ᐃᓚᒋᔭᐅᑉᓗᓂ ᐊᕙᑎᓕᕆᔨᒃᑯᑦ ᐱᕙᓪᓕᐊᓂᖓᓐᓄᑦ, ᐊᒡᓃᑯᒃᑯᑦ ᕿᒥᕐᕈᔭᕆᐊᖃᕐᓂᐊᖅᑐᑦ ᐊᒃᑐᖅᓯᓂᐅᔪᖕᓇᖅᑐᓗᒃᑖᓂᒃ ᐊᒻᒪᓗ ᐊᑐᖁᔨᓗᑎᒃ ᒥᒃᖠᒋᐊᖅᓯᓂᐅᔪᖕᓇᖅᑐᓂᒃ ᐊᒃᑐᖅᓯᓂᕐᓂᑦ.  ᑕᒪᓐᓇ ᕿᒥᕐᕈᔭᐅᓂᐊᖅᑐᖅ ᐊᔾᔨᒌᙱᑦᑐᓄᑦ ᒪᓕᒃᑕᐅᔭᕆᐊᖃᖅᑐᓕᕆᔨᓄᑦ ᐊᒻᒪᓗ ᐃᓚᐅᓕᖃᑕᐅᔪᓄᑦ ᐊᒻᒪᓗ ᒪᓕᒃᑕᐅᔪᒃᓴᐃᑦ ᖃᐅᔨᓴᐃᓂᕐᒧᑦ ᑐᓂᔭᐅᓗᑎᒃ ᐱᓕᕆᐊᖅ ᓈᒻᒪᒋᔭᐅᒃᐸᑦ.

ᒫᓐᓇᐅᔪᖅ, ᐊᒡᓃᑯᒃᑯᑦ ᖃᐅᔨᓴᐃᖃᑦᑕᖅᑐᑦ ᐊᒻᒪᓗ ᐆᒃᑐᕋᖅᑕᐅᓂᐊᖅᑐᓂᒃ ᐃᒪᕐᒥᑦ ᑯᕕᑎᑕᐅᖅᑳᖅᑎᓐᓇᒍ ᐊᒻᒪᓗ ᓇᓗᓇᐃᖅᖢᒋᑦ ᖃᓄᐃᖓᓂᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓴᕕᖕᓄᑦ ᐊᒻᒪᓗ ᓯᑎᔪᓄᑦ ᐅᔭᕋᖕᓄᑦ ᐅᔭᕋᒃᑕᕆᐊᕐᒥᑦ ᑯᕕᑎᑦᑎᓂᕐᒧᑦ ᒪᓕᒐᕋᓛᖏᓐᓄᑦ (MDMER).  ᐃᒪᖅ ᓴᑉᑯᑕᐅᖃᑦᑕᖅᑐ ᐃᑎᕕᐊᓄᑦ ᐃᒪᖅ ᑎᑭᐅᑎᓯᒪᔭᕌᖓᑦ ᐋᖅᑭᒃᑕᐅᓯᒪᔪᓄᑦ MDMER-ᒥᑦ.

MDMER ᑕᒡᕙᐅᔪᖅ ᒥᒃᖠᒋᐊᖅᑎᓐᓂᐊᕐᓗᒋᑦ ᐅᓗᕆᐊᓇᕐᓂᐅᔪᑦ ᐃᖃᓗᖕᓄᑦ ᐃᓂᒋᔭᖏᓐᓄᓪᓗ ᐱᐅᓯᒋᐊᕐᓗᒋᑦ ᐊᐅᓚᑦᑎᓂᖅ ᐅᓗᕆᐊᓇᖅᑐᓂᒃ ᓴᕕᖕᓃᑦᑐᓂᑦ ᑎᔪᓂᑦ ᐅᔭᕋᖕᓂᑦ ᐅᔭᕋᒃᑕᕆᐊᕐᓂᑦ ᑯᕕᔪᒥᑦ (ᐊᒃᑕᑰᖅᑕᐅᔪᖅ).  ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᖕᓇᖅᑐᑎᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖕᒧᐊᕐᓗᑎᑦ: https://laws-lois.justice.gc.ca/.

ᓈᓴᐅᑏᑦ/ᑎᑎᖅᑲᐃᑦ 2019-ᒥᑦ ᑯᕕᑎᑦᑎᓂᕐᓄᑦ ᐱᔾᔪᑎᒋᑉᓗᒋᑦ, ᖃᐅᔨᒪᔪᒍᑦ ᐊᖏᔪᒥᒃ ᐊᒃᑐᖅᓯᓂᖅᑕᖃᔾᔮᙱᒻᒪᑦ ᐃᒪᐅᑉ ᖃᓄᐃᓐᓂᕆᔭᖓᓄᑦ ᐃᑎᕕᐊᓄᑦ ᐊᑯᑉᓕᖅᓯᓂᕐᒧᑦ ᐃᓂᐅᔪᖅ ᐱᔾᔪᑎᒋᑉᓗᒍ.