ᑕᓯᕐᔪᐊᖅ ᖁᕕᐊᓲᑎᖃᖅᑐᖅ ᒥᓕᔭᓐᒋᓕᖅᑕᖓᓂᑦ ᐊᐅᓐᓯᓄᑦ ᑎᑭᐅᑎᓂᕐᒧᑦ, ᐸᕐᓇᒃᐸᓪᓕᐊᔪᑦ ᐊᖏᒡᓕᒋᐊᕈᖕᓇᕐᓂᕐᒧᑦ

ᐱᑦᑕᐅᓂᖅᓴᒥᒃ ᓯᕗᓂᒃᓴᖅᓯᐅᕆᓂᖅ ᐃᓄᐃᑦ ᐱᓕᕆᕗᑦ ᐱᖃᑎᒋᑉᓗᒋ, ᐱᓕᕆᖃᑎᒋᔭᕗᑦ ᐊᒻᒪᓗ ᓯᓚᖅᖃᑎᕗᑦ

ᐱᖓᓱᑦ ᐅᑭᐅᑦ ᐊᓂᒍᖅᑐᓂᑦ ᐊᒻᒪᓗ ᒥᓕᔭᓐᖏᓐᓃᑦᑐᑦ ᐃᑲᕐᕋᐃᑦ ᐊᒃᓱᕈᖅᖢᑎᒃ ᐱᓕᕆᖅᖄᖅᑎᓪᓗᒋᑦ, ᑕᓯᕐᔪᐊᖅ ᑯᕕᓯᓚᐅᖅᑐᖅ ᒥᓕᔭᓐᒋᔭᖓᓂᑦ ᐊᐅᓐᓯᓂᑦ ᒎᓗᒥᒃ ᐊᕗᓐᓂᕕᒃ (ᕕᕗᐊᕆ) 25, 2022-ᒥᑦ.

ᐊᖏᔪᖅ ᖃᓄᐃᓕᐅᕐᓂᐅᔪᖅ ᐅᔭᕋᒃᑕᕆᐊᕐᒥᑦ ᑲᒻᐸᓂᐅᔪᓄᑦ, ᑎᑭᐅᑎᓂᖅ ᐱᓗᐊᖅᑐᒥᑦ ᑐᑭᖃᖅᑐᖅ ᓇᓗᓇᐃᖅᓯᖕᒪᑦ ᐱᕙᓪᓕᐊᓂᖓᑕ 15 ᐃᑭᐅᓂᑦ ᐃᖏᕐᕋᓂᕆᔭᖓᓐᓂᒃ ᑎᑭᐅᑎᓂᐊᕐᓗᑎᒃ ᐱᕈᖅᐸᓪᓕᐊᓂᕐᒧᑦ ᐊᒻᒪᓗ ᐃᓅᖃᑎᒌᑦ ᐱᕈᖅᐸᓪᓕᐊᓂᖃᕐᓂᖏᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ.

“ᐱᓂᐊᕐᓂᓕᐅᓚᐅᖅᑐᒍᑦ ᐱᓕᕆᖃᑎᒋᓂᐊᕐᓗᒋᑦ ᐱᓕᕆᖃᑎᒋᔭᕗᑦ ᓄᓇᕗᒻᒥᐅᑕᐃᑦ ᐱᐅᓂᖅᓴᒥᒃ ᓯᕗᓂᒃᓴᓕᐅᖃᑎᒋᓂᐊᕐᓗᒋᑦ,” ᐅᖃᖅᑐᖅ ᓗᒃ ᑦᓱᐃᓈᑦ (Luc Chouinard), ᑕᓯᕐᔪᐊᑉ ᓱᓇᑐᐃᓐᓇᓄᑦ ᐃᓱᒪᑕᕆᓚᐅᐱᓪᓚᒃᑕᖓ. “ᐊᒻᒪᓗ ᐱᓕᕆᐊᒃᓴᖅᑕᖃᖅᑎᓪᓗᒍ ᓱᓕ, ᐊᖏᔪᒥᒃ ᐱᕙᓪᓕᐊᓂᖃᖅᑐᒍᑦ ᑎᑭᐅᑎᓂᐊᕐᓗᒍ ᐱᓂᐊᕐᓂᕋᐅᑎ. ᑐᓂᓯᓯᒪᔪᒍᑦ ᑮᓇᐅᔭᓕᐅᑦᑎᐊᖅᑐᓂᒃ ᐱᓕᕆᐊᓂᒃ ᐊᒻᒪᓗ ᐃᑲᔪᖅᓯᒪᑉᓗᑎᒃ ᐱᕙᓪᓕᐊᑎᖦᖢᒋᑦ ᐊᔪᙱᓐᓂᖃᓕᕐᓗᑎᒃ ᐱᓕᕆᔨᕗᑦ. ᐃᑲᔪᖅᓯᒪᔪᒍᑦ ᓄᓇᓕᖕᓂᑦ ᐊᒻᒪᓗ ᐱᓕᕆᐊᓕᖕᓂᑦ ᓇᖕᒥᓂᕆᔭᐅᔪᓂᒃ, ᐊᒻᒪᓗ ᓄᓇᓕᖕᒥᑦ ᐱᖁᑎᓕᐅᖅᓯᒪᑉᓗᑕ ᐊᒻᒪᓗ ᐱᑖᕐᕕᐅᖃᑦᑕᖅᑐᓂᒃ. ᐱᓕᕆᖃᑎᒋᓯᒪᖕᒥᔭᕗᑦ ᓄᓇᓕᖕᒥᑦ ᒐᕙᒪᐅᔪᑦ ᓴᖅᕿᑦᑎᓂᐊᕐᓗᑕ ᐱᓕᕆᐊᖃᕐᓂᕐᒧᑦ ᒪᓂᒪᓂᕐᒥᒃ, ᐊᔪᙱᓐᓂᖅᑖᖅᑐᖅᑎᑦᑎᓂᕐᒥᒃ ᐊᒻᒪᓗ ᐸᐸᑦᑎᓂᕐᒧᑦ ᑐᕌᖓᔪᓂᒃ ᐃᓄᐃᑦ ᐱᓕᕆᔨᑉᑎᖕᓄᑦ.”

ᓗᒃ ᐃᓚᓯᑉᓗᓂ ᐅᖃᖅᑐᖅ, “ᖁᕕᐊᓲᑎᖃᕋᔭᙱᑦᑐᒍᑦ ᑎᑭᐅᑎᓂᕐᒧᑦ ᐃᑲᔪᖅᑕᐅᓂᖃᙱᒃᑯᑉᑕ ᐃᓄᐃᑦ ᐱᓕᕆᔨᑉᑎᖕᓄᑦ ᐊᒻᒪᓗ ᖃᑕᙳᑎᖏᓐᓄᑦ, ᐊᒻᒪᓗ ᐃᓄᐃᑦ ᓯᕗᓕᐅᖅᑎᐅᔪᑦ ᐊᒻᒪᓗ ᑭᕙᓪᓕᕐᒥᑦ ᐃᓄᐃᑦ ᑲᑐᔾᔨᖃᑎᒌᒃᑯᑦ – ᑕᒪᕐᒥᓗᒃᑖᖅ ᓯᓚᑎᕗᑦ ᐊᒻᒪᓗ ᐱᓕᕆᖃᑎᕗᑦ ᓄᓇᕗᒻᒥᑦ.”

ᖁᔭᓐᓇᒦᕐᓂᖅ, ᐃᓕᑕᖅᓯᓂᖅ

ᖁᔭᓐᓇᒦᕐᓂᐊᕐᓗᒋᑦ ᐊᒡᓃᑯᒃᑯᓐᓄᑦ ᐱᓕᕆᔩᑦ ᐊᒻᒪᓗ ᑳᓐᑐᕌᒃᖃᖅᑐᑦ ᐃᑲᔪᕐᓂᖏᓐᓄᑦ ᐅᔭᕋᒃᑕᕆᐊᖅ ᑎᑭᐅᑎᓂᖓᓄᑦ ᐱᒻᒪᕆᐅᔪᒧᑦ, ᑕᓯᕐᔪᐊᖅ ᑲᒪᔭᖃᓚᐅᖅᑐᖅ ᓯᑕᒪᐅᔪᓂᒃ ᖁᕕᐊᓲᑎᖃᕐᓂᐅᔪᓂᒃ. ᓇᓗᓇᐃᕐᓂᐊᕐᓗᒍ ᑯᕕᓯᓂᕗᑦ, ᒎᓗ ᓇᓄᙳᐊᖅ ᐃᓕᔭᐅᓚᐅᖅᑐᖅ ᓇᑦᑎᐊᑦ (ᒫᑦᓯ) 9-ᒥᑦ, ᑐᓂᔭᐅᑉᓗᓂ ᐊᒡᓃᑯᒃᑯᑦ ᑕᑯᔭᖅᑐᐃᔪᖏᑦ ᓯᕗᓕᐅᖅᑎᖏᓐᓄᑦ Ammar Al-Joundi-ᒧᑦ ᐊᖓᔪᖅᖄᖅ ᐊᒻᒪᓗ ᐃᓱᒪᑕᕐᔪᐊᖅ, ᑖᒥᓃᒃ ᔾᔨᕌᕐᑦ (Dominique Girard) ᐊᖓᔪᖅᖄᖑᔪᓄ ᑐᖏᓕᖓ ᐊᖓᔪᖅᖄᖅ ᐊᒻᒪᓗ ᐃᓱᒪᑕᕐᔪᐊᖅ ᐊᐅᓛᖅᑎᑦᑎᓂᕐᒧᑦ ᓄᓇᕗᒻᒥ ᑯᐸᐃᒃᒥᑦ ᐊᒻᒪᓗ ᑕᕆᐅᑉ ᐊᑭᐊᓂᑦ, ᑭᐅᕈᓪ ᑉᓚᒧ (Carol Plummer) ᐊᖓᔪᖅᖄᖑᔪᓄ ᑐᖏᓕᖓ ᐊᖓᔪᖅᖄᖅ ᐊᔪᙱᑦᑎᐊᕐᓂᕐᒧᑦ, ᒫᑎᓐ ᑉᓛᓐᑎ (Martin Plante) ᑐᖏᓕᖓ ᐊᖓᔪᖅᖄᖅ ᓄᓇᕗᒻᒥᑦ, ᐊᒻᒪᓗ ᐅᓕᕕᔩ ᒍᕌᓐᑎᓐ (Olivier Grondin) ᕿᓂᖅᓴᐃᓂᕐᒧᑦ ᐊᐅᓚᑦᑎᔨ ᑲᓇᑕᒥᑦ.

ᓄᕐᕋᐃᑦ (ᒪᐃ) 25-ᒥᑦ ᐊᒻᒪᓗ ᒪᓐᓃᑦ (ᔫᓂ) 8-ᒥᑦ ᑕᓯᕐᔪᐊᖅ ᑲᒪᔭᖃᓚᐅᖅᑐᖅ ᖁᕕᐊᓇᖅᑐᒥᒃ ᐱᓕᕆᔨ ᖁᕕᐊᓲᑎᒋᔭᐅᑉᓗᓂ ᐅᔭᕋᒃᑕᕆᐊᕐᒥᑦ ᑭᑐᑐᐃᓐᓇᓄᑦ ᐅᒃᑯᐃᖓᑎᑦᑎᑉᓗᑎᒃ ᐱᐅᒋᔭᐅᑦᑎᐊᖃᑦᑕᖅᑐᒥᒃ ᐊᔾᔨᓕᐅᕆᕝᕕᖃᖅᖢᓂ ᐱᓕᕆᔩᑦ ᐊᔾᔨᓕᐅᖅᑕᐅᔪᖕᓇᖅᖢᑎᒃ ᒍᓘ ᓇᓄᙳᐊᕐᓗ ᐃᓚᐅᓗᓂ. ᑭᖑᓪᓕᖅᐹᖅ ᖁᕕᐊᓲᑎᖃᕐᓂᖅ, ᒪᓐᓃᑦ (ᔫᓂ) 30-ᒥᑦ, ᐃᓕᑕᖅᓯᑉᓗᑎᒃ ᑕᖃᓱᐃᑦᑐᓂᒃ ᐃᑲᔪᖅᑐᓂᒃ ᐱᓕᕆᔨᓂᒃ ᐊᒡᓃᑯᒃᑯᑦ ᒥᐅᕆᐱᐅᓪᒦᑦᑐᑦ ᐊᒻᒪᓗ ᕚᓪᑐᐊᒥᑦ, ᑯᐸᐃᒃᒥᑦ.

ᖃᓄᐃᓕᐅᕈᑕᐅᔪᒧᑦ, ᓗᒃ ᐅᖃᖅᑐᖅ, “ᐱᕕᖃᓚᐅᖅᑐᒍᑦᖁᔭᓐᓇᒦᕐᓗᒋᑦ ᐊᒻᒪᓗ ᐃᓕᑕᕆᓗᒋ ᐱᓕᕆᔩᑦ, ᐊᒻᒪᓗ ᐊᒥᓱᐃᑦ ᑳᓐᑐᕌᒃᖃᖅᑐᕗᑦ, ᐅᑎᕐᓂᖅ ᐊᔪᙱᓐᓂᖏᓐᓄᑦ ᐊᐅᓚᓂᖃᖅᑎᓪᓗᒋ ᓂᕆᐅᓇᙱᑦᑑᓚᐅᖅᑐᓂᒃ ᖃᑉᓯᐊᕐᔪᐃᑦ ᐅᑭᐅᑦ ᐊᓂᒍᖅᑐᓂᑦ. ᒫᓐᓇ, ᓄᓇᕗᒻᒥ ᐱᓕᕆᔨᕗᑦ ᐅᑎᖅᓯᒪᓕᖅᑎᓪᓗᒋ, ᖁᕕᐊᓲᑎᖃᕈᒪᓚᐅᖅᑐᒍᑦ ᐊᒻᒪᓗ ᖃᐅᔨᑎᓪᓗᒋᑦ ᐃᓚᒋᔭᐅᖕᒪᑕ ᖃᓄᐃᓕᐅᕐᓂᓗᒃᑖᑉᑎᖕᓂᑦ – ᑐᙵᕕᐅᔪᖅ ᐊᒡᓃᑯᒃᑯᑦ ᐱᖅᖁᓯᕆᔭᖓᓄᑦ ᑲᒪᒋᔭᖃᕐᓂᕐᒥᒃ.”

ᐱᓇᐃᖅᓯᓂᖅ ᑕᓯᕐᔪᐊᑉ ᓯᕗᓂᒃᓴᖃᕈᖕᓇᕐᓂᖓᓄᑦ

ᑕᓯᕐᔪᐊᖅ ᓱᓕ ᐊᖏᔪᒥᒃ ᐅᔭᖅᖃᑦᑎᐊᕙᖕᓂᑦ ᐱᔪᖕᓇᖅᑐᖅ ᐊᒻᒪᓗ ᓯᕗᓂᒃᓴᒥᑦ ᐃᓚᐅᔪᑦ ᐊᖏᒡᓕᒋᐊᖅᑕᐅᔪᖕᓇᕐᓂᖓ ᐅᔭᕋᒃᑕᕆᐊᖅ.

ᒫᓐᓇᐅᔪᖅ, ᐅᔭᕋᒃᑕᕆᐊᖅ ᐱᑎᑕᐅᔪᖕᓇᕐᓂᐅᔪᒦᑦᑐᖅ, ᑲᔪᓯᔪᖕᓇᖅᐸᑦ, ᐱᕙᓪᓕᐊᓂᖃᕋᔭᖅᑐᑦ ᐱᑕᖃᖅᑐᓂᒃ ᓂᒋᐊᓂᑦ ᐅᔭᕋᒃᑕᕆᐊᑉ ᐃᓂᐊᓂᑦ. ᐱᓕᕆᔩᑦ ᕿᓂᕐᒥᔪᑦ ᑲᑉᐳᔾᔭᓅᖅᑐᓂᒃ ᐱᒋᐊᖅᑎᑦᑎᔪᖕᓇᖅᑐᒥᒃ ᐊᐅᓚᑕᐅᒃᑲᓐᓂᕈᖕᓇᕐᓂᖓᓄᑦ ᐅᔭᕋᒃᑕᕆᐊᖅ, ᐊᔪᙱᓐᓂᖅᓴᐅᓕᕐᓗᓂ ᐊᒻᒪᓗ ᐱᐅᓯᒋᐊᕐᓗᒋᑦ ᐱᐊᓂᒃᑕᐅᔪᑦ. ᑐᕌᒐᐅᔪᖅ ᐅᐃᒍᒋᐊᕐᓗᒍ ᐊᐅᓛᕐᓂᕆᔭᖓ ᐅᔭᕋᒃᑕᕆᐊᑉ ᐊᒻᒪᓗ ᐊᒥᓱᒃᑲᓐᓂᕐᓂᒃ ᐊᑯᓂᐅᔪᒥᑦ ᐊᕐᕌᒍᑕᒫᖅ ᐊᐅᓐᓯᓕᐅᕐᓗᓂᒃ.

ᐱᔭᒃᓴᐅᑎᖃᖅᑑᑉᓗᖓ ᑕᓯᕐᔪᐊᕐᒥᑦ ᐅᐃᒍᒋᐊᖅᓯᓂᕐᒧᑦ, ᓘᒃ ᐅᖃᖅᑐᖅ, “ᑕᐅᑐᒐᖃᖅᑐᒍᑦ ᓯᕗᓂᒃᓴᒥᑦ ᐊᒻᒪᓗ ᐱᓇᐃᖅᓯᓂᕐᒧᑦ ᑕᓯᕐᔪᐊᑉ ᐱᑕᖃᐅᑦᑎᐊᖅᑐᖅ ᐅᔭᖅᖃᑦᑎᐊᕙᖃᕈᖕᓇᕐᓂᖓᓂᑦ. ᐃᑲᔪᖅᑕᐅᓗᑕ ᓄᓇᕗᒻᒥᐅᓄᑦ, ᐋᖅᕿᒃᓯᒪᑦᑎᐊᖅᑐᒍᑦ ᐱᕈᐃᑎᑦᑎᓂᕐᒧᑦ ᐱᑦᑕᐅᓂᖅᓴᒥᒃ ᓯᕗᓂᒃᓴᒥᑦ, ᐊᔪᙱᓐᓂᖃᕐᓂᖅᓴᐅᔪᒥᒃ ᓯᕗᓂᒃᓴᒥᑦ, ᐃᑲᔪᐃᓂᖃᖅᑐᒥᒃ ᑭᑐᓗᒃᑖᓄᑦ.”

ᐊᖏᔪᖅ ᑯᕕᓯᓂᖅ: ᑕᓯᕐᔪᐊᑉ ᒥᓕᔭᓐᒋᔭᖓᓂᑦ ᐊᐅᓐᓯᓂᑦ ᑯᕕᓯᓂᖓᑦ ᐋᖅᕿᒃᓯᔪᖅ ᐅᑭᐅᑦ ᐊᒥᓱᓂᒃ ᐊᒃᓱᕈᖅᖢᑎᒃ ᐱᓕᕆᓂᕆᔭᖏᑦ ᐊᒥᓱᒻᒪᕇᑦ ᐃᓄᐃᑦ – ᖃᐅᔨᔭᐅᓵᕐᓂᕐᒥᑦ ᐅᑉᓗᒥᒧᑦ ᐃᓗᐃᑦᑑᖓᑦᑎᐊᖅᑐᒧᑦ, ᐱᑦᑕᐅᔪᒥᑦ ᐅᔭᕋᒃᑕᕆᐊᕐᒥᑦ ᓴᓗᒪᑦᑎᐊᖅᑐᒥᑦ ᐊᕙᑎᒥᑦ.