ᐊᒡᓃᑯᒃᑯᑦ ᐃᖅᑲᐅᒪᔾᔪᑎᓕᐅᖅᑐᑦ ᐅᒃᑯᐃᖅᓯᓂᖓᓐᓂᒃ ᐊᒪᕈᖅ ᐱᓕᕆᐊᕐᒥᑦ ᑐᓴᖅᑎᑦᑎᑉᓗᑎᒃ $1 ᒥᓕᔭᓐᓂᒃ ᑐᓂᕐᕈᑎᖃᕐᓂᖓᓐᓂᒃ ᓯᑕᒪᓂᑦ ᓄᓇᓕᖕᒥᑦ ᐱᓕᕆᐊᓄᑦ ᐱᐅᓯᒋᐊᖅᓯᓂᐊᖅᑐᓂᒃ ᐃᓅᓯᖏᓐᓂᒃ ᖃᒪᓂᑦᑐᐊᕐᒥᐅᑕᐃᑦ.

ᓘᒃ ᓱᐃᓈᑦ, ᓱᓇᑐᐃᓐᓇᓄᑦ ᐊᐅᓚᑦᑎᔨ ᐊᒡᓃᑯᒃᑯᑦ ᐊᐳᖅᑎᓐᓈᖅᑐᒥᑦ ᐊᐅᓛᖅᑎᑦᑎᓂᖓᓐᓂᑦ, ᑐᓴᖅᑎᑦᑎᓚᐅᖅᑐᖅ ᓴᓇᑦᑕᐃᓕᐊᕈᓯᕐᒥᑦ, ᐋᒋᓯ 24-ᒥᑦ, ᐊᕐᕌᕈᑕᒫᖅ ᖃᒪᓂᑦᑐᐊᕐᒥᐅᑦ ᖁᕕᐊᓱᒡᕕᒋᖃᑦᑕᖅᑕᖓᓐᓂᒃ ᖃᓂᑕᖓᓂᑦ ᑕᓯᐅᑉ ᖁᕕᐊᓲᑎᖃᕐᓂᕐᒥᑦ.

“ᐊᒡᓃᑯᒃᑯᑦ ᐱᕙᓪᓕᐊᑎᑦᑎᓂᖃᖅᑐᑦ ᐅᔭᖅᑲᓂᒃ ᐱᑕᓕᖕᓂᑦ ᐱᔭᒃᓴᐅᑎᖃᕐᓂᒃᑯᑦ ᐊᒻᒪᓗ ᐃᑲᔪᐃᓂᖃᕐᓂᐊᖅᑐᓂᒃ ᑕᒪᐃᓐᓄᑦ. ᖁᕕᐊᒋᑦᑎᐊᖅᑕᕗᑦ ᑐᓂᕐᕈᑎᖃᕐᓂᐊᕐᓗᑕ ᐱᕈᐃᑎᑦᑎᓂᖃᕐᓂᐊᖅᑐᓂᒃ ᖃᒪᓂᑦᑐᐊᕐᒥᑦ ᐊᒻᒪᓗ ᖃᓂᑕᖏᓐᓂᑦ ᓄᓇᓕᖕᓂᑦ. ᐊᒻᒪᓗ, ᓴᖅᑭᑦᑎᔪᒪᔪᒍᑦ ᓴᙱᔪᓂᒃ ᓄᓇᓕᖕᓂᑦ ᐊᒻᒪᓗ ᖃᐅᔨᒪᔭᐅᓂᖃᕐᓂᒥᒃ ᐃᑲᔪᐃᖃᑦᑕᕐᓂᕐᒥᒃ ᐱᕈᐃᑎᑦᑎᓂᕐᒧᑦ ᑭᖑᕚᖑᓂᐊᖅᑐᓄᑦ ᓄᓇᕗᒻᒥᐅᓂᑦ.”

ᖁᕕᐊᓲᑎᖃᖅᑎᓪᓗᒋᑦ, ᒥᔅᑕ ᓱᐃᓈᑦ ᑐᓴᖅᑎᑦᑎᓚᐅᖅᑐᖅ ᐊᒡᓃᑯᒃᑯᑦ ᐃᑲᔪᕐᓂᐊᕐᓂᖏᓐᓂᒃ ᑮᓇᐅᔭᖃᖅᑎᑦᑎᓗᑎᒃ ᓄᓇᓕᖕᒥᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ ᐱᓕᕆᐊᓂᑦ:

  • ᑐᓂᕐᕈᑕᐅᔪᖅ $500,000 ᐅᑭᐅᑦ ᑕᓪᓕᒪᐃᑦ ᖃᐃᔪᓂᑦ ᖃᒪᓂᑦᑐᐊᕐᒥᑦ ᐊᑉᓗᖅᑕ ᑲᑐᔾᔨᖃᑎᒌᓄᑦ ᓴᖅᕿᑎᑦᑎᓂᐊᕐᓗᑎᒃ ᓂᕿᑖᕐᕕᖕᒥᑦ ᐊᒻᒪᓗ ᐃᑲᔪᕐᓗᑎᒃ ᓂᕿᖄᓂᖃᑦᑕᙱᓐᓂᕐᒥᒃ ᑭᕙᓪᓕᑦᒥ. ᑕᓪᓕᒪᓄᑦ ᐅᑭᐅᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᑐᕌᖓᔪᖅ ᐃᑲᔪᕐᓂᐊᖅᑐᖅ ᐱᓕᕆᐊᓂᒃ ᐅᑯᓂᙵᑦ:
    • ᐱᓇᓱᐊᕈᓯᑕᒫᖅ ᐆᓇᖅᑐᓂᒃ ᐅᑉᓗᕈᒥᑕᖅᑎᑦᑎᓂᖅ ᐃᓐᓇᕆᔭᐅᔪᓂᒃ
    • ᐱᓇᓱᐊᕈᓯᑕᒫᖅ ᓂᕆᑎᑦᑎᖃᑦᑕᕐᓂᖅ ᐊᑭᓕᖅᑐᖅᑕᐅᙱᖦᖢᑎᒃ ᐱᓕᕆᔨᓄᑦ ᓂᕿᑖᕐᕕᖕᒥᑦ (ᐊᒻᒪᓗ ᐊᑭᓗᒃᑐᖅᑕᕐᕕᒃ) ᐊᒻᒪᓗ ᐋᖅᑭᒃᓱᐃᓗᑎᒃ ᐊᔾᔨᒌᙱᑦᑐᓂᒃ ᑮᓇᐅᔭᓂᒃ ᐱᕈᐃᑎᑦᑎᓂᕐᓂᒃ
    • ᐱᑕᖃᖅᑎᐅᔭᐃᓐᓇᕐᓗᒋᑦ ᐸᓂᖅᑐᓂᒃ ᓂᕿᓂᒃ, ᖃᑕᙳᑎᒌᓂᒃ ᐱᔭᕆᐊᖃᓗᐊᖅᑐᓂᒃ ᐱᔭᐅᖃᑦᑕᕈᖕᓇᕐᓂᐊᖅᑐᓂᒃ
    • ᓈᒻᒪᒃᑐᓂᒃ ᐸᓂᖅᑐᓂᒃ ᓂᕿᖃᖅᑎᑦᑎᓗᑎᒃ ᑐᐊᕕᓇᖅᑐᓄᑦ ᐊᑐᕐᓂᐊᖅᑐᓂᒃ, ᐅᔾᔨᕆᓗᐊᕐᓗᒋᑦ ᓄᑕᖅᑲᐃᑦ ᐊᖏᕐᕋᒦᑦᑐᑦ
  • ᑐᓂᕐᕈᑕᐅᔪᖅ $250,000 ᖃᒪᓂᑦᑐᐊᕐᒥᑦ ᐃᑯᐊᓪᓚᒃᑐᓕᕆᔨᒃᑯᓐᓄᑦ ᐊᑐᕐᓂᐊᖅᑕᖏᓐᓂᒃ ᓄᓇᒃᑰᕈᑕᐅᓯᕝᕕᖕᒧᑦ ᐊᒻᒪᓗ ᑐᖅᑯᖅᑕᐅᓯᒪᓂᐊᕐᓗᒍ ᓄᑖᖅ ᑐᐊᕕᓇᖅᑐᓕᕆᔾᔪᑎ ᓄᓇᒃᑰᕈᑎᖓᑦ. ᑐᐊᕕᓇᖅᑐᓕᕆᔾᔪᑎ ᓄᓇᒃᑰᕈᑎ ᓂᐅᕕᖅᑕᐅᓵᓚᐅᖅᑐᖅ Arctic Fuel-ᑯᓐᓄᑦ ᓄᓇᓕᖕᒥᑦ ᐱᑖᖅᑎᑦᑎᔨᐅᔪᖅ ᐊᒡᓃᑯᒃᑯᓐᓂᑦ – ᑐᓂᕐᕈᑕᐅᔪᖅ ᓄᓇᓕᖕᒧᑦ. ᑭᓯᐊᓂ, ᐃᑯᐊᓪᓚᓚᐅᖅᑐᒧᑦ ᓴᕋᓚᐅᕐᒪᑦ ᓄᓇᒃᑰᕈᑕᐅᓯᕝᕕᖓ ᔭᓄᐊᕆᐅᓚᐅᖅᑐᒥᑦ, ᑐᖅᑯᖅᓯᓯᒪᕝᕕᒃᑕᖃᓚᐅᖏᑦᑐᖅ ᑐᐊᕕᓇᖅᑐᓕᕆᔾᔪᑎ ᓄᓇᒃᑰᕈᑎᒧᑦ ᐊᒻᒪᓗ ᐊᑐᖅᑕᐅᓂᖅ ᐊᔪᓚᐅᖅᑐᖅ. ᓂᐅᕕᕐᓂᖓᑦ ᓄᓇᒃᑰᕈᑕᐅᓯᕝᕕᖕᒥᑦ, ᖃᒪᓂᑦᑐᐊᖅ ᐊᑐᕈᖕᓇᕐᓂᐊᓕᖅᑕᖓᑦ ᑐᐊᕕᓇᖅᑐᓕᕆᔾᔪᑎ ᓄᓇᒃᑰᕈᑎᖓ ᐊᒻᒪᓗ ᐱᐅᓂᖅᓴᒥᒃ ᐋᓐᓂᐊᖃᖅᑕᐃᓕᒪᓂᕐᒥᒃ ᐊᒻᒪᓗ ᑐᐊᕕᓇᖅᑐᓕᕆᓂᕐᒥᒃ ᑲᒪᓕᕐᓗᑎᒃ ᖃᒪᓂᑦᑐᐊᕐᒥᐅᓄᑦ.
  • ᑐᓂᕐᕈᑕᐅᔪᖅ $150,000 ᕿᓂᖅᑎᓄᑦ ᖃᖓᑕᓲᒥᒃ ᐊᔾᔨᓕᐅᕈᑎᓕᖕᒥᑦ ᓂᐅᕕᕈᑕᐅᓂᐊᕐᓗᓂ ᐊᓯᖏᓐᓂᒡᓗ ᐱᖁᑎᓂᒃ ᕿᓂᕐᓂᕐᒧᑦ ᐊᑐᖅᑕᐅᓂᐊᖅᑐᓂᒃ – ᐱᔭᐅᔭᕆᐊᖃᒻᒪᕆᒃᑐᑦ ᐅᖓᓯᒃᑐᒥᑦ ᓄᓇᓕᖕᓄᑦ – ᐊᔪᕈᖕᓃᖅᓴᖅᑕᐅᓂᐊᕐᓗᑎᒃ ᐊᒻᒪᓗ ᓇᓗᓇᐃᒃᑯᑕᖅᑖᕐᓗᑎᒃ ᐊᐅᓛᖅᑎᑦᑎᓂᕐᓄᑦ.
  • ᑐᓂᕐᕈᑕᐅᔪᖅ $100,000 ᖃᒪᓂᑦᑐᐊᕐᒥᑦ ᕿᑎᒃᑎᔨᖏᓐᓄᑦ ᐊᑐᕐᓂᐊᕐᓗᒍ ᓄᑖᒥᒃ ᓂᐱᖃᖅᑎᑦᑎᔾᔪᑎᒥᒃ ᐊᒻᒪᓗ ᐃᑭᑦᑕᖅᑐᓂᒃ. ᕼᐋᒻᓚᒃᑯᑦ ᒧᒥᖅᑎᑦᑎᒐᔪᒃᑐᑦ ᐊᓯᖏᓐᓂᒡᓗ ᖃᓄᐃᓕᐅᕐᓂᐅᔪᓂᒃ ᐱᙳᐊᕐᕕᖓᓐᓂᑦ.

2000 ᐅᖓᑖᓄᑦ ᐃᓄᐃᑦ ᑕᐃᑲᓃᓚᐅᖅᑐᑦ ᓄᓇᓕᖕᒥᑦ ᖁᕕᐊᓱᖕᓂᖃᖅᑎᓪᓗᒋᑦ ᐊᒪᕈᖅ ᐅᒃᑯᐃᖅᑕᐅᓂᖓᓄᑦ.

ᑐᓴᖅᑎᑦᑎᑎᓪᓗᒋᑦ ᐊᒡᓃᑯᒃᑯᑦ ᐃᑲᔪᕐᓂᖓᑦ ᖃᐅᔨᒪᔭᐅᔾᔪᑎᓄᑦ ᐱᓕᕆᐊᕐᓄᑦ, ᒥᔅᑕ ᓱᐃᓈᑦ ᐅᖃᓚᐅᖅᑐᖅ, “ᐊᑉᓗᖅᑕ ᑐᑭᖃᖅᑐᖅ ‘ᓯᕗᒻᒧᒋᐊᕐᓂᖅ’  ᐃᓄᒃᑎᑐᑦ ᐊᒻᒪᓗ ᑕᒪᑐᒧᙵ ᑎᑭᐅᑎᔪᒪᑦᑎᐊᖅᑐᒍᑦ ᐃᑲᔪᐃᓂᑉᑎᒍᑦ ᓄᓇᓕᖕᒥᑦ-ᐃᓕᑕᕆᔭᐅᓯᒪᔪᑦ ᓯᕗᓪᓕᖅᐸᐅᑎᔭᐅᔪᒪᔪᓂᑦ – ᐃᑲᔪᕐᓗᒋᑦ ᖃᒪᓂᑦᑐᐊᕐᒥᐅᑕᐃᑦ ᓯᕗᒻᒧᒋᐊᕐᓂᕐᒥᒃ ᐊᒻᒪᓗ ᐱᐅᓯᕚᓪᓕᖅᑎᕐᓗᒋᑦ ᐃᓅᓯᖏᑦ ᓴᙱᒃᑎᑎᓐᓂᒃᑯᑦ ᓄᓇᓕᖕᒥᑦ ᓂᕿᖃᖅᑎᑦᑎᓂᖅ, ᐋᓐᓂᐊᖃᖅᑕᐃᓕᒪᓂᖏᓐᓄᑦ ᑲᒪᒋᔭᐅᓂᖃᓕᒃᑲᓐᓂᕐᓗᒋᑦ ᐊᒻᒪᓗ ᑐᐊᕕᕐᓇᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ, ᐊᒻᒪᓗ ᐱᕕᖃᖅᑎᓪᓗᒋᑦ ᐃᓅᖃᑎᖏᓐᓄᑦ ᐱᓕᕆᖃᑎᒌᖕᓂᖏᓐᓂᒃ ᐱᖃᓐᓈᖏᓐᓄᑦ ᐊᒻᒪᓗ ᖃᑕᙳᑎᖏᓐᓄᑦ.”

ᓱᓇᐅᕙ ᐊᒪᕈᖅ ᐱᓕᕆᐊᖅ? ᐊᒪᕈᖅ ᐃᖕᒥᒃᑰᖓᔪᖅ ᐱᑕᓕᒃ 50 ᑭᓛᒥᑕᓪᓗᐊᓂᒃ ᐅᖓᓯᒃᑎᒋᔪᖅ ᐅᐊᖕᓇᖅᐸᓯᖓᓂᑦ ᐱᖓᖕᓇᖅᐸᓯᖓᓂᑦ ᐊᒡᓃᑯᒃᑯᑦ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᖓᓂᑦ. ᐊᒪᕈᖅ ᒎᓗᓂᒃ ᐱᑕᓕᒃ, ᐱᕙᓪᓕᐊᔭᐅᔪᖅ ᓄᓇᒥᑦ ᐅᒃᑯᐃᖓᑉᓗᓂ ᐅᔭᕋᒃᑕᕆᐊᕐᒥᑦ ᐊᐅᓛᖅᑎᑦᑎᓂᖅ ᐅᔭᕋᒃᑕᖅᑕᐅᔪᑦ ᐊᐳᖅᑎᓐᓈᖅᑐᒥᑦ ᓯᖃᓪᓕᑎᕆᕝᕕᖕᒧᐊᖅᑕᐅᖃᑦᑕᕐᓂᐊᖅᖢᑎᒃ. ᒫᓐᓇᐅᔪᖅ, 240-ᓂᒃ ᐱᓕᕆᔨᖃᖅᑐᑦ ᐊᒻᒪᓗ ᑳᓐᑐᕌᒃᖃᖅᑐᑦ ᐱᓕᕆᔪᑦ ᐅᔭᕋᒃᑕᕆᐊᕐᒥᑦ ᐊᒻᒪᓗ ᓂᐅᕕᐊᒃᓴᖃᕐᓂᕐᒧᑦ ᐱᓕᐅᕆᕙᓪᓕᐊᓕᖅᐸᑕ, ᓂᕆᐅᒃᑐᒍᑦ ᐊᒪᕈᖅ 2.5 ᒥᓕᔭᓐ ᐊᐅᓐᓯᓪᓗᐊᓂᒃ ᒎᓗᓕᐅᕐᓂᐊᕐᓂᖓᓄᑦ ᐊᑯᓐᓂᖓᓂᑦ 2019 ᐊᒻᒪᓗ 2025, ᐊᕐᕌᒍᑕᒫᖅ ᒎᓗᓕᐅᖃᑦᑕᕐᓗᑎᒃ ᐊᒥᓱᑦ ᑲᑎᖦᖢᒋᑦ ᐊᑕᐅᓯᙳᕐᓗᒍ ᓈᓴᐅᑎ 272,500 ᐊᐅᓐᓯᓂᒃ.