ᐊᒡᓃᑯᒃᑯᑦ ᓴᕆᒪᓱᒃᑐᑦ ᖁᕕᐊᓲᑎᒋᓂᐊᕐᓗᒋᑦ ᑎᑭᐅᑎᓂᕆᔭᖏᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐱᓕᕆᖃᑎᒌᑦ 2024-ᒥᑦ ᓄᓇᕐᔪᐊᕐᒥᑦ ᐅᔭᕋᒃᑕᕆᐅᕐᒥᑦ ᐊᓐᓇᒃᑐᐃᓂᕐᒧᑦ ᐱᒡᒎᒃᑐᓂᑦ (IMRC), ᑲᓚᒻᐱᐊᒥᑦ ᐱᒡᒎᓚᐅᖅᑐᑦ. ᐱᒡᒎᒃᖢᑎᒃ ᓄᓇᕐᔪᐊᕐᒥᑦ ᐱᐅᓛᕆᔭᐅᔪᓂᒃ, ᐃᓚᒌᒃᑐᖁᑎᕗᑦ ᑕᑯᒃᓴᐅᑎᑦᑎᓚᐅᖅᑐᑦ ᐊᔪᙱᑦᑎᐊᖅᑕᖏᓐᓂᑦ, ᐅᑎᕈᖕᓇᕐᓂᖏᓐᓂᑦ, ᐊᒻᒪᓗ ᐃᓚᒌᒍᖕᓇᕐᓂᖏᓐᓂᑦ, ᑎᑭᑎᑦᑎᔪᑦ ᐊᖏᕐᕋᒧᑦ ᐊᑎᖓᓂᑦ ᑕᒪᐃᓐᓄᑦ ᐊᔪᙱᓛᑦ-ᒥᑦ ᐅᖃᐅᓯᐅᔪᖕᓇᖅᑐᖅ ᑭᓯᐊᓂ ᐱᑦᑕᐅᑦᑎᐊᖅᑐᒥᒃ ᐱᓕᕆᓂᖃᖅᑐᑐᑦ. ᓵᓚᒃᓴᕐᓂᖏᓐᓂᑦ ᑕᑯᒃᓴᐅᑎᑦᑎᔪᖅ ᓴᙱᓂᕆᔭᖏᓐᓂᑦ ᐃᓚᒌᒃᑐᖁᑎᑉᑕ ᐊᒻᒪᓗ ᐊᒡᓃᑯᒃᑯᑦ ᐱᓂᐊᕐᓂᕆᔭᖓᓐᓂᒃ ᐅᔭᕋᒃᑕᕆᐊᒥᑦ ᐊᑦᑕᕐᓇᖅᑐᖃᙱᑎᑦᑎᓂᕐᒥᒃ ᐊᒻᒪᓗ ᐊᓐᓇᒃᑐᐃᓂᕐᒧᑦ ᐱᑦᑕᐅᑦᑎᐊᖅᑐᒥᒃ ᓄᓇᕐᔪᐊᕐᒥᑦ ᑕᐅᑯᔭᐅᓂᐊᕐᓗᓂ.

ᓄᓇᕐᔪᐊᕐᒥᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᐱᒡᒎᖕᓂᖅ (IMRC) ᐃᒃᐱᒋᔭᐅᑦᑎᐊᖅᖢᓂ ᓄᓇᕐᔪᐊᕐᒥᑦ ᐱᑎᑕᐅᖃᑦᑕᖅᑐᖅ ᐋᖅᕿᒃᓱᖅᑕᐅᑉᓗᓂ ᓄᓇᕐᔪᐊᕐᒥᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᑎᒥᐅᔪᓄᑦ (IMRB) ᓴᖅᕿᔮᖅᑎᑦᑎᓂᐊᕐᓗᓂ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᐊᐅᓛᖅᑎᑦᑎᓂᕐᓂᑦ ᓄᓇᕐᔪᐊᒦᖓᔪᒃᑯᑦ ᐊᒻᒪᓗ ᐱᐅᓯᒋᐊᕐᓗᒋᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒥᒃ ᖃᐅᔨᒪᔭᖃᕐᓂᖅ ᐊᒻᒪᓗ ᐊᑐᖅᑕᐅᖃᑦᑕᖅᑐᓂᒃ ᓄᓇᕐᔪᐊᕐᒥᑦ ᐱᓕᕆᖃᑎᒌᒃᑐᓂᑦ.

ᐃᓚᒋᔭᐅᑉᓗᑎᒃ ᓄᓇᕐᔪᐊᕐᒥᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᑎᒥᐅᔪᓄᑦ (IMRB), ᑲᓚᒻᐱᐊ ᑲᒪᒋᔭᖃᓚᐅᖅᑐᖅ 13-ᒋᔭᖓᓂᑦᐱᒡᒎᒃᑎᑦᑎᓂᕐᒥᒃ ᐊᒥᕋᐃᔭᕐᕕᒃ 15-ᒥᑦ 21-ᒧᑦ, 2024-ᒥᑦ. ᐱᑦᑕᐅᑦᑎᐊᖅᑐᖅ ᐱᒡᒎᒃᑎᑦᑎᓂᖅ ᑲᑎᑎᑦᑎᓚᐅᖅᑐᖅ 21-ᓂᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᔨᖏᓐᓂᑦ ᓄᓇᕐᔪᐊᕐᒥᙶᖅᑐᓂᑦ, ᑭᒡᒐᖅᑐᐃᑉᓗᑎᒃ ᓄᓇᖏᓐᓂᑦ ᓲᕐᓗ ᔭᒻᐱᐊ, ᑦᓴᐃᓇ, ᐃᓐᑎᐊ, ᐋᔅᑐᕇᓕᐊ, ᕕᐊᑦᓈᒻ, ᐊᒻᒪᓗ ᑲᓇᑕ, ᑕᑯᒃᓴᐅᑎᓐᓂᐊᕐᓗᒋᑦ ᐊᔪᙱᓐᓂᕆᔭᖏᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᐊᐅᓛᖅᑎᑦᑎᓂᖏᓐᓂᑦ.

ᓄᓇᕐᔪᐊᕐᒥᑦ ᐅᔭᕋᒃᑕᕆᐊᒥᑦ ᐊᓐᓇᒃᑐᐃᓂᕐᒧᑦ ᐱᒡᒎᖕᓂᖅ (IMRC) ᑕᑯᒃᓴᐅᑎᑦᑎᔪᖅ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᒪᓕᒐᓂᒃ ᐊᒃᓱᕈᕐᓇᖅᑐᒃ, ᑎᒥᖏᑦ ᐊᑐᖅᖢᒋᑦ ᐊᒻᒪᓗ ᐃᓱᒪᒃᑯᑦ ᐱᔭᕆᐊᖃᖅᑎᑦᑎᔪᓂᒃ ᐆᒃᑐᕋᐅᑎᓂᒃ ᐱᔾᔪᑎᖃᖅᑐᓂᒃ ᓄᓇᐅᑉ ᐃᓗᐊᓂᑦ ᐊᓐᓇᒃᑐᐃᓂᕐᓄᑦ. ᐱᒡᒎᒃᑐᑦ ᐃᓚᒌᑦ ᕿᒥᕐᕈᔭᐅᖃᑦᑕᖅᑐᑦ ᖃᓄᐃᓕᐅᕐᓂᖏᓐᓄᑦ ᐊᓐᓇᒃᑐᐃᓂᕐᒧᑦ ᐆᒃᑐᕋᐅᑎᓂᑦ, ᐋᓐᓂᖅᑐᓂᒃ ᐃᖢᐊᖅᓴᐃᓂᕐᒧᑦ ᐊᒃᓱᕈᕐᓇᖅᑐᓂᒃ, ᐊᒻᒪᓗ ᓄᑕᐅᓛᖑᔪᓂᒃ ᐱᖁᑎᓂᒃ ᐊᑐᖅᖢᑎᒃ, ᐊᑕᐅᑦᑎᒃᑯᑦ ᒪᓕᒃᖢᑎᒃ ᖁᑦᑎᓛᒃᑯᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᑐᖅᑕᐅᔪᓂᒃ.

ᐊᒡᓃᑯᒃᑯᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐃᓚᒋᒃᑐᖏᑦ

ᑭᒡᒐᖅᑐᐃᑉᓗᑎᒃ ᑲᓇᑕᒥᑦ, ᐊᒡᓃᑯᒃᑯᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐃᓚᒌᒃᑐᖏᑦ ᐱᑕᖃᐅᖅᖢᑎᒃ ᐊᔪᙱᓐᓂᖃᖅᑐᓂᒃ ᐃᓄᖕᓂᑦ ᐊᐳᖅᑎᓐᓈᖅᑐᒥᑦ ᐊᒻᒪᓗ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᓂᑦ ᐊᒻᒪᓗ ᕼᐆᑉ ᐸᐃ ᐱᓕᕆᐊᕐᒥᑦ. ᐃᓚᒌᑦ ᑲᒪᒋᔭᐅᓚᐅᖅᑐᑦ ᐃᐅᕆᒃ ᒫᑳᑎ-ᒧᑦ (Eric Marcotte), ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐃᓱᒪᑕᕐᔪᐊᖅ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ. ᐱᒡᒎᒃᖢᑎᒃ 7-ᓂᒃ ᐊᒃᓱᕈᕐᓇᖅᑐᓕᕆᑉᓗᑎᒃ, ᐃᓚᒌᑦ ᑕᑯᒃᓴᐅᑎᑦᑎᓚᐅᖅᑐᑦ ᐱᑦᑕᐅᑦᑎᐊᖅᑐᒥᒃ ᐱᓕᕆᖃᑎᒌᖕᓂᕐᒥᒃ, ᐋᖅᕿᒃᑕᐅᓯᒪᓂᖏᑦ ᐱᓕᕆᐊᖏᓐᓄᑦ, ᐊᒻᒪᓗ ᐊᔪᙱᓐᓂᖃᕐᓂᕐᒥᒃ, ᐱᖓᓱᒋᔭᐅᑉᓗᑎᒃ ᐋᓐᓂᖅᑐᖃᖅᐸᑦ ᐃᖢᐊᖅᓴᐃᓂᕐᒧᑦ ᐊᒻᒪᓗ ᐊᑎᖓᓂᑦ ᑕᒪᐃᓐᓄᑦ ᐊᔪᙱᓛᑦ-ᒥᑦ.

ᐃᓚᒌᓂᑦ ᐃᓚᐅᓚᐅᖅᑐᑦ:

  • ᑯᕆᔅᑕᕗ ᐲᑐ (Christopher Pitre) (ᐃᓱᒪᑕᖅ)
  • ᒫᒃ ᐋᓐᑐᕇ-ᑰᑑ (Marc-Andre Coutu)
  • ᑦᓵᕈᓪᔅ ᐱᓛᓐᔨᕐ (Charles Belanger)
  • ᔫᓪ ᕗᐊᓂᐅᕐ (Joel Fournier)
  • ᑭᐊᕕᓐ ᓚᓛᓐ (Kevin Lalonde)
  • ᑕᐃᕕᑦ ᐊᔮᑎ (David Ayotte)
  • ᒧᐊᒋᓐ ᓕᐋᓐ ᕼᐃᔪᐊᑦ (Morgan Leon Hjorth)
  • ᐱᓕᐱ ᐱᐅᑐᐃᓐ (Philippe Beaudoin)
  • ᐸᑐᕆᓯᐅ ᒪᒃᓯᒥᓕᐊᓄ ᐃᒡᓖᓯᐊᔅ (Patricio Maximiliano Iglesias)
  • ᔨᐊᕗᕆ ᐹᓪ ᓂᐊᕗᓪ (Geoffrey Paul Neville)

ᐱᑦᑕᐅᑦᐊᖅᑐᒥᒃ ᐃᑲᔪᖅᑎᒌᒃᑯᑦ ᐊᒻᒪᓗ ᐱᓕᕆᖃᑎᒌᒃᑯᑦ

ᐊᒡᓃᑯᒃᑯᑦ ᐱᓕᕆᔨᖏᑦᑕ ᐱᐊᓂᑦᑎᐊᕐᓂᖏᑦ ᖃᓄᐃᓕᐅᕐᓂᕆᔭᖏᓐᓂᑐᐃᓐᓇᐅᖏᑦᑐᖅ ᑭᓯᐊᓂ ᐱᑦᑎᐊᖅᓯᒪᓂᖏᑦ ᐃᑲᔪᖅᑎᒌᖕᓂᖏᓐᓄᑦ. ᐱᒡᒎᒃᑎᓪᓗᒋ, ᓇᓗᓇᕈᖕᓃᓚᐅᖅᑐᖅ ᖃᑉᓯᐊᕐᔪᐃᑦ ᓄᓇᕐᔪᐊᕐᒥᑦ ᐃᓚᒌᒃᑐᑦ ᐱᓕᕆᐊᖃᕐᓂᑯᖃᓚᐅᖏᑦᑐᑦ ᐊᒃᖢᓈᒥᒃ ᐊᑐᕐᓗᑎᒃ ᐊᓐᓇᒃᑐᐃᓂᕐᒥᒃ. ᑕᑯᒃᓴᐅᑎᑦᑎᔪᑦ ᓱᓕᔪᒥᒃ ᐱᓕᕆᖃᑎᒌᖃᑦᑕᕐᓂᖏᓐᓂᑦ, ᐱᓕᕆᔨᕗᑦ ᐃᑲᔪᓚᐅᖅᑐᑦ ᑐᓂᓯᑉᓗᑎᒃ ᐱᕕᖃᕐᓂᕆᔭᖏᓐᓂᑦ ᐊᒻᒪᓗ ᖃᐅᔨᒪᓂᕆᔭᖏᓐᓂᑦ, ᐊᔪᕈᖕᓃᖅᓴᐃᑉᓗᑎᒃ ᐃᓚᒌᒃᑐᓂᑦ ᐊᑐᕆᐊᓕᖏᓐᓄᑦ ᐱᖁᑎᓂᒃ ᐊᒻᒪᓗ ᑐᓂᑉᓗᒋᑦ ᐊᑐᕆᐊᖃᖅᑕᖏᓐᓂᑦ, ᐃᓚᐅᑉᓗᑎᒃ ᐊᒃᓗᓈᓕᕆᓂᕐᒧᑦ ᐊᒡᒑᓂᒃ ᐱᖃᙱᑦᑐᓄᑦ.

ᐃᑲᔪᕈᒪᓂᖏᑦ ᐅᖓᑖᓅᓚᐅᖅᑐᖅ ᐱᒡᒎᖕᓂᐅᑉ, ᐋᖅᕿᒃᓯᑉᓗᓂ ᑲᑎᓐᓂᕆᔭᖏᓐᓂᑦ ᐃᒃᐱᒍᓲᑎᖃᑦᑕᐅᑎᓂᖃᖅᖢᑎᒃ ᐊᒻᒪᓗ ᐱᐅᒋᔾᔪᑎᓂᕐᒥᒃ. ᐃᑲᔪᐃᓂᕆᔭᖏᑦ ᐊᒡᓃᑯᒃᑯᑦ ᐱᓕᕆᔨᖏᑦ ᐊᑯᓂᐅᔪᒥᒃ ᖃᐅᔨᒪᔭᐅᑎᑦᑎᓂᖃᓕᓚᐅᖅᑐᖅ, ᐊᓯᖏᓐᓄᑦ ᐱᒡᒎᖃᑕᐅᔪᓄᑦ ᐃᒃᓯᕙᖃᑎᒋᔭᐅᔪᒪᑉᓗᑎᒃ ᐱᒡᒎᖕᓂᖃᖅᑎᓪᓗᒋᑦ, ᓴᙱᒃᑎᒋᐊᖅᓯᔪᖅ ᑲᑎᓐᓂᖃᕐᓂᕐᒥᒃ ᐱᒡᒎᒃᑐᓂᑦ.

ᐊᒡᓃᑯᒃᑯᑦ ᐃᒃᓯᕙᐅᑕᖓᑦ ᑲᑎᒪᔨᓄᑦ, ᓵᓐ ᐳᐃᑦ ᐅᖃᓚᐅᕐᓂᖓᑐᑦ “[…] ᐱᐅᑦᑎᐊᖅᑐᖅ ᐊᒻᒪᓗ ᐅᐱᓐᓇᙱᑦᑐᖅ. ᓯᕗᓕᖅᑎᐅᑉᓗᖓ ᑲᒻᐸᓂᒃᑯᓐᓄᑦ, ᓴᕆᒪᒋᑦᑎᐊᖅᑕᕗᑦ ᐊᒻᒪᓗ ᐃᖢᐊᕐᓂᕐᒥᒃ ᐃᒃᐱᒍᓱᖕᓇᖅᑐᖅ ᖃᐅᔨᒪᑉᓗᓂ ᐃᓄᖁᑎᕗᑦ ᖃᓄᓗᒃᑖᖅ ᐱᓂᐊᕐᒪᑕ ᖃᐅᑕᒫᒃᑯᑦ ᓈᒻᒪᒃᑑᔪᒥᑦ ᐊᒻᒪᓗ ᐃᒃᐱᒍᓱᒡᕕᖃᕐᓗᑎᒃ ᐊᓯᓗᒃᑖᓄᑦ”

ᐃᓕᑕᖅᓯᓂᖅ ᓄᓇᕐᔪᐊᕐᒥᑦ ᑕᐅᑐᒃᑕᐅᔪᒥᑦ

ᐱᓕᕆᖃᑎᒌᑦ ᐱᓕᕆᑦᑎᐊᕐᓂᖏᑦ ᐊᒻᒪᓗ ᖃᓄᐃᓕᐅᕐᓂᕆᔭᖏᑦ ᐃᓂᑖᖅᑎᑦᑎᔪᑦ ᓄᓇᕐᔪᐊᕐᒥᑦ ᓯᕗᓕᖅᑎᐅᓂᕐᒧᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐊᐅᓛᖅᑎᑦᑎᓂᕐᓂᑦ. ᓄᓇᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᑎᒥᐅᔪᑦ ᐃᓕᑕᖅᓯᔪᑦ ᐊᔪᙱᑦᑎᐊᕐᓂᖏᓐᓂᑦ, ᐅᔪᙱᓐᓂᖃᕐᓂᒃᑯᑦ, ᐊᒻᒪᓗ ᑐᓂᓯᓂᕆᔭᖏᓐᓂᑦ ᐱᒡᒎᖕᓂᖃᖅᑎᓪᓗᒋᑦ. ᑲᓚᒻᐱᔭᒥᑦ ᐱᐊᓂᑦᑎᐊᖅᓯᒪᓂᖅ ᑲᒪᔭᖃᕐᓂᖏᓐᓂᑦ ᐱᒡᒎᒃᑎᑦᑎᓂᕐᒥᑦ, ᐃᓚᐅᑉᓗᑎᒃ ᐊᒡᓃᑯᒃᑯᑦ ᓯᕗᓕᖅᑎᖏᑦ, ᖃᐅᔨᑎᑦᑎᓚᐅᖅᑐᑦ ᐱᒻᒪᕆᐅᓂᖓᑕ ᐱᓕᕆᖃᑎᒌᖕᓂᐅᑉ ᓯᕗᒻᒧᖕᓂᐊᕐᓗᑎᒃ ᓄᓇᕐᔪᐊᕐᒥᑦ ᐅᔭᕋᒃᑕᕆᐊᒥᑦ ᐊᑦᑕᕐᓇᖅᑐᒦᑎᑦᑎᖏᓐᓂᕐᒧᑦ ᐊᑐᖅᑕᐅᔪᓂᑦ.

“ᑖᒻᓇ ᐃᓅᓯᕐᒥᑦ ᐊᑕᐅᓰᕐᓗᓂ ᐱᕕᖃᖅᑎᑦᑎᓂᐅᔪᖅ ᐊᒻᒪᓗ ᐃᓚᒌᒃᑐᑦ ᐱᒡᒎᖕᓂᕐᒥᑦ ᐱᔪᖕᓇᕐᓂᓕᒫᖏᓐᓂᑦ ᐊᑐᖅᖢᑎᒃ ᑭᒡᒐᖅᑐᐃᓚᐅᖅᑐᑦ ᐊᒡᓃᑯᒃᑯᓐᓂᑦ ᐊᒻᒪᓗ ᓄᓇᒋᔭᑉᑎᖕᓂᑦ. ᑖᒻᓇ ᓴᕆᒪᓱᒍᑎᒋᓂᖅᐹᕆᔭᕋ ᐊᒡᓃᑯᒃᑯᓐᓂᑦ ᐱᓕᕆᔨᐅᑉᓗᖓ ᑕᐃᒪᙵᓂᑦ ᐃᓚᐅᓕᕋᒪ ᑲᒻᐸᓂᒃᑯᓐᓄᑦ,” ᐅᖃᖅᑐᖅ ᔨᐊᕗᕆ ᓂᐊᕗᓪ.

ᐊᒡᓃᑯᒃᑯᑦ ᐱᓂᐊᕐᓂᕆᔭᖓᑦ ᐱᑦᑕᐅᓂᕐᒧᑦ

ᐊᒡᓃᑯᒃᑯᓐᓂᑦ, ᐅᔭᕋᒃᑕᕆᐊᒥᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᐊᓐᓇᒃᑐᐃᓂᕐᒧᑦ ᐊᐅᓛᖅᑎᑦᑎᓂᑉᑎᖕᓃᖃᑕᐅᑦᑎᐊᖅᑐᖅ, ᐊᒻᒪᓗ ᓵᓚᒃᓴᕐᓂᖏᑦ ᑕᑯᒃᓴᐅᑎᑦᑎᔪᑦ ᐱᓕᕆᐊᖃᕈᒪᓂᑉᑎᖕᓂᑦ ᖁᑦᑎᓛᖑᔪᒃᑯᑦ ᐊᑐᖅᑕᐅᖃᑦᑕᖅᑐᒃᑯᑦ ᐸᕐᓇᒃᓯᒪᓂᕐᒧᑦ. ᐃᓚᒌᒃᑐᖁᑎᑉᑕ ᐱᐊᓂᑦᑎᐊᕐᓂᖏᑦ IMRC-ᒥᑦ ᓴᙱᒃᑎᒋᐊᖅᓯᔪᖅ ᐊᒡᓃᑯᒃᑯᑦ ᐱᓂᐊᕐᓂᕆᔭᖓᓐᓂᑦ ᐊᑐᕐᓂᐊᕐᓗᑎᒃ ᐱᖅᖁᓯᖃᕐᓂᕐᒥᒃ ᐱᑦᑕᐅᑦᑎᐊᖅᑐᒥᒃ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ, ᐊᔪᕈᖕᓃᖅᓴᐃᓂᕐᒧᑦ, ᐊᒻᒪᓗ ᓄᓇᕐᔪᐊᕐᒥᑦ ᐱᓕᕆᖃᑎᒌᒍᖕᓇᕐᓂᕐᒥᒃ.

ᖁᕕᐊᒋᕙᕗᑦ ᑕᒪᕐᒥᓗᒃᑖᖅ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐃᓚᒌᒃᑐᑦ ᐊᖏᔪᐊᓗᖕᒧᑦ ᑎᑭᐅᑎᓂᕆᔭᖓᓐᓄᑦ!