᐅᓂᖓᓄᑦ ᐊᑐᖅᑕᐅᓲᒥᒃ ᐅᑉᓗᕈᒥᑕᕐᕕᐅᓚᐅᖅᑐᖅ ᐱᓪᓗᕆᒃᑑᑉᓗᓂ ᐃᓂᐅᓕᖅᖢᓂ ᖁᕕᐊᓲᑎᖃᖃᑦᑕᖅᑐᖅ ᐃᓄᐃᑦ ᐱᖅᖁᓯᖓᓐᓂᑦ. ᓄᑖᙳᖅᑎᕆᓂᖅ ᐊᒻᒪᓗ ᖃᓄᐃᑦᑑᓂᖓ, ᐱᐊᓂᑦᑎᐊᖅᓯᓚᐅᖅᑐᖅ ᐱᐅᓯᒋᐊᖅᓯᒪᔪᒥᒃ ᐃᒐᒥᑦ, ᑐᙵᓇᖅᑑᑎᖦᓗᒍ ᑭᑐᓗᒃᑖᓄᑦ ᖁᕕᐊᒋᔭᖃᕐᓂᐊᕐᓗᑎᒃ ᐃᓄᐃᑦ ᓂᕿᖏᓐᓂᑦ ᐊᒻᒪᓗ ᐱᖅᖁᓯᕆᔭᐅᔪᑦ ᑲᑎᓐᓂᖏᓐᓄᑦ.

ᐃᓂᐅᔪᖅ ᐃᓱᒪᒋᔭᐅᒃᑲᓐᓂᖅᑐᖅ

ᑕᑯᒃᓴᐅᑎᑕᐅᓂᖓ ᐅᒃᑯᐃᖅᑕᐅᓂᖓ ᐱᐅᑦᑎᐊᖅᑐᖅ ᓴᓂᕋᕐᒧᐊᖅᑐᒃᓴᖅ ᓴᓇᔭᐅᔪᖅ ᐋᔅᑕᓐ ᑲᔾᔪᖕᒧᑦ ᐊᕐᕕᐊᕐᒥᐅᑕᕐᒧᑦ, ᐱᓕᕆᔨᐅᕙᓚᐅᖅᑐᖅ ᐊᒡᓃᑯᒃᑯᓐᓄᑦ, ᓴᓇᙳᐊᕈᖕᓇᕐᓂᖓ ᓄᑖᓂᒃ ᑕᑯᒃᓴᕈᖅᑎᑦᑎᔪᖅ ᐃᓄᐃᑦ ᓂᕿᖏᓐᓄᑦ ᐃᒐᒥᑦ. ᐋᔅᑕᓐ ᓴᓂᕋᕐᒧᐊᖅᑐᒃᓴᖅ ᓴᓇᔭᖓ, ᐃᒐᒦᓕᖅᑐᖅ ᐱᑦᑕᐅᑦᑎᐊᖅᑐᓂᒃ ᐊᒻᒪᓗ ᐱᓕᕆᐊᕆᔪᒪᔭᖓᓂᑦ ᓴᓇᖃᑦᑕᕐᓂᖓᓂᑦ ᑕᑯᒃᓴᐅᑎᑦᑎᔪᖅ. ᐱᑎᑦᑎᔪᖅ ᓄᑕᕋᐅᓚᐅᕐᓂᖓᓂᑦ ᐃᖅᖃᐅᒪᔭᖏᓐᓂᑦ ᐊᒻᒪᓗ ᐊᑖᑕᖓᑕ ᑕᐅᑐᕐᕉᕈᖕᓇᕐᓂᖓᓂᒃ ᐅᓂᑉᑳᖅᑕᖏᓐᓂᑦ ᓴᓇᙳᐊᒐᑎᒍᑦ, ᐋᔅᑕᓐ ᐱᓕᕆᐊᖓ ᐱᓯᒪᔪᖅ ᐃᓄᐃᑦ ᐱᖅᖁᓯᖏᓐᓂᑦ ᐊᒻᒪᓗ ᐃᓚᓯᓯᒪᑉᓗᓂ ᐊᔾᔨᐅᖏᑦᑑᔪᒥᒃ, ᐱᐅᓯᑎᑦᑎᑦᑎᐊᖅᖢᓂ ᐃᒐᒥᑦ.

ᐊᖏᔪᒥᒃ ᖁᔭᓐᓇᒦᒃ

ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᐊᖏᔪᒥᒃ ᖁᔭᓕᔪᖅ ᐋᔅᑕᓐ ᑲᔾᔪᖕᒥᑦ ᐊᖏᑦᑎᐊᖅᑐᒥᒃ ᐃᑲᔪᖅᓯᒪᓂᖓᓄᑦ ᐊᒻᒪᓗ ᑭᑐᓗᒃᑖᓄᑦ ᐃᓚᐅᓚᐅᖅᑐᓄᑦ ᐅᕙᑉᑎᖕᓂᑦ ᖁᕕᐊᓲᑎᖃᖅᑎᓪᓗᑕ ᐅᒃᑯᐃᖅᑕᐅᒃᑲᓐᓂᕐᓂᖓ ᐃᓄᐃᑦ ᓂᕿᖏᓐᓂᑦ ᐃᒐ. ᐃᓂᐅᔪᖅ ᐃᓂᑐᐃᓐᓇᐅᔪᖕᓃᖅᑐᖅ ᖁᕕᐊᒋᔭᖃᕐᓂᐊᕐᓗᓂ ᓂᕆᔭᒃᓴᓂᒃ; ᑕᑯᒃᓴᐅᑎᑦᑎᔪᖅ ᐱᓂᐊᕐᓂᕆᔭᑉᑎᖕᓂᑦ ᐱᖅᖁᓯᑐᖃᕆᔭᐅᔪᓂᒃ, ᓯᓚᖅᖃᑎᒋᔭᐅᔪᑦ ᓄᓇᓕᖕᓂᑦ, ᐊᒻᒪᓗ ᓱᓇᓕᐅᕆᔪᖕᓇᕐᓂᕐᒥᒃ.

ᐋᔅᑕᓐ ᑲᔾᔪᒃ

ᐋᔅᑕᓐ ᑲᔾᔪᒃ ᓇᑭᙶᕐᓂᖓ ᓴᓇᙳᐊᖅᑎᐅᑉᓗᓂ ᐊᖏᔫᔪᖅ ᐊᒻᒪᓗ ᐱᔪᒥᓇᖅᑑᑉᓗᑎᒃ ᓴᓂᕋᕐᒧᐊᒃᑐᒃᓴᖅ ᓴᓇᔭᖓᑎᑐᑦ. ᒪᒃᑯᒃᑑᓚᐅᕐᓂᖓᓂᑦ, ᐋᔅᑕᓐ ᐱᔭᐅᓯᒪᓕᓚᐅᖅᑐᖅ ᓴᓇᙳᐊᒐᓕᐅᕆᓂᕐᒧᑦ, ᐱᒋᐊᕈᒪᓂᖃᓕᖅᑎᑕᐅᑉᓗᓂ ᐊᑖᑕᖓᑕ ᑕᐅᑐᕐᕉᕐᓂᒃᑯᑦ ᐅᓂᑉᑳᖃᑦᑕᖅᑕᖏᑦ ᐊᔾᔨᑎᒍᑦ. ᑎᑎᕋᐅᔭᕐᓂᕐᒥᒃ ᖁᕕᐊᒋᔭᖃᕐᓂᖓ ᐊᒻᒪᓗ ᑕᑯᒃᓴᐅᑎᑦᑎᓂᖅ ᐅᓂᑉᑳᓂᒃ ᐋᖅᕿᒃᓯᓯᒪᔪᖅ ᓴᓇᖃᑦᑕᖅᑕᖏᓐᓂᑦ, ᐱᑦᑕᐅᑦᑎᐊᖅᖢᓂ ᑕᑯᒃᓴᐅᑎᑕᐅᓕᖅᑐᖅ ᑕᓯᕐᔪᐊᕐᒥᑦ ᐃᓄᐃᑦ ᓂᕿᖏᓐᓄᑦ ᐃᒐᖓᓂᑦ. ᐋᔅᑕᓐ ᐱᓕᕆᐊᖓ ᐱᐅᓯᒋᐊᖅᓯᓂᖃᑐᐃᓐᓇᙱᑦᑐᖅ ᐃᒐᒦᑦᑐᓂᑦ ᑭᓯᐊᓂ ᐃᖅᖃᐅᒪᔾᔪᑕᐅᖕᒥᔪᖅ ᓴᙱᓂᕆᔭᖓᑕ ᓴᓇᙳᐊᖅᑕᐅᔪᑦ ᑲᑎᑎᑦᑎᓂᐊᕐᓗᓂ ᐃᓄᐃᑦ ᐱᖅᖁᓯᖏᓐᓄᑦ.