ᑕᓯᕐᔪᐊᖅ ᓵᓚᒃᓴᖅᑐᖅ ᔮᓐ ᕋᐃᔭᓐ (John T. Ryan) ᐃᓂᐅᔪᒥᑦ ᐊᑦᑕᕐᓇᖅᑐᖃᙱᓐᓂᕐᒧᑦ ᐃᓕᑕᕆᔭᐅᔾᔪᑎᒥᑦ

ᐅᐱᒋᔭᐅᔪᖅ ᐊᑦᑕᕐᓇᙱᓛᖑᔪᓂᒃ ᓴᕕᖕᓄᑦ ᐅᔭᕋᒃᑕᕆᐊᖑᓂᖓᓄᑦ ᐳᕆᐊᕆ (Prairie) ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓂᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ

ᓯᕗᓪᓕᖅᐹᑦᑎᐊᖑᔪᒥᑦ, ᐃᓚᒋᔭᐅᔪᖅ ᐊᒡᓃᑯᒃᑯᑦ ᓄᓇᕗᒻᒥᑦ ᐊᐅᓛᖅᑎᑦᑎᓂᖓᓐᓄᑦ ᓵᓚᒃᓴᖅᑐᖅ ᐅᔭᕋᒃᑕᕆᐊᓕᕆᔨᓄᑦ ᐱᐅᓛᒥᒃ ᐃᓕᑕᕆᔭᐅᔾᔪᑎᒥᒃ ᐊᑦᑕᕐᓇᖅᑐᖃᙱᑎᑦᑎᖃᑦᑕᕐᓂᖏᓐᓄᑦ.

ᓄᕐᕋᐃᑦ 1-ᒥᑦ ᐅᔭᕋᒃᑕᕆᐊᓕᕆᓂᕐᒥᑦ ᐱᓕᕆᐊᓕᒃᑯᓐᓂᑦ, ᓴᕕᓕᕆᔨᒃᑯᑦ ᐊᒻᒪᓗ ᐅᖅᓱᐊᓗᓕᕆᔨᒃᑯᑦ 2023-ᒥᑦ ᑲᑎᒪᑎᑦᑎᓂᖓᓐᓂᑦ ᒪᓐᑐᕆᔮᓪᒥᑦ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᔮᓐ ᕋᐃᔭᓐ (John T. Ryan) ᐃᓂᐅᔪᒥᑦ ᐊᑦᑕᕐᓇᖅᑐᖃᙱᓐᓂᕐᒧᑦ ᓇᓗᓇᐃᒃᑯᑕᖅᑖᓚᐅᖅᑐᑦ ᓴᕕᓕᕆᓂᕐᒥᒃ ᐅᔭᕋᒃᑕᕆᐊᕐᒥᑦ ᐃᓂᓕᐅᖅᑐᓯᒪᔪᒥᑦ ᐊᑦᑎᓛᖑᓂᖏᓐᓄᑦ ᐅᖃᐅᓯᐅᔭᕆᐊᓕᖕᓄᑦ ᐋᓐᓂᖅᑐᑦ ᖃᑉᓰᖅᑕᖃᑦᑕᕐᓂᖏᓐᓄᑦ[1] ᐳᕆᐊᕆ (Prairie) ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓂᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ 2022-ᒥᑦ.

“ᓯᕗᓪᓕᖅᐹᖅ ᓵᓚᒃᓴᕈᓯᐊᖅ ᐱᒻᒪᕆᐅᔪᒥᒃ ᑎᑭᐅᑎᑎᑦᑎᔪᖅ ᓄᓇᕗᒻᒧᑦ ᐊᒻᒪᓗ ᑕᓯᕐᔪᐊᕐᒧᑦ,” ᐅᖃᖅᑐᖅ ᑦᓵᕈᓪᔅ-ᐋᓐᑐᕇ ᓛᖓᕕᓐ (Charles-André Langevin), ᑕᓯᕐᔪᐊᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᓐᓂᕐᒧᑦ ᐊᖓᔪᖅᖄᖓᑦ. “ᐃᓕᑕᕆᔭᐅᓂᖅ ᖃᐅᔨᑎᑦᑎᔪᖅ ᐊᒃᓱᕈᖅᖢᑎᒃ ᐱᓕᕆᓯᒪᓂᖏᓐᓄᑦ ᐊᒻᒪᓗ ᐅᔭᕋᒃᑕᕆᐊᕐᒦᑦᑐᓗᒃᑖᑦ ᐃᓄᐃᑦ ᐱᓕᕆᐊᒥᖕᓂᑦ ᑲᒪᓂᖏᓐᓄᑦ ᐃᑲᔪᐃᓂᖃᖅᑐᑦ ᐊᑦᑕᕐᓇᖅᑐᖃᙱᑎᑦᑎᓂᕐᒥᒃ ᐱᓕᕆᕝᕕᖕᒥᑦ ᐱᖓᓱᐃᑦ ᐅᑭᐅᑦᐊᓂᒍᖅᓯᒪᓕᖅᑐᓂᑦ ᐅᑉᓗᒥᒧᑦ ᑎᑭᖦᖢᒍ. ᖁᕕᐊᓲᑎᖃᕐᓂᐅᔪᖅ ᐱᓕᕆᓯᒪᔪᑦ ᐊᑕᐅᑦᑎᒃᑯᑦ ᐅᓗᕆᐊᓇᖅᑐᖃᙱᑎᑦᑎᓂᐊᕐᓗᑎᒃ ᐊᒻᒪᓗ ᖃᓄᐃᖏᑦᑎᐊᖅᑐᒥᒃ ᐱᓕᕆᕝᕕᖃᖅᑎᓪᓗᒋᑦ ᑭᑐᓗᒃᑖᑦ.”

ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒧᑦ ᓱᓇᑐᐃᓐᓇᓄᑦ ᐊᐅᓚᑦᑎᔨ, ᔮᓐ-ᑲᓛᑦ ᐱᓚᐃᔅ (Jean-Claude Blais) ᐅᖃᖅᑐᖅ: “ᐊᖏᔪᒥᒃ ᓴᕆᒪᓱᒃᑐᑦ ᑕᓯᕐᔪᐊᕐᒥᑦ ᐱᓕᕆᔩᑦ ᐱᖕᒪᔾᔪᒃ ᐃᓕᑕᕆᔭᐅᔾᔪᑎ. ᓯᕗᓪᓕᖅᐸᐅᑎᓯᒪᐃᓐᓇᖃᑦᑕᖅᑕᕗᑦ ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᐊᑦᑕᕐᓇᖅᑐᖃᙱᓐᓂᖅ ᐅᖃᓪᓗᕆᒃᓴᐅᑎᓂᓗᒃᑖᑉᑎᓐᓂᑦ ᐊᒻᒪᓗ ᐃᓱᒪᓕᐅᕆᓂᑉᑎᖕᓂᑦ, ᑐᕌᒐᖃᖅᖢᑕ ᑭᑐᓗᒃᑖᑦ ᐊᖏᕐᕋᕐᓂᐊᕐᓗᑎᒃ ᖃᓄᐃᖏᓪᓗᑎᒃ ᐃᓱᓕᒃᑳᖓᑕ ᑭᐳᒃᑕᐅᑎᑉᓗᑎᒃ ᐱᓕᕆᓂᖏᑦ. ᐃᓕᑕᕆᔭᐅᓂᖅ ᐱᒋᐊᓵᕐᓂᕐᒦᖏᓐᓇᖅᑐᖅ ᐊᑯᓂᐅᔪᒥᑦ ᐅᕐᓂᒃᑕᑉᑎᖕᓄᑦ ᓴᙱᒃᑎᒋᐊᖅᓯᓂᖅ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐱᖅᖁᓯᕐᒧᑦ ᐊᒻᒪᓗ ᐱᖅᖁᓯᕆᔭᐅᔪᓄᑦ.”

ᑎᕆᒡᓗᐃᑦ-ᒥᑦ, ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐱᓕᕆᔩᑦ ᓴᖅᕿᑦᑎᓚᐅᖅᑐᑦ ᑐᓗᖅᑐᓂᒃ ᐱᑕᖃᖅᑕᐃᓕᑎᑦᑎᓂᕐᒧᑦ ᒥᒃᖠᒋᐊᖅᑎᓐᓂᐊᕐᓗᒍ ᑐᓗᖅᑐᖃᑐᐃᓐᓇᕆᐊᖃᕐᓂᖅ ᐅᔭᕋᒃᑕᕆᐊᕐᒥᑦ – ᖁᓛᓂᑦ ᐊᒻᒪᓗ ᐃᓗᐊᓂᑦ ᓄᓇᐅᑉ, ᐊᒻᒪᓗ ᐱᓕᕆᔨᓄᑦ ᐊᒻᒪᓗ ᑳᓐᑐᕌᒃᖃᖅᑐᓄᑦ ᐱᓕᕆᔪᑦ ᐅᔭᕋᒃᑕᕆᐊᕐᒥᑦ. ᐊᑐᖅᖢᒍ ᐱᓕᕆᐊᖅ, ᐊᕕᒃᑐᖅᓯᒪᔪᓗᒃᑖᑦ, ᐃᓚᐅᑉᓗᑎᒃ ᓄᓇᐅᑉ ᐃᓗᐊᓂᑦ ᐊᒻᒪᓗ ᓄᓇᒥᑦ ᐅᒃᑯᐃᖓᔪᓂᑦ ᐅᔭᕋᒃᑕᕐᓃᑦ, ᐆᒻᒪᖅᖁᑎᓕᕆᔨᒃᑯᑦ ᐊᒻᒪᓗ ᐱᖁᑎᓂᒃ, ᐊᔪᕈᖕᓃᖅᓴᐃᓂᖅ, ᐊᒻᒪᓗ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᑦ, ᐱᓕᕆᖃᑎᒌᖕᓂᐊᖅᑐᑦ ᐱᐅᓯᒋᐊᕐᓂᐊᕐᓗᒍ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᓐᓂᕐᒧᑦ ᐱᖅᖁᓯᕆᔭᐅᔪᑦ ᐱᓕᕆᑎᓪᓗᒋᑦ ᐱᓕᕆᔩᑦ.

“ᐱᓕᕆᐊᖃᕐᓂᖅ ᑕᑯᒃᓴᐅᑎᑦᑎᖕᒥᔪᖅ ᖃᓄᐃᓕᐅᕈᑕᐅᔪᓂᒃ ᐱᐅᓯᒋᐊᖅᓯᓂᖃᐃᓐᓇᕐᓂᑉᑎᖕᓄᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ ᐊᒻᒪᓗ ᐊᑦᑕᕐᓇᖅᑐᖃᙱᑎᓪᓗᒋᑦ ᐱᓕᕆᔨᒋᔭᕗᑦ. ᐱᐅᓯᑎᑦᑎᖕᒥᔪᑦ ᐱᓕᕆᔩᑦ ᐱᓕᕆᐊᖃᖃᑦᑕᐅᑎᓪᓗᒋᑦ ᓴᖅᕿᑎᑕᐅᓂᖓ ᐱᓕᕆᐊᖑᔪᖅ,” ᐅᖃᒃᑲᓐᓂᖅᖢᓂ ᔮᓐ-ᑲᓛᑦ ᐱᓚᐃᔅ (Jean-Claude Blais).

ᐃᓕᑕᕆᔭᐅᑎᒃᑲᓐᓂᕐᓂᐊᕐᓗᒍ ᐃᑲᔪᐃᓂᖏᑦ ᐱᓕᕆᔨᓗᒃᑖᑦ ᑕᒪᑐᒧᖓ ᑎᑭᐅᑎᔭᐅᔪᒧᑦ, ᔮᓐ ᕋᐃᔭᓐ (John T. Ryan) ᐃᓂᐅᔪᒥᑦ ᐊᑦᑕᕐᓇᖅᑐᖃᙱᓐᓂᕐᒧᑦ ᓇᓗᓇᐃᒃᑯᑕᖅ ᑕᓯᕐᔪᐊᕐᒧᙵᐅᑎᔭᐅᓂᐊᖅᑐᖅ ᐱᓕᕆᔩᑦ ᐊᒻᒪᓗ ᑳᓐᑐᕌᒃᖃᖅᑐᑦ ᐃᓕᑕᕆᔭᐅᔾᔪᑎᒥᑦ ᑕᑯᒃᓴᐅᓗᑎᒃ ᐊᔾᔨᓕᐅᕆᔪᖕᓇᕐᓂᐊᕐᒪᑕ.

ᖁᕕᐊᒋᕙᕗᑦ ᑕᓯᕐᔪᐊᕐᒥᑦ ᐱᓕᕆᔩᑦ!

 

[1] 200,000-ᓂᒃ ᐃᑲᕐᕋᑕᒫᑦ ᐱᓕᕆᑎᓪᓗᒋᑦ. ᐅᖃᐅᓯᐅᔭᕆᐊᖃᖅᑐᑦ ᐋᓐᓂᖅᑕᖃᕐᓂᖓᓄᑦ ᐃᖢᐊᖅᓴᖅᑕᐅᔭᕆᐊᖃᖅᖢᑎᒃ ᐱᓕᕆᔨᒥᒃ ᐋᓐᓂᖅᓯᒪᓂᖓᓄᑦ ᐊᔪᖅᖢᓂ ᐱᓕᕆᐊᒥᓄᑦ ᐅᑎᕐᓂᖅ ᖃᐅᑎᓪᓗᒍ, ᐅᕝᕙᓘᓐᓃᑦ ᓇᓕᑐᐃᓐᓇᖏᓐᓂᑦ ᐅᑉᓗᓗᒃᑖᕐᒥᑦ ᑭᖑᓂᐊᒍᑦ ᐅᑉᓗᕐᒥᑦ ᐋᓐᓂᕐᒪᑦ.