ᓄᑖᖅ ᑐᕌᖓᔪᖅ ᐃᑲᔪᖅᑐᖅ ᐃᓅᔪᓂᒃ ᑭᕙᓪᓕᕐᒥᑦ ᓄᓇᓕᖕᓂᑦ ᐱᒋᐊᓵᖅᑎᓪᓗᒋᑦ ᐱᓕᕆᐊᕐᒥᑦ ᓄᓇᐅᑉ ᐃᓗᐊᓂᑦ ᐅᔭᕋᒃᑕᕆᐊᓕᕆᓂᕐᒥᑦ ᓯᕗᓪᓕᖅᐸᐅᔪᑦ ᓯᑕᒪᐃᑦ ᐱᐊᓂᒃᖢᑎᒃ, ᓯᕗᓪᓕᖅᐹᒥᒃ ᐱᓕᕆᐊᖅᑖᖅᖢᑎᒃ ᐅᔭᕋᒃᑕᕆᐊᓕᕆᓂᕐᒥᑦ.

ᐊᒥᕋᐃᔭᕐᕕᒃ 23-ᒥᑦ, 30 ᐅᑉᓗᐃᑦ ᑭᖑᓂᐊᒍᑦ ᓄᓇᐅᑉ ᖄᖓᓂᑦ ᐊᒻᒪᓗ ᐃᓗᐊᓂᑦ ᐊᔪᕈᖕᓃᖅᓴᖅᑳᖅᑎᓪᓗᒋᑦ, ᐱᓛᔾᔨ ᓂᕕᐊᑦᓯᐊᖅ, ᓯᑑᐊᑦ ᐊᒡᒐᒃ, ᔨᐅᕆ ᐊᐃᖏᓪᓕᖅ ᐊᒻᒪᓗ ᕈᐊᓐᑎ ᑲᑕᓗᒃ ᐱᐊᓂᓚᐅᖅᑐᑦ ᑕᓯᕐᔪᐊᕐᒥᑦ ᓄᓇᐅᑉ ᐃᓗᐊᓂᑦ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒥᑦ.  ᑕᖅᕿᐅᓚᐅᖅᑐᒥᒃ, ᐱᓕᕆᒋᐊᓚᐅᖅᑐᑦ ᑕᓯᕐᔪᐊᕐᒥᑦ Class 2 ᐱᔨᑦᑕᕋᐃᔨᐅᓂᕐᒥᒃ ᐅᔭᕋᒃᑕᖅᑎᒧᑦ.

ᑐᒡᓕᐅᔪᑦ ᓯᑕᒪᐃᑦ ᐊᔪᕈᖕᓃᖅᓴᖅᑕᐅᓂᐊᖅᑐᑦ ᐱᒋᐊᕐᓂᐊᖅᑐᑦ ᑲᑕᒑᕆᕝᕕᒃ 4-ᒥᑦ ᐱᐊᓂᒡᓗᑎᒡᓗ ᐋᒡᔪᓕᕐᕕᐅᑉ ᕿᑎᐊᓂᑦ.

ᐱᓕᒪᓐ ᑎᔅᕈᐊᑦᓱᔅ-ᒑᓂᐊᓐ, ᐅᔭᕋᒃᑕᕆᐊᕐᒥᑦ ᐊᖓᔪᖅᑳᖅ ᑕᓯᕐᔪᐊᕐᒥᑦ, ᐅᖃᖅᑐᖅ, “ᑐᕌᖓᔪᖅ ᐋᖅᑭᒃᓱᖅᓯᒪᔪᖅ ᐃᓅᔪᓄᑦ ᑐᓂᓯᑉᓗᓂᓗ ᐊᖏᔪᒥᒃ ᐱᓕᕆᓂᑯᖃᓕᕐᓂᕐᒥᒃ. ᑐᕌᒐᐅᔪᖅ ᐊᔪᕈᖕᓃᖅᓴᖅᓯᒪᔪᑦ ᐱᓕᕆᔪᖕᓇᖅᓯᓂᐊᕐᓗᑎᒃ 30 ᐅᑉᓗᐃᑦ ᑭᖑᓂᐊᒍᑦ. ᒫᓐᓇᒧᑦ ᑎᑭᖦᖢᒍ, ᐃᓕᓐᓂᐊᖅᑏᑦ ᐱᔪᒪᓂᖃᑦᑎᐊᖃᑦᑕᖅᑐᑦ ᑐᕌᖓᔪᒥᑦ ᐊᒻᒪᓗ ᑕᖅᑭᑕᒫᒃᑯᑦ ᑕᐃᒪᓐᓇᐃᓕᐅᕈᒪᑉᓗᑕ ᐃᓱᒪᔪᒍᑦ, ᒪᕐᕉᒃ ᑕᖅᑭᑕᒫᒃᑰᖏᖔᖅᑐᖅ.”

ᐃᓚᒋᔭᐅᑦᑎᐊᖅᑐᖅ ᑐᕌᖓᔪᖅ ᐱᐊᓂᑦᑎᐊᕐᓂᖓᓄᑦ ᑮᓇᐅᔭᖃᖅᑎᑕᐅᓂᕗᑦ ᖃᑕᙳᑎᒌᓕᕆᔨᒃᑯᓐᓂᑦ. ᐱᓕᕆᔩᑦ ᖃᑕᙳᑎᒌᓕᕆᔨᒃᑯᓐᓂᑦ ᐊᒃᓱᕈᖅᖢᑎᒃ ᐱᓕᕆᓯᒪᔪᑦ ᓴᖅᑭᑎᓐᓂᐊᕐᓗᒍ ᑕᒪᓐᓇ ᐊᒻᒪᓗ ᐊᒡᓃᑯᒃᑯᑦ ᐱᒻᒪᕆᐅᑎᑕᖓ ᒪᓕᒃᑎᑦᑎᓂᖓᑦ ᐊᒻᒪᓗ ᐱᓕᕆᖃᑎᒋᓂᖓᑦ ᐱᒻᒪᕆᐅᔪᖅ ᐱᓕᕆᐊᕐᒥᑦ.

ᓄᓇᐅᑉ ᐃᓗᐊᓂᑦ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᖅ ᐅᑯᐊᖑᔪᑦ ᒪᕐᕉᒃ 15 ᐅᑉᓗᓄᑦ ᐊᑭᓕᖅᑐᖅᑕᐅᑉᓗᑎᒃ ᐊᔪᕈᖕᓃᖅᓴᖅᑕᐅᖃᑦᑕᖅᑐᑦ, ᐊᔪᙱᓐᓂᖃᖅᑐᒧᑦ ᐃᓅᔪᒧᑦ ᐊᔪᕈᖕᓃᖅᓴᐃᔨᒧᑦ ᐃᐊᐳᑦ ᑭᒪᓕᐊᕐᔪᒃ-ᒧᑦ. ᐊᔪᕈᖕᓃᖅᓴᐃᔨᐅᑉ ᖃᓄᐃᓕᐅᖁᔨᓂᖓᓄᑦ, ᐃᓕᓐᓂᐊᖅᑏᑦ ᖃᕆᐊᕐᒥᑦ ᐊᒻᒪᓗ ᐱᓕᕆᕝᕕᐅᔪᒥᑦ ᐊᔪᕈᖕᓃᖅᓴᖅᑕᐅᖃᑦᑕᖅᑐᑦ – ᐃᓕᑦᑎᕙᓪᓕᐊᑉᓗᑎᒃ ᐊᖁᒃᑎᐅᓂᕐᒥᒃ 30-ᑕᓐ ᐅᓯᑲᑦᑕᐅᑎᒥᒃ ᓄᓇᒃᑰᕈᑎᓂᒃ ᓄᓇᐅᑉ ᖄᖓᓂᑦ ᐊᒻᒪᓗ ᐃᓗᐊᓂᑦ, ᐊᒻᒪᓗ ᐱᖃᑎᒋᔭᐅᑉᓗᑎᒃ ᐊᔪᙱᓐᓂᖃᖅᑐᓄᑦ ᐅᔭᕋᒃᑕᕆᐊᕐᒥᑦ ᐊᐅᓛᖅᑎᑦᑎᔨᓂᒃ ᐊᓯᖏᓐᓂᒡᓗ ᐱᓕᕆᐊᒃᓴᖃᖅᖢᑎᒃ.

ᐃᓕᓐᓂᐊᕌᓂᒃᐸᑕ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒥᑦ, Class 23 ᐱᔨᑦᑎᕋᐃᓂᕐᒧᑦ ᐅᔭᕋᒃᑕᖅᑏᑦ ᐊᒡᓃᑯᒃᑯᑦ ᓄᓇᕗᒻᒥ ᓄᓇᐅᑉ ᐃᓗᐊᓂᑦ ᐅᔭᕋᒃᑕᕆᐊᓕᕆᓂᕐᒧᑦ ᐱᓕᕆᐊᖅᑖᕐᓂᕐᒧᐊᖃᑦᑕᖅᖢᑎᒃ, ᐱᕕᖃᒃᑲᓐᓂᕐᓂᖅᓴᐅᓕᕐᓂᐊᖅᖢᑎᒃ ᐊᒻᒪᓗ ᐱᒋᐊᕈᒪᓂᖃᕐᓂᐅᔪᓄᑦ. ᐊᑯᓂᐅᔪᒥᑦ ᑐᕌᒐᖅ ᐃᓐᓄᒃᑕᐅᑎᓪᓗᒋᑦ ᓄᓇᐅᑉ ᐃᓗᐊᓂᑦ ᐅᔭᕋᒃᑕᕆᐊᕐᒥᑦ ᐱᓕᕆᐊᖅᑖᕐᓂᖅ ᐱᐊᓂᒃᓯᒪᔪᓄᑦ ᐃᓅᔪᑦ ᐊᔪᕈᖕᓃᖅᓴᖅᑐᓄᑦ, ᑐᒡᓕᐊᓂᑦ ᐱᒋᐊᕈᖕᓇᕐᓂᐊᕐᓗᑎᒃ ᐅᔭᕋᒃᑕᕆᐊᓕᕆᓂᕐᒥᑦ.

ᐊᔪᕈᖕᓃᖅᓴᓵᖅᓯᒪᔪᑦ ᐅᔭᕋᒃᑕᖅᑏᑦ ᐃᑲᔪᖅᑐᐃᓇᔭᖅᐸᑦ ᐊᓯᖏᓐᓂᒃ ᓄᓇᐅᑉ ᐃᓗᐊᓂᑦ ᐊᔪᕈᖕᓃᖅᓴᖅᑕᐅᓗᑎᒃ ᑐᕌᖓᔪᒧᐊᖁᔨᓗᑎᒃ?     

ᓯᑐᐊᑦ ᐊᒡᒐᒃ: “ᐅᔭᕋᒃᑕᖅᑎᓗᒃᑖᑦ ᑕᐃᒪᐅᔪᑦ ᐃᑲᔪᕐᓂᐊᕐᓗᑎᑦ ᐊᒻᒪᓗ ᐊᔪᕈᖕᓃᖅᓴᓂᖅ ᐊᖏᔪᒥᒃ ᐱᐅᔪᒥᒃ ᐊᒃᑐᖅᓯᓯᒪᔪᖅ. ᐊᔾᔨᐅᖏᑦᑎᐊᖅᑐᖅ ᓄᓇᐅᑉ ᐃᓗᐊᓂᑦ, ᐊᓕᐊᓇᐃᒋᔭᕋ!”

ᕈᐊᓐᑎ ᑲᑕᓗᒃ: “ᐊᔪᕐᓇᖅᑐᖅᑎᑐᑦ ᐃᓱᒪᒋᑦᑕᐃᓕᒍᑦ ᓄᓇᐅᑉ ᐃᓗᐊᓃᒻᒪᑦ ᐊᒻᒪᓗ ᐱᓕᕆᑉᓗᓂ ᐊᖏᔪᓂᒃ ᓄᓇᒃᑰᕈᑎᕐᔪᐊᕐᓂᑦ. ᐃᑲᔪᖃᑦᑕᕐᓂᖏᑦ ᐊᓯᖏᑦ ᐱᓕᕆᔩᑦ, ᐊᔪᕈᖕᓃᖅᓴᐃᔩᑦ ᐊᒻᒪᓗ ᓄᓇᐅᑉ ᐃᓗᐊᓂᑦ ᐅᔭᕋᒃᑕᖅᑏᑦ ᐊᔪᙱᑦᑐᐊᓗᐃᑦ, ᐃᓱᒪᓚᐅᖏᑦᑐᖓ ᑕᐃᒪᓐᓈᓗᒃ ᐃᑲᔪᖅᑕᐅᒋᐊᒃᓴᖅ”.

ᔨᐅᕆ ᐊᐃᖏᓪᓕᖅ: “ᐅᖃᐅᑎᓇᔭᖅᑕᒃᑲ ᐆᒃᑐᕐᓗᑎ! ᐊᑐᕐᓂᑦᑎᐊᕙᐅᔪᖅ ᐊᒻᒪᓗ ᐱᓕᕆᐊᖃᕋᔭᖅᑐᑦ ᐊᒡᓃᑯᒃᑯᓐᓂᑦ.”

ᐱᓚᔾᔨ ᓂᕕᐊᑦᓯᐊᖅ: “ᐅᖃᐅᑎᓇᔭᖅᑕᒃᑲᑦ ᐆᒃᑐᖁᓗᒋᑦ ᐊᑐᕐᓂᑦᑎᐊᕙᐅᖕᒪᑦ ᐊᒻᒪᓗ ᐱᐅᔫᑉᓗᓂ ᐊᒃᓱᕈᕐᓇᕐᓂᖅ. ᐊᔪᕐᓇᖅᑑᔭᖅᑑᒐᓗᐊᖅ ᑭᓯᐊᓂ ᐱᓕᕆᐊᕆᓕᕈᖕᓂ, ᖁᕕᐊᓱᓕᖃᑦᑕᖅᑐᑎᑦ ᐊᖁᒍᖕᓇᖅᓯᓂᐊᕋᕕᑦ ᐊᒻᒪᓗ ᓄᓇᐅᑉ ᐃᓗᐊᓄᐊᕐᓗᑎᑦ ᐅᔭᕋᒃᑕᖅᑎᙳᕐᓗᑎᓪᓗ.”

ᓴᐅᒥᒃᖠᕐᒥᑦ ᑕᓕᖅᐱᒃᖠᕐᒧᑦ: ᐱᓚᔾᔨ ᓂᕕᐊᑦᓯᐊᖅ, ᓯᑐᐊᑦ ᐊᒡᒐᒃ, ᔨᐅᕆ ᐊᐃᖏᓪᓕᖅ, ᐃᐊᐳᑦ ᑭᒪᓕᐊᕐᔪᒃ ᐊᒻᒪᓗ ᕈᐊᓐᑎ ᑲᑕᓗᒃ.