ᓴᕆᒪᓇᖅᑐᖅ ᐃᑲᔪᖃᑦᑕᖅᖢᓂ ᐃᓕᑕᖅᓯᓂᕐᒧᑦ ᐱᓕᕆᐊᕆᔭᖏᓐᓄᑦ ᐅᖃᓕᒫᕈᖕᓇᖅᓯᓂᕐᒧᑦ ᓈᓴᐅᑎᐅᔪᓄᑦ ᓄᓇᕗᒻᒥᑦ.

ᐅᖃᓕᒫᕈᖕᓇᑦᑎᐊᕐᓂᖅ ᐱᐅᓯᑎᑦᑎᓂᖃᑐᐃᓐᓇᙱᑦᑐᖅ ᐃᓅᑉ ᐅᖃᓕᒫᕈᖕᓇᖅᓯᓂᖓᓄᑦ ᐊᒻᒪᓗ ᑎᑎᕋᕈᖕᓇᖅᓯᓂᖓᓄᑦ, ᑭᓯᐊᓂ ᐃᑲᔪᐃᓂᖃᕐᒥᔪᖅ ᐃᖕᒥᓄᑦ ᓇᓗᓂᖃᕈᖕᓃᕐᓂᕐᒥᒃ ᐊᒻᒪᓗ ᐊᔪᙱᓐᓂᕐᒥᒃ, ᐊᒻᒪᓗ ᓄᓇᓕᖕᒥᑦ ᐃᓂᖃᕐᓂᕐᒧᑦ ᐊᒻᒪᓗ ᐱᕙᓪᓕᐊᓂᕐᒧᑦ.

ᐊᒡᓃᑯᒃᑯᑦ ᓴᕆᒪᓱᒃᑐᑦ ᐃᑲᔪᖃᑦᑕᕐᓂᖏᓐᓂᑦ ᐃᓕᑕᖅᓯᓂᕐᒧᑦ ᐱᓕᕆᐊᕆᔭᖏᓐᓄᑦ ᐱᕈᖅᐸᓪᓕᐊᑎᑦᑎᓂᖏᑦ ᓄᓇᕗᒻᒥᑦ ᐅᖃᓕᒫᕈᖕᓇᖅᓯᓂᕐᒧᑦ ᓈᓴᐅᑎᐅᔪᑦ ᐊᒻᒪᓗ ᐱᓕᕆᐊᖏᑦ ᐋᖅᕿᒃᓯᓂᕐᒥᒃ ᐱᑦᑕᐅᓂᖅᓴᒥᒃ ᓯᕗᓂᒃᓴᖃᕐᓂᖏᑦ ᓄᓇᕗᒻᒥᐅᓗᒃᑖᓄᑦ. ᑕᒡᕗᖓ ᑎᑭᖦᖢᒍ, ᖁᕕᐊᓱᒃᑐᒍᑦ ᑐᓂᓯᔪᖕᓇᕋᑉᑕ ᐃᓕᑕᖅᓯᓂᕐᒧᑦ $250,000-ᓂᒃ ᐃᑲᔫᑎᓂᒃ ᐊᖏᒡᓕᒋᐊᕈᖕᓇᕐᓂᐊᕐᓗᒋᑦ ᐱᓕᕆᔨᑖᖅᑐᕐᓂᖏᑦ, ᑐᓴᐅᒪᑎᑦᑎᓂᕐᒧᑦ ᖃᓄᐃᓕᐅᖅᑎᑦᑎᓂᖏᑦ ᐊᒻᒪᓗ ᑐᕌᖓᔪᓕᕆᓂᖏᑦ.

ᐃᓕᑕᖅᓯᓂᒃᑯᑦ ᐊᑐᖃᑦᑕᖅᑕᖏᑦ ᑮᓇᐅᔭᐃᑦ ᐊᒡᓃᑯᒃᑯᓐᓂᙶᖅᑐᑦ ᐃᒡᓗᕐᔪᐊᖅᑖᕐᓂᕐᒧᑦ ᑲᖏᖅᖠᓂᕐᒥᑦ, ᐱᓕᕆᕝᕕᖓᓄᑦ ᐃᓂᒋᔭᐅᔪᖅ ᑭᕙᓪᓕᕐᒥᑦ. ᑭᕙᓪᓕᕐᒥᑦ ᐃᓂᒋᔭᐅᔪᒥᑦ, ᐃᓕᑕᖅᓯᓂᒃᑯᑦ ᑐᓂᓯᖃᑦᑕᕈᖕᓇᖅᓯᔪᑦ ᐅᖃᓕᒫᕆᐅᖅᓴᓂᕐᒧᑦ ᑐᕌᖓᔪᓂᒃ ᐃᓐᓇᕐᓄᑦ ᐊᒻᒪᓗ ᒪᒃᑯᒃᑐᓄᑦ.

ᐊᒡᓃᑯᒃᑯᑦ ᐃᑲᔪᐃᓂᖓᑦ ᐃᓕᑕᖅᓯᓂᒃᑯᑦ ᐃᒡᓗᕐᔪᐊᕐᒥᒃ ᓂᐅᕕᕐᓂᐊᕐᓗᑎᒃ ᐃᓚᒋᔭᐅᔪᖅ ᐱᖓᓱᓂᑦ ᓄᓇᓕᖕᒥᑦ ᐱᒻᒪᕆᐅᔪᑦ ᐱᓕᕆᐊᕐᓄᑦ ᑮᓇᐅᔭᖃᖅᑎᑕᐅᓚᐅᖅᑐᓂᑦ ᖁᕕᐊᓲᑎᒋᓂᐊᕐᓗᒍ ᐅᒃᑯᐃᕐᓂᖓ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᒪᓐᓃᑦ (ᔫᓂ) 2019-ᒥᑦ.  ᑐᓂᓯᓚᐅᕐᒥᔪᒍᑦ $250,000-ᓂᒃ ᓴᓇᔭᐅᓂᖓᓄᑦ ᓄᑖᖅ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᑦ ᐊᔪᕈᖕᓃᖅᓴᐃᕝᕕᖓᓐᓄᑦ, ᐃᑯᐊᓪᓚᒃᑐᓕᕆᔨᓂᑦ ᐊᔪᕈᖕᓃᖅᓴᕈᖕᓇᖅᑎᑦᑎᔪᖅ ᐃᑯᐊᓪᓚᒃᑐᖃᖅᐸᑦ ᐊᒻᒪᓗ ᐊᓐᓇᒃᑐᐃᓂᕐᒧᑦ ᐅᓗᕆᐊᓇᙱᑦᑐᒃᑯᑦ, ᐱᓪᓗᐊᕕᒃᑐᖃᖅᑎᓪᓗᒍ; ᐊᒻᒪᓗ $500,000-ᓂᒃ ᐃᓕᑕᖅᓯᓂᒃᑯᑦ ᐱᓕᕆᐊᕆᔭᖓᓄᑦ ᐃᑲᔪᖅᑐᐃᓂᕐᒧᑦ ᐊᒻᒪᓗ ᓯᕗᒻᒧᒋᐊᖅᓯᓂᕐᒧᑦ ᐃᓐᓇᕐᓄᑦ ᐊᒻᒪᓗ ᒪᒃᑯᒃᑐᓄᑦ ᐅᖃᓕᒫᕈᖕᓇᖅᓯᑎᑕᐅᓂᖏᑦ ᓄᓇᕗᒻᒥᑦ.

ᐄᑐᕆᐊᓇ ᑯᓱᒐᖅ, ᐃᓕᑕᖅᓯᓂᒃᑯᓐᓄᑦ ᐊᖓᔪᖅᖄᖑᔪᖅ ᐅᖃᖅᑐᖅ, “ᐃᓂᖃᕐᓗᓂ ᓇᖕᒥᓂᕆᓂᕋᕈᖕᓇᖅᑕᑉᑎᖕᓂᑦ ᐊᖏᒡᓕᒋᐊᖅᓯᓂᐊᖅᑐᖅ ᑭᕙᓪᓕᕐᒥᑦ ᑐᕌᖓᔪᓕᕆᓂᑉᑎᖕᓂᑦ ᐊᒻᒪᓗ ᐱᓕᕆᔨᑖᖅᑐᕐᓂᕐᒧᑦ ᐃᑲᔪᕐᓗᓂ. ᐊᖏᔪᒥᒃ ᐃᑲᔪᐃᓂᖃᖅᓯᒪᔪᖅ, ᑭᕙᓪᓕᕐᒥᑦ ᐱᓕᕆᔨᓂᒃ ᐊᒥᓱᙳᕆᐊᖅᓯᓗᓂ ᒪᕐᕉᖕᓂᑦ ᑕᓪᓕᒪᓄᑦ ᐱᓕᕆᔨᓄᑦ, ᐊᒻᒪᓗ ᐅᕙᑉᑎᖕᓂᑦ ᐊᖏᒡᓕᒋᐊᖅᓯᔪᖅ ᑐᓴᐅᒪᑎᑦᑎᓂᕆᔭᑉᑎᖕᓄᑦ ᐊᒻᒪᓗ ᑐᕌᖓᔪᓕᕆᓂᑉᑎᖕᓄᑦ. ᓴᕆᒪᓱᖕᓂᐅᔪᖅ ᐃᒃᐱᒋᔭᕗᑦ ᐅᒃᑯᐃᖅᓯᔭᕌᖓᑉᑕ ᐊᒻᒪᓗ ᖃᐃᖃᑕᐅᖁᑉᓗᒋᑦ ᐃᓄᐃᑦ ᐱᓕᕆᕝᕕᑉᑎᖕᓄᑦ ᐅᕙᑉᑎᖕᓂᑦ ᑐᓂᓯᓯᒪᔪᖅ ᓇᓗᖏᓐᓂᕐᒥᒃ ᐱᒃᑲᓐᓂᕐᓂᐊᕐᓗᑕ.”

ᓄᕙᒡᔪᐊᕐᓇᐅᒐᓗᐊᖅᑎᓪᓗᒍ, ᐃᓕᑕᖅᓯᓂᖅ ᐱᐊᓂᒃᓯᔪᖕᓇᓚᐅᖅᑐᖅ 60 ᐅᖓᑖᓄᑦ ᐱᓕᕆᐊᕐᓂᑦ ᐅᑭᐅᑉ ᐃᓗᐊᓂᑦ, ᐊᒻᒪᓗ ᑎᑭᐅᑎᑉᓗᑎᒃ ᑕᓪᓕᒪᓄᑦ ᓄᓇᓕᖕᓂᑦ ᓄᓇᕗᑦ ᐃᓗᐊᓂᑦ.  ᐱᓕᕆᖃᑎᒌᒃᑯᑦ ᐱᕙᓪᓕᐊᓂᖃᐃᓐᓇᕐᓂᐊᖅᑐᑦ ᐊᒻᒪᓗ ᑲᒪᔭᖃᕐᓗᑎᒃ ᐅᖃᓕᒫᕆᐅᖅᓴᕐᓂᒧᑦ ᑐᕌᖓᔪᓂᑦ ᐋᖅᕿᒃᑕᐅᓯᒪᔪᑦ ᒪᓕᒃᖢᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ – ᐃᓄᐃᑦ ᐱᖅᖁᓯᕐᒥᒃ ᖃᐅᔨᒪᓂᕆᔭᖏᑦ – ᐊᒻᒪᓗ ᐃᓕᓐᓂᐊᖅᑎᑦᑎᓂᐅᔪᑦ ᐃᓄᐃᑦ ᐱᖅᖁᓯᒃᑯᑦ ᐊᑐᖃᑦᑕᖅᑕᖏᓐᓂᑦ.