ᐅᒃᑑᐱᕆ ᐱᒋᐊᓵᖅᑎᓪᓗᒍ, ᐊᒡᓃᑯᒃᑯᑦ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᕐᒥᑦ ᐱᓕᕆᔨᖏᑦ ᖁᕕᐊᓱᓚᐅᖅᑐᑦ ᒪᕐᕉᖕᓂᒃ ᐃᓕᓐᓂᐊᖅᑐᓂᑦ ᖁᑦᑎᖕᓂᓕᖕᓂᑦ 9-ᒥᑦ ᖃᒪᓂᑦᑐᐊᑉ ᔫᓇ ᐊᒥᑦᓈᖅ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖓᓂᑦ ᐃᓚᒋᔭᐅᑉᓗᓂ ᑲᓇᑕᒥᑦ ᐊᕐᕌᒍᑕᒫᖅ ᓄᑕᖅᑲᕗᑦ ᐅᑉᓗᕐᒥᑦ ᐱᓕᕆᕝᕕᖕᒧᐊᖅᑎᑦᑎᓂᖅ-ᖓᓐᓂᑦ ᐱᑎᑦᑎᓚᐅᖅᑐᑦ, – ᓯᕗᓪᓕᖅᐹᖑᔪᖅ ᐱᓕᕆᕝᕕᑉᑎᖕᓂᑦ!

ᐊᕌᒍᑕᒫᖅ ᑕᐃᒪᓐᓇᐃᓕᐅᕐᓂᖅ ᐃᓕᓐᓂᐊᖅᑎᓂᒃ 9-ᓂᒃ ᖁᑦᑎᖕᓂᓕᖕᓂᑦ ᓯᕗᓂᒃᓴᖓᓐᓄᐊᖅᑎᑦᑎᖃᑦᑕᖅᑐᖅ ᐅᑉᓗᕐᒧᑦ ᐊᑕᐅᓯᕐᒥᒃ ᐊᒻᒪᓗ ᐱᓕᕆᓂᑯᖃᖅᑎᓪᓗᒋᑦ ᓄᓇᕐᔪᐊᕐᒥᑦ ᐱᓕᕆᓂᐅᕙᒃᑐᓂᒃ ᐱᓕᕆᐊᖓᓐᓂᒃ ᐊᖓᔪᖅᑳᖓᑕ, ᐃᓚᖓᑕ, ᐱᖃᓐᓈᖓᑕᓘᓐᓃᑦ ᐃᓕᑦᑎᓗᑎᒡᓗ ᓱᓇᓕᕆᖃᑦᑕᕐᒪᖔᑕ ᖃᐅᑕᒫᑦ ᐱᓕᕆᐊᖏᓐᓂᑦ.

ᐊᐳᖅᑎᓐᓈᖅᑐᖅ ᑐᙵᓱᒃᑎᑦᑎᓚᐅᖅᑐᖅ ᑲᑎᖦᖢᒋᑦ 26 ᐃᓕᓐᓂᐊᖅᑐᓂᒃ, ᐱᖃᑎᒋᔭᐅᑉᓗᑎᒃ ᐱᖓᓱᓄᑦ ᐃᓕᓐᓂᐊᖅᑎᑦᑎᔨᓄᑦ ᖃᓄᐃᓕᐅᕐᓂᖃᕈᓘᔭᖅᑎᑕᐅᓚᐅᖅᑐᑦ ᐃᑲᔪᕐᓂᐊᕐᓗᒋᑦ ᐃᓕᓐᓂᐊᖅᑐᑦ ᑐᑭᓯᐊᓕᒃᑲᓐᓂᕐᓂᕐᒥᒃ ᐅᔭᕋᒃᑕᕆᐊᓕᕆᓂᕐᒥᑦ.

ᐱᓕᕆᓂᖅ ᐅᑉᓗᕐᒥᑦ ᐱᒋᐊᓚᐅᖅᑐᖅ ᑕᑯᑎᑕᐅᑉᓗᑎᒃ – ᐱᓗᐊᖅᑐᒥᑦ, ᓯᓚᒦᑦᑐᓂᑦ.  ᐊᒥᓱᓄᑦ ᐃᓕᓐᐊᖅᑎᓄᑦ, ᓯᕗᓪᓕᖅᐹᕆᓚᐅᖅᑕᖓᑦ ᑕᑯᔭᕆᐅᖅᖢᑎᒃ ᓄᓇᒥᑦ ᐅᒃᑯᐃᖓᔪᒥᑦ ᐅᔭᕋᒃᑕᕆᐊᕐᒥᑦ.  ᑕᑯᓚᐅᕐᒥᔪᑦ ᐊᖕᒪᓗᖅᑐᖅ, ᓯᖃᓪᓕᑎᕈᑎ, ᐱᓕᐅᕆᕙᓪᓕᐊᕝᕕᒃ ᐊᒻᒪᓗ ᑕᑯᑉᓗᒋᑦ ᐅᓯᑲᑦᑕᐅᑏᑦ ᓄᓇᒃᑰᕈᑏᑦ ᐅᓯᓕᖅᑐᐃᔪᑦ ᐅᔭᕋᒃᑕᖅᑕᐅᔪᓂᑦ ᐊᑉᖁᑎᒃᑰᕐᒪᑕ.

ᐅᑉᓗᕈᒥᑕᖅᑎᓪᓗᒋᑦ ᐃᓕᓐᓂᐊᖅᑐᑦ ᐃᒃᓯᕙᖃᑎᖃᕈᖕᓇᓚᐅᖅᑐᑦ ᐃᓚᖏᓐᓂᒃ ᐅᓂᑉᑳᒪᖦᖢᑎᒡᓗ ᐅᑉᓛᖓᓂᑦ ᐊᑐᖅᑲᐅᔭᖏᑦᑕ ᒥᒃᓵᓄᑦ ᐊᒻᒪᓗ ᐅᑉᓗᕈᒥᑖᓂᒃᑎᓪᓗᒋᑦ ᐸᕐᓇᐃᓂᖃᓚᐅᖅᑐᑦ ᓄᓇᓕᐊᓛᒧᙵᐅᓗᑎᒃ ᐊᒻᒪᓗ ᐱᖁᑎᒋᔭᐅᔪᓄᑦ ᐃᒡᓗᕐᔪᐊᓄᑦ.

ᐃᓚᖏᑦ ᑕᑯᑎᑕᐅᓚᐅᖅᑐᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᒻᒪᓗ ᐅᓗᕆᐊᓇᖅᑐᖃᙱᑦᑐᓕᕆᔨᒃᑯᑦ ᑐᐊᕕᓇᖅᑐᓄᑦ ᐅᐸᓗᐊᔨᖏᓐᓄᑦ, ᐅᔭᖅᑲᓕᕆᔨᒃᑯᑦ ᐊᒻᒪᓗ ᐊᔪᕈᖕᓃᖅᓴᐃᔨᒃᑯᑦ ᐃᓕᓐᓂᐊᖅᑏᑦ ᑲᑎᖃᑎᖃᖅᖢᑎᒃ ᐅᓯᑲᑦᑕᖕᓂᕐᒧᑦ ᓄᓇᒃᑰᕈᑎᓄᑦ ᐊᔪᕈᖕᓃᖅᓴᐃᔨᓂᒃ, ᓴᓗᒻᒪᖅᓴᐃᔨᓂᒃ, ᐋᖅᑭᒃᓱᐃᔨᓂᒃ, ᐅᔭᕋᒃᑕᕆᐊᕐᒥᑦ ᐅᖃᓗᒃᑎᓂᑦ ᐊᒻᒪᓗ ᓯᕐᓗᐊᓕᕆᔨᓂᑦ.  ᐊᕕᒃᑐᖅᓯᒪᔪᓗᒃᑖᑦ ᑭᒡᒐᖅᑐᐃᔪᒥᒃ ᒪᓂᒪᑎᑦᑎᓚᐅᖅᑐᑦ ᐅᖃᐅᓯᖃᕐᓂᐊᕐᓗᑎᒃ ᐅᑉᓗᑕᒫᑦ ᐱᓕᕆᐊᕆᖃᑦᑕᖅᑕᖏᓐᓂᑦ ᑭᐅᓗᑎᒡᓗ ᐊᒥᓱᑦ ᐊᐱᖅᑯᑕᐅᔪᓂᒃ.

ᐅᑉᓗᖅ ᐱᐊᓂᑦᑎᐊᕐᓂᖃᓚᐅᖅᑐᖅ ᑭᖑᓪᓕᖅᐹᒥᑦ ᓄᖅᑲᖅᖢᑎᒃ − ᓄᓇᓕᐊᓛᑉ ᐃᒐᕝᕕᖓᓄᑦ − ᐋᖅᑭᒃᓱᐃᔪᖕᓇᖅᖢᑏᒃ ᑮᒃ-ᓂᑦ ᐊᖏᕐᕋᐅᑎᓂᐊᖅᑕᖏᓐᓂᑦ, ᐃᓱᓕᑦᑎᐊᖅᑐᐊᓘᓚᐅᖅᑐᖅ ᖁᕕᐊᓇᖅᑐᒥᑦ ᐱᐊᓐᓂᑦᑎᐊᕐᓂᖃᖅᑐᒥᑦ ᐅᑉᓗᖅ!

“ᑲᓇᑕᓗᒃᑖᒥᑦ ᐱᓕᕆᐊᖑᔪᖅ ᐊᖏᔪᒥᒃ ᐱᐊᓂᑦᑎᐊᕐᓂᖃᓚᐅᖅᑐᖅ ᐃᓕᓐᓂᐊᖅᑐᓄᑦ – ᒫᓐᓇᒧᑦ ᑎᑭᖦᖢᒍ ᐱᓇᓱᐊᕈᓰᑦ ᐊᓂᒍᖅᑎᓪᓗᒋᑦ ᓄᑕᖅᑲᐃᑦ ᐅᖃᐅᓯᕆᔭᖓᑦ ᓱᓕ ᐅᑉᓗᖅ − ᑕᐃᑯᙵᐅᓂᕆᓚᐅᖅᑕᖓᑦ,” ᐅᖃᖅᑐᖅ ᑲᐃᑦᓕᓐ ᐳᕉᓪ, ᐃᓚᒋᔭᐅᔪᖅ ᐋᖅᑭᒃᓱᐃᔨᓄᑦ ᐊᒻᒪᓗ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᔨ ᐊᒡᓃᑯᒃᑯᓐᓂᑦ.

ᐱᐅᔪᒥᒃ ᑕᑯᔭᐅᓚᐅᖅᑎᓪᓗᒍ ᐃᓕᓐᓂᐊᕐᕕᖕᒥᑦ, ᐅᒡᓃᑯᒃᑯᑦ ᐃᓚᐅᒃᑲᓐᓂᕈᒪᔪᑦ ᑕᒪᑐᒧᙵ ᐊᒥᓱᓄᑦ ᐅᑭᐅᓄᑦ ᖃᐃᔪᓄᑦ.