ᕕᕗᐊᕆ 25-ᒥᑦ, ᑲᓇᑕᐅᑉ ᒐᕙᒪᒃᑯᖏᑦ ᐅᖃᓚᐅᖅᑐᑦ ᑮᓇᐅᔭᖃᖅᑎᑦᑎᓂᐊᕐᓂᖏᓐᓄᑦ ᑭᕙᓪᓕᕐᒥᑦ ᐃᒪᕐᒥᒃ ᐆᒻᒪᖅᑯᑎᒃᑯᑦ-ᖃᕆᑕᐅᔭᒃᑰᕈᑎᒧᑦ ᐱᓕᕆᐊᖅ ᐊᔪᙱᓐᓇᔭᕐᓂᖓᓄᑦ ᖃᐅᔨᓴᐃᓂᕐᒧᑦ, ᑐᓴᖅᑎᑦᑎᓂᐅᔪᒥᒃ ᐊᒡᓃᑯᒃᑯᑦ ᖁᕕᐊᓱᒃᑐᑦ ᑐᙵᓱᒃᑎᖦᖢᒍ.  ᐱᓕᕆᐊᖅ ᑲᒪᒋᔭᐅᔪᖅ ᑭᕙᓪᓕᕐᒥᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᐱᓕᕆᖃᑎᖃᖅᖢᑎᒃ Anbaric ᐱᕙᓪᓕᐊᓂᕐᒧᑦ ᐱᓕᕆᖃᑎᒌᒃᑯᓐᓂᑦ.  ᐊᖏᓛᒥᒃ ᐃᑯᒻᒪᖅᑯᑎᒥᒃ ᐊᑐᖅᑎᐅᑉᓗᑎᒃ ᑭᕙᓪᓕᕐᒥᑦ, ᐊᒡᓃᑯᒃᑯᑦ ᑐᑭᓯᐊᔪᑦ ᐱᒻᒪᕆᐅᓂᖓ ᐊᑐᖅᑕᐅᒃᑲᓐᓂᕈᖕᓇᖅᑐᒥᒃ ᐆᒻᒪᖅᑯᑎᒧᑦ, ᑕᐃᒪᓐᓇᒧᓪᓗ ᐃᓚᐅᖃᑕᐅᖃᑦᑕᖅᓯᒪᔪᑦ ᐅᖃᓪᓚᖕᓂᐅᔪᓂᒃ ᐊᑐᖅᑕᐅᒃᑲᓐᓂᕈᖕᓇᖅᑐᑦ ᐆᒪᖅᑯᑏᑦ ᒥᒃᓵᓄᑦ ᐅᑭᐅᓂᑦ ᖃᑉᓯᐊᕐᔪᖕᓂᑦ ᐊᓂᒍᖅᓯᒪᓕᖅᑐᓂᑦ.

ᐃᒪᕐᒥᒃ ᐆᒻᒪᖅᑯᑎᒃᑯᑦ-ᖃᕆᑕᐅᔭᒃᑰᕈᑎ ᑐᓂᓯᓂᐊᖅᑐᖅ ᑭᕙᓪᓕᕐᒥᑦ ᐊᑐᖅᑕᐅᒃᑲᓐᓂᕈᖕᓇᖅᑐᒥᒃ ᐆᒻᒪᖅᑯᑎᒥᒃ ᐃᑲᔪᒻᒫᕐᓗᓂ ᐃᓄᖏᓐᓂᒃ ᐊᓯᖏᓐᓂᒡᓗ ᐱᓕᕆᕝᕕᒡᔪᐊᕐᓂᑦ ᑭᕙᓪᓕᕐᒥᑦ.  ᐅᒃᐱᕆᔭᖃᑦᑎᐊᖅᖢᑕ ᐊᑐᐃᓐᓇᕈᖕᓇᖅᑐᒥᒃ ᐱᕙᓪᓕᐊᓂᕐᒥᒃ, ᐊᒡᓃᑯᒃᑯᑦ ᐊᐅᓛᖅᑎᑦᑎᓂᖃᑐᐃᓐᓇᕈᒪᙱᑦᑐᑦ ᐊᑯᓂᐅᔪᒧᑦ ᐅᑭᐅᖅᑕᖅᑐᒥᑦ, ᑭᓯᐊᓂ ᕿᒪᒃᓯᓗᑎᒃ ᓴᙱᔪᒥᒃ ᑕᐃᒪᙵᓂᒥᒃ ᐱᒋᐊᖅᓯᒪᔭᕐᒥᒃ ᐃᑲᔪᐃᓂᖃᕐᓂᐊᖅᑐᒥᒃ ᓄᓇᓕᖕᓂᑦ ᐊᐅᓛᖅᑎᑦᑎᓂᖃᕐᕕᒋᔭᑉᑎᖕᓂᑦ.

ᐃᓚᒋᔭᐅᔪᑉᓗᓂ ᒥᒃᖠᒋᐊᖅᑎᑦᑐᒪᔭᑉᑎᖕᓄᑦ ᐱᐅᖏᑦᑐᑦ ᓯᓚᒧᑦ ᐊᓂᐊᔪᑦ, ᐊᓯᖏᓐᓂᒃ ᑕᑯᒋᐊᖅᓯᒪᔪᒍᑦ ᓯᓚᒧᑦ ᐊᓂᐊᔪᑦ ᒥᒃᓵᓄᑦ ᐊᑐᖅᑕᐅᒃᑲᓐᓂᕈᖕᓇᖅᑐᓂᒃ ᐆᒻᒪᖅᑯᑎᓂᒃ ᐊᑐᕐᓂᐊᕐᓗᒋᑦ ᐊᑯᓂᐅᖏᑦᑐᒃᑯᑦ ᑎᑭᓪᓗᒍ ᐃᒪᕐᒥᒃ ᐆᒻᒪᖅᑯᑎᒃᑯᑦ-ᖃᕆᑕᐅᔭᒃᑰᕈᑎᑕᖃᓕᖅᐸᒧᑦ.  ᑕᐃᒪᓐᓇ ᖃᐅᔨᓴᐃᓂᖃᓕᓚᐅᖅᑐᑦ ᐊᔪᙱᑦᑐᖕᓇᕐᒪᖔᑦ ᓴᖅᑭᑦᑎᔪᒪᑉᓗᑕ ᐊᓄᕆᒧᑦ ᐊᐅᓚᑕᐅᔪᒥᒃ ᐱᓕᕆᐊᕐᒥᒃ ᑕᓯᕐᔪᐊᕐᒥᑦ.  ᐊᑕᐅᑦᑎᒃᑯᑦ ᐊᓄᕆᒧᑦ ᐊᐅᓚᑕᐅᔪᖃᕐᓗᓂ, ᐃᓚᐅᓕᕋᑕᕐᓗᓂ ᐃᑯᒻᒪᖅᑯᑎᖃᕐᓂᖅ ᐃᒪᕐᒥᒃ ᐆᒻᒪᖅᑯᑎᒃᑯᑦ-ᖃᕆᑕᐅᔭᒃᑰᕈᑎᒃᑯᑦ, ᐊᒡᓃᑯᒃᑯᓐᓂᑦ ᐊᑐᓗᐊᖅᑎᑦᑎᓂᐊᙱᑦᑐᖅ ᐅᖅᓱᐊᓗᖕᒥᑦ, ᐃᑲᔪᕐᓂᐊᖅᑐᖅ ᒥᒃᖠᒋᐊᖅᑎᓪᓗᒋᑦ ᐱᐅᖏᑦᑐᑦ ᓯᓚᒧᑦ ᐊᓂᐊᔪᑦ.

ᐊᒡᓃᑯᒃᑯᑦ ᐱᓂᐊᕐᓂᖓᑦ ᐊᑐᕐᓗᓂ ᐱᔭᒃᓴᐅᑎᖃᕐᓂᒃᑯᑦ ᐆᒻᒪᖅᑯᑎᒥᒃ ᐊᒻᒪᓗ ᐊᐅᓚᓪᓗᒋᑦ ᐱᐅᖏᑦᑐᑦ ᓯᓚᒧᑦ ᐊᓂᐊᔪᑦ ᐱᔾᔪᑕᐅᔪᖅ ᐱᒻᒪᕆᐅᔪᒥᒃ ᐊᑐᐃᓐᓇᕈᖕᓇᖅᑐᒥᒃ ᐱᕙᓪᓕᐊᓂᕐᒧᑦ ᐱᒻᒪᕆᐅᒋᔭᑉᑎᖕᓄᑦ ᐊᐅᓛᖅᑎᑦᑎᓂᐊᕐᓗᓂ ᐅᓗᕆᐊᓇᖅᑐᖃᙱᑦᑐᒃᑯᑦ, ᒥᐊᓂᕆᓗᒍ ᐊᕙᑎ ᐊᒻᒪᓗ ᑲᒪᒋᓗᒋᑦ ᐱᓕᕆᔨᕗᑦ ᐊᒻᒪᓗ ᓄᓇᓖᑦ ᐃᒃᐱᒍᓱᒡᕕᖃᕐᓂᒃᑯᑦ.  ᐱᔭᒃᓴᕗᑦ ᐱᓕᕆᐊᕆᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐅᒃᐱᕈᓱᒃᑐᒍᑦ ᕿᒪᐃᓂᐊᖅᑐᒍᑦ ᐱᐅᔪᒥᒃ ᑕᐃᒪᙵᓂᒥᑦ ᐱᒋᐊᖅᓯᒪᔭᑉᑎᖕᓂᒃ ᓄᓇᓕᑉᓯᖕᓂᑦ.