ᐊᒥᕋᐃᔭᕐᕕᐅᓚᐅᖅᑐᒥᑦ, ᖁᕕᐊᓲᑎᖃᖅᑎᓪᓗᒋᑦ ᑕᓯᕐᒥᑦ ᖃᒪᓂᑦᑐᐊᕐᒥᑦ, ᐊᒡᓃᑯᒃᑯᑦ ᓄᓇᕗᒻᒥᑦ ᐱᓕᕆᖃᑎᖃᓚᐅᖅᑐᑦ ᑲᓇᑕᒥᑦ ᓯᕗᓪᓕᖅ ᐅᖃᓕᒫᒐᖅ-ᑯᓐᓂᑦ ᑐᑭᖃᖅᑐᒃᑯᑦ ᐃᑲᔪᕐᓂᐊᕐᓗᑎᒃ ᒪᒃᑯᒃᑐᓂᒃ ᓄᓇᕗᒻᒥᑦ. ᐱᓕᕆᐊᖑᔪᖅ ᐋᖅᕿᐅᒪᓚᐅᖅᑐᖅ ᐱᔪᒪᓕᖅᑎᓐᓂᐊᕐᓗᒋᑦ ᓄᑕᖅᖃᐃᑦ ᐱᑦᑕᐅᔪᒥᒃ ᐅᖃᓕᒫᒐᓂᒃ ᐱᔪᖕᓇᕐᓂᐊᕐᓗᑎᒃ, ᖁᕕᐊᒋᓗᒍ ᐅᖃᓕᒫᕐᓂᖅ ᐊᒻᒪᓗ ᐃᓕᑦᑎᕙᓪᓕᐊᓗᑎᒃ ᐅᑭᐅᑕᖅᑐᒦᓪᓗᑎᒃ.

ᐱᓕᕆᐊᖑᑎᓪᓗᒍ, ᑲᓇᑕᒥᑦ ᓯᕗᓪᓕᖅ ᐅᖃᓕᒫᒐᖅ-ᑯᑦ ᑐᓂᐅᖅᖃᐃᓚᐅᖅᑐᑦ 2000 ᐅᖓᑖᓅᖅᑐᓂᒃ ᓄᑖᓂᒃ ᐅᖃᓕᒫᒐᓂᒃ ᓄᑕᖅᖃᓄᑦ ᐅᑭᐅᓕᖕᓄᑦ 5-ᒥᑦ 15-ᒧᑦ. ᐱᓕᕆᐊᖅ ᐃᑲᔪᕐᓂᐊᕐᓗᓂ ᓄᓇᓕᖕᒥᑦ ᒪᒃᑯᒃᑐᓂᑦ ᐅᖃᓕᒫᒐᖅᑖᖅᑎᓪᓗᒋᑦ ᓄᓇᕐᔪᐊᕐᒥᑦ ᑕᑯᔾᔪᑎᐅᓗᑎᒃ, ᐊᑕᐅᑦᑎᒃᑯᑦ ᑕᑯᒃᓴᐅᑎᓪᓗᒋᑦ ᓇᖕᒥᓂᖅ ᐊᔾᔨᒌᙱᑦᑐᓂᒃ ᐊᑐᖅᓯᒪᔭᖏᑦ. ᐃᓚᖏᓐᓂᑦ ᐱᓕᕆᐊᖑᔪᒥᑦ ᐊᔾᔨᐅᖏᑦᑐᒃᑯᑦ ᐅᖃᓕᒫᖅᑎᑕᐅᓚᐅᖅᑐᑦ ᓯᓐᓇᒃᓴᐃᓐᓇᖅᓯᔪᖅ-ᒥᑦ (It’s Time for Bed) ᐅᖃᓕᒫᓕᐅᖅᑐᒥᑦ ᐊᒻᒪᓗ ᑎᑎᕋᐅᔭᖅᑐᒥᑦ ᓯᐳᕋ ᒥᐅᕐᓐᔅ ᐊᒻᒪᓗ ᔨᐅᕆᒥ ᑎᐱᐊᑭ-ᒥᑦ, ᑕᒪᕐᒥᒃ ᐃᖃᓗᖕᒥᐅᑖᒃ. ᑕᐃᑲᓃᓐᓂᖏᑦ ᑕᑯᒃᓴᐅᑎᑦᑎᓚᐅᖅᑐᑦ ᐱᒻᒪᕆᐅᓂᖓᑕ ᐅᓂᑉᑳᕐᓂᖅ ᐱᓯᒪᔪᓂᑦ ᓄᓇᖃᖅᖄᖅᑐᑦ ᐱᖅᖁᓯᖏᓐᓂᑦ, ᒪᒃᑯᒃᑐᓂᒃ ᐅᖃᓕᒫᖅᑎᓂᒃ ᑲᑎᑎᑦᑎᔪᖅ ᐅᓂᑉᑳᓄᑦ ᑕᑯᒃᓴᐅᑎᑦᑎᔪᓂᒃ ᓇᑭᙶᖅᓯᒪᓂᕆᔭᖓᓐᓂᑦ.

ᓯᕗᓪᓕᖅ ᐅᖃᓕᒫᒐᖅ-ᑯᑦ ᐱᓕᕆᐊᕆᔭᖓᑦ ᒥᒃᖠᒋᐊᕐᓂᐊᕐᓗᒋᑦ ᐃᓕᓐᓂᐊᕐᕕᖕᒥᑦ ᐊᔪᕐᓂᕆᔭᐅᔪᑦ ᓴᙱᔪᒥᒃ ᐱᒋᐊᖅᑎᑦᑎᓂᖃᓚᐅᖅᑐᖅ ᓄᓇᕗᒻᒥᑦ, ᑖᑉᑯᐊ ᑐᓂᕐᕈᑎᖃᖅᖢᑎᒃ $51,000-ᓗᐊᓂᒃ ᐊᑭᖃᖅᑐᓂᒃ ᐅᖃᓕᒫᒐᓂᑦ ᖃᒪᓂᑦᑐᐊᕐᒥᐅᓄᑦ. ᐅᖃᓕᒫᒐᐃᑦ ᐊᑐᖅᑕᐅᖏᓐᓇᕐᓂᐊᖅᑐᑦ ᐃᓕᓐᓂᐊᕐᕕᖕᓂᑦ, ᐸᐃᕆᕝᕕᖕᓂᑦ, ᐊᒻᒪᓗ ᖃᑕᙳᑎᒌᓂᑦ ᐱᓕᕆᐊᓂᒃᑎᓪᓗᒋᑦ, ᐊᑐᖅᑕᐅᔭᕆᐊᖃᖅᑐᓂᒃ ᐱᖃᖅᑎᑦᑎᓗᑎᒃ ᐃᑲᔪᖅᑐᓂᒃ ᐅᖃᓕᒫᒋᐅᖅᓴᓂᕐᒥᒃ.

ᕼᐃᐊᑐ ᕙᑯᕼᐊᕐᓴᓐ, ᐊᖓᔪᖅᖄᖅ ᓯᕗᓪᓕᖅ ᐅᖃᓕᒫᒐᖅ-ᑯᓐᓄᑦ, ᖃᐅᔨᑎᑦᑎᓚᐅᖅᑐᖅ ᖁᕕᐊᒋᓂᕆᔭᖓᓂᑦ. “ᖁᔭᓕᔪᒍᑦ ᐱᕕᖃᖅᑎᑕᐅᓚᐅᕋᑉᑕ ᐱᔨᑦᑎᕐᓂᐊᕐᓗᒋᑦ ᖃᒪᓂᑦᑐᐊᕐᒥᐅᑕᐃᑦ […] ᐅᐱᓐᓇᓚᐅᖅᑐᖅ ᐅᖃᓪᓚᖃᑎᒋᑉᓗᒋᑦ ᐃᓚᖏᑦ ᐃᓐᓇᕆᔭᐅᔪᑦ ᐅᖃᓕᒫᒐᖅᑖᕆᐊᖅᑐᕐᒪᑕ ᖃᑕᙳᑎᖏᓐᓄᑦ.”

ᐱᓕᕆᐊᖑᔪᑦ ᓴᙱᔪᒥᒃ ᐃᖅᖃᐃᑎᑦᑎᓂᐅᔪᖅ ᐱᒻᒪᕆᐅᓂᖓᑕ ᐃᑲᔪᕐᓂᐊᕐᓗᒋᑦ ᓄᓇᓕᖕᒥᑦ ᐊᔪᙱᓐᓂᕆᔭᐅᔪᑦ ᐊᒻᒪᓗ ᐃᓱᒪᒋᔭᐅᔪᓂᒃ ᓄᓇᕗᒻᒥᑦ, ᐃᑲᔪᕐᓗᒋᑦ ᒪᒃᑯᒃᑐᐃᑦ ᐃᓱᒪᖏᑦ ᐱᕈᖅᑎᓪᓗᒋᑦ ᐊᒻᒪᓗ ᐊᔪᙱᓪᓗᑎᒃ ᑐᓂᕐᕈᑎᐅᔪᒃᑯᑦ ᐅᖃᓕᒫᕐᓂᕐᒧᑦ.