ᐊᐱᖅᓱᐃᓂᖅ ᑎᐅᕆᒃ ᐆᕐᕕᓐ-ᒥᑦ, ᓵᓚᒃᓴᓚᐅᖅᑐᖅ ᐊᒡᓃᑯᒃᑯᑦ ᑲᔪᓯᓯᒪᐃᓐᓇᕐᓂᖅ ᐃᓕᓐᓂᐊᖅᑎᓄᑦ ᐃᑲᔫᑎᒥᒃ

“ᐱᐅᓯᒋᐊᕐᓗᓂ ᓇᖕᒥᓂᖅ ᐱᐅᓯᒋᐊᖅᓯᓂᐅᔪᖕᓇᖅᑐᖅ ᐊᒥᓲᓂᖅᓴᐅᔪᓄᑦ ᑲᑎᒪᔪᓄᑦ, ᐊᒻᒪᓗ ᐱᒋᐊᓪᓚᒃᑎᒃᑲᓐᓂᕈᒪᔭᕋ ᐃᓅᓯᕐᒪ ᓇᒧᙵᐅᑎᒃᑲᓗᐊᖅᐹᖓ.” – ᑎᐅᕆᒃ ᐊᐅᓪᓚᓐᓈᖅ ᕿᒧᒃᓯᕌᖅ ᐆᕐᕕᓐ

ᑲᑎᓯᒪᔪᑦ ᓄᓇᖅᖃᑎᒌᑦ ᑲᑎᒪᔨᖏᑦ ᑐᓴᖅᑎᑦᑎᓚᐅᖅᑐᑦ ᑕᖅᖀᓐᓇᕐᔪᐊᖅ 24-ᒥᑦ ᓄᓇᕐᔪᐊᕐᒧᑦ ᐅᑉᓗᕆᔭᐅᓂᖓ ᐃᓕᓐᓂᐊᕐᓂᕐᒧᑦ, ᖁᕕᐊᓲᑎᒋᑉᓗᒍ ᐱᓕᕆᐊᖓᑕ ᐃᓕᓐᓂᐊᕐᓂᐅᑉ ᓴᐃᒻᒪᐅᑎᖃᕐᓂᕐᒧᑦ ᐊᒻᒪᓗ ᐱᕙᓪᓕᐊᓂᕐᒧᑦ.

ᒪᒃᑯᒃᑐᑦ ᐅᔭᕋᒃᑕᕐᓂᕐᒥᒃ ᐊᔪᙱᓐᓂᖃᖅᑖᕐᓂᕐᒧᑦ ᐃᓕᓐᓂᐊᖅᑐᓄᑦ ᐃᑲᔫᑎ ᑮᓇᐅᔭᑎᒍᑦ, ᐊᒡᓃᑯᒃᑯᑦ ᓴᖅᕿᑦᑎᓚᐅᖅᑐᑦ ᑲᔪᓯᓯᒪᐃᓐᓇᕐᓂᖅ ᐃᓕᓐᓂᐊᖅᑐᓄᑦ ᐃᑲᔫᑎᒥᒃ ᐃᑲᔪᖅᑐᒥᒃ ᐃᓄᐃᑦ ᐃᓕᓐᓂᐊᖅᑎᐅᔪᓂᑦ ᐃᓕᓐᓂᐊᒃᑲᓐᓂᕈᒪᔪᓄᑦ ᐊᒻᒪᓗ ᐱᐊᓂᑦᑎᐊᖅᓯᒪᓂᐊᕐᓗᑎᒃ ᑲᓇᑕᒥᑦ ᐅᔭᕋᒃᑕᕆᐊᓕᓂᕐᒧᑦ ᐊᒻᒪᓗ ᓴᕕᓕᕆᓂᕐᒧᑦ ᐱᓕᕆᐊᖃᖅᑐᓄᑦ.

ᐱᔾᔪᑎᒋᑉᓗᒍ #InternationalDayofEducation, ᖁᕕᐊᓱᒃᑐᒍᑦ ᐊᐱᖅᓱᕈᖕᓇᓚᐅᕋᑉᑎᒍᑦ ᑎᐅᕆᒃ ᐊᐅᓪᓚᓐᓈᖅ ᕿᒧᒃᓯᕌᖅ ᐆᕐᕕᓐ, ᐅᑭᐅᖑᔪᒧᑦ ᐱᑖᖅᑎᑕᐅᔪᖅ ᐊᒡᓃᑯᒃᑯᑦ ᑲᔪᓯᓯᒪᐃᓐᓇᕐᓂᖅ ᐃᓕᓐᓂᐊᖅᑎᓄᑦ ᐃᑲᔫᑎᒥᒃ.

 

ᐅᖃᐅᑎᑎᒍᑦ ᐃᒡᕕᑦ ᒥᒃᓵᓄᑦ?

ᐊᑎᕋ ᑎᐅᕆᒃ ᐊᐅᓪᓚᓐᓈᖅ ᕿᒧᒃᓯᕌᖅ ᐆᕐᕕᓐ. ᑲᖏᖅᖠᓂᕐᒥᐅᑕᐅᔪᖓ, ᓄᓇᕗᒻᒥᑦ. ᐃᓅᓯᓗᒃᑖᕐᓚᒻᓂᑦ ᑲᖏᖅᖠᓂᕐᒥᐅᑕᐅᔪᖓ. ᒫᓐᓇ ᐃᖃᓗᖕᒥᐅᑕᐅᔪᖓ, ᐃᓕᓐᓂᐊᖅᑐᖓ ᐊᕙᑎᓕᕆᓂᕐᒥᒃ ᐱᓕᕆᐊᖃᕐᓂᕐᒧᑦ; ᑐᕌᖓᔪᒧᑦ ᐊᑎᓕᐅᖅᓯᒪᔪᖓ ᐊᕙᑎᓕᕆᓂᕐᒧᑦ ᐱᓕᕆᔨᐅᓂᕐᒧᑦ ᑐᕌᖓᔪᒥᑦ. ᖁᕕᐊᒋᔭᕋ ᐱᖃᐃᓕᓴᕐᕕᖕᒦᓐᓂᖅ, ᒪᖃᐃᓐᓂᖅ, ᐅᖃᓕᒫᕐᓂᖅ, ᐊᒻᒪᓗ ᐃᓕᑦᑎᓂᖅ. ᐱᒋᐊᕈᒪᒍᑎᒋᔭᒃᑲ ᖃᑕᙳᑎᒃᑲ ᐊᒻᒪᓗ ᐱᖃᓐᓈᒃᑲ ᐊᓕᐊᓇᐃᒋᒐᑉᑯ ᖃᐅᔨᒪᔪᖕᓇᕋᑉᑭᑦ ᐃᓚᖏᑦ ᐊᔪᙱᓐᓂᖃᖅᑐᑦ ᐊᒻᒪᓗ ᐱᐊᓂᑦᑎᐊᖅᓯᒪᓂᖃᖅᑐᑦ ᐃᓄᐃᑦ ᐊᔾᔨᒌᙱᑦᑐᓂᑦ ᐃᓅᓯᖏᓐᓃᑦᑐᓂᑦ.

ᑐᕌᒐᕆᔭᕋ ᐊᔪᙱᑦᑎᐊᕈᒪᑉᓗᖓ ᖃᓄᐃᑦᑐᑐᐃᓐᓇᓂᒃ ᐱᔾᔪᑎᖃᖅᑐᓂᒃ, ᐃᓚᐅᑉᓗᓂ ᖃᐅᔨᒪᓂᖃᕐᓗᖓ ᓄᓇᓕᐊᖅᑕᕐᓂᕐᒥᒃ, ᑐᑭᓯᐅᓗᒍ ᖃᕆᐊᕐᒥᑦ ᐃᓕᓐᓂᐊᕐᓂᖅ, ᐱᓕᕆᓂᑯᖃᕐᓗᖓ, ᐊᒻᒪᓗ ᓄᓇᓕᖕᒥᐅᑕᐅᖃᑎᒌᖕᓂᕐᒥᒃ ᖃᑕᙳᑎᒃᑲ ᐱᖃᑎᒋᓗᒋᑦ ᐊᒻᒪᓗ ᑲᖏᖅᖠᓂᕐᒥᐅᑕᐃᑦ. ᐱᐅᓯᒋᐊᕐᓗᓂ ᓇᖕᒥᓂᖅ ᐱᐅᓯᒋᐊᖅᓯᓂᐅᔪᖕᓇᖅᑐᖅ ᐊᒥᓲᓂᖅᓴᐅᔪᓄᑦ ᑲᑎᒪᔪᓄᑦ, ᐊᒻᒪᓗ ᐱᒋᐊᓪᓚᒃᑎᒃᑲᓐᓂᕈᒪᔭᕋ ᐃᓅᓯᕐᒪ ᓇᒧᙵᐅᑎᒃᑲᓗᐊᖅᐹᖓ.

 

ᖃᓄᖅ ᐃᓱᒪᓕᐅᓕᓚᐅᖅᐱᑦ ᐃᓕᓐᓂᐊᕈᒪᑉᓗᑎᑦ ᑕᒪᑐᒥᙵᑦ?

2020-2021-ᒥᑦ, ᐱᓕᕆᓚᐅᖅᑐᖓ ᐃᒪᓕᕆᓂᕐᒧᑦ ᐱᓕᕆᔨᐅᓂᕐᒥᒃ ᖃᐅᔨᓴᐃᑉᓗᖓ ᐃᒪᑦᑎᐊᕙᖕᒦᑦᑐᓂᒃ ᐃᖃᓗᖕᓂᑦ. ᐱᓕᕆᐊᒪ ᓇᒧᑐᐃᓐᓈᖅᑎᓚᐅᖅᑖᖓ ᑲᓇᑕᒥᑦ ᐊᒻᒪᓗ ᐱᒋᐊᕈᒪᓕᓚᐅᖅᑐᖓ ᐊᕙᑎᓕᕆᓂᕐᒧᑦ ᐱᓕᕆᓂᕐᒥᒃ. ᐊᐅᔭᖅ, ᑕᓯᕐᔪᐊᕐᒥᑦ ᐱᓕᕆᓚᐅᖅᑐᖓ ᐊᕙᑎᓕᕆᓂᕐᒥᒃ ᐃᓕᓐᓂᐊᖅᑎᑕᐅᑉᓗᖓ. ᐊᑕᐅᓯᖅ ᐅᖃᖃᑦᑕᖅᑕᕋ, “ᐃᓂᖃᐃᓐᓇᓲᖅ ᐱᐅᓯᒋᐊᖅᓯᓂᕐᒧᑦ.” ᐊᒡᓃᑯᒃᑯᑦ ᐅᒃᐱᕈᓱᖕᒥᔪᑦ ᐱᐅᓯᒋᐊᖅᓯᓂᖃᕈᖕᓇᐃᓐᓇᓲᖑᖕᒪᑦ, ᐊᒻᒪᓗ ᐱᑦᑕᐅᔪᒥᒃ ᐱᓕᕆᐊᖃᖃᑎᒋᒋᐊᕐᓂᐊᖅᑕᒃᑲ.

 

ᓱᓇᓂᒃ ᐃᒃᐱᒍᓱᓚᐅᖅᐱᑦ ᐊᒻᒪᓗ ᐃᓱᒪᓚᐅᖅᐱᑦ ᖃᐅᔨᒐᕕᑦ ᐃᓕᓐᓂᐊᖅᑐᓄᑦ ᐃᑲᔫᑎᒥᒃ ᓵᓚᒃᓴᕋᕕᑦ?

ᑐᓴᕋᒪ ᓵᓚᒃᓴᖅᑕᕋ ᐃᓕᓐᓂᐊᖅᑎᒧᑦ ᐃᑲᔫᑎ, ᖁᕕᐊᓱᑦᑎᐊᓚᐅᖅᑐᖓ. ᐅᖁᒪᐃᑦᑐᖅ ᑐᐃᒻᓂᑦ ᐃᒃᐱᒋᔭᕋ ᐲᖅᑑᔭᓚᐅᖅᑐᖅ. ᐃᓕᓐᓂᐊᖅᑎᓪᓗᖓ ᐱᐊᓂᒃᐸᓪᓕᐊᓂᐊᕐᓗᖓ ᓯᑕᒪᐃᑦ ᑕᖅᕿᓂᑦ, ᐊᖏᕐᕋᕆᓂᐊᖅᑕᒻᓂᑦ ᕿᓂᕆᐊᖃᖅᑐᖓ. ᐃᓕᓐᓂᐊᖅᑐᓄᑦ ᐃᑲᔫᑎ ᐃᑲᔪᕐᓂᐊᖅᑐᖅ ᐃᒡᓗᑖᕈᖕᓇᕐᓂᐊᕐᓗᖓ.

 

ᖃᓄᖅ ᐅᖃᐅᔾᔨᔪᒪᕕᑦ ᐃᓕᓐᓂᐊᖅᑐᓄᑦ ᐊᕙᑎᓕᕆᓂᕐᒧᑦ ᐅᔭᕋᒃᑕᕆᐊᕐᒥᓪᓘᓐᓃᑦ ᐱᓕᕆᔪᒪᔪᓄᑦ?

ᐅᖃᐅᑎᓇᔭᖅᑕᒃᑲ ᐃᓄᐃᑦ ᐃᓕᓐᓂᐊᖅᑐᑦ ᐊᕙᑎᓕᕆᓂᕐᒥᑦ ᐊᔪᙱᓐᓂᕆᔭᖏᓐᓂᑦ ᓇᓗᙱᓐᓂᖃᕐᓗᑎᒃ ᐊᒻᒪᓗ ᐃᓚᒋᔭᐅᔪᑐᑦ ᐃᒃᐱᒌᓐᓇᖃᑦᑕᕐᓗᑎᑦ. ᐊᓕᐊᓇᐃᒋᓕᕐᓗᒍ ᐃᓕᓐᓂᐊᖅᐸᓪᓕᐊᓂᐅᔪᖅ, ᑕᐃᒪᓐᓇ ᐱᐊᓚᓛᖑᖕᒪᑦ ᑎᑭᐅᑎᓂᐊᕐᓗᓂ ᑐᕌᒐᕆᔭᐅᔪᓄᑦ. ᐱᕕᖃᓕᑐᐊᖅᐸᑦ ᐱᒋᐊᕐᓗᑎᑦ ᐊᒻᒪᓗ ᐊᔪᙱᓐᓂᖅᑖᕐᓗᑎᑦ ᐃᓕᖕᓂᒃ ᓯᕗᓕᖅᑎᐅᑎᑦᑎᓂᐊᖅᑐᓂᒃ ᐱᓕᕆᐊᕐᒥᑦ.

 

ᐃᓕᓐᓂᐊᕌᓂᒃᑯᕕᑦ ᓱᓕᕆᓂᐊᖅᐱᑦ, ᐊᒻᒪᓗ ᓱᓇᒥᒃ ᓂᕆᐅᒃᐱᑦ ᐃᓕᓐᓂᐊᕌᓂᒃᑯᕕᑦ?

ᐃᓕᓐᓂᐊᕌᓂᒃᑯᒪ, ᑲᖏᖅᖠᓂᕐᒧᑦ ᐅᑎᕈᒪᔪᖓ. ᐊᒡᓃᑯᒃᑯᑦ ᐱᓕᕆᖃᑎᒋᔪᒪᔭᒃᑲ ᑲᑎᑎᑦᑐᒪᑉᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᐅᔨᓇᓱᒃᑐᓕᕆᓂᒃᑯᑦ ᖃᐅᔨᒪᓂᕆᔭᐅᔪᑦ.

 

ᒪᒃᑯᒃᑐᑦ ᐅᔭᕋᒃᑕᕆᐊᓕᕆᓂᕐᒧᑦ ᐊᔪᙱᓐᓂᖃᕐᓂᕐᒧᑦ ᐃᓕᓐᓂᐊᖅᑎᓄᑦ ᑮᓇᐅᔭᖅ ᓴᖅᕿᑕᐅᓚᐅᖅᑐᖅ ᐃᑲᔪᕐᓂᐊᕐᓗᒋᑦ ᑮᓇᐅᔭᖃᖅᑎᓪᓗᒋᑦ ᐃᓕᓐᓂᐊᖅᑎᓪᓗᒋᑦ ᑲᓇᑕᐅᑉ ᑭᖑᕚᕆᓂᐊᖅᑕᖏᑦ ᐅᔭᕋᒃᑕᕆᐊᕐᓂᕐᒥᒃ ᐊᔪᙱᓐᓂᖅᑖᕐᓂᕐᒧᑦ. ᐅᓇ ᓇᕿᓪᓗᒍ ᐅᖃᓕᒫᒃᑲᓐᓂᕈᒪᒍᕕᑦ ᒪᒃᑯᒃᑐᑦ ᐅᔭᕋᒃᑕᕐᓂᕐᒥᒃ ᐊᔪᙱᓐᓂᖃᖅᑖᓂᕐᒧᑦ ᐃᓕᓐᓂᐊᖅᑎᓂᒃ ᐃᑲᔫᑎ ᑮᓇᐅᔭᒥᑦ ᐱᔾᔪᑎᖃᖅᑐᒥᒃ ᐊᒻᒪᓗ ᐱᑖᖅᑐᓂᑦ ᐱᔾᔪᑎᖃᖅᑐᑦ ᑕᑯᓗᒋ: http://www.ympscholarships.com/2023-winners/