ᑲᑎᖅᓱᐃᔨᐅᑉ ᓴᕕᖓ ᓴᓇᔭᐅᔪᖅ ᓄᓇᕗᑦ ᒎᓗᓪᓗᐊᕕᐊᓂᑦ ᐱᔭᐅᔪᖅ ᐃᓚᖓᒍᑦ ᐊᒡᓃᑯᒃᑯᑦ ᐊᐳᖅᑎᓐᓈᖅᑐᒥᑦ ᐊᔭᕋᒃᑕᕆᐊᖓᓂᑦ

ᖁᕕᐊᓲᑎᖃᕐᓂᖅ ᓄᓇᕗᑦ ᐅᑉᓗᖓᓂᑦ ᐊᒻᒪᓗ 20 ᐊᕐᕌᒍᐃᑦ ᑎᑭᐅᑎᓂᖓ ᓄᓇᕗᑦ, ᐊᒡᓃᑯᒃᑯᑦ ᖁᕕᐊᓲᑎᖃᖅᑎᑦᑎᓂᐊᖅᑐᑦ Royal Canadian Mint-ᑯᑦ ᑖᑉᑯᐊ ᓴᕕᓕᐅᖅᑏᑦ ᓴᖅᑭᑦᑎᑎᓪᓗᒋᑦ ᓄᑖᒥᒃ ᑲᑎᖅᓱᐃᔩᑦ ᓴᕕᖓᓂᑦ ᓴᓇᔭᐅᔪᖅ ᓄᓇᕗᒻᒥᙶᖅᑐᒥᒃ ᒎᓘᑉᓗᓂ ᐊᒻᒪᓗ ᑕᖅᓴᖃᖅᑐᖅ ᐃᓅᑉ ᑎᑎᕋᐅᔭᖅᑕᖓᓂᒃ ᔪᒪᐃᓐ ᐊᕐᓇᑦᑕᐅᔪᖅ ᓴᖅᑭᑕᐅᖅᑲᐅᑕᐅᓚᐅᖅᓯᒪᔪᖅ $2 ᓴᕕᖕᒥᑦ ᓄᓇᕗᙳᓵᖅᑎᓪᓗᒍ 1999-ᒥᑦ.

ᐅᔭᕋᒃᑕᕆᐊᕐᒥᑦ mint-ᒧᑦ:

20 ᐊᕐᕌᒍᐃᑦ ᑎᑭᐅᑎᓂᖓ ᓄᓇᕗᒻᒥᑦ ᐃᖅᑲᐅᒪᓂᕐᒧᑦ ᓴᕕᒃ ᐱᔭᐅᓚᐅᖅᑐᖅ 99.99%-ᖑᔪᖅ ᒎᓗ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᕐᒥᑦ ᖃᒪᓂᑦᑐᐊᑉ ᖃᓂᑕᖓᓂᑦ ᐊᒻᒪᓗ TMAC Resources-ᑯᑦ Doris North ᐅᔭᕋᒃᑕᕆᐊᕐᒥᑦ Hope Bay-ᒥᑦ.

ᒎᓗ ᐱᓕᕆᐊᖑᓚᐅᖅᑐᖅ Royal Canadian Mint-ᑯᑦ ᐱᐅᔪᕐᔪᐊᒻᒪᕆᐊᓗᖓᓐᓂᑦ ᐱᓕᕆᕝᕕᖓᓐᓂᑦ ᐊᒻᒪᓗ ᓴᖅᑭᑕᐅᓕᖅᖢᓂ ᓂᐅᕕᐊᒃᓴᐅᑉᓗᓂ ᔫᓂ 25-ᒥᑦ.  ᑐᒡᓕᕆᔭᐅᔪᖅ ᓴᕕᒃ ᓄᓇᕗᒻᒥᙶᖅᑐᖅ ᒎᓗ, ᑕᐃᔭᐅᔪᖅ ᓇᓗᓇᐃᒃᑯᑏᑦ ᐅᑭᐅᖅᑕᖅᑐᒥᑦ, ᓴᖅᑭᑕᐅᔪᖅ 2018-ᒥᑦ.

ᐃᓕᑕᕆᔭᐅᑉᓗᑎᒃ ᐊᒡᓃᑯᒃᑯᑦ ᐊᒻᒪᓗ TMAC Resources-ᑯᑦ ᓴᓇᔭᐅᓂᖓᓄᑦ ᐱᐅᔪᕐᔪᐊᖅ ᓴᕕᒃ, Mint-ᑯᓐᓄᑦ ᐊᖓᔪᖅᑳᑉ ᑐᒡᓕᖓ ᓂᐅᕕᐊᒃᓴᓄᑦ ᓗᐊᓐ ᐅᐃᑦᒧᐊ ᐅᖃᖅᑐᖅ ᓴᕆᒪᓱᒃᑐᖅ ᐱᓕᕆᖃᑎᒌᖕᓂᕆᔭᖓᓂᒃ ᒪᕐᕉᖕᓂᒃ ᐅᔭᕋᒃᑕᕆᐊᕐᓂᑦ ᐊᒻᒪᓗ ᐊᔾᔨᐅᖏᑦᑐᖅ ᓄᑖᖅ ᓴᕕᒃ ᐃᖕᒥᓂᒃ ᐅᓂᑉᑳᖅᑐᖅ ᓇᑭᙶᕐᓂᕆᔭᖓᓂᑦ.

“ᒎᓗ ᐊᑐᖅᑕᐅᓚᐅᖅᑐᖅ ᐅᑎᕐᕕᐅᔪᖕᓇᖅᑐᖅ ᐅᔭᕋᒃᑕᕆᐊᖏᓐᓄᑦ ᓄᓇᕗᒻᒥᑦ ᐊᒻᒪᓗ ᑕᑯᒃᓴᐅᔪᖅ ᐱᓂᐊᕐᓂᕆᔭᖏᑦ ᐱᑦᑕᐅᔪᒃᑯᑦ ᐱᕝᕕᐅᔪᓂᑦ ᐊᒻᒪᓗ ᐱᓕᕆᐊᖃᕐᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ ᐱᖓᓲᔪᓄᑦ ᐱᓕᕆᐊᕐᒧᑦ ᐱᓕᕆᖃᑎᒌᓗᒃᑖᓄᑦ,” ᐅᖃᖅᑐᖅ ᐅᐃᑦᒧᐊ.  “ᓴᕕᒃ, ᒎᓘᔪᖅ ᐃᓚᒋᔭᐅᔪᖅ ᐅᓂᑉᑳᒧᑦ, ᐊᒻᒪᓗ ᐱᒻᒪᕆᐅᑉᓗᓂ ᐊᔾᔨᐅᖏᑦᑑᓂᕆᔭᖓ.”

ᐊᒡᓃᑯᒃᑯᑦ ᖁᕕᐊᓱᑦᑎᐊᖅᑐᑦ ᐊᒻᒪᓗ ᓴᕆᒪᓱᒃᑐᑦ ᒎᓗ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᑉᑎᓐᓂᙶᖅᑐᖅ ᐃᓚᒋᔭᐅᖕᒪᑦ ᐊᔾᔨᐅᖏᑦᑑᔪᒥᑦ ᐃᖅᑲᐅᒪᓐᓇᐅᑎᒧᑦ.  ᓵᓐ ᐳᐃᑦ ᐅᖃᖅᑐᖅ, “ᑖᒻᓇ ᒎᓗᑎᑑᖅᖢᓂ ᐱᓯᒪᓕᖅᑑᔪᖅ ᐅᑉᓗᒥ ᓄᓇᕗᒻᒧᑦ ᐊᒻᒪᓗ ᐊᒡᓃᑯᒃᑯᓐᓄᑦ.  ᐅᑉᓗᒥᐅᔪᖅ, ᖁᕕᐊᓲᑎᖃᖅᑐᒍᑦ ᓄᓇᕗᙳᓚᐅᕐᓂᖓᓂᒃ ᐊᒻᒪᓗ 20 ᐊᕐᕌᒍᐃᑦ ᐃᖕᒥᖕᓂᒃ-ᒐᕙᒪᐅᓕᕐᓂᖓᓄᑦ ᐊᒻᒪᓗ ᐱᔪᒪᓂᖃᕐᓂᖓᓄᑦ.  ᐊᒻᒪᓗ, ᑕᒡᕙᓂ ᐃᓱᐊᓂᑦ ᐊᐅᔭᐅᑉ, ᐊᒡᓃᑯᒃᑯᑦ ᖁᕕᐊᓲᑎᖃᕐᓂᐊᖅᑐᑦ ᐅᒃᑯᐃᖅᓯᓂᖓᓐᓂᒃ ᒪᕐᕉᒃ ᓄᑖᒃ ᒎᓗᒥᒃ ᐅᔭᕋᒃᑕᕆᐊᓂᒃ ᓄᓇᕗᒻᒥᑦ – ᑕᓯᕐᔪᐊᖅ ᐊᒻᒪᓗ ᐊᒪᕈᖅ.”

ᐅᖃᖅᖢᓂᓗ, “ᐊᒡᓃᑯᒃᑯᑦ ᐱᖃᖃᑕᐅᔪᑦ ᐊᔾᔨᒋᔭᐅᔪᓂᒃ ᐱᒻᒪᕆᐅᒍᓱᖕᓂᕆᔭᖏᓐᓂᒃ ᓄᓇᕗᒻᒥᐅᑦ ᖃᑕᙳᑎᒌᓄᑦ, ᐱᖅᑯᓯᖏᓐᓄᑦ, ᐊᓯᒥᒃ ᐃᒃᐱᒍᓱᒡᕕᖃᕐᓂᕐᒧᑦ ᐊᒻᒪᓗ ᑕᑎᖃᕐᓂᕐᒥᒃ.  ᑖᒻᓇ 20 ᐊᕐᕌᒍᓂᒃ ᑎᑭᐅᑎᓂᖅ ᓈᒻᒪᑦᑎᐊᖅᑐᖅ ᑕᑯᒃᓴᐅᑎᓐᓂᐊᕐᓗᒍ ᓄᓇᕗᑦ ᐃᑲᔪᐃᓂᕆᔭᖓ ᑲᓇᑕᐅᑉ ᐊᔾᔨᐅᖏᑦᑐᑦ ᐱᒻᒪᕆᐅᒋᔭᖏᓐᓄᑦ ᐊᒻᒪᓗ ᐱᖅᑯᓯᕐᒧᑦ.  ᑲᔪᓯᓂᐊᖅᑐᒍᑦ ᐱᓕᕆᖃᑎᒋᓗᒋᑦ ᐃᓄᐃᑦ ᐱᓕᕆᖃᑎᕗᑦ ᐱᔭᒃᓴᐅᑎᖃᕐᓂᒃᑯᑦ ᐱᕙᓪᓕᐊᑎᑦᑎᓂᕐᒥᒃ ᓄᓇᕗᑦ ᐱᕈᖅᐸᓪᓕᐊᓂᖓᓄᑦ ᐊᒻᒪᓗ ᐃᓅᖃᑎᒌᓄᑦ ᐊᔪᙱᓐᓂᖃᓕᖅᑎᑦᑎᓂᕐᒧᑦ ᐃᑲᔪᐃᓂᖃᕐᓂᐊᖅᑐᒥᒃ ᓄᓇᕗᒻᒥᐅᓗᒃᑖᓄᑦ.”

ᐋᖅᑭᐅᒪᓂᖓᑐᑦ

  • 20-ᒋᓕᖅᑕᖓᓂᒃ ᑎᑭᐅᑎᓂᖅ ᓄᓇᕗᑦ 2019 $20 ᒎᓗᓪᓗᐊᕕᒃ ᑕᑯᒃᓴᐅᔪᖅ ᐃᓅᑉ ᑎᑎᕋᐅᔭᖅᑎᐅᔫᑉ ᔪᒪᐃᓐ ᐊᕐᓇᑦᑕᐅᔪᖅ ᑎᑎᕋᐅᔭᖅᑕᖓᓂᑦ ᐃᓄᒃ ᕿᓚᐅᔾᔭᖅᑐᖅ, ᓄᓇᙳᐊᖃᖅᖢᓂ ᓄᓇᕗᒻᒥᑦ ᐊᒻᒪᓗ ᖁᓪᓕᖅᑕᖃᖅᖢᓂ.
  • ᒧᒥᖅᑑᑉ ᐊᑖᓂᑦ ᑎᑎᕋᖅᓯᒪᔪᖅ “NUNAVUT” ᐊᒻᒪᓗ “ᓄᓇᕗᑦ“ (“ᓄᓇᕗᑦ” ᐃᓄᒃᑎᑐᑦ).
  • ᑐᓄᐊᓂᑦ ᑎᑎᕋᐅᔭᖅᓯᒪᑉᓗᓂ ᑯᐃᓐ ᐃᓕᓴᐱ II-ᒥᑦ ᑎᑎᕋᐅᔭᖅᑕᖓ ᓱᓵᓇ ᐸᓚᓐᑦ (Susanna Blunt).
  • ᑎᑭᐅᑎᓂᕐᒧᑦ ᓴᕕᒃ ᐊᔾᔨᓕᐊᖑᓯᒪᔪᖅ Mint-ᑯᑦ 1999-ᒥᑦ $2 ᓴᕕᒃ ᓴᖅᑭᑕᐅᓚᐅᖅᑐᖅ ᓯᕗᓪᓕᖅᐹᒥᑦ ᖁᕕᐊᓲᑎᒋᑉᓗᒍ ᓄᓇᕗᑦᑖᕐᓂᖅ.
  • $20 ᓴᕕᒃ 99.99% ᒎᓗᓪᓚᑦᑖᖑᔪᖅ ᐱᔭᐅᑉᓗᓂ ᓄᓇᕗᒻᒥᑦ, ᐊᖕᒪᓗᕐᓂᖃᖅᖢᓂ 20 ᒥᓕᓖᑕᓂᒃ (millimetres) ᐊᒻᒪᓗ ᓴᕕᐅᑉ ᐅᖁᒪᐃᓐᓂᖓ14 ᒍᕌᒻᔅ-ᖑᑉᓗᓂ (grams).
  • ᐅᕗᙵᕐᓗᑎᑦ www.mint.ca ᖃᐅᔨᒃᑲᓐᓂᕈᒪᒍᕕᑦ ᐅᕝᕙᒡᓗᓐᓃᑦ ᑎᑭᓴᐃᓗᑎᑦ ᐃᖅᑲᐅᒪᓐᓇᐅᑎ ᓴᕕᖕᒥᑦ.