ᓄᓇᕗᒻᒥ ᐱᓕᕆᕝᕕᖓᑦᑕ ᐱᓕᕆᐊᒃᓴᖓᑦ ᑲᒪᓂᐊᕐᓗᑎᒃ ᐅᑎᖅᐸᓪᓕᐊᓂᕐᒧᑦ ᐱᓕᕆᐊᖏᓐᓄᑦ ᓄᓇᕗᒻᒥᑦ ᐱᓕᕆᔨᕗᑦ ᐃᑲᔪᐃᓂᖃᒻᒫᕐᓗᑎᒃ ᐱᐊᓂᑦᑎᐊᕈᖕᓇᕐᓂᖏᓐᓄᑦ ᓄᓇᓕᖓᑦ.

ᓴᓇᑦᑕᐃᓕᐅᕌᓂᒃᐸᑦ ᐊᑯᓪᓕᕈᕐᕕᒃ 10-ᒥᑦ, ᐊᒡᓃᑯᒃᑯᑦ ᓄᓇᕗᒻᒥ ᐱᓕᕆᕝᕕᖓᑦ ᐱᒋᐊᖅᑎᓐᓂᐊᖅᑕᖓᑦ ᐆᒃᑐᕋᐅᑕᐅᔪᖅ ᐱᓕᕆᐊᖓᑦ, ᐱᑦᑎᐊᕐᓂᕐᒧᑦ ᐃᑲᔪᐃᔨᑦ. ᐅᓗᕆᐊᓇᖅᑐᖃᙱᑎᑦᑎᓂᕐᒧᑦ ᐱᓕᕆᐊᖑᓯᒪᑉᓗᑎᒃ ᓯᐊᒻᒪᒃᑎᑕᐅᖁᓇᒍ ᓄᕙᖕᓇᕐᔪᐊᖅ-19 ᑭᕙᓪᓕᕐᒥᑦ ᓄᓇᓕᖕᓄᑦ, ᑲᒻᐸᓂᒃᑯᑦ ᓄᓇᕗᒻᒥ ᐱᓕᕆᔨᖏᑦ – ᐱᓕᕆᙱᒃᑲᓗᐊᖅᑎᓪᓗᒋᑦ ᐊᑭᓕᖅᑐᖅᑕᐅᔪᑦ – ᐅᔭᕋᒃᑕᕆᐊᕐᒧᐊᕐᓂᖅ ᓱᓕ ᐊᔪᖅᑐᑦ. ᐱᔾᔪᑎᒋᑉᓗᒍ ᓄᑖᖅ ᐱᓕᕆᐊᖅ, ᐱᓕᕆᐊᒧᑦ ᐅᑎᕈᖕᓇᖅᓯᓂᐊᓕᖅᑐᑦ ᐅᓗᕆᐊᓇᙱᑦᑐᖃᖅᑎᑦᑎᓂᑐᐃᓐᓇᐅᖏᓪᓗᓂ, ᑭᓯᐊᓂ ᖃᓄᐃᖏᑦᑎᐊᕐᓂᕐᒧᑦ, ᓄᓇᓕᖏᑦ: ᐱᐊᓂᒡᓗᒋᑦ ᐃᒃᑲᕐᕋᓕᐊᖏᑦ ᓄᓇᓕᖕᒥᑦ ᐱᓕᕆᐊᓄᑦ ᑐᕌᖓᔪᓂᑦ.

ᐆᒃᑑᑕᐅᔪᖅ ᐱᓕᕆᐊᖅ ᐊᒡᓃᑯᒃᑯᑦ ᐊᑭᓕᖅᑐᕐᓗᒋᑦ ᐱᓕᕆᔨᖏᑦ ᐊᑐᕐᓗᒋᑦ ᑮᓇᐅᔭᓕᐊᖏᑦ ᐅᑭᐅᓗᒃᑖᕐᒧᑦ ᐱᓕᕆᑎᓪᓗᒋᑦ ᐱᓕᕆᖃᑎᒌᓄᑦ ᐃᑲᔪᐃᓂᖃᕐᓗᑎᒃ ᐊᒻᒪᓗ ᐱᒋᐊᖅᑎᑦᑎᔪᖕᓇᕐᓗᓂ ᓄᓇᓕᖕᒥᐅᓂᑦ. ᐱᒋᐊᕐᓗᑕ, ᐱᓕᕆᖃᑎᒋᓂᐊᖅᑕᕗᑦ ᐊᖅᑭᐅᒪᕝᕕᒃ ᑲᑐᔾᔨᖃᑎᒌᑦ, ᐊᑉᓗᖅᑕ ᑲᑐᔾᔨᖃᑎᒌᑦ, ᖃᒪᓂ’ᑐᐊᕐᒥᑦ ᓇᔾᔨᔪᓄᑦ ᓂᕿᑦᑎᐊᕙᖃᕐᓂᕐᒧᑦ ᐱᓕᕆᐊᖅ.

ᐊᕐᕕᐊᓂᑦ ᐊᖅᑭᐅᒪᕝᕕᒃ ᑲᑐᔾᔨᖃᑎᒌᑦ ᐱᒻᒪᕆᐅᔪᓂᒃ ᐸᕐᓇᐅᑎᖃᓚᐅᖅᑐᑦ ᖃᐅᔨᒋᐊᕐᕕᒋᒻᒪᔾᔪᒃ ᐊᒡᓃᑯᒃᑯᑦ: 20-ᓂᒃ ᐱᓕᕆᔨᓂᒃ ᐱᓗᑎᒃ ᐃᑲᔪᕐᓂᐊᖅᑐᓂᒃ 6 ᑐᕌᖓᔪᓂᑦ ᐃᑲᔪᕐᓂᐊᕐᓗᑎᒃ ᐊᔾᔨᒌᙱᑦᑐᓂᒃ ᖃᓄᐃᖏᑦᑎᐊᕐᓂᕐᒨᖓᔪᓂᑦ ᓲᕐᓗ ᐅᖃᐅᔾᔨᔨᐅᓂᕐᒧᑦ ᒪᒃᑯᒃᑐᓄᑦ, ᒪᒃᑯᒃᑐᐃᑦ ᒪᖃᐃᑏᑦ ᐊᒻᒪᓗ ᐃᓄᙳᐃᓂᖅ ᐊᖓᔪᖅᑳᖑᓂᕐᒧᑦ ᐃᑲᔪᐃᓂᖅ.

ᖃᒪᓂ’ᑐᐊᕐᒥᑦ, ᐃᓚᐅᖃᑕᐅᔪᓗᒃᑖᕐᓚᐃᑦ ᐱᓕᕆᔪᑦ ᐊᑉᓗᖅᑕ ᑲᑐᔾᔨᖃᑎᒌᓄᑦ, ᐊᑭᓗᒃᑐᖅᑕᕐᕕᒃ ᐊᒻᒪᓗ ᓂᕿᑖᕐᕕᒃ ᑕᐃᑲᓂ ᐃᑲᔪᖅᑐᖅ ᓂᕿᖄᓂᖃᑦᑕᙱᑦᑐᓄᑦ. ᐱᖓᓱᑦ ᐊᒡᓃᑯᒃᑯᓐᓄᑦ ᐱᓕᕆᔩᑦ ᐊᑭᓗᒃᑐᖅᑕᕐᕕᖕᒦᖃᑦᑕᖅᑐᑦ, ᐅᑉᓗᓗᒃᑖᖅ ᐅᒃᑯᐃᙶᕈᖕᓇᖅᓯᑉᓗᓂ, ᐊᒻᒪᓗ ᐊᒥᐊᒃᑰᔪᑦ 8 ᐱᓕᕆᔩᑦ ᐃᑲᔪᖃᑦᑕᖅᖢᑎᒃ ᓂᕿᑖᕐᕕᖕᒥᑦ ᐊᒻᒪᓗ ᐊᒡᔭᖅᑐᐃᑉᓗᑎᒃ ᓂᕿᓂᒃ ᐱᒋᐊᓵᖅᑎᓪᓗᒎᓚᐅᖅᑐᖅ.

ᖃᒪᓂ’ᑐᐊᕐᒥᑦ ᓄᑕᕋᒃᓴᓖᑦ ᓂᕿᑦᑎᐊᕙᖃᕐᓂᕐᒧᑦ ᐱᓕᕆᐊᖅ, ᓯᕗᓪᓕᖅᐹᖑᓯᒪᔪᖅ ᐊᒻᒪᓗ ᐊᑯᓂᐅᓛᖅ ᐊᐅᓛᖅᓯᒪᔪᖅ ᓄᓇᕗᒻᒥᑦ, ᐃᑲᔪᖃᑦᑕᖅᑐᖅ ᓄᑕᕋᒃᓴᓕᖕᓂᒃ, ᐊᓈᓇᐅᔪᓂᒃ ᓄᑕᕋᖅᑖᓵᖅᑐᓂᒃ (ᑎᒍᐊᖅᑐᓪᓗ), ᓄᑕᖅᑲᓂᒃ, ᐊᑖᑕᐅᔪᓂᒃ, ᐊᒻᒪᓗ ᖃᑕᙳᑎᒌᓂᒃ ᖃᒪᓂ’ᑐᐊᕐᒥᑦ ᓂᕿᑦᑎᐊᕙᓄᑦ ᐃᓕᓐᓂᐊᖅᑎᑦᑎᓂᕐᒥᒃ, ᐃᒐᒋᐅᖅᓴᓂᕐᒥᒃ, ᒥᖅᓱᕆᐅᖅᓴᓂᕐᓂᒃ, ᐊᓯᖏᓪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᖃᓄᐃᖏᑦᑎᐊᕐᓂᕐᒧᓪᓘᓐᓃᑦ ᐊᔪᕈᖕᓃᖅᓴᐃᓂᕐᓂᒃ – ᐱᓕᕆᐊᖑᔪᑦ ᐃᓄᐃᑦ ᐱᖅᑯᓯᖏᑦ ᐱᒻᒪᕆᐅᒋᔭᐅᓂᖏᓐᓄᑦ. ᓯᐅᕋᓐ ᐊᓕᖅ, ᐊᒡᓃᑯᒃᑯᓐᓄᑦᑕᐅᖅ ᐱᓕᕆᔨᐅᔪᖅ ᑖᑉᑯᓇᓃᖃᑕᐅᔪᖅ, ᐃᑲᕐᕋᓕᐊᖏᑦ ᐊᑐᖃᑦᑕᖅᑕᖏᑦ ᓄᑕᕋᒃᓴᖃᖅᑐᓄᑦ ᓂᕿᑦᑎᐊᕙᓕᕆᓂᕐᒧᑦ ᐃᑲᔪᖃᑦᑕᓚᐅᖅᓯᒪᑉᓗᓂ ᓯᕗᓂᐊᓂ. “ᖁᔭᓕᔪᖓ ᐱᓕᕆᐊᕐᒧᑦ,” ᐅᖃᖅᑐᖅ. “ᖁᕕᐊᒋᔭᕋ ᓄᑕᕋᒃᓴᓖᑦ ᐱᓕᕆᑉᓗᖓ… ᐱᓕᕆᖃᑎᒋᑉᓗᒋᑦ ᕚᓗᕆ ᐊᒻᒪᓗ ᐋᓂ.” ᐅᖃᖅᖢᓂᓗ ᑮᓇᐅᔭᓕᐅᒃᑲᓐᓂᕐᓂᖅ ᐃᑲᔪᕐᓂᐊᖅᑐᖅ, ᐊᒻᒪᓗ ᑮᓇᐅᔭᓂᒃ ᐊᑐᕐᓂᐅᔪᓄᑦ ᐃᑲᔫᑎᖃᕐᓂᐊᖅᑐᖅ ᓄᕙᖕᓇᕐᔪᐊᖅ-19-ᒥᑦ ᐱᔾᔪᑕᐅᑎᓪᓗᒍ ᐱᓕᕆᓂᕐᒧᑦ.

ᕚᓗᕆ ᑑᕆ, ᑐᑭᒧᐊᒃᑎᑦᑎᔨ ᓄᑕᕋᒃᓴᓂᕐᒧᑦ ᐊᒻᒪᓗ ᑲᑎᒪᔨᐅᖃᑕᐅᔪᖅ ᐊᑉᓗᖅᑕ ᑲᑐᔾᔨᖃᑎᒌᓄᑦ, ᐅᒃᐱᕈᓱᒃᑐᖅ ᐱᓕᕆᐊᖅ ᐱᑦᑕᐅᔫᖕᒪᑦ ᐊᒡᓃᑯᒃᑯᑦ ᐱᓕᕆᔨᖏᑦ ᐱᓕᕆᐊᖃᖅᑎᖦᖢᒋᑦ, ᓄᓇᓕᖕᒧᑦ ᐃᑲᔫᑕᐅᒻᒫᕐᓗᓂ ᐅᔭᕋᒃᑕᕆᐊᕐᒥᑦ ᐱᓕᕆᓂᖅ ᐊᔪᕐᓂᐊᖅᑎᓪᓗᒋᑦ. ᐅᖃᖅᑐᖅ, ᐃᑲᔪᖅᑕᐅᓂᖓᑦ ᑕᑯᑎᑦᑎᑐᐃᓐᓇᕐᓂᐊᖏᑦᑐᖅ ᐱᓕᕆᔨᓂᒃ ᖃᓄᖅ ᓂᕿᑖᕐᕕᒃ ᐋᖅᑭᐅᒪᓂᖓᓂᒃ, ᑭᓯᐊᓂᑦ ᐊᑉᓗᖅᑕ-ᒥᒃ ᐃᑲᔪᕐᓂᐊᖅᑐᖅᑕᐅᖅ ᐊᑭᓗᒃᑐᖅᑕᕐᕕᖓᓐᓂᒃ ᐊᐅᓛᓕᒃᑲᓐᓂᖅᑎᑦᑎᓗᓂ. “ᐊᓕᐊᓇᐃᑦᑎᐊᖅᑐᖅ ᐃᑲᔪᐃᓂᖃᒃᑲᓐᓂᓕᕐᒥᖕᒪᑕ ᐊᒡᓃᑯᒃᑯᑦ ᖃᒪᓂ’ᑐᐊᕐᒧᑦ… [ᐊᒻᒪᓗ] ᒪ’ᓈᕈᒪᔭᒃᑲ ᑐᓂᓯᓂᖓᓐᓄᑦ ᖃᒪᓂ’ᑐᐊᕐᒥᑦ ᓄᑕᕋᒃᓴᓕᖕᓄᑦ ᓂᕿᑦᑎᐊᕙᓕᕆᓂᕐᒥᑦ ᐱᓕᕆᔨᖓᑦ ᐅᕙᑉᑎᖕᓂᑦ ᐃᑲᔪᕐᓗᓂ.”

ᑕᖅᑭᖅ ᐊᓂᒍᖅᑎᓪᓗᒍ, ᖃᑉᓯᐊᕐᔪᐃᑦ ᐱᓕᕆᐊᑦ ᐊᑐᓕᖅᑎᑕᐅᓚᐅᖅᑐᑦ ᐊᒻᒪᓗ ᐃᑲᔪᐃᔪᑦ ᓯᑕᒪᓄᑦ ᓄᓇᓕᖕᓃᓕᖅᑐᖅ. ᐅᖃᓪᓗᕆᒃᓴᐅᑎᓂᖃᐃᓐᓇᖅᑐᑦ ᓱᓕ ᓄᓇᓕᖕᒥᑦ ᐱᓕᕆᖃᑎᒋᔭᐅᔪᑦ ᐊᖏᒡᓕᒋᐊᖅᑎᓐᓂᐊᕐᓗᒍ ᐱᑦᑎᐊᕐᓂᕐᒧᑦ ᐃᑲᔪᐃᔨᑦ. ᑕᐃᒪᑐᖅ ᖃᐃᔪᓂᑦ ᐱᓇᓱᐊᕈᓯᕐᓂᑦ, ᑕᒪᕐᒥᑦ 7-ᖑᔪᑦ ᓄᓇᓖᑦ ᑭᕙᓪᓕᕐᒥᑦ ᐊᑐᓕᕐᓂᐊᖅᐸᖓᑦ ᑖᒻᓇ ᐱᓕᕆᐊᖅ.