ᓴᙱᒃᑎᑎᕆᓂᖅ ᓄᓇᓕᖕᒥᑦ ᐱᓕᕆᖃᑎᒌᖕᓂᖏᓐᓂᑦ

ᖃᓄᖅ ᐊᑕᐅᓯᕐᒧᑦ ᐃᑲᔪᐃᓂᖅ ᐊᑐᖃᑦᑕᕐᒪᖔᑦ ᓴᙱᓂᖅᓴᐅᔪᒥᒃ, ᐅᑎᒃᑲᓐᓂᕈᖕᓇᕐᓂᖅᓴᐅᔪᓂᒃ ᓄᓇᖅᖃᑎᒌᓂᑦ 

ᐅᑉᓗᒥᐅᓕᖅᑐᖅ, ᐱᓕᕆᐊᕐᒧᑦ ᐱᓕᕆᖃᑎᒌᖕᓂᖅ ᐊᒻᒪᓗ ᐊᑕᐅᓯᕐᒧᑦ ᐃᑲᔫᑎᓂᖅ ᐱᒻᒪᕆᐅᓂᖅᓴᐅᓕᖅᑐᖅ. ᑲᖏᖅᖠᓂᕐᒥᑦ, ᓄᓇᕗᑦ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᒃᑯᑦ ᐋᖅᕿᒃᓯᓚᐅᖅᑐᑦ ᐱᔪᒥᓇᖅᑐᒥᒃ ᐱᓕᕆᖃᑎᒌᖕᓂᕐᒥᑦ ᑲᖏᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᓐᓂᑦ. ᐊᑕᐅᓯᕐᒧᑦ ᐃᑲᔪᐃᓂᕐᒥᒃ ᐊᖏᖃᑎᒌᒍᑎᖑᑉᓗᓂ ᐱᒋᐊᓚᐅᖅᑐᖅ ᑕᖅᖀᓐᓇᕐᔪᐊᖅ 2021-ᒥᑦ ᐱᐊᓂᑦᑎᐊᖅᓯᒪᔪᒃᑯᑦ ᐱᓕᕆᖃᑎᒌᖕᓂᙳᖅᑐᖅ ᐃᑲᔪᐃᓂᖃᖅᖢᓂ ᐊᐅᓚᑦᑎᔨᓂᑐᐃᓐᓇᐅᖏᑦᑐᖅ ᑭᓯᐊᓂ ᓄᓇᓕᓗᒃᑖᒧᑦ.

ᓴᙱᓂᖅᓴᒥᑦ ᐱᓕᕆᖃᑎᒌᖕᓂᓕᐅᕐᓂᖅ ᐱᓇᓱᐊᕈᓯᕐᒥᑦ ᐊᔪᕈᖕᓃᖅᓴᐃᖃᑦᑕᕐᓂᒃᑯᑦ

ᐱᒋᐊᓚᐅᖅᑐᖅ ᓇᑦᑎᐊᑦ 2023-ᒥᑦ, ᐃᓚᒋᔭᐅᔪᑦ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᑐᐊᕕᓇᖅᑐᓂᒃ ᐅᐸᓗᐊᔨᒃᑯᑦ ᐃᑲᔪᖅᓯᒪᓕᖅᑐᑦ ᐱᕕᖃᕐᓂᖏᑦ ᐊᑐᖅᖢᒋᑦ ᐊᒻᒪᓗ ᖃᐅᔨᒪᓂᕆᔭᖏᑦ ᐃᓚᐅᑉᓗᑎᒃ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᑦ ᐱᓇᓱᐊᕈᓯᕐᒥᑦ ᐊᔪᕈᖕᓃᖅᓴᖅᑕᐅᓂᖏᓐᓂᑦ. ᑐᕌᒐᕆᔭᐅᓗᐊᖅᑐᖅ ᐱᐅᓯᒋᐊᕐᓂᐊᕐᓗᒍ ᐊᑕᐅᓯᕐᒧᑦ ᐃᑲᔪᐃᓂᕐᒥᒃ ᐊᖏᖃᑎᒌᒍᑎ, ᐃᖕᒥᖕᓄᑦ ᐃᓕᑦᑎᖃᑦᑕᐅᑎᓗᑎᒃ, ᐊᒻᒪᓗ ᐸᕐᓇᒃᓯᒪᑦᑎᐊᕐᓂᐊᕐᓗᑎᒃ ᑐᐊᕕᓇᖅᑐᖃᓕᖅᐸᑦ.

ᐃᓚᖓᑦ ᑕᑯᒃᓴᐅᔪᖅ ᐱᓕᕆᐊᕐᒥᑦ ᐱᓕᕆᖃᑎᒌᖕᓂᕐᒥᑦ ᐊᑕᐅᑦᑎᒃᑯᑦ ᐊᔪᕈᖕᓃᖅᓴᖅᑕᐅᓂᖏᑦ 2023-ᒥᑦ ᐅᑭᐅᖅᑕᖅᑐᒥᑦ ᐅᔭᕋᒃᑕᕆᐊᓕᕆᓂᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑐᓕᕆᔨᖏᑦ ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᔨᐅᔪᑦ ᐱᒡᒎᖕᓂᕐᒥᑦ ᔭᓗᓇᐃᒥᑦ ᐃᓚᐅᖃᑕᐅᔪᖕᓇᖅᓯᑉᓗᑎᒃ. ᖃᑉᓯᐊᕐᔪᐃᑦ ᐅᑉᓗᓄᑦ, ᐃᓚᒋᔭᐅᔪᑦ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᑐᐊᕕᓇᖅᑐᓄᑦ ᐅᐸᓗᐊᔨᖏᑦ ᐊᔪᕈᖕᓃᖅᓴᖃᑎᖃᓚᐅᖅᑐᑦ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᓐᓂᑦ, ᒪᕐᕉᖕᓄᓪᓗ ᐅᑉᓘᖕᓂᑦ ᓄᑖᖑᔪᒥᑦ ᑭᕙᓪᓕᕐᒥᑦ ᐃᑯᐊᓪᓚᒃᑐᓕᕆᔩᑦ ᐊᔪᕈᖕᓃᖅᓴᐃᕝᕕᖓᓐᓂᑦ ᑲᖏᖅᖠᓂᕐᒥᑦ. ᐱᖓᓱᐃᑦ ᐅᑉᓗᐃᑦ ᐊᒃᖢᓈᒥᑦ ᐊᑐᖅᖢᑎᒃ ᐊᓐᓇᒃᑐᐃᓂᕐᒥᒃ ᐊᔪᕈᖕᓃᖅᓴᓚᐅᖅᑐᑦ, ᑎᑭᑎᑕᐅᔪᒥᒃ ᖃᐅᔨᒪᓂᖃᖅᑐᒧᑦ ᐊᔪᕈᖕᓃᖅᓴᖅᑕᐅᑉᓗᑎᒃ.

ᐅᖃᖅᑐᖅ ᑕᓯᕐᔪᐊᕐᒥᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᓐᓄᑦ ᐊᖓᔪᖅᖄᖅ, ᑦᓵᕈᓪᔅ ᐋᓐᑐᕆ ᓛᓐᔭᕕᓐ (Charles-Andre Langevin), “ᐊᔪᕈᖕᓃᖅᓴᐃᓃᑦ ᐊᖏᔪᒥᒃ ᐱᐊᓂᑦᑎᐊᓚᐅᖅᑐᑦ. ᓴᕆᒪᓱᓚᐅᖅᑐᒍᑦ ᐃᓕᑦᑎᔪᖕᓇᓚᐅᕋᑉᑕ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᒃᑯᓐᓂᑦ ᑭᓯᐊᓂ ᑐᓂᑉᓗᑎᒍᑦᑕᐅᖅ ᑐᐊᕕᓇᖅᑐᓄᑦ ᐅᐸᓗᐊᓂᕐᒥᒃ ᖃᐅᔨᒪᓂᕆᔭᑉᑎᖕᓂᑦ. ᓇᓗᓇᙱᒻᒥᔪᖅ ᐊᑕᐅᑦᑎᒃᑯᑦ ᐱᓕᕆᐊᖃᕐᓃᑦ ᐅᕙᑉᑎᖕᓂᑦ ᓴᙱᒃᑎᒋᐊᖅᓯᓂᐊᖅᑐᑦ ᑐᐊᕕᓇᖅᑐᖃᓕᖅᐸᑦ, ᑕᒪᐃᓐᓂᑦ ᓄᓇᓕᖕᒥᑦ ᐊᒻᒪᓗ ᐅᔭᕋᒃᑕᕆᐊᕐᒥᑦ.”

ᐱᓕᕆᔩᑦ ᐊᒻᒪᓗ ᓄᓇᓕᒃ ᐅᓗᕆᐊᓇᖅᑐᖃᙱᑦᑐᒦᑎᑕᐅᓂᖏᑦ

ᐱᓕᕆᐊᕐᒧᑦ ᐱᓕᕆᖃᑎᒌᖕᓂᖅ ᐊᖏᔪᒥᒃ ᐊᒃᑐᖅᓯᓂᖃᖅᑐᖅ ᐃᓚᐅᖃᑕᐅᔪᓄᑐᐃᓐᓇᐅᖏᑦᑐᖅ ᑭᓯᐊᓂ ᐊᖏᓂᖅᓴᐅᔪᒧᑦ ᓄᓇᓕᖕᒧᑦ. ᑯᕆᔅ ᐸᐃᑐᕐ (Chris Pitre), ᐅᔭᕋᒃᑕᕆᐊᕐᒥᑦ ᐊᓐᓇᒃᑐᐃᓂᕐᒧᑦ ᐊᖓᔪᖅᖄᖅ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᑐᐊᕕᓇᖅᑐᓕᕆᔨᒃᑯᓐᓄᑦ, ᑕᑯᑎᑦᑎᔪᖅ ᐃᑲᔪᐃᓂᖃᖅᑐᓂᒃ ᐊᔪᕈᖕᓃᖅᓴᐃᓂᕐᒥᑦ ᓱᓕᔪᒃᑯᑦ ᐊᑐᖅᑕᐅᕙᒃᑐᓂᑦ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᓐᓄᑦ. ᐅᖃᖅᑐᖅ ᐱᑦᑕᐅᔪᒥᒃ ᖃᓄᐃᖓᓕᖅᑎᑦᑎᓯᒪᓂᖓ ᑕᒪᐃᓐᓄᑦ ᐱᓕᕆᖃᑎᒌᓄᑦ, ᐊᔪᙱᓐᓂᒃᑯᑐᐃᓐᓇᐅᖏᑦᑐᖅ ᑭᓯᐊᓂ ᓄᓇᓕᖕᒥᑦ ᐱᕈᐃᑎᑦᑎᓂᕐᒧᑦᑕᐅᖅ ᐊᒻᒪᓗ ᐱᓕᕆᖃᑎᒌᖕᓂᓕᐅᕆᓂᕐᒧᑦ.

“ᐱᑕᖃᓗᐊᖏᑦᑐᖅ ᐊᑐᖅᑕᐅᔪᖕᓇᖅᑐᓂᒃ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᓂᐊᕐᓗᓂ. ᒫᓐᓇᓕ, 70-ᒃᑲᓐᓃᑦ ᐅᖓᑖᓄᑦ ᑐᐊᕕᓇᖅᑐᓄᑦ ᐅᐸᓗᐊᔨᓂᒃ ᐃᓚᐅᔪᖃᓕᖅᑐᑦ ᐃᑲᔪᕐᓂᐊᖅᑐᓂᒃ, ᐃᑲᔪᐃᓂᖃᑦᑎᐊᕐᓂᐊᖅᑐᖅ ᓄᓇᓕᒃ ᐱᕈᖅᐸᓪᓕᐊᑎᓪᓗᒍ. ᐃᔨᕗᑦ ᖃᐅᒻᒪᒃᑲᓐᓂᖃᑦᑕᖅᑐᑦ ᐱᑦᑕᐅᔪᒃᑯᑦ ᐃᓚᐅᖃᑕᐅᒐᑉᑕ ᓄᓇᓕᖕᒥᑦ, ᐊᒻᒪᓗ ᐊᔪᕈᖕᓃᖅᓴᖅᑕᐅᖃᑦᑕᖅᑐᑦ ᐃᓚᒋᑉᓗᑎᒍᑦ ᐊᒻᒪᓗ ᐊᔪᙱᓐᓂᖅᑖᒃᑲᓐᓂᖅᖢᑎᒃ. ᐃᓱᐊᓂᑦ ᐅᑉᓘᑉ ᑕᒡᕙᓃᑦᑐᑦ ᐃᑲᔪᕐᓂᐊᕐᓗᓂᑎᒍᑦ ᐊᒻᒪᓗ ᐅᕙᒍᑦ ᑕᒡᕙᓃᑦᑐᒍᑦ ᐃᑲᔪᕐᓂᐊᕐᓗᑎᒍᑦ.”

ᒫᒃ ᐅᐊᐃᔭᑦ (Mark Wyatt), ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᑦ ᐊᖓᔪᖅᖄᖓᑦ, ᖃᐅᔨᑎᑦᑎᓚᐅᖅᑐᖅ ᖁᕕᐊᒋᓂᖓᓄᑦ ᐊᑕᐅᓯᕐᒧᑦ ᐃᑲᔪᐃᓂᕐᒥᒃ ᐊᖏᖃᑎᒌᒍᑎ ᐱᕙᓪᓕᐊᑎᑦᑎᓯᒪᖕᒪᑦ. ᐅᖃᖅᑐᖅ ᐱᐅᓯᒋᐊᖅᓯᒪᔪᑦ ᐊᔪᕈᖕᓃᖅᓴᖅᑕᐅᔪᖕᓇᕐᓂᖏᓐᓄᑦ ᐊᒻᒪᓗ ᐃᑲᔪᖃᑎᒌᒍᖕᓇᕐᓂᖏᑦ ᓴᖅᕿᓚᐅᖅᑐᖅ ᐱᓕᕆᐊᒧᑦ ᐱᓕᕆᖃᑎᒌᖕᓂᕐᒥᑦ, ᑐᓂᓯᖃᑦᑕᐅᑎᔪᖕᓇᖅᑎᑦᑎᑉᓗᓂ ᐊᑐᖅᑕᐅᔭᕆᐊᓕᖕᓂᑦ ᐊᒻᒪᓗ ᐱᐅᓯᒋᐊᖅᑕᐅᓗᑎᒃ ᐊᔪᙱᓐᓂᕆᔭᐅᔪᑦ ᐱᒻᒪᕆᐅᔪᑦ ᐃᑯᐊᓪᓚᒃᑐᓕᕆᔨᓄᑦ ᐊᒻᒪᓗ ᑐᐊᕕᓇᖅᑐᓄᑦ ᐅᐸᓗᐊᓂᐊᕐᓗᓂ.

“ᑐᕌᒐᕆᔭᕗᑦ ᐱᓕᕆᖃᑎᒌᖕᓂᐊᕐᓗᑕ, ᐃᑲᔪᖃᑦᑕᐅᑎᓗᑕ ᐱᔭᕆᐊᖃᖅᑕᑉᑎᖕᓄᑦ, ᐊᒻᒪᓗ ᓄᓇᓕᒃ ᐅᓗᕆᐊᓇᖅᑐᖃᙱᑎᓪᓗᒍ. ᐊᑕᐅᓯᕐᒧᑦ ᐃᑲᔪᐃᓂᕐᒥᒃ ᐊᖏᖃᑎᒌᒍᑎ ᐅᕙᑉᑎᖕᓂᑦ ᐃᑲᔪᖅᑐᖅ ᓴᙱᓂᖃᖅᑎᑦᑎᓂᕐᒥᒃ, ᐅᑎᒃᑲᓐᓂᕈᖕᓇᕐᓂᖏᓐᓂᒃ ᓄᓇᓖᑦ.”

ᓄᓇᓕᒃ ᓴᙱᓂᖓ ᐊᑕᐅᓯᕐᒧᑦ ᐃᑲᔪᐃᓂᒃᑯᑦ

ᐱᓕᕆᖃᑎᒌᖕᓂᖓᑦ ᑕᑯᒃᓴᐅᑎᑦᑎᔪᖅ ᓴᙱᓂᕆᔭᖓᑕ ᐱᓕᕆᐊᕐᒧᑦ ᐱᓕᕆᖃᑎᒌᖕᓂᖅ ᐊᒻᒪᓗ ᐊᑕᐅᓯᕐᒧᑦ ᐃᑲᔫᑎᖃᑦᑕᕐᓂᖅ ᑐᐊᕕᓇᖅᑐᓂᒃ ᐅᐸᓗᐊᓂᕐᒥᑦ ᐊᒻᒪᓗ ᐸᕐᓇᒃᓯᒪᓂᕐᒥᑦ. ᑐᓂᓯᖃᑦᑕᕐᓗᓂ ᖃᐅᔨᒪᓂᕆᔭᐅᔪᒥᒃ, ᐊᔪᕈᖕᓃᖅᓴᐃᓂᕐᒧᑦ ᐊᑐᖅᑕᐅᔪᓂᒃ, ᐊᒻᒪᓗ, ᐱᒻᒪᕆᐅᓛᖑᔪᖅ, ᓴᙱᔪᒥᒃ ᐱᓕᕆᖃᑎᒌᖕᓂᓕᐅᕐᓗᓂ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᐊᒻᒪᓗ ᑲᖏᖅᖠᓂᕐᒥᑦ ᐃᑯᐊᓪᓚᒃᑐᓕᕆᔨᒃᑯᑦ ᐊᐅᓚᑦᑎᔨᑐᐃᓐᓇᐅᖏᑦᑐᑦ ᐊᑕᐅᓯᕐᒧᑦ ᐃᑲᔪᐃᓂᕐᒥᒃ ᐊᖏᖃᑎᒌᒍᑎᒧᑦ; ᑲᑎᖦᖢᑎᒃ ᐱᓕᕆᖃᑎᒌᙳᖅᑐᑦ.