ᐃᓐᓇᕆᔭᐅᔪᑦ ᖃᐅᔨᒪᓂᕆᔭᖏᓐᓂᑦ ᐊᒻᒪᓗ ᐊᔪᙱᓐᓂᕆᔭᖏᓐᓂᒃ ᑐᓂᓯᔪᑦ ᓄᓇᕗᒻᒥ ᐊᐅᓛᖅᑎᑦᑎᔨᓄᑦ

ᖃᓄᖅ ᐊᒡᓃᑯᒃᑯᑦ ᓄᓇᓕᖕᒥᑦ ᐃᓚᐅᑎᑦᑎᖃᑕᐅᓂᖏᑦ ᐱᕈᐃᑎᑦᑎᓂᖃᖃᑦᑕᕐᓂᖓ ᑕᑎᒋᔭᖃᕐᓂᕐᒥᒃ 

2021-ᒥᑦ ᐊᒡᓃᑯᒃᑯᑦ ᐋᖅᕿᒃᓯᓚᐅᖅᑐᑦ ᑭᕙᓪᓕᕐᒥᑦ ᐃᓄᐃᑦ ᐃᓐᓇᕆᔭᐅᔪᑦ ᐅᖃᐅᔾᔨᓂᕐᒧᑦ ᑲᑎᒪᔨᐊᓛᓂᒃ, ᑲᑎᒪᔩᑦ ᐱᒻᒪᕆᐅᔪᓂᒃ ᖃᓄᐃᓕᐅᖅᑎᑦᑎᖃᑦᑕᖅᑐᑦ ᓄᓇᕗᒻᒥᐅᓄᑦ ᐊᒻᒪᓗ ᓄᓇᕗᒻᒥ ᐊᐅᓚᖅᑎᑦᑎᔨᑉᑎᖕᓄᑦ.

21-ᖑᔪᑦ ᐃᓐᓇᕆᔭᐅᔪᑦ ᓄᓇᓕᖕᓂᙶᖅᑐᑦ ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ, ᖃᖏᖅᖠᓂᖅ, ᑎᑭᕋᕐᔪᐊᖅ, ᐊᒻᒪᓗ ᐊᕐᕕᐊᓂᑦ ᐃᓐᓇᕆᔭᐅᔪᑦ ᑲᑎᒪᔨᐊᓛᑦ ᓄᓇᓕᖕᒥᐅᓂᒃ ᑐᓴᐅᒪᑎᑦᑎᑐᐃᓐᓇᖃᑦᑕᙱᑦᑐᑦ ᐊᒡᓃᑯᒃᑯᑦ ᐅᔭᕋᒃᑕᕆᐊᓕᕆᓂᖏᓐᓂᑦ ᐊᒻᒪᓗ ᓯᕗᓂᒃᓴᒥᑦ ᐸᕐᓇᐅᑎᖏᓐᓂᑦ, ᑭᓯᐊᓂᑦᑕᐅᖅ ᑐᓂᓯᖃᑦᑕᕐᒥᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᑎᒥᐅᔪᑦ ᐃᓄᐃᑦ ᐱᖅᖁᓯᓂᒃ ᖃᐅᔨᒪᔭᖃᖅᑐᑦ, ᐊᒻᒪᓗ ᐃᓄᐃᑦ ᐃᓅᖃᑎᒌᖕᓂᖏᓐᓄᑦ ᐱᒻᒪᕆᐅᔪᓂᒃ, ᐋᖅᕿᐅᒪᔪᑦ ᒪᓕᒃᑎᑦᑎᔪᑦ ᓄᓇᓕᖕᒥᑦ ᒪᓕᒐᓂᑦ, ᐃᓚᓕᐅᑎᔭᐅᔪᖕᓇᕐᓂᐊᕐᒪᑕ ᕿᓂᖅᓴᐃᓂᑉᑎᖕᓄᑦ, ᐸᕐᓇᐃᓂᑉᑎᖕᓄᑦ, ᐱᓕᕆᔨᑉᑎᖕᓄᑦ, ᖃᓄᐃᖏᑦᑎᐊᕐᓂᕐᒧᑦ, ᐊᒻᒪᓗ ᐊᐅᓛᖅᑎᑦᑎᓂᕐᒧᑦ ᐸᕐᓇᐅᑎᓄᑦ.

ᐊᑐᖅᑕᐅᑉᓗᓂ ᐱᕈᐃᑎᑦᑎᓂᕐᒧᑦ ᓄᓇᓕᖕᒥᑦ ᐃᓚᐅᖃᑕᐅᓂᕐᒧᑦ ᐊᒻᒪᓗ ᑕᑎᒋᔭᐅᓗᑎᒃ, ᐃᓐᓇᕆᔭᐅᔪᑦ ᑲᑎᒪᔨᐊᓛᑦ ᐃᓱᒪᒋᔭᖃᖃᑦᑕᖅᑐᑦ ᓄᑖᖑᔪᓂᒃ, ᐱᓕᕆᖃᑎᒌᖕᓂᕐᒥᒃ, ᐊᒻᒪᓗ ᐊᔾᔨᐅᖏᑦᑑᑉᓗᑎᒃ:

  • ᐃᓱᒪᒋᔭᖃᖃᑦᑕᖅᑐᑦ ᓄᑖᖑᔪᓂᒃ ᐃᒪᓐᓇᐃᒻᒪᑦ ᐃᓐᓇᕆᔭᐅᔪᑦ ᖃᓄᐃᓕᐅᖅᑎᑦᑎᓂᖃᕈᖕᓇᕐᒪᑕ ᐱᔾᔪᑕᐅᔪᓄᑦ ᓲᕐᓗ ᐃᓂᐅᔪᑦ ᐊᑎᑐᖃᖏᓐᓂᑦ ᐊᒻᒪᓗ ᖃᓄᖅ ᑐᓴᐅᒪᑎᑦᑎᓂᖅ ᐱᓕᕆᐊᓄᑦ ᐃᓚᒋᔭᐅᔪᓂᒃ ᑐᑭᓯᓐᓇᖅᑐᒃᑯᑦ ᐅᖃᐅᓯᓂᒃ ᐊᑐᕐᓗᑎᒃ ᐊᒡᓃᑯᒃᑯᑦ ᑲᔪᓯᓂᐊᓵᖅᑎᓪᓗᒋᑦ ᓱᓇᑐᐃᓐᓇᓂᒃ ᐊᒃᑐᖅᓯᔪᓂᒃ ᖃᐅᔨᓴᐃᓂᐅᔪᓂᒃ. ᓴᙱᔫᔪᖅ ᓂᐱᒋᔭᖓᑦ ᐃᓐᓇᕆᔭᐅᔪᓄᑦ ᐃᓱᒪᓕᐅᕆᓂᖃᕐᓂᐊᓵᖅᑎᓪᓗᒋᑦ.
  • ᐱᓕᕆᖃᑎᒌᖕᓂᖅ ᐃᒪᓐᓇᐃᒻᒪᑦ ᓄᓇᓕᖕᒥᑦ ᑐᕌᒐᐅᔪᑦ ᐊᑐᖃᑦᑕᕐᒪᑕ ᐅᖃᓪᓗᕆᒃᓴᐅᑕᐅᔪᓗᒃᑖᓂᒃ. ᓄᓇᓕᖕᒥᑦ ᓯᕗᓕᐅᖅᑎᐅᔪᑦ ᖃᐅᔨᖃᑦᑕᖅᑐᑦ ᐊᑯᓂᐅᔪᒥᒃ ᑐᕌᒐᐅᔪᓂᒃ, ᓲᕐᓗ ᐃᓄᐃᑦ ᐊᔪᕈᖕᓃᖅᓴᖅᑕᐅᓂᖏᑦ ᐊᒻᒪᓗ ᐃᒃᐱᒍᓱᒡᕕᒋᔭᐅᓗᑎᒃ ᐱᖅᖁᓯᕆᔭᐅᔪᑦ. ᐊᑦᑎᖅᓯᑉᓗᓂ ᕿᓂᖅᓴᐃᕝᕕᐅᔪᓂᑦ ᐊᑐᖅᖢᒋᑦ ᐊᑎᑐᖃᕆᔭᐅᔪᑦ ᐃᓂᐅᔪᓄᑦ, ᐆᒃᑑᑎᒋᓗᒍ, ᓄᓇᓕᖕᒥᑦ ᑐᕌᒐᐅᔪᖅ ᖃᓂᑦᑐᒥᑦ ᐃᓂᐅᔪᑦ ᐊᑎᖏᑦ ᐊᑐᖅᑕᐅᖏᓐᓇᕐᓗᑎᒃ ᐊᒻᒪᓗ ᑕᐃᒪᓐᓇᐃᓪᓗᑎᒃ.
  • ᐊᔾᔨᐅᖏᑦᑐᖅ ᐃᒪᓐᓇᐃᒻᒪᑦ ᐃᓐᓇᕆᔭᐅᔪᓂᒃ ᐃᖕᒥᒃᑰᖓᓗᑎᒃ ᑲᑎᒪᖃᑦᑕᕐᓗᑎᒃ ᐊᒻᒪᓗ ᐅᖃᐅᔾᔨᖃᑦᑕᕐᓗᑎᒃ ᐱᔾᔪᑕᐅᔪᑦ ᒥᒃᓵᓄᑦ ᐃᓱᒪᒋᔭᖏᑦ ᖃᐅᔨᔭᐅᖁᑉᓗᒋᑦ ᓲᕐᓗ ᖃᓄᐃᖏᑦᑎᐊᕐᓂᕐᒧᑦ ᐱᓕᕆᐊᒃᓴᐃᑦ ᐅᔭᕋᒃᑕᕆᐊᓂᑦ ᐃᓅᔪᓄᑦ ᐱᓕᕆᔨᒋᔭᐅᔪᓄᑦ.

“ᐱᒻᒪᕆᐅᑎᑕᕗᑦ ᐃᓐᓇᕆᔭᐅᔪᑦ ᑲᑎᒪᔨᐊᓛᑦ ᖃᓄᐃᓕᐅᖅᑎᑦᑎᓂᖏᑦ ᐃᓚᖏᓐᓂᑦ ᐱᓕᕆᓂᑉᑎᖕᓂᑦ,” ᐅᖃᖅᑐᖅ ᓱᓵᓐ ᓕᒃᑯᓕᐅ, ᐊᖓᔪᒃᖠᖅ ᐅᖃᐅᔾᔨᔨ, ᐱᖃᖃᑕᐅᔪᓂᒃ ᐃᓚᐅᑎᑦᑎᓂᖅ.

“ᐅᕙᑉᑎᖕᓂᑦᖃᐅᔨᑎᑦᑎᖃᑦᑕᖅᑐᑦ ᖃᐅᔨᒪᓂᕆᔭᐅᔪᓂᒃ ᐱᑕᖃᙱᑦᑐᓂᒃ ᖃᓄᐃᖓᓂᐊᕐᓂᖓᓄᑦ ᐋᖅᕿᒃᓱᖅᑕᐅᕙᓪᓕᐊᓕᓵᕐᓂᖓᓂᑦ ᐅᔭᕋᒃᑕᕆᐊᖅ ᐊᒻᒪᓗ ᐊᐱᖅᖁᑕᐅᔪᑦ ᓄᓇᓕᖕᓂᑦ ᐅᕙᑉᑎᖕᓄᐊᖅᖢᒋᑦ ᑐᑭᓯᐊᓕᒃᑲᓐᓂᕐᓂᐊᕐᓗᒋᑦ ᐊᒃᑐᖅᓯᓂᐅᔪᓂᑦ ᐊᒻᒪᓗ ᐊᖏᓗᐊᖏᒋᐊᖅᑎᑦᑎᓂᕐᒧᑦ ᐱᓕᕆᐊᖑᔪᑦ. ᑲᑎᒪᔨᐊᓛᑦ ᖃᐅᔨᖃᑦᑕᕐᒥᔪᑦ ᐅᔭᕋᒃᑕᕆᐊᕐᒨᖓᔪᓂᒃ ᐊᔪᕈᖕᓃᖅᓴᕈᑕᐅᔪᖕᓇᖅᑐᓂᒃ ᓄᓇᖃᖅᖄᖅᑐᓄᑦ ᐊᒻᒪᓗ ᒪᒃᑯᖕᓂᖅᓴᐅᔪᓄᑦ, ᐊᑕᐅᑦᑎᒃᑯᑦ ᐅᖃᐅᔾᔨᑉᓗᑎᒃ ᐅᕙᑉᑎᖕᓂᑦ ᖃᓄᖅ ᖃᓄᐃᖏᑦᑎᐊᖅᑎᒃᑲᓐᓂᕈᖕᓇᕐᒪᖔᑉᑎᒍᑦ ᓄᓇᖃᖅᖄᖅᑐᑦ ᐃᓄᐃᑦ ᐅᖓᓯᒃᑐᒥᑦ ᐅᔭᕋᒃᑕᕆᐊᑉᑎᖕᓂᑦ.”

ᐃᓐᓇᕆᔭᐅᔪᑦ ᑲᑎᒪᔨᐊᓛᑦ ᐱᓕᕆᓂᖃᑦᑎᐊᓚᐅᖅᑐᑦ 2021-2022-ᒥᑦ. ᐃᓚᐅᓚᐅᖅᑐᑦ ᐊᒻᒪᓗ ᐃᑲᔪᐃᓂᖃᖅᖢᑎᒃ ᐅᑯᓄᖓ:

14-ᓂᑦ ᓄᓇᓕᖕᓂᑦ ᐃᓚᐅᖃᑕᐅᑎᑦᑎᓃᑦ, ᑲᑎᑦᑎᑉᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐱᒻᒪᕆᐅᓂᖓᑕ ᓯᕗᓪᓕᖅᐸᐅᔪᑦ ᐊᒥᕐᕋᐃᑦ ᑐᒃᑐᐃᑦ ᐊᓂᒍᖅᑎᑕᐅᔭᕆᐊᖃᕐᓂᖏᑦ, ᐃᖢᐃᓵᖅᑕᐅᖏᓪᓗᑎᒃ, ᐊᒡᓃᑯᒃᑯᑦ ᐅᑭᐅᓗᒃᑖᖅ ᐊᑉᖁᑎᖓᑎᒍᑦ ᐊᑉᖁᓵᖅᓯᒪᑎᓪᓗᒋᑦ ᖃᓄᐃᖏᓪᓗᑎᒃ ᐊᓂᒎᑎᓂᐊᕐᓗᑎᒃ ᑭᖑᓪᓕᐅᔪᑦ ᑐᒃᑐᐃᑦ.

50 ᐃᓄᐃᑦ ᖃᐅᔨᒪᔭᑐᖃᖏᑦ ᐅᖃᐅᓰᑦ, ᐱᒻᒪᕆᐅᓯᒪᑉᓗᑎᒃ ᑐᑭᓯᐊᓂᕆᔭᑉᑎᖕᓄᑦ ᐃᓄᐃᑦ ᐱᖅᖁᓯᒃᑯᑦ ᓄᓇᒥᒃ ᐊᑐᖃᑦᑕᕐᓂᖏᓐᓄᑦ, ᓄᓇᓕᖕᒥᑦ ᐱᖅᖁᓯᕆᔭᐅᔪᓄᑦ, ᐱᔭᐅᔪᒪᔪᓂᒃ ᐊᒻᒪᓗ ᐱᔭᐅᔭᕆᐊᓕᖕᓂᑦ.

20 ᐃᓚᔭᐅᒃᑲᓐᓂᖅᑐᑦ ᐃᓂᐅᔪᓄᑦ ᐊᑎᑐᖃᕆᔭᐅᔪᑦ, ᐃᓚᔭᐅᓚᐅᖅᑐᑦ ᖃᕆᑕᐅᔭᒃᑯᑦ ᐊᑐᖅᑕᐅᔪᒧᑦ ᐊᒡᓃᑯᒃᑯᑦ ᐊᕕᒃᑐᖅᓯᒪᔪᖏᓐᓄᑦ.