ᓴᕆᒪᓱᒃᑐᒍᑦ ᖁᕕᐊᓲᑎᒋᑉᓗᒍ ᐱᓕᕆᖃᑎᕗᑦ, ᑕᐃᕕᑎ ᕿᑎᖅᖠᖅ, ᑎᑭᕋᕐᔪᐊᕐᒥᐅᑕᖅ, ᓄᓇᕗᒻᒥᑦ, ᑐᓂᔭᐅᖕᒪᑦ 2025 ᓯᑯᑲᒻ ᔨᒻ ᐃᓕᑕᕆᔭᐅᔾᔪᑎᒥᑦ. ᑐᓂᓯᔪᑦ ᑲᓇᑕᒥᑦ ᕿᓂᖅᓴᐃᔩᑦ ᐊᒻᒪᓗ ᐱᕙᓪᓕᐊᓂᕐᒧᑦ ᑲᑐᔾᔨᖃᑎᒌᒃᑯᑦ (PDAC), ᐃᓕᑕᖅᓯᔾᔪᑎ ᐃᓕᑕᖅᓯᖃᑦᑕᖅᑐᖅ ᓄᓇᖃᖅᖄᖅᑐᓂᑦ ᓯᕗᓕᖅᑎᓂᒃ ᐃᑲᔪᑦᑎᐊᖅᓯᒪᔪᓂᒃ ᐅᔭᕋᒃᑕᕆᐊᓕᕆᖃᑦᑕᖅᑐᓄᑦ.

ᑕᐃᕕᑦ ᓂᕈᐊᖅᑕᐅᓚᐅᖅᑐᖅ ᓯᕗᓕᖅᑎᐅᓂᖓᓄᑦ ᑲᑎᑦᑎᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᑦ ᒪᓕᒐᓂᒃ ᐅᔭᕋᒃᑕᕆᐊᓕᕆᓂᕐᒧᑦ. ᐊᒡᓃᑯᒃᑯᓐᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᓕᕆᔨᐅᑉᓗᓂ ᐊᒻᒪᓗ ᐅᖃᐅᔾᔨᔨᐅᑉᓗᓂ, ᑕᐃᕕᑎ ᐃᑲᔪᖅᓯᒪᔪᖅ ᑲᑎᑎᓪᓗᒋᑦ ᐃᓄᐃᑦ ᖃᐅᔨᒪᓂᕆᔭᖏᑦ ᐊᒻᒪᓗ ᖃᑉᓗᓈᑦ ᖃᐅᔨᓇᓱᒃᑐᓕᕆᓂᖏᑦ, ᓯᕗᒻᒧᒃᑎᖦᖢᒋᑦ ᐅᔭᕋᒃᑕᕆᐊᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᑦ ᓇᓕᒨᖓᔪᓂᒃ ᐃᓄᐃᑦ ᐱᒻᒪᕆᐅᒋᔭᖏᓐᓄᑦ, ᐊᕙᑎᒧᑦ ᐱᔭᒃᓴᐅᑎᖃᕐᓂᕐᒧᑦ ᐊᒻᒪᓗ ᓄᓇᓕᒃ ᖃᓄᐃᖏᑦᑎᐊᕐᓂᖓᓄᑦ.

ᑎᑭᐅᑎᓯᒪᓂᖅ ᓴᓇᔭᖏᓐᓄᑦ ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᑦ, ᑲᑎᑎᑦᑎᑉᓗᓂ 20 ᐅᖓᑖᓄᑦ ᐃᓐᓇᕆᔭᐅᔪᓂᑦ 7-ᖑᔪᓂᑦ ᓄᓇᓕᖕᓂᑦ. ᓯᕗᓕᖅᑎᐅᑉᓗᓂ, ᑭᕙᓪᓕᕐᒥᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᒃᑯᓐᓄᑦ ᐱᒻᒪᕆᐅᔪᒥᒃ ᐃᑲᔪᖃᑦᑕᖅᑐᑦ ᓂᕐᔪᑎᓂᒃ ᐊᐅᓚᑦᑎᓂᕐᒧᑦ, ᐃᒪᕐᒥᒃ ᑲᒪᔭᖃᕐᓂᕐᒧᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᒻᒪᓗ ᓄᓇᓕᖕᒥᐅᖃᑎᒌᑦ ᐱᕙᓪᓕᐊᓂᖏᓐᓄᑦ ᑕᓯᕐᔪᐊᕐᒥᑦ ᐊᒻᒪᓗ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᓄᑦ. ᐱᓕᕆᐊᖓ ᐱᖅᖁᓯᕆᔭᐅᔪᑦ ᐃᓗᐃᑦᑑᖓᑎᓐᓂᐊᕐᓗᒋᑦ ᐃᓐᓇᕆᔭᐅᔪᑦ ᑲᑎᒪᔨᐊᓛᒃᑯᓐᓂᑦ ᐅᖃᓪᓗᕆᒃᓴᖅᑎᑦᑎᖃᑦᑕᖅᑐᖅ ᐃᓄᒃᑎᑑᖅᖢᑎᒃ, ᓴᙱᒃᑎᒋᐊᖅᓯᑉᓗᓂ ᓄᓇᓕᖕᒥᑦ ᐃᓚᐅᖃᑕᐅᑎᑦᑎᓂᕐᒧᑦ ᐊᒻᒪᓗ ᐊᓯᐅᔨᑦᑕᐃᓕᓂᕐᒧᑦ ᐃᓄᐃᑦ ᐱᖅᖁᓯᕆᔭᖏᓐᓂᑦ.

ᓱᓵᓐ ᓕᒃᓕᐅᕐ, ᓄᓇᓕᖕᒥᑦ ᐱᓕᕆᖃᑎᒌᒃᑐᓕᕆᓂᕐᓄᑦ ᐊᖓᔪᖅᖄᕆᔭᐅᔪᖅ ᐅᖃᓚᐅᖅᑐᖅ, “ᑕᐃᕕᑎ ᐅᒃᐱᕆᔭᖃᓚᐅᖅᑐᖅ ᐅᑎᖅᑎᑦᑎᓂᖅ ᐃᓐᓇᕆᔭᐅᔪᑦ ᐃᓚᐅᖃᑕᐅᓂᖏᓐᓄᑦ ᐱᒋᐊᓵᖅᑎᓪᓗᒍ ᓄᓇᕗᒻᒧᑦ ᐊᖏᖃᑎᒌᒍᑎᒧᑦ ᐋᔩᖃᑎᒌᖕᓃᑦ ᐃᑲᔪᕐᓂᐊᕐᓗᒋᑦ ᓄᓇᓕᖕᒥᑦ ᖁᒡᕙᖅᓯᓂᕐᓄᑦ ᑕᐅᑐᒐᕆᓚᐅᖅᑕᖏᓐᓂᑦ ᐅᔭᕋᒃᑕᕆᐊᓕᕆᓂᕐᒥᑦ. ᐅᑉᓗᒥ, ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᒃᑯᑦ ᐱᓕᕆᐊᖃᐃᓐᓇᕐᓂᖏᑦ ᐊᕙᑎᒥᒃ ᑲᒪᔨᐅᓂᕐᒧᑦ ᑲᔪᓯᓯᒪᔪᖅ ᐊᑕᐅᑦᑎᒃᑯᑦ ᐃᑲᔪᕐᓂᐊᕐᓗᒋᑦ ᑭᖑᕚᕆᔭᐅᔪᑦ ᐱᔭᕆᐊᓕᖏᓐᓂᒃ ᐊᔪᙱᓐᓂᖅᑖᖅᐸᓪᓕᐊᓂᕐᒥᑦ. ᐊᒡᓃᑯᒃᑯᑦ ᖁᕕᐊᓱᒃᑐᑦ ᐱᓕᕆᖃᑎᒋᖃᑦᑕᕐᓗᒋᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᒃᑯᑦ ᐊᑕᐅᓯᕐᒥᒃ ᑕᒪᑐᒥᙵᑦ ᑕᐅᑐᒐᖃᕐᓗᑎᒃ.”

ᑕᐃᕕᑎᐅᑉ ᓯᕗᓕᖅᑎᐅᓂᖓ ᑎᑭᐅᑎᓯᒪᔪᖅ ᓄᓇᓕᖕᒥᑦ ᐱᓕᕆᐊᒃᓴᐅᔪᓄᑦ, ᐃᓚᐅᑉᓗᑎᒃ ᐃᑲᔪᓚᐅᕐᓂᖓ ᓴᖅᕿᑕᐅᓂᖓᓄᑦ $5 ᒥᓕᔭᓐᓂᒃ ᐃᓄᙳᐃᓂᖅ ᐱᓕᕆᐊᕐᒧᑦ, ᐃᑲᔪᓚᐅᖅᖢᓂ ᐅᑉᓛᕈᒥᑕᖅᑎᑦᑎᓂᕐᓄᑦ ᑐᕌᖓᔪᓂᑦ ᐊᒻᒪᓗ ᐅᖃᓕᒫᕆᐅᒃᓴᑎᑦᑎᓂᕐᓄᑦ ᓄᑕᖅᖃᓂᑦ. ᑭᒡᒐᖅᑐᐃᓂᖓ ᐋᖅᕿᒃᓯᓯᒪᖕᒥᔪᖅ ᐊᒡᓃᑯᒃᑯᑦ ᒪᓕᒐᓕᕆᓂᕐᒧᑦ ᐊᑐᖅᑕᖓᓐᓂᑦ, ᐋᖅᕿᒃᓯᑉᓗᓂ ᐃᓚᓕᐅᑎᔭᐅᓂᐊᕐᓂᖏᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐱᒻᒪᕆᐅᒋᔭᐅᔪᑦ ᐱᔭᒃᓴᐅᑎᖃᕐᓂᒃᑯᑦ ᐱᕝᕕᐅᖃᑦᑕᖅᑐᒥᒃ ᐱᕙᓪᓕᐊᓂᖅ.

ᐱᑎᑦᑎᓂᖓ ᑎᑭᐅᑎᔪᖅ ᓄᓇᕗᑦ ᐅᖓᑖᓅᑦ, ᐱᔪᒪᓂᖃᓕᖅᑎᑦᑎᓯᒪᔪᖅ ᐅᖃᐅᔾᔨᔨᐅᔪᓂᑦ ᐳᕆᑎᔅ ᑲᓚᒻᐱᔭᒥᑦ ᐊᒻᒪᓗ ᐃᑲᔪᖅᖢᓂ ᑲᓇᑕᒥᑦ ᐅᖃᓪᓗᕆᒃᓴᐅᑕᐅᔪᓄᑦ UNDRIP-ᒧᑦ (ᑲᑎᓯᒪᔪᑦ ᓄᓇᖅᖃᑎᒌᓄᑦ ᐅᖃᕐᓂᕋᐅᑎ ᐱᔪᖕᓇᐅᑎᖏᓐᓄᑦ ᓄᓇᖃᖅᖄᖅᑐᑦ ᐃᓄᐃᑦ) ᒪᓕᒐᕐᒥᑦ. ᐱᓕᕆᓂᖓ ᐱᖅᖁᓯᕆᔭᐅᔪᒥᒃ ᐊᓯᐅᔨᑦᑕᐃᓕᓂᕐᒧᑦ, ᐊᑐᖅᑕᐅᖏᓐᓇᕈᖕᓇᕐᓂᖓᓄᑦ, ᐊᒻᒪᓗ ᓄᓇᖃᖅᖄᖅᑐᑦ ᓯᕗᓕᖅᑎᐅᓂᖏᑦ ᐊᕙᓗᓯᒪᔪᖅ ᐱᑎᑦᑎᓂᕆᔭᖓᓄᑦ ᓯᑯᑲᒻ ᔨᒻ ᐃᓕᑕᕆᔭᐅᔾᔪᑎ.

ᑕᐃᕕᑎᐅᑉ ᐅᐱᒋᔭᐅᓂᖅ ᐱᖕᒪᒍ ᐅᖃᓚᐅᖅᑐᖅ, “ᐃᓕᑕᕆᔭᐅᔾᔪᑎ ᑕᑯᒃᓴᐅᑎᑦᑎᔪᖅ ᐃᓱᒪᑐᓂᖏᓐᓂᑦ ᐃᓐᓇᕆᔭᐅᔪᖁᑎᑉᑕ ᐊᒻᒪᓗ ᓴᙱᓂᕆᔭᖓ ᓄᓇᓕᑉᑕ. ᐃᓄᐃᑦ ᖃᐅᔨᒪᔭᑐᖃᖏᑦ ᐅᕙᑉᑎᖕᓂᑦ ᐃᑲᔪᐃᓐᓇᖅᓯᒪᔪᑦ, ᐊᒻᒪᓗ ᓴᕆᒪᓱᒃᑐᖓ ᐃᑲᔪᕈᖕᓇᕋᒪ ᐃᓚᓕᐅᑎᔭᐅᓂᖏᑦ ᖃᐅᔨᒪᓂᕆᔭᐅᔪᑦ ᐅᔭᕋᒃᑕᕆᐊᓕᕆᓂᕐᓄᑦ. ᐃᒃᐱᒍᓱᒡᕕᒋᒍᑉᑎᒍᑦ ᐱᖅᖁᓯᕆᔭᕗᑦ ᐊᒻᒪᓗ ᐱᓕᕆᖃᑎᒌᒡᓗᑕ, ᓴᙱᓂᖅᓴᒥᒃ ᓯᕗᓂᒃᓴᖃᖅᑎᑦᑎᔪᒍᑦ ᐊᑯᓂᐅᔪᒧᑦ.”

ᖁᕕᐊᒋᕙᑉᑎᒋᑦ, ᑕᐃᕕᑎ! ᐱᓕᕆᓃᑦ ᐋᖅᕿᒃᓯᓯᒪᔪᖅ ᓯᕗᓂᒃᓴᒥᒃ ᐊᔪᙱᑦᑐᒃᑯᑦ ᐅᔭᕋᒃᑕᕆᐊᓕᕆᓂᕐᒥᑦ ᐊᒻᒪᓗ ᓴᙱᒃᑎᑎᓪᓗᒋᑦ ᓄᓇᖃᖅᖄᖅᑐᓄᑦ ᓂᐱᒋᔭᐅᔪᑦ ᐅᔭᕋᒃᑕᕆᐊᓂᑦ ᐱᓕᕆᕝᕕᐅᔪᓂᑦ.