ᖃᒪᓂᑦᑐᐊᕐᒥᑦ ᐊᒃᑕᑯᖏᓐᓂᒃ ᓴᓗᒻᒪᖅᓴᐃᓂᖅ ᐊᑕᐅᓯᖅ ᒥᑭᔪᖅ, ᐱᒻᒪᕆᐅᔪᖅ ᐱᒋᐊᕈᑎ ᒥᒃᖠᒋᐊᖅᑎᓪᓗᒍ ᓄᓇᐅᑉ ᐋᖅᑭᐅᒪᓂᖓ

ᐃᓂᒃᓴᖃᓗᐊᖏᖦᖢᓂ ᐊᒃᑕᑰᕐᓂᐊᕐᓗᒋᑦ ᓄᑕᐅᖏᑦᑐᑦ ᐊᒃᓴᓗᐊᕕᓃᑦ, ᓯᖁᒥᓯᒪᔪᑦ ᐃᒡᓗᕐᔪᐊᒧᑦ ᐱᖁᑎᒋᔭᐅᔪᓄᑦ, ᐃᓗᓕᖃᙱᑦᑐᑦ ᖃᑦᑕᐅᔭᐃᑦ ᐊᓯᖏᓪᓗ ᐅᓗᕆᐊᓇᖅᑐᓖᑦ ᖃᒪᓂᑦᑐᐊᕐᒥᑦ, ᓄᓇᕗᒻᒥᑦ ᒫᓐᓇᓵᖑᓚᐅᖅᑐᖅ ᐊᒃᓱᕈᕐᓇᖅᑐᖃᓚᐅᖅᑐᑦ ᐊᒃᑕᑯᖏᑦ ᐅᓗᕆᐊᓇᖅᓯᕙᓪᓕᐊᑐᐃᓐᓇᖅᑎᓪᓗᒋᑦ.  ᑕᐃᒪᓐᓇᒧᑦ ᐊᐱᕆᓚᐅᖅᑐᑦ ᓯᓚᑎᒋᔭᖏᓐᓂᑦ, ᐊᒡᓃᑯᒃᑯᓐᓂᑦ ᐊᐳᖅᑎᓐᓈᖅᑐᒥᑦ ᐅᔭᕋᒃᑕᕆᐊᕐᒥᑦ.

“ᐊᒥᓱᑦ ᐱᓕᕆᔨᕗᑦ ᖃᒪᓂᑦᑐᐊᕐᒥᐅᑕᐅᔪᑦ, ᓄᓇᓕᒃ ᓯᓚᑎᑐᐃᓐᓇᕆᙱᑕᕗᑦ ᑭᓯᐊᓂ ᐃᓚᒋᔭᐅᔪᑦ ᖃᑕᙳᑎᑉᑎᖕᓂᑦ.  ᐊᒻᒪᓗ, ᓴᓗᒻᒪᖅᓴᐃᓂᖅ ᐊᒃᑕᑯᓂᑦ ᐱᒻᒪᕆᐅᒃᐸᑦ ᖃᒪᓂᑦᑐᐊᕐᒥᐅᓄᑦ, ᐅᕙᑉᑎᖕᓄᑦᑕᐅᖅ ᐱᒻᒪᕆᐅᔪᖅ.  ᑐᑭᓯᐊᔪᒍᑦ ᐱᓕᕆᐊᕆᓂᖅ ᐱᒻᒪᕆᐅᖕᒪᑦ ᒥᐊᓂᕆᓂᐊᕐᓗᒍ ᓱᕋᑲᐅᑎᒋᔪᖕᓇᖅᑐᖅ ᐊᕙᑎᕗᑦ ᓄᓇᖃᕐᕕᒋᔭᕗᑦ,” ᐅᖃᖅᑐᖅ ᓯᑏᕕᓐ ᑐᕌᒻᑉᓖ, ᓱᓇᑐᐃᓐᓇᓄᑦ ᐃᓱᒪᑕᕆᔭᐅᔪᖅ ᐆᒻᒪᖅᑯᑎᓄᑦ ᐊᒻᒪᓗ ᐱᖁᑎᓕᕆᔨᒃᑯᓐᓄᑦ (E&I) ᐊᐳᖅᑎᓐᓈᖅᑐᒥᑦ.

ᐊᒃᑕᑯᓂᒃ ᓴᓗᒻᒪᖅᓴᐃᓂᖃᓚᐅᖅᑐᑦ ᔪᓚᐃ 10-ᒥᑦ ᐊᒻᒪᓗ ᔪᓚᐃ 19-ᒥᑦ.  ᓴᓗᒻᒪᖅᓴᐃᔪᑦ ᑕᑕᑦᑎᓚᐅᖅᑐᑦ ᐊᒃᑕᑯᓂᑦ 53-ᓂᒃ ᐅᒥᐊᕐᔪᐊᕐᒥᑦ ᐅᓯᒋᔭᐅᓲᑦ ᓰᑳᓐ-ᖑᓂᕋᖅᑕᐅᔪᓂᒃ, ᐃᓚᐅᑉᓗᑎᒃ 37 ᓰᑳᓐ-ᖑᓂᕋᖅᑕᐅᔪᑦ ᐃᓗᓕᖃᖅᖢᑎᒃ 370 ᑕᓐ-ᓂᒃ ᐅᓗᕆᐊᓇᖅᑐᓕᖕᓂᒃ ᐊᒃᑕᑯᓂᑦ.  ᓰᑳᓐ-ᖑᓂᕋᖅᑕᐅᔪᑦ ᐅᓯᓕᖅᑐᖅᑕᐅᓚᐅᖅᑐᑦ ᓯᑲᐅᒧᑦ ᖃᒪᓂᑦᑐᐊᕐᒥᑦ ᐊᐅᓪᓚᖅᑎᑕᐅᑉᓗᑎᒡᓗ ᖃᑉᓗᓈᓄᑦ ᑭᓴᕐᕕᖕᒧᑦ Bécancour, ᑯᐸᐃᒃ-ᒥᑦ.  ᑕᐃᑲᙵᑦ, ᓰᑳᓐ ᐊᒡᔭᖅᑕᐅᓚᐅᖅᑐᑦ ᐱᔪᖕᓇᖅᑎᑕᐅᔪᒧᑦ ᐊᑐᒃᑲᓐᓂᓕᐅᕆᔨᒃᑯᓐᓄᑦ ᐊᒻᒪᓗ ᐱᓕᕆᐊᖃᕐᕕᒃᑯᓐᓄᑦ – ᐊᑐᒃᑲᓐᓂᖅᑐᓕᐊᖑᓂᐊᕐᓗᑎᒃ ᐅᕝᕙᓘᓐᓃᑦ ᐅᖅᓱᒧᑦ ᐊᑐᖅᑕᐅᓂᐊᕐᓗᑎᒃ ᐃᑯᒻᒪᖅᑯᑎᓕᐅᕆᓂᕐᒧᑦ ᐃᑯᒻᒪᖅᑯᑎᓕᐅᕆᕝᕕᖕᓂᑦ.

ᓰᑳᓐ ᓯᑲᐅᒃᑰᖅᑎᑕᐅᖅᑲᐅᑕᐅᓚᐅᖅᑐᑦ ᐊᐅᔭᐅᑎᓪᓗᒍ ᐊᕐᕌᒍᑕᒫᖅ ᐅᒥᐊᕐᔪᐊᑦ ᑎᑭᖃᑦᑕᕐᓂᖏᑦᑎᒍᑦ ᓄᑖᓂᒃ ᑎᑭᐅᔾᔨᓲᓂᒃ ᐊᑐᖅᑕᐅᓂᐊᖅᑐᓂᒡᓗ ᐊᐳᖅᑎᓐᓈᖅᑐᒥᑦ.  ᐃᓗᓕᖃᙱᓪᓗᑎᒃ ᐅᑎᖅᑎᙱᖔᕐᓗᒋᑦ, ᓰᑳᓐ ᒪᕐᕈᐃᖅᑕᖅᑐᑎᑐᑦ ᐊᑐᖅᑕᐅᓕᓚᐅᖅᑐᑦ ᐅᑎᖅᖢᑎᒃ ᐃᓗᓪᓕᖅᑐᖅᓯᒪᑉᓗᑎᒃ ᐊᒃᑕᑯᓂᑦ “ᐅᓯᒋᔭᐅᔪᑦ”.

ᐆᒻᒪᖅᑯᑎᓄᑦ ᐊᒻᒪᓗ ᐱᖁᑎᓕᕆᔨᒃᑯᑦ ᖃᐅᔨᓴᖅᑎᐅᓚᐅᖅᑐᑦ ᑐᑭᒥᐊᒃᑎᑦᑎᔨᐅᑉᓗᑎᒡᓗ ᐃᓚᓗᒃᑖᖏᓐᓂᑦ ᐱᓕᕆᐊᑉ – ᐃᑲᔪᖅᑕᐅᑉᓗᑎᒃ ᐅᓗᕆᐊᓇᖅᑐᓕᖕᓂᒃ ᖃᐅᔨᒪᓂᖃᖅᑐᒧᑦ ᐃᕚᓐ ᐴᑐᐃᓐ-ᒧᑦ ᕿᑭᖅᑖᓗᖕᒥᑦ ᐊᕙᑎᓕᕆᔨᒃᑯᓐᓄᑦ – ᓈᒻᒪᒃᑐᓂᒡᓗ ᓰᑳᓐ-ᓂᒃ ᒪᓂᒪᑎᑦᑎᑉᓗᓂ ᐱᓕᕆᐊᕐᒧᑦ, ᐊᑐᖅᑕᐅᔭᕆᐊᓖᑦ “ᕼᐋᔅᒫᑦ”-ᒧᑦ ᐊᓕᓚᔪᓕᕆᔾᔪᑏᑦ ᐱᐊᓂᓚᐅᖅᑐᑦ, ᐊᑐᖅᑕᐅᔪᓗᒃᑖᓪᓗ ᓈᓴᖅᑕᐅᑦᑎᐊᓗᒃᑖᖅᖢᑎᒃ, ᐴᖅᑐᖅᑕᐅᑉᓗᑎᒃ ᐊᐅᓪᓚᖅᑎᑕᐅᑉᓗᑎᒡᓗ.

ᕗᕌᖕᒃ ᑐᑐ, ᐃᒃᓯᕙᐅᑕᖅ ᖃᒪᓂᑦᑐᐊᕐᒥᑦ ᓄᓇᓕᕆᓂᕐᒧᑦ ᑲᑎᒪᔨᐊᓛᓄᑦ, ᐃᑲᔪᓚᐅᖅᑐᖅ ᑲᒪᒋᑉᓗᒍ ᐱᓕᕆᐊᖅ ᐱᔾᔪᑎᑉᓗᒋᑦ ᓄᓇᓕᒃ.  ᓇᖕᒥᓂᖃᖃᑕᐅᑉᓗᓂ ᓄᓇᓕᖕᒥᑦ ᐃᓅᔪᑦ ᓇᖕᒥᓂᓕᖕᓄᑦ ᐱᑖᐅᑉ ᐊᒡᔭᖅᑐᐃᔨᒃᑯᑦ, ᑲᒻᐸᓂᖓ ᐃᑲᔪᓚᐅᕐᒥᔪᖅ ᐊᒡᔭᖅᑐᐃᑉᓗᑎᒃ ᐅᓯᓕᖅᑐᖅᖢᒋᓪᓗ ᓰᑳᓐ ᓯᑲᐅᒧᑦ.

“ᓴᓗᒻᒪᖅᓴᕐᓗᒍ ᐊᒃᑕᑰᓯᕝᕕᒃ ᐱᒻᒪᕆᐅᔪᖅ ᐅᕙᑉᑎᖕᓄᑦ ᐊᒥᓱᐃᑦ ᐱᔾᔪᑎᒋᑉᓗᒋᑦ, ᐱᓗᐊᖅᑐᒥᑦ ᐆᒪᓂᖃᖃᑎᒌᒃᑐᖁᑎᕗᑦ ᓱᕋᒃᓴᕋᐃᑦᑑᖕᒪᑦ.  ᐅᕙᒻᓄᑦ, ᐃᓚᒋᔭᐅᓗᐊᖅᑐᖅ ᐃᒪᕆᖃᑦᑕᖅᑕᕗᑦ ᖃᓄᐃᖏᑏᓐᓇᕐᓗᒍ.

ᕗᕌᖕᒃ ᐅᖃᖅᑐᖅ ᐱᓪᓗᕆᒃᓴᖅᖢᓂ ᐊᐅᓚᑦᑎᓂᖅ ᓄᓇᓕᐅᑉ ᐊᒃᑕᑰᖅᑕᖓᓂᑦ ᐃᒪᖅ ᐊᒻᒪᓗ ᐊᒃᑕᑯᐃᑦ ᓯᕗᓪᓕᖅᐸᐅᑎᔭᕆᐊᖃᖅᑕᖏᑦ ᓄᓇᓕᕆᓂᕐᒧᑦ ᑲᑎᒪᔨᐊᓛᒃᑯᑦ, ᐱᓗᐊᖅᑐᒥᑦ ᖃᒪᓂᑦᑐᐊᖅ ᐊᓯᖏᓪᓗ ᓄᓇᕗᒻᒥ ᓄᓇᓖᑦ ᐱᕈᖅᐸᓪᓕᐊᖕᒪᑕ ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᖅ ᑕᒫᓂ ᐊᖏᒡᓕᕙᓪᓕᐊᑎᓪᓗᒍ.

“ᐱᓪᓗᕆᒃᓴᖅᖢᑕ ᐱᓕᕆᐊᕆᔭᕗᑦ ᑕᒪᒃᑯᐊ.  ᒥᒃᖠᒋᐊᕈᒪᓗᐊᒃᑲᓐᓂᖅᑕᕗᑦ ᐊᕙᑎᒧᑦ ᐊᒃᑐᖅᓯᓂᐅᔪᖅ ᐊᑐᖅᑕᐅᑎᒃᑲᓐᓂᕐᓗᒋᑦ ᐊᒃᑕᑰᖅᑕᐅᔪᑦ.  ᐊᒡᓃᑯᒃᑯᑦ ᐊᖏᔪᒥᒃ ᐃᑲᔪᐃᓂᖃᖅᓯᒪᔪᑦ ᖃᐅᔨᒪᓂᖃᓕᖅᑎᒃᑲᓐᓂᖅᖢᑕ ᑕᒫᓂ ᐃᓂᐅᔪᒥᑦ.  ᑲᑎᒪᔪᓄᐊᖃᑦᑕᖅᑐᑦ ᕼᐋᒻᓚᒃᑯᑦ ᑲᑎᒪᔭᕌᖓᑕ ᑐᓴᖅᑎᑦᑎᑉᓗᑎᒡᓗ ᑲᑉᐳᔾᔭᓅᖅᑐᓂᒃ ᓄᑖᓂᒡᓗ ᐆᒃᑐᕋᖅᑕᖓᓐᓂᒃ ᐊᒻᒪᓗ ᐊᑐᓕᖅᑕᖓᓐᓂᒃ ᒥᒃᖠᒋᐊᖅᑎᑦᑐᒪᑉᓗᒋᑦ ᓇᖕᒥᓂᖅ ᐊᑐᖅᑕᖓᓐᓂᑦ.  ᓄᓇᕐᔪᐊᕐᒥᑦ, ᑐᑭᓯᐊᔪᖓ ᓄᑖᖑᓚᖑᔪᖅ ᐱᓕᕆᐊᖑᔪᓂᑦ ᕿᓂᖅᑐᑦ ᓯᑎᔪᑦ ᐊᒃᑕᑰᖅᑕᐅᔪᑦ ᐊᑐᓕᖅᑕᐅᓗᑎᒃ ᐆᒻᒪᖅᑯᑎᓕᐅᕆᓂᕐᒧᑦ.  ᐱᐅᔪᒻᒪᕆᐊᓗᒃ ᑕᒪᓐᓇ ᑕᐃᑲᓃᑦᑐᒪᑉᓗᑕᓗ – ᐱᓕᕆᐊᖃᖃᑕᐅᓗᑕ ᑕᒪᒃᑯᐊ ᓄᑖᑦ ᐃᓱᒪᒋᔭᐅᔪᓂᑦ.”

ᕗᕌᖕᒃ ᐃᓚᓯᔪᖅ, “ᓇᓗᓇᙱᑦᑐᖅ ᐊᒡᓃᑯᒃᑯᑦ ᐱᐅᔫᔪᒥᒃ ᕿᒪᐃᔪᒪᖕᒪᑕ ᓄᓇᕗᒻᒧᑦ ᐊᒻᒪᓗ ᐃᑲᔪᕐᓂᕆᔭᖓᑦ ᐅᖃᐅᓯᐅᒃᑲᓐᓂᕐᓂᖅ ᐅᖓᑖᓄᑦ ᐊᔪᕐᓇᖅᑐᖅ.”  ᐅᓇ ᓇᕿᓪᓗᒍ ᐅᖃᓕᒫᕈᒪᒍᕕᑦ ᖃᒪᓂᑦᑐᐊᕐᒥᑦ ᕼᐋᒻᓚᒃᑯᑦ ᑲᑎᒪᔨᖏᑦᑕ ᖁᔭᓐᓇᒦᖅᑕᖓᓐᓂᒃ ᐊᒡᓃᑯᒃᑯᓐᓄᑦ ᖃᒪᓂᑦᑐᐊᑉ ᐊᒃᑕᑯᖏᓐᓂᒃ ᓴᓗᒻᒪᖅᓴᐃᓂᕐᒧᑦ.

ᓈᓴᐅᑎᑎᒍᑦ

ᐃᕚᓐ ᐴᑐᐃᓐ, ᐱᓕᕆᐊᕐᒧᑦ ᐊᐅᓚᑦᑎᔨ ᕿᑭᖅᑖᓗᒃ ᐊᕙᑎᓕᕆᔨᒃᑯᓐᓄᑦ ᐊᒻᒪᓗ ᖃᐅᔨᒪᓂᖃᖅᑐᖅ ᐊᐅᓚᑦᑎᓂᕐᒧᑦ ᐅᓗᕆᐊᓇᖅᑐᓕᖕᓂᒃ, ᐅᖃᖅᑐᖅ ᐱᓕᕆᐊᕐᒧᑦ ᐱᓕᕆᔪᑦ ᐱᓕᕆᐊᖃᓚᐅᖅᑐᑦ ᐊᐅᓪᓚᖅᑎᑦᑎᑉᓗᑎᒡᓗ:

37 20-ᐃᑎᒐᓂᒃ ᑕᑭᑎᒋᔪᓂᒃ ᓰᑳᓐ-ᓂᒃ ᐃᓗᓕᖃᖅᑐᑦ ᐅᓗᕆᐊᓇᖅᑐᓂᒃ ᐊᒃᑕᑯᓂᒃ ᐃᓚᐅᑉᓗᑎᒃ 1,545 205-ᓖᑕᐃᑦ ᓴᕖᑦ ᖃᑦᑕᐅᔭᐃᑦ ᓯᑲᐅᒧᐊᖅᑕᐅᓚᐅᖅᑐᑦ ᐊᒻᒪᓗ ᐃᓗᓕᖃᓗᐊᖅᖢᑎᒃ: ᐊᑐᖅᓯᒪᔪᖅ ᐅᖅᓱᐊᓗᒃ, ᐊᑐᖅᓯᒪᔪᖅ ᑎᖕᒥᓲᓄᑦ ᐅᖅᓱᖅ, ᐊᑐᖅᓯᒪᔪᖅ ᐅᖅᓯᖅ, ᐊᑐᖅᓯᒪᔪᖅ ᐅᖅᓯᖅᑎᕈᑎ, ᐅᖅᓱᓕᒃ ᐃᒪᖅ, ᓄᓇᒃᑰᕈᑎᓄᑦ ᐹᑐᓖᑦ, ᐊᑐᖅᓯᒪᔪᖅ ᖁᐊᖅᑕᐃᓕᔾᔪᑏᑦ, ᐃᓗᓕᖃᙱᑦᑐᑦ ᐳᑉᓚᓖᑦ ᐅᖅᓱᐃᑦ, ᐊᑐᖅᓯᒪᔪᑦ ᒥᖒᑏᑦ;

8 20-ᓂᒃ ᑕᑭᓂᓖᑦ ᓰᑳᓐ ᐃᓗᓕᖃᖅᑐᑦ ᐊᒃᓴᓗᐊᓂᒃ;

8 20-ᓂᒃ ᑕᑭᓂᓖᑦ ᓰᑳᓐ ᐃᓗᓕᖃᖅᑐᑦ ᐊᒃᑕᑰᖅᑕᐅᔪᑦ ᓴᕖᑦ;