ᓱᓇᑐᐃᓐᓇᓕᕆᔾᔪᑕᐅᓂᖓᓂᒃ ᖃᐅᔨᒪᕕᑦ ᐆᒻᒪᖅᑯᑎᑖᖃᑦᑕᕐᓂᖓᑕ LED ᐃᑭᑦᑕᖅᑐᐃᑦ ᓚᒪᓐᓂᒃ ᐊᑐᖅᖢᓂ ᐹᑐᓖᑎᑐᑦ?  ᐃᓕᖕᓂᒃ ᐊᐃᔅᑯᕇᒻᓕᐅᕈᑎᔪᖕᓇᖅᐱᑦ ᐊᑐᕐᓗᑎᑦ ᔨᑉᓛᒃ ᐴᕐᓂᑦ?  ᓵᓚᖃᕈᖕᓇᖅᐱᑦ ᐅᒥᖕᒪᖕᒥᒃ ᐅᓇᑕᖃᑎᖃᕐᓗᑎᑦ?

ᑕᒪᒃᑯᐊ ᐃᓚᐃᓐᓇᖏᐅᔪᑦ ᐊᔾᔨᐅᖏᑦᑐᑦ ᐊᔪᙱᓐᓃᑦ ᐃᓕᓐᓂᐊᖅᑎᑦᑎᔾᔪᑕᐅᓂᐊᖅᑐᑦ ᓯᕗᓪᓕᖅᐹᑦᑎᐊᕆᔭᖓᓂᒃ ᐊᒡᓃᑯᒃᑯᑦ ᖃᒪᓂᑦᑐᐊᕐᒥᑦ ᐊᐅᔭᒃᑯᑦ ᑕᖕᒫᖅᑎᑦᑎᓂᖓᑦ, ᖁᔭᓕᓂᕐᒧᑦ ᐅᑎᖅᑎᑦᑎᓂᕆᔭᕗᑦ ᖃᒪᓂᑦᑐᐊᕐᒧᑦ. 35 ᒪᒃᑯᒃᑐᐃᑦ, ᐅᑭᐅᓖᑦ 9 ᐊᒻᒪᓗ 15, ᑕᖕᒫᖃᑕᐅᓚᐅᖅᑐᑦ ᔪᓚᐃ ᓄᙳᐊᓂᑦ ᖁᕕᐅᓱᒃᑎᖦᖢᒋᑦ ᐊᔾᔨᐅᖏᑦᑐᕐᒥᒃ ᐃᓕᓐᓂᐊᖅᖢᑎᒃ.

ᐋᖅᑭᒃᑕᐅᓯᒪᔪᖅ ᐃᓅᓯᓗᒃᑖᕐᒥᑦ ᐊᔪᙱᓐᓂᖅᑖᕐᓂᐊᕐᓗᑎᒃ ᖁᕕᐊᓇᖅᑐᒃᑯᑦ ᐊᒻᒪᓗ ᑎᒥᒥᒃ ᐊᑐᖅᖢᑎᒃ ᐃᓕᓐᓂᐊᕐᓂᖅ, ᐊᒡᓃᑯᒃᑯᑦ ᐱᓕᕆᔨᖏᑦ ᐃᓚᐅᖃᑕᐅᓚᐅᖅᑐᑦ ᐊᒻᒪᓗ ᐃᑲᔪᖅᖢᑎᒃ ᐊᒥᓱᓂᒃ ᐃᓕᓐᓂᐊᖅᑎᑦᑎᓂᕐᓂᒃ.  ᑕᖕᒫᖅᑏᑦ ᐱᐅᓯᕚᓪᓕᕐᓂᖃᑐᐃᓐᓇᓚᐅᖏᑦᑐᑦ ᐃᖕᒥᖕᓂᒃ ᑕᐅᑐᖕᓂᕆᔭᖓᓐᓂᒃ, ᐃᓕᑦᑎᓚᐅᖅᑐᑦ ᓄᑖᓂᒃ ᐅᖃᖃᑎᖃᕐᓂᐅᔪᓂᒃ ᐊᒻᒪᓗ ᐃᓅᖃᑎᒌᖕᓂᕐᒧᑦ ᐊᔪᙱᓐᓂᐅᔪᓂᒃ ᐃᑲᔪᕐᓂᐊᖅᑐᓂᒃ ᐃᓕᓐᓂᐊᕐᕕᖕᒥᑦ ᐊᒻᒪᓗ ᓯᕗᓂᒃᓴᒥᑦ ᐱᓕᕆᐊᖏᓐᓂᑦ. ᑕᖕᒫᖅᑏᑦ ᐱᓇᓱᐊᕈᓯᓗᒃᑖᒥᑦ ᐃᓕᓐᓂᐊᓚᐅᖅᑐᑦ ᐃᓚᒋᔭᐅᔪᒥᑦ ᐱᖓᓲᔪᓂᑦ ᐊᑐᖅᑕᐅᖃᑦᑕᖅᑐᓂᑦ – ᑕᖕᒫᕐᕕᖕᒥᑦ ᓱᓇᑐᐃᓐᓇᓕᕆᓂᖅ, ᐃᒐᓂᖅ ᑕᖕᒫᕐᕕᖕᒥᑦ ᐅᕝᕙᓘᓐᓃᑦ ᐱᖃᐃᓕᓴᕐᓂᒃᑯᑦ ᕿᑎᖕᓂᐅᔪᓂᒃ ᑕᖕᒫᕐᕕᖕᒥᑦ.

ᓲᖅ ᓱᓇᑐᐃᓐᓇᓕᕆᓂᖅ ᐊᒻᒪᓗ ᐅᔭᕋᒃᑕᕆᐊᕐᓂᖅ ᐊᑑᑎᖃᕐᒪᖔᑦ!

15 ᓱᓇᑐᐃᓐᓇᓕᕆᓂᕐᒧᑦ ᑕᖕᒫᖅᑏᑦ ᕿᒥᕐᕈᓚᐅᖅᑐᑦ ᐊᔾᔨᒌᙱᑦᑐᓂᒃ ᓱᓇᑐᐃᓐᓇᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ, ᐃᓚᐅᑉᓗᑎᒃ ᐃᑯᒻᒪᖅᑯᑎ, ᐱᓕᕆᖃᑎᒌᖕᓂᐅᔪᑦ ᐊᒻᒪᓗ ᐅᔭᖅᑲᓕᕆᓂᖅ. ᐅᔭᖅᑲᓕᕆᓂᕐᒧᑦ ᐃᓕᓐᓂᐊᖅᑐᖅ ᐱᓕᑉ ᒫᖒ, ᐊᒪᕈᕐᒥᐅᑕᖅ, ᐃᓕᓐᓂᐊᖅᑎᑦᑎᓚᐅᖅᑐᖅ ᐅᖃᓪᓚᒃᖢᓂ ᖃᓄᖅ ᒎᓗ ᐋᖅᑭᒃᑕᐅᖃᑦᑕᕐᒪᖔᑦ ᓄᓇᕐᔪᐊᕐᒥᑦ ᐊᒻᒪᓗ ᓄᓇᕗᒻᒥᑦ; ᖃᓂᖅᓴᐃᑎᑦᑎᑉᓗᓂᓗ ᐅᔭᖅᑲᓂᒃ ᐆᒃᑐᕋᖅᑕᐅᓂᐊᖅᑐᓂᒃ ᐃᓗᓕᖃᖅᑐᑦ ᒎᓗᒥᒃ. ᐅᔭᕋᒃᑕᕆᐊᕐᓂᖅ ᐊᑑᑎᖃᖅᑐᖅ – ᐊᒡᓃᑯᒃᑯᑦ ᐱᓕᕆᖃᑎᖏᑦ – ᑲᒪᓚᐅᖅᑐᑦ ᓱᓇᓗᒃᑖᓂᒃ ᐅᔭᕋᒃᑕᕆᐊᕐᓂᕐᒥᒃ ᐱᓕᕆᐊᖑᖃᑦᑕᖅᑐᓂᒡᓗ ᓲᕐᓗ ᓄᓇᓕᕆᓂᖅ, ᐊᐅᓚᑕᐅᓲᑦ ᐊᒻᒪᓗ ᐅᒃᑯᓯᒃᓴᓂᒃ ᓴᓇᙳᐊᒐᓂᒃ. ᑕᖕᒫᖅᑏᑦ ᐃᓕᑦᑎᓚᐅᕐᒥᔪᑦ ᐃᑯᒻᒪᖅᑯᑎᒥᒃ ᐊᒻᒪᓗ ᖃᓄᖅ ᐃᖕᒥᓂᒃ ᓴᖅᑭᖃᑦᑕᕐᓂᖓᓂᒃ ᖃᐅᑕᒫᑦ ᐊᑐᖅᑕᐅᖃᑦᑕᖅᑐᓂᑦ. ᐃᓕᓐᓂᐊᖅᑏᑦ ᐅᐱᓚᐅᖅᑐᑦ ᐃᖕᒥᖕᓂᒃ ᐃᑯᒻᒪᖅᑯᑎᓕᐅᕈᖕᓇᕐᒪᑕ ᐃᑭᓐᓂᐊᕐᓗᒍ ᐃᑭᑦᑕᖅᑐᖅ ᐊᑐᖅᖢᓂ ᓚᒪᓐᓂᒃ ᐹᑐᓖᑎᑐᑦ ᐊᒻᒪᓗ ᓴᕕᒐᐅᔭᓂᒃ ᐊᒻᒪᓗ ᑭᑭᐊᖕᓂᑦ ᒪᕐᕉᖕᓂᒃ ᐃᑯᒻᒪᖅᑯᑎᑖᕐᓂᕐᒧᑦ ᓇᐸᔪᓕᐅᕐᓂᐊᕐᓗᑎᒃ!

ᐃᒐᓂᖅ – ᐴᕐᒦᑦᑐᖅ! 

7 ᐃᒐᔨᐅᔪᑦ ᑕᖕᒫᕐᕕᖕᒥᑦ ᐃᓕᑦᑎᓚᐅᖅᑐᑦ ᓂᕿᑦᑎᐊᕙᖕᓂᒃ ᓂᕆᖃᑦᑕᓕᕐᓂᕐᒥᒃ ᐊᒻᒪᓗ ᐅᓗᕆᐊᓇᙱᑎᑦᑎᓂᕐᒥᒃ ᓂᕿᓂᒃ. ᖃᓄᐃᓕᐅᖁᔭᐅᓂᖓᑐᑦ ᒌᐳᕆᐅᓪ ᒨᕆᓐ-ᒧᑦ, ᐃᓕᓐᓂᐊᖅᑏᑦ ᓂᕿᓕᐅᖃᑦᑕᓚᐅᖅᑐᑦ 40 ᐅᖓᑖᓄᑦ ᐃᓄᖕᓄᑦ. ᐃᓕᓐᓂᐊᖅᑎᑕᐅᑉᓗᑎᒡᓗ ᐃᓐᓇᕆᔭᐅᔪᖅ ᓄᓇᓕᖕᒥᑦ ᓲᓴᓐ ᑐᓗᖅᑐᕐᒧᑦ, ᐃᓕᓐᓂᐊᖅᑏᑦ ᐃᓄᐃᑦ ᓂᕿᖏᓐᓂᒃ ᑐᒃᑐᒥᑦ ᐊᒻᒪᓗ ᐅᒥᖕᒪᖕᒥᒃ ᖃᔪᓕᐅᓚᐅᖅᑐᑦ, ᐊᐳᖅᑎᓐᓈᖅᑐᒥᑦ ᐊᐅᔭᒃᑯᑦ ᐃᓕᓐᓂᐊᖅᑎ ᓂᕆᔭᐅᖃᑦᑕᖅᑐᓕᕆᔨ ᕗᕌᓐᔅ ᓚᑑᓱ ᐃᓕᓐᓂᐊᖅᑎᑦᑎᑉᓗᓂ ᓂᕿᑦᑎᐊᕙᖕᓂᑦ.

ᐊᒻᒪᓗ, ᓱᓇᑐᐃᓐᓇᓕᕆᓂᖅ ᓇᓂᑐᐃᓐᓈᖅᑎᓪᓗᒍ ᐃᒐᔩᓪᓘᓐᓃᑦ ᑕᖕᒫᕐᕕᖕᒥᑦ ᐃᓕᓐᓂᐊᓚᐅᖅᑐᑦ ᐆᓇᕐᓂᕐᒥᒃ ᓅᑦᑎᓂᕐᒧᑦ ᐊᒻᒪᓗ ᓯᑯᓕᐅᕆᓂᕐᒥᒃ ᓇᖕᒥᓂᖅ ᐊᐃᔅᑯᕇᒻᓕᐅᕐᒪᑕ ᔨᑉ ᓛᒃ ᐴᕐᒥᒃ ᐊᑐᖅᖢᑎᒃ, ᒪᒪᖅᑐᓕᐅᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ ᐊᑐᖅᖢᑎᒃ, ᓯᑯᒥᒃ ᐊᒻᒪᓗ ᑕᕆᐅᕐᒥᑦ.

ᐊᒃᑐᖅᐸᒋᑦ, ᐋᒻᒪᒃᑕᒋᑦ! 

13 ᐱᖃᐃᓕᓴᕐᓂᕐᒧᑦ ᕿᑎᒃᑏᑦ ᑕᖕᒫᕐᕕᖕᒥᑦ ᐃᓕᑦᑎᓚᐅᖅᑐᑦ ᓄᑖᓂᒃ ᐊᒻᒪᓗ ᐱᖅᑯᓯᕆᔭᐅᔪᒥᒃ ᕿᑎᖕᓂᕐᒥᑦ, ᖃᐅᒻᒪᓪᓚᒃᑕᖅᑐᓕᖕᒧᑦ ᐋᒻᒪᑭᑕᐅᓐᓂᖅ ᖁᕕᐊᒋᓛᕆᑉᓗᓂᔾᔪᒃ! ᖁᕕᐊᓇᑦᑎᐊᖅᑎᓪᓗᒍ ᐊᒻᒪᓗ ᐱᒡᒎᓐᓇᖅᖢᓂ, ᐃᓕᑦᑎᓚᐅᕐᒥᔪᑦ ᖃᐅᒻᒪᓪᓚᒃᑕᖅᑐᓕᖕᒥᑦ ᐊᑐᖅᑕᐅᖃᑦᑕᖅᑐᓂᒃ ᐊᒻᒪᓗ ᐱᖃᐃᓕᓴᕐᓂᖃᑦᑎᐊᓚᐅᖅᑐᑦ. ᓘᒃ ᐳᕌᓱᑦ, ᐱᓕᐅᕆᕙᓪᓕᐊᓂᕐᒧᑦ ᐱᖁᑎᓂᒃ ᐊᔪᕈᖕᓃᖅᓴᐃᔨ ᐊᐳᖅᑎᓐᓈᖅᑐᒥᑦ, ᐃᓕᓐᓂᐊᖅᑎᑦᑎᓚᐅᖅᑐᖅ ᐃᓚᒋᔭᐅᔪᓂᒃ ᐃᖕᒥᖕᓂᒃ ᒥᐊᓂᕆᔪᖕᓇᕐᓂᕐᒧᑦ ᑐᒡᒐᐅᑎᖃᑎᒌᒡᕕᖓᓂᑦ.

ᐃᓱᐊᓂᑦ ᑕᖕᒫᕐᓂᐅᑉ ᐊᒡᓃᑯᒃᑯᑦ ᖁᕕᐊᓲᑎᖃᕐᓂᕐᒧᑦ ᑲᒪᔭᖃᓚᐅᖅᑐᑦ ᐃᓕᓐᓂᐊᖅᑎᓂᒃ ᐱᐊᓂᓚᐅᖅᑕᖏᓐᓂᑦ ᐊᔾᔨᓂᒃ ᑕᑯᑎᑖᕆᓚᐅᖅᑐᑦ ᖃᑕᙳᑎᖏᓐᓄᑦ, ᑕᑯᔭᒃᓴᓂᑦ ᐊᒻᒪᓗ ᐅᓂᑉᑳᕐᓂᒃᑯᑦ. ᐊᑐᓂ ᑕᖕᒫᖅᑏᑦ ᐃᖕᒥᖕᓄᑦ ᑐᕌᖓᔪᒥᒃ ᓂᑉᓕᐅᑕᐅᓚᐅᖅᑐᑦ ᐃᓕᓐᓂᐊᖅᑎᑦᑎᔨᖓᓐᓄᑦ ᐊᒻᒪᓗ ᐃᒐᓂᕐᒧᑦ, ᓱᓇᑐᐃᓐᓇᓕᕆᓂᕐᒧᑦ ᐅᕝᕙᓘᓐᓃᑦ ᑎᒥᒃᑯᑦ ᐱᖃᐃᓕᓴᖅᖢᑎᒃ ᕿᑎᖕᓂᕐᒧᑦ ᐱᔾᔪᑎᓕᖕᓂᒃ ᐱᑖᖅᑐᖅᖢᑎᒃ – ᓲᕐᓗ ᐅᖃᓕᒫᒐᕐᒥᑦ ᐃᒐᔾᔪᑎ, ᓱᓇᑐᐃᓐᓇᓕᕆᓂᕐᒧᑦ ᖃᓄᐃᓕᐅᕈᑎᒥᒃ ᐅᕝᕙᓘᓐᓃᑦ ᐃᒻᒥᖃᑦᑕᖅᑐᖅ ᖁᑭᐅᑎᙳᐊᕐᒥᑦ.

ᐊᒡᓃᑯᒃᑯᑦ ᐱᓕᕆᔨᖓᑦ ᐄᒥ ᑐᕌᒻᑉᓖ-ᓕᒪᐃ, ᑕᖕᒫᕐᕕᖕᒥᑦ ᐋᖅᑭᒃᓱᐃᓚᐅᖅᑐᖅ, ᐅᖃᓚᐅᖅᑐᖅ, “ᑐᕌᒐᕗᑦ ᐃᓕᑦᑎᑎᓪᓗᒋᑦ ᒪᒃᑯᒃᑐᐃᑦ ᐱᒻᒪᕆᐅᔪᓂᒃ ᐱᓕᕆᐊᓂᑦ ᐊᒻᒪᓗ ᐃᓅᖃᑎᒌᖕᓂᕐᒥᒃ ᐊᔪᙱᓐᓂᐅᔪᓂᒃ ᖁᕕᐊᓇᖅᑐᒃᑯᑦ ᐊᒻᒪᓗ ᑎᒥᒥᒃ ᐊᑐᕐᓗᓂ ᖃᓄᐃᓕᐅᖅᑎᑦᑎᓂᒃᑯᑦ. ᐊᖏᕐᕋᖓᓐᓃᖏᓚᐅᐱᓪᓚᒃᑎᑦᑐᒪᓚᐅᕐᒥᔭᕗᑦ, ᖃᕆᑕᐅᔭᓂᒃ ᑕᐅᑐᙱᓪᓗᑎᒃ ᐊᒻᒪᓗ ᑕᓚᕕᓴᓂᒃ, ᐊᒻᒪᓗ ᐃᓕᑦᑎᒃᑲᓐᓂᕐᓗᑎᒃ ᓄᓇᕐᔪᐊᕐᒥᑦ ᐊᕙᑖᓃᑦᑐᓂᒃ, ᓱᓇᑐᐃᓐᓇᓕᕆᓂᒃᑰᕋᓗᐊᖅᐸᑦ, ᑎᒥᒥᒃ ᐊᑐᕐᓗᓂ ᕿᑎᖕᓂᐅᔪᓂᒃ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐃᒐᓂᕐᒥᒃ. ᖃᒪᓂᑦᑐᐊᕐᒥᑦ ᐊᐅᔭᒃᑯᑦ ᑕᖕᒫᖅᑎᑦᑎᓂᖅ ᐱᐊᓂᑦᑎᐊᕐᓂᐅᓚᐅᖅᑐᖅ ᐊᒻᒪᓗ ᑕᐃᒪᑐᖅ ᖃᒪᓂᑦᑐᐊᕐᒥᑦ ᓄᑕᖅᑲᐃᑦ ᐃᓕᓚᐅᖅᑕᖏᑦ ᐊᔪᙱᓐᓂᖅᑖᓵᖏᑦ ᐊᑐᖃᑦᑕᐃᓐᓇᕐᓂᐊᖅᐸᖏᑦ.”

ᓈᓴᐅᑎᑖᒃᑲᓐᓂᕐᓂᖅ: 

ᑕᖕᒫᖅᑏᑦ ᐃᓕᓐᓂᐊᕆᐊᖏᓐᓇᖃᑦᑕᓚᐅᖅᑐᑦ ᐊᒻᒪᓗ ᐃᓚᐅᖏᓐᓇᖃᑦᑕᖅᖢᑎᒃ ᐊᒧᔭᐅᔪᖕᓇᕐᓂᐊᓚᐅᖅᑐᑦ ᐸᐃᓯᑯᑖᕐᓂᐊᕐᓗᑎᒃ ᖃᒪᓂᑦᑐᐊᕐᒥᑦ ᓂᐅᕕᖅᑎᓂᑦ.  ᖁᕕᐊᓱᖃᑎᒋᔭᕗᑦ ᐋᓕᓴᓐ ᑐᐱᖅ, ᒫᑎᐅ ᐃᕝᕕᐅᒃ ᐊᒻᒪᓗ ᓵᓚᒃᓴᕈᓯᐊᖏᓐᓂᑦ!

ᐊᒻᒪᓗ, ᖁᔭᓕᔪᒪᖕᒥᔭᕗᑦ ᐊᒡᓃᑯᒃᑯᑦ ᐱᓕᕆᔨᖏᑦ, ᓄᓇᓕᖕᒥᑦ ᐊᔪᙱᓐᓂᖃᑦᑎᐊᖅᑐᑦ ᐊᒻᒪᓗ ᐃᓐᓇᕆᔭᐅᔪᑦ, ᐊᒻᒪᓗ ᐱᓕᕆᖃᑎᒋᔭᓗᒃᑖᕗᑦ ᐃᑲᔪᓚᐅᖅᑐᑦ ᖃᒪᓂᑦᑐᐊᕐᒥᑦ ᐊᐅᔭᒃᑯᑦ ᑕᖕᒫᖅᑎᑦᑎᓂᕐᒥᒃ ᐱᐊᓂᑦᑎᐊᕈᖕᓇᖅᑎᖦᖢᒍ, ᐃᓚᐅᑉᓗᑎᒃ ᖃᒪᓂᑦᑐᐊᕐᒥᑦ ᓂᐅᕕᖅᑏᑦ, ᖃᒪᓂᑦᑐᐊᕐᒥᑦ ᕼᐋᒻᓚᒃᑯᑦ, ᖃᒪᓂᑦᑐᐊᕐᒥᑦ ᐆᒪᔪᓕᕆᔨᐊᓛᒃᑯᑦ ᐊᒻᒪᓗ ᖃᒪᓂᑦᑐᐊᕐᒥᑦ ᐳᑭᖅᑕᓖᑦ.