ᓇᓗᓇᙱᑦᑐᖅ ᓴᙱᔪᒥᒃ ᐅᖃᓕᒫᕐᓂᕐᒥᒃ ᐊᔪᙱᓐᓂᐅᔪᓂᒃ ᐊᒃᑐᖅᓯᓂᖃᕐᓂᖓ ᐱᓕᕆᐊᖃᕈᒪᓂᕐᒥᒃ ᐊᒻᒪᓗ ᖃᓄᐃᖏᑦᑎᐊᕐᓂᖓᓄᑦ ᐃᓅᓯᖅ ᑐᓂᓯᓂᕐᒥᒃ ᐃᓕᓐᓂᐊᒃᑲᓐᓂᕐᓂᐅᔪᒥᒃ, ᐱᓕᕆᐊᖅᑖᕐᓂᕐᒧᑦ ᐊᒻᒪᓗ ᐊᔪᕈᖕᓃᖅᓴᐃᓂᕐᒧᑦ ᐱᕕᖃᕐᓂᐅᔪᓂᒃ.  ᑭᓯᐊᓂ, ᑭᓇᓗᒃᑖᕐᒧᑦ ᐊᔪᕐᓇᖅᑑᖏᑦᑐᖅ ᐅᖃᓕᒫᒐᓂᒃ ᐱᔪᖕᓇᕐᓗᑎᒃ, ᐃᓕᓐᓂᐊᕐᕕᖕᒥᑦ ᖃᕆᐊᕐᒥᐅᒐᓗᐊᖅᐸᑦ ᐅᕝᕙᓘᓐᓃᑦ ᐊᖏᕐᕋᕆᔭᐅᔪᒥᑦ, ᐊᒻᒪᓗ ᑕᒪᓐᓇ ᓱᓕᓗᐊᖅᑐᖅ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ.  ᑕᐃᒪᓐᓇ ᐊᓚᐃᓐ ᓵᕐᓚᓐ, ᐸᕐᓇᐃᔨ ᐋᖅᑭᒃᓱᖅᑕᐅᔭᕆᐊᓕᖕᓄᑦ, ᐊᐳᖅᑎᓐᓈᖅᑐᒥᑦ, ᐊᒻᒪᓗ ᐊᒡᓃᑯᒃᑯᓐᓂᑦ ᓄᓇᓕᖕᒥᑦ ᐱᓕᕆᖃᑎᒋᔭᐅᔪᓄᑦ, ᑕᑯᓚᐅᖅᑐᑦ ᐱᕕᖃᕐᓂᐅᔪᖅ ᓯᕗᒻᒧᒃᑎᓪᓗᒍ ᐊᒻᒪᓗ ᐊᔾᔨᐅᖏᑦᑐᖅᑕᖃᖅᑎᓪᓗᒍ ᖃᒪᓂᑦᑐᐅᕐᒥᑦ.

ᐃᓚᒋᔭᐅᓗᓂ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᑉᑎᖕᓂᑦ ᐃᓄᓗᒃᑖᓄᑦ ᑲᑐᔾᔨᖃᑎᒌᓄᑦ, ᐊᓚᐃᓐ ᐃᓚᐅᖃᑕᐅᑦᑎᐊᕐᓂᖃᓚᐅᖅᑐᖅ ᑲᑎᖅᓱᐃᓂᕐᒧᑦ, ᐋᖅᑭᒃᓱᕐᓗᒋᑦ ᐊᒻᒪᓗ ᑐᓂᐅᖅᑲᐅᑎᒋᓗᒋᑦ ᐊᔾᔨᒌᙱᑦᑐᑦ ᑐᓂᕐᕈᑕᐅᔪᑦ ᐊᓐᓄᕌᑦ ᓄᓇᓕᖕᒥᐅᓄᑦ ᐃᓄᖏᓐᓄᑦ ᑲᒪᓂᑦᑐᐊᕐᒥᐅᓄᑦ.  ᑭᓯᐊᓂ ᒫᓐᓇᓵᖑᔪᖅ ᐊᐃᓯᒪᑉᓗᓂ ᐱᓕᕆᐊᕆᑉᓗᒋᑦ ᑐᓂᕐᕈᑕᐅᓵᖅᑐᑦ ᐊᐅᓪᓚᖅᑎᓐᓂᐊᖅᖢᒋᑦ ᐊᓈᓇᖓ ᖃᐃᓚᐅᖅᑐᖅ ᐊᐱᕆᑉᓗᓂᓗ ᐅᖃᓕᒫᒐᓂᒃᑕᐅᖅ ᐱᔭᕆᐊᖃᕐᒪᖔᑕ – ᐃᓚᐅᒐᒥ ᑲᑐᔾᔨᖃᑎᒌᒋᔭᖓᓂᑦ ᐊᕐᕌᒍᑕᒫᒃᑯᑦ ᐅᖃᓕᒫᓕᕆᖃᑦᑕᖅᖢᑎᒃ ᐱᑕᖃᐅᕋᒥ ᖃᑉᓗᓈᑎᑑᖅᑐᓂᒃ.  ᑲᑐᔾᔨᖃᑎᒌᒃ ᐱᓕᕆᖃᑦᑕᖅᑐᑦ ᓄᓇᕐᔪᐊᖅ ᐃᓂᑦᑎᐊᕙᐅᓂᖅᓴᐅᑎᑦᑐᒪᑉᓗᒍ.

ᖃᑉᓯᐊᕐᔪᑐᐃᓐᓇᐅᖏᖦᖢᑎᒃ ᐅᖃᓕᒫᒐᐃᑦ – ᑭᓯᐊᓂ ᐊᒥᓱᒻᒪᕆᐅᓚᐅᖅᑐᑦ!  ᓄᑕᖅᑲᓄᑦ ᐅᖃᓕᒫᒐᓂᑦ ᐊᒻᒪᓗ ᐅᓂᑉᑳᒥᐊᓂᑦ ᑲᓇᑕᓗᒃᑖᕐᒥᑦ ᓄᓇᓕᕆᓂᐅᔪᓄᑦ, ᖁᕕᐊᒋᔭᐅᔪᖅ ᐃᓅᓱᖅ-ᒧᑦ ᐊᒻᒪᓗ ᓱᓇᑐᐃᓐᓇᓕᕆᓂᕐᓄᑦ ᐅᖃᓕᒫᒐᓄᑦ, ᐊᒻᒪᓗ ᐊᑐᖅᑕᐅᕙᒃᑐᓕᕆᓂᕐᓄᑦ ᐊᒻᒪᓗ ᐃᑯᒪᓕᕆᓂᕐᓄᑦ!  ᑲᑎᓗᒃᑖᖅᖢᒋᑦ, ᒪᕐᕉᖕᓂᒃ ᑕᑖᖅᑑᖕᓂᑦ ᕿᔪᐊᔪᓂᒃ ᑲᓕᔾᔪᑕᐅᖃᑦᑕᖅᑐᑦ ᑕᑖᓛᐅᖅᑐᑦ ᐅᖃᓕᒫᒐᑦᑎᐊᕙᖕᓂᒃ ᐅᖁᒪᐃᓐᓂᖃᖅᖢᑎᒃ 850 ᑭᓗᒡᕌᒻ ᐅᖓᑖᓄᑦ!

ᑕᑯᖕᒪᒋᑦ, ᐊᓚᐃᓐ ᐃᓱᒪᒃᓴᖅᓯᐅᓕᓚᐅᖅᑐᖅ ᖃᓄᖅ ᐅᓯᔭᐅᑎᑦᑐᖕᓇᕐᒪᖔᒋᑦ ᐊᒡᔭᖅᑕᐅᓗᑎᒃ ᓄᓇᕗᒻᒧᑦ ᐊᑭᑐᓗᐊᙱᒋᐊᖅᑐᒃᑯᑦ.  ᑎᖕᒥᓲᒃᑯᑦ ᐅᑭᐅᖅᑕᖅᑐᒧᑦ ᐊᐅᓪᓚᖅᑎᓐᓂᐊᕐᓗᒋᑦ ᐊᑭᖃᕋᔭᖅᑐᑦ $8.00 ᐊᑕᐅᓯᖅ ᑭᓗᒡᕌᒻ-ᒧᑦ, ᓯᑲᐅᒃᑯᓪᓕ ᐊᐅᓪᓚᖅᑎᑉᐸᑕ $0.50-ᑐᕋᔭᖅᖢᓂ ᐊᑕᐅᓯᖅ ᑭᓗᒡᕌᒃ-ᒧᑦ, ᓇᓗᓇᙱᓕᓚᐅᖅᑐᖅ ᐊᐅᓪᓚᖅᑎᓪᓗᒋᑦ ᑕᕆᐅᒃᑯᑦ.

ᐊᓚᐃᓐ ᐅᖃᖃᑎᖃᓕᓚᐅᖅᑐᖅ ᐱᓕᕆᖃᑎᒋᔭᖏᓐᓂᒃ ᐊᒡᓃᑯᒃᑯᓐᓂᑦ, ᓗᒃ ᓱᐃᓈᑦ-ᒧᑦ, ᓱᓇᑐᐃᓐᓇᓄᑦ ᐊᐅᓚᑦᑎᔨᐅᔪᖅ – ᐊᐳᖅᑎᓐᓈᖅᑐᒥᑦ, ᐅᖃᐅᑎᑉᓗᒍ ᑭᑐᓗᒃᑖᓂᒃ ᐃᑲᔪᕐᓂᖃᕐᓂᐊᕐᒪᑦ ᐃᓂᓕᐅᕐᓗᒋᑦ ᐅᖃᓕᒫᒐᐃᑦ ᐃᓚᖓᓐᓄᑦ ᓯᑲᐅᒋᖃᑦᑕᖅᑕᖏᓐᓄᑦ ᐅᓯᔭᐅᑎᓪᓗᒋᑦ ᐊᒡᓃᑯᒃᑯᑦ ᐊᕐᕌᒍᑕᒫᖅ ᑎᑭᑎᖃᑦᑕᖅᑕᖓᓐᓄᑦ ᑕᑖᑦᑎᐊᕋᔪᒃᖢᑎᒡᓗ ᐅᑭᐅᓗᒃᑖᕐᒧᑦ ᐊᑐᖅᑕᐅᔭᕆᐊᖃᓗᐊᖅᑐᖏᓐᓂᒃ ᐱᓕᕆᐊᖏᓐᓄᑦ ᐅᔭᕋᒃᑕᕆᐊᕐᒥᑦ.

ᑕᒪᓐᓇ ᐊᔪᕐᓇᙱᑦᑑᔭᖅᑐᖅ ᐱᓕᕆᐊᕆᓗᒍ, ᐊᖏᔪᒥᒃ ᑲᑐᔾᔨᖃᑎᒌᖕᓂᒃᑯᑦ ᐱᓕᕆᐊᖑᔭᕆᐊᖃᓚᐅᖅᑐᑦ ᐊᐅᓪᓚᖅᑎᓐᓂᐊᕐᓗᒋᑦ, ᐊᒻᒪᓗ ᐃᓚᐅᖃᑕᐅᔪᑦ ᐊᓈᓇᖓᑕ ᑲᑐᔾᔨᖃᑎᒌᖓᑦ ᑐᓂᕐᕈᑎᖃᖅᑐᑦ ᐅᖃᓕᒫᒐᓂᒃ, ᐊᐅᓪᓚᖅᑎᓪᓗᒋᑦ ᐊᐅᓪᓚᖅᑎᑦᑎᔨᓄᑦ ᐊᒻᒪᓗ ᐊᓯᖏᑦ ᐊᒡᓃᑯᒃᑯᓐᓄᑦ ᐱᓕᕆᖃᑎᖃᖅᑐᑦ.  ᐱᓕᕆᖃᑎᒌᖕᓂᖃᕆᐊᖃᓚᐅᖅᑐᖅ ᐊᒡᓃᑯᒃᑯᓐᓄᑦ ᐱᓕᕆᔨᐅᔪᒥᒃ ᑯᐊᑦᓂ ᓯᑯᐊᐅᔅ, ᐊᖓᔪᒃᖠᖅ IIBA-ᒥᒃ ᑐᑭᒧᐊᒃᑎᑦᑎᔨ, ᓄᓇᓕᖕᒥᑦ ᐱᓕᕆᖃᑎᒌᒃᑐᓕᕆᔨᒃᑯᓐᓄᑦ, ᐊᒻᒪᓗ ᑭᐊᕆᓐ ᔨᑉ, ᖃᒪᓂᑦᑐᐊᕐᒥᑦ ᓄᓇᓕᖕᒥᑦ ᑲᒪᓂᕐᓄᑦ ᑐᑭᒧᐊᒃᑎᑦᑎᔨ.

ᑕᒪᓗᒃᑖᕐᒧᑦ, ᐱᓕᕆᓂᐅᔪᖅ ᐅᑭᐅᓗᒃᑖᖅ ᑲᒪᒋᔭᐅᓚᐅᖅᑐᖅ ᐊᒻᒪᓗ ᐱᐊᓂᒃᖢᓂ ᐅᖃᓕᒫᒐᐃᑦ ᐊᓈᓇᖓᑕ ᑲᑐᔾᔨᖃᑎᒌᒃᑯᑦ ᐊᐅᓪᓚᖅᑎᖦᖢᓂᒋᑦ Becancour-ᒧᑦ – ᓄᓇᓕᒃ ᐊᒡᓃᑯᒃᑯᑦ ᓯᑲᐅᖏᑦ ᐊᐅᓪᓚᕆᐊᕐᕕᖃᖃᑦᑕᖅᑕᖓᓂᑦ ᐅᑭᐅᖅᑕᖅᑐᒧᙵᐅᓂᐊᖅᖢᑎᒃ ᐊᒻᒪᓗ ᐃᓂᑖᖅᑎᑕᐅᑉᓗᑎᒃ ᓯᑲᐅᒥᑦ ᖃᒪᓂᑦᑐᐊᕐᒧᑦ.

ᑎᑭᒻᒪᑕ ᐅᖃᓕᒫᒐᐃᑦ ᐅᖃᖃᑎᒋᑉᓗᒍ ᑭᐅᕆᓐ ᔨᑉ ᐅᖃᖅᖢᓂ ᒐᕙᒪᒃᑯᓐᓄᑦ ᐃᒡᓗᖁᑎᒋᔭᐅᔪᑦ ᓄᓇᓕᐊᓛᓂᑦ ᐊᑕᐅᓯᐅᙱᑦᑐᒧᑦ ᐊᑐᖅᑕᐅᖃᑦᑕᕐᓂᖏᓐᓄᑦ, ᐅᖃᓕᒫᒐᖃᕐᕕᒃ ᖃᒪᓂᑦᑐᐊᕐᒧᓗᒃᑖᖅ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖕᒦᓐᓂᕋᖅᖢᓂᐅᒃ.

“ᑕᕆᐅᒃᑯᑦ ᐊᒥᓱᓂᒃ ᒪᐊᓕᓂᒃ ᐃᖏᕐᕋᖅᑳᖅᑎᓪᓗᒋᑦ, ᑐᓂᕐᕈᑕᐅᔪᑦ ᐅᖃᓕᒫᒐᐃᑦ Sherbrooke Rotary Club-ᑯᓐᓂᑦ ᐊᓚᐃᓐ ᐊᓈᓇᖓᑕ ᑲᑐᔾᔨᖃᑎᒌᒃᑯᖏᓐᓂᑦ ᑎᑭᓚᐅᖅᑐᑦ ᔫᓇ ᐊᒥᑦᓈᖅ ᐃᓕᓐᓂᐊᕐᕕᖕᒧᑦ ᐅᒃᑑᐱᕆᒥᐅᓚᐅᖅᑐᖅ.  ᐊᒡᔭᖅᑕᐅᔪᑦ ᑲᒪᒋᔭᐅᑦᑎᐊᖅᖢᑎᒃ ᐱᓕᕆᐊᖑᓚᐅᖅᑐᑦ, ᐊᔪᙱᓐᓂᖃᕐᓂᒃᑯᑦ ᐊᒻᒪᓗ ᓇᓚᐅᑦᑎᑦᑎᐊᕐᓂᒃᑯᑦ ᑕᒪᓐᓇ ᖃᐅᔨᓯᒪᓕᖅᑕᕋ ᐱᖅᑯᓯᕆᔭᖓᑦ ᐊᒡᓃᑯᒃᑯᑦ”, ᐅᖃᖅᑐᖅ ᑭᐊᕆᓐ.  ᐅᖃᖅᖢᓂᓗ, “ᐃᓚᖏᑦ ᐅᖃᓕᒫᒐᐃᑦ ᕇᑦᓱᓪ ᐊᕐᓇᒻᒪᒃᑎᖅ ᐃᓕᓐᓂᐊᕐᕕᖕᒧᐊᖅᑕᐅᓚᐅᕐᒥᔪᑦ ᒪᓂᒪᑎᑕᐅᑉᓗᑎᒡᓗ ᐊᖓᔪᖅᑳᕆᔭᐅᔪᓄᑦ ᐊᒻᒪᓗ ᓱᕈᓯᐅᓂᖅᓴᐅᔪᓄᑦ ᓄᑕᖅᑲᓄᑦ ᐊᖏᕐᕋᐅᑎᔪᖕᓇᕐᓂᐊᕐᓗᒋᑦ ᖁᑦᑎᖕᓂᖅᓴᒥᑦ ᐃᓕᓐᓂᐊᕐᕕᖕᒥᑦ.  ᐅᖃᓕᒫᒐᖅᑕᖃᐅᓚᐅᖅᑐᖅ ᐊᔾᔨᒌᙱᑦᑐᓄᑦ ᐅᑭᐅᓕᓗᒃᑖᓄᑦ.  ᐊᒻᒪᓗ ᑭᖑᓪᓕᖅᐹᖅ, ᑐᓂᕐᕈᑕᐅᔪᑦ ᐃᑲᔪᐃᓂᖃᓚᐅᕐᒥᔪᖅ ᓄᑖᖅ ᐊᑭᓗᒃᑐᖅᑕᕐᕕᖕᒥᑦ/ᓂᕿᑖᕐᕕᖕᒥᑦ ᓄᓇᓕᖕᒦᑦᑐᒥᑦ.  ᐱᓕᕆᐊᖅ ᐱᔭᐅᑦᑎᐊᓚᐅᖅᑐᖅ ᐊᒻᒪᓗ ᐃᑲᔪᖅᖢᓂ ᐊᒥᓱᓂᒃ ᐃᓄᖕᓂᒃ ᓄᓇᓕᖕᒥᐅᓂᑦ!”

ᐊᓚᐃᓐ ᐅᖃᖅᑐᖅ “ᐃᓄᐃᑦ ᐊᖏᔪᒥᒃ ᐆᒻᒪᑎᖃᖅᑐᑦ, ᖃᐅᔨᒪᓕᖅᖢᒋᑦ ᐃᑲᔪᕈᒪᓕᕐᓂᖃᕐᓇᖅᑐᖅ”, ᐊᒻᒪᓗ ᑕᒪᑐᒥᙵᑦ ᐊᖏᕈᑎᒋᑦᑎᐊᖅᑕᕗᑦ.  ᖁᔭᓐᓇᒦᖅᑕᕗᑦ ᐊᒻᒪᓗ ᖁᕕᐊᒋᑉᓗᒍ ᐊᓚᐃᓐ ᐊᒻᒪᓗ ᐊᒥᓱᒻᒪᕆᐅᔪᑦ ᐃᑲᔪᓚᐅᖅᑐᑦ ᑐᓂᓯᓂᐊᖅᖢᑎᒃ ᖃᒪᓂᑦᑐᐊᕐᒧᑦ ᐊᒥᓱᒻᒪᕆᐊᓗᖕᓂᒃ ᐱᐅᑦᑎᐊᖅᑐᓂᒃ ᐅᖃᓕᒫᒐᓂᒃ.