ᐊᒡᓃᑯᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᔫᓇ ᐊᒥᑦᓈᖅ ᐃᓕᓐᓂᐊᕐᕕᖕᒥᑦ 8-ᒋᔭᖓᓂᑦ ᐱᓕᕆᐊᓂᒃ ᖃᐅᔨᒪᓕᖅᑎᑦᑎᓂᖅ, ᐊᔪᙱᓐᓃᑦ ᐊᒻᒪᓗ ᖃᐅᔨᒪᓂᖃᕐᓂᖅ-ᒧᑦ (TASK) ᐱᓇᓱᐊᕈᓯᕐᒥᑦ

8-ᒋᓕᖅᑕᖓᓂᑦ ᐅᑭᐅᒥᑦ, ᐊᒡᓃᑯᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᔫᓇ ᐊᒥᑦᓈᖅ ᐃᓕᓐᓂᐊᕐᕕᖕᒥᑦ ᐃᑲᔪᕐᓂᐊᕐᓗᑎᒃ ᐊᕐᕌᒍᑕᒫᒃᑯᑦ ᐱᓕᕆᐊᓂᒃ ᖃᐅᔨᒪᓕᖅᑎᑦᑎᓂᖅ, ᐊᔪᙱᓐᓃᑦ ᐊᒻᒪᓗ ᖃᐅᔨᒪᓂᖃᕐᓂᖅ-ᒧᑦ (TASK) ᐱᓇᓱᐊᕈᓯᕐᒥᑦ ᖃᒪᓂᑦᑐᐊᕐᒥᑦ.

ᓄᕐᕋᐃᑦ 15-ᒥᑦ 19-ᒧᑦ, 75 ᐃᓕᓐᓂᐊᖅᑏᑦ ᖁᑦᑎᖕᓂᓕᖕᓂᑦ 10-ᒥᑦ 12-ᒧᑦ ᐱᓕᕆᐊᖃᕈᖕᓇᓚᐅᖅᑐᑦ ᐃᓕᓐᓂᐊᖅᖢᑎᒃ ᐱᓕᕆᐊᖅᑖᕆᔪᒪᔭᖏᓐᓂᑦ. ᐅᑭᐅᖑᔪᖅ ᐱᓕᕆᐊᓂᑦ ᐃᓚᐅᔪᑦ ᓂᐱᐅᓯᖅᑐᐃᔨ, ᐃᑯᒪᓕᕆᔩᑦ, ᓴᕕᒐᐅᔭᓕᕆᔩᑦ, ᕿᔪᓕᕆᔩᑦ, ᐃᒐᔩᑦ, ᒥᖅᓱᖅᑎᐅᓂᖅ, ᐊᒻᒪᓗ ᓄᔭᓕᕆᓂᖅ.

ᑐᕋᒐᕆᔭᖓ TASK ᐃᓕᓐᓂᐊᖅᑎᓂᒃ ᐃᓱᒪᒃᓴᖅᓯᐅᕈᑎᖃᕈᖕᓇᕐᓂᐊᕐᓗᑎᒃ ᖃᓄᐃᓕᐅᕈᒪᓂᖏᓐᓂᒃ ᐃᓕᓐᓂᐊᕌᓂᒃᐸᑕ ᐊᒻᒪᓗ ᓴᙱᒃᑎᑎᓪᓗᒋᑦ ᐊᑐᕈᖕᓇᖅᑕᖏᓐᓂᒃ ᐊᒻᒪᓗ ᐱᕝᕕᐅᖃᑦᑕᖅᑐᓂᒃ ᑎᑭᐅᑎᓂᐊᕐᓗᑎᒃ ᑐᕌᒐᕆᔭᖏᓐᓄᑦ. ᐱᓕᕆᐊᑦ ᐆᒃᑐᖃᑦᑕᖅᑕᖏᑦ TASK-ᒥᑦ ᐱᓇᓱᐊᕈᓯᖃᖅᑎᓪᓗᒍ ᑕᑯᑎᑦᑎᖃᑦᑕᖅᑐᑦ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᖕᓇᖅᑐᓂᒃ ᐊᒻᒪᓗ ᓇᖕᒥᓂᕐᒧᑦ ᐃᓱᒪᖅᓱᕐᓗᑎᒃ ᐃᓱᒪᒋᓇᔭᓚᐅᖏᑕᒃᓴᕆᔭᖏᓐᓂᑦ.

ᓯᕗᓕᐅᖅᑎᐅᑉᓗᑎᒃ ᐅᔭᕋᒃᑕᕆᐊᓕᕆᓂᕐᒥᑦ, ᐊᒡᓃᑯᒃᑯᑦ ᑐᓂᓯᖃᑦᑕᖅᑐᑦ ᐊᒥᓱᓂᒃ ᐱᓕᕆᐊᒃᓴᓄᑦ ᐱᕕᖃᖅᑎᑦᑎᓂᕐᓂᒃ ᐊᔪᙱᓐᓂᖃᖅᑐᑦ ᐱᓕᕆᐊᓂᒃ ᐅᑯᓄᖓ ᓯᖃᓪᓕᑎᕆᔩᑦ, ᓂᐱᐅᓯᖅᑐᐃᔩᑦ, ᓱᑉᓗᓕᕆᔩᑦ, ᕿᔪᓕᕆᔩᑦ, ᐃᒐᔨᓄᑦ ᐊᒻᒪᓗ ᓴᕕᒐᐅᔭᓕᕆᔨᓄᑦ. ᑐᕌᒐᕆᔭᕗᑦ ᓂᕈᐊᖅᑕᐅᔪᖕᓇᕐᓗᑕ, ᐊᒡᓃᑯᒃᑯᑦ ᐱᕕᖃᖅᑎᑦᑎᓂᐊᖅᑐᑦ ᓄᓇᓕᖕᓂᑦ ᖃᓂᑖᓃᑦᑐᓂᒃ ᐊᐅᓛᖅᑎᑦᑎᕝᕕᒋᔭᖏᓐᓂᑦ. TASK ᐱᓇᓱᐊᕈᓯᖅ ᐃᓕᓐᓂᐊᖅᑎᓂᒃ ᐱᕕᖃᖅᑎᑦᑎᖃᑦᑕᖅᑐᖅ ᖃᐅᔨᓂᐊᕐᓗᑎᒃ ᐱᓕᕆᐊᖅ ᐊᓕᐊᓇᐃᒋᔭᖓᓐᓂᒃ. ᐱᓕᕆᐊᖅ ᐊᓕᐊᓇᐃᒋᔭᖓᑦ ᐱᒋᐊᖅᑎᑦᑎᒃᐸᑦ ᐱᓕᕆᐊᖅᑖᕆᔪᒪᔭᖓᓄᑦ ᐊᒻᒪᓗ ᓇᓕᑐᐃᓐᓇᖏᓐᓂᑦ ᓄᓇᕗᒻᒥ ᐊᐅᓛᖅᑎᑦᑎᕝᕕᒋᔭᑉᑎᖕᓂᑦ ᐱᓕᕆᓗᑎᒃ, ᐅᕝᕙᓘᓐᓃᑦ ᐊᓯᐊᓄᙵᐅᒐᓗᐊᖅᐸᑕ, ᑕᐃᒪᑐᖅ ᐃᑲᔪᕐᓂᐊᖅᐳᖅ ᓇᖕᒥᓂᖅ ᐱᔪᒪᓂᕆᔭᖏᓐᓄᑦ ᓄᓇᓕᖏᓐᓂᑦ.

ᑕᐃᕕᑎ ᐋᐳᓪᐸᒻ (David Applebaum), ᐃᓕᓐᓂᐊᖅᑎᑦᑎᔨ ᔫᓇ ᐊᒥᑦᓈᖅ-ᒥᑦ, ᐱᐅᒋᑉᓗᓂᐅᒃ ᐃᓕᓐᓂᐊᖅᑎᓐᓄᑦ ᐊᒃᑐᖅᓯᓯᒪᓂᖓ TASK ᐱᓇᓱᐊᕈᓯᖅ ᐅᖃᓪᓚᓚᐅᖅᑐᖅ.

“ᐃᓕᓐᓂᐊᖅᑏᑦ ᓇᒧᙵᐅᑲᑕᖃᑦᑕᖅᑑᒐᓗᐊᑦ ᐃᓕᓐᓂᐊᕐᕕᖕᒧᐊᕈᑎᒃ ᐃᓕᓐᓂᐊᕐᕕᖕᒧᐊᖅᓵᓕᖃᑦᑕᖅᑐᑦ ᐱᓇᓱᐊᕈᓯᖃᖅᑎᓪᓗᒋᑦ. ᐃᓕᓐᓂᐊᖅᑏᑦ ᑐᐸᒃᓯᒪᓇᓱᖃᑦᑕᖅᑐᑦ ᐃᓕᓐᓂᐊᖅᑎᓪᓗᒋᑦ ᑐᑭᓯᔪᒪᓂᖃᑦᑎᐊᓕᖅᖢᑎᒃ ᐊᒻᒪᓗ ᐃᓕᑦᑎᔪᒪᑦᑎᐊᖅᖢᑎᒃ. ᐃᓕᓐᓂᐊᖅᑏᑦ ᐅᑉᓗᕐᒥᑦ ᐃᓱᓕᖁᔨᖃᑦᑕᙱᑦᑐᑦ ᐅᑉᓗᐃᑦ ᐃᓱᓕᒃᑳᖓᑕ”.

ᐃᓕᓐᓂᐊᖅᑎᑕᐅᓂᖏᑦ ᐃᑲᔪᕐᓂᖃᑐᐃᓐᓇᖏᑦᑐᖅ ᐱᓂᖏᓐᓄᑦ ᐊᒻᒪᓗ ᐃᓚᐅᖃᑕᐅᔪᖕᓇᕐᓂᖏᓐᓄᑦ, ᑭᓯᐊᓂᑦᑕᐅᖅ ᑐᓂᓯᖕᒥᔪᖅ ᐃᓕᓐᓂᐊᖅᑎᓂᒃ ᖃᓄᖅ ᑕᐅᑦᑐᖃᕐᒪᖔᑦ ᓯᕗᓂᒃᓴᖓᑦ. “ᐃᓕᓐᓂᐊᖅᑏᑦ ᐃᓕᑦᑎᑐᐃᓐᓇᙱᑦᑐᑦ ᐊᑕᐅᓯᕐᒥᒃ ᐱᓕᕆᐊᒃᓴᒥᑦ ᐃᓚᐅᖃᑕᐅᕝᕕᒋᔭᖏᓐᓂᑦ, ᑭᓯᐊᓂ ᐃᓕᑦᑎᑉᓗᑎᒃᑕᐅᖅ ᐅᔭᕋᒃᑕᕆᐊᕐᒦᖃᑕᐅᓂᖏᑦᑕ ᒥᒃᓵᓄᑦ ᐊᒻᒪᓗ ᐱᒻᒪᕆᐅᓂᖓᑕ ᐱᑦᑕᐅᔫᓗᓂ ᐱᓕᕆᓗᓂ ᑕᐃᑲᓂ ᐱᓕᕆᐊᒃᓴᖅᑖᕐᓂᐊᕐᓗᓂ. ᑕᑯᓚᐅᖅᑐᖓ ᐃᓕᓐᓂᐊᖅᑎᓂᒃ ᓂᐸᐃᒐᔪᒃᑐᓂᒃ ᐊᒻᒪᓗ ᐃᓚᐅᖃᑕᐅᓂᖃᓗᐊᖏᒥᐊᕐᓗᑎᒃ, ᐊᐱᖅᓱᖅᑐᓂᒃ ᐊᒻᒪᓗ ᓄᑖᓂᒃ ᐆᒃᑐᖃᑦᑕᖅᑐᓂᒃ,” ᑕᐃᕕᑎ ᐅᖃᒃᑲᓐᓂᖅᑐᖅ.

ᖃᒪᓂᑦᑐᐊᕐᒥᐅᑕᐅᑉᓗᖓ, ᑐᕆᐊᓐᑦ ᑐᑐ (Trent Tootoo), ᐃᑯᒪᓕᕆᔨ ᐊᒡᓃᑯᒃᑯᓐᓄᑦ ᐊᐳᖅᑎᓐᓈᖅᑐᒥᑦ ᐃᓚᒋᔭᐅᖃᑕᐅᓚᐅᖅᑐᖅ TASK ᐱᓇᓱᐊᕈᓯᕐᒥᑦ ᐃᓕᓐᓂᐊᖅᑎᑦᑎᔨᓄᑦ ᐊᒻᒪᓗ ᐆᒃᑑᑕᐅᑉᓗᓂ ᐃᓕᓐᓂᐊᖅᑏᑦ ᓱᓇᒥᒃ ᐱᔪᒪᓂᖃᕋᔭᕐᓂᖏᓐᓄᑦ. ᐊᓯᖏᑎᑐᑦ ᐃᓕᓐᓂᐊᖅᑎᑦᑎᔨᐅᔪᓂᑦ ᐊᒡᓃᑯᒃᑯᓐᓂᑦ, ᐊᑐᖅᑕᖓ TASK ᐱᓇᓱᐊᕈᓯᕐᒥᑦ ᐱᑦᑕᐅᑦᑎᐊᕐᓂᕋᓚᐅᖅᑐᖓ.

“ᖁᕕᐊᒋᓚᐅᖅᑕᕋ ᐱᓕᕆᖃᑎᒋᑉᓗᒋᑦ ᐃᓕᓐᓂᐊᖅᑏᑦ ᑐᓵᑦᑎᐊᖃᑦᑕᓚᐅᖅᑐᑦ ᐊᒻᒪᓗ ᐃᓚᐅᖃᑕᐅᑉᓗᑎᒃ ᐱᓇᓱᐊᕈᓯᓗᒃᑖᒥᑦ. ᐊᓕᐊᓇᐃᓚᐅᖅᑐᖅ ᐱᓇᓱᐊᕈᓯᓗᒃᑖᒥᑦ ᐃᑲᔪᖃᑦᑕᖅᖢᒋᑦ ᐃᓕᓐᓂᐊᖅᑎᓪᓗᒋᑦ ᐃᑯᒪᓕᕆᓂᕐᓂᑦ ᐊᓯᖏᓐᓂᓪᓗ ᐃᓅᓯᓗᒃᑖᒥᑦ ᐃᓕᑦᑎᔾᔪᑕᐅᔪᓂᒃ,” ᐅᖃᖅᑐᖅ ᑐᕆᐊᓐᑦ ᑐᑐ.

ᐊᒡᓃᑯᒃᑯᑦ ᑲᒪᔭᖃᓚᐅᖅᑐᑦ 7-ᓂᒃ ᐱᓕᕆᐊᒃᓴᓂᒃ ᑐᓂᔭᐅᓯᒪᔪᑦ ᐅᑭᐅᖑᔪᖅ: ᓂᐱᐅᓯᖅᑐᐃᔨ, ᐃᑯᒪᓕᕆᔨ, ᓴᕕᒐᐅᔭᓕᕆᔨ, ᐊᒻᒪᓗ ᐃᒐᔨᐅᓂᕐᒧᑦ.

ᐃᑯᒪᓕᕆᔨᐅᓂᕐᒧᑦ ᐃᓕᓐᓂᐊᖅᑎᑦᑎᓚᐅᖅᑐᑦ ᑎᕙᓐ ᕿᓪᓗᓛᖅ ᐊᒻᒪᓗ ᑐᕆᐊᓐᑦ ᑐᑐ, ᐃᓕᓐᓂᐊᖅᑎᑦᑎᔩᑦ ᐊᒡᓃᑯᒃᑯᓐᓂᙶᖅᑐᑦ ᐱᓕᕆᒋᖃᖅᖢᑎᒃ ᒪᐃᒃ ᓄᑲᑉᐱᐊᕐᒥᒃ ᐲᑕ ᐊᒡᔭᖅᑐᐃᔨᒃᑯᓐᓂᑦ, ᑕᒪᕐᒥᓗᒃᑖᖅ ᖃᒪᓂᑦᑐᐊᕐᒥᐅᑕᐅᔪᑦ.

ᐊᓯᖏᑦ ᐃᓕᓐᓂᐊᖅᑎᑦᑎᔩᑦ ᐊᒡᓃᑯᒃᑯᓐᓂᙶᖅᑐᑦ ᐃᓚᐅᔪᑦ ᒪᐃᑯᓪ ᓅᐳᓪ ᐊᒻᒪᓗ ᔪᐊᑕᓐ ᕈᐊᓄᓪᑦ, ᐃᓕᓐᓂᐊᖅᑎᑦᑎᓚᐅᖅᑐᑦ ᓂᐱᐅᓯᖅᑐᐃᓂᕐᒥᒃ, ᐊᒻᒪᓗ ᔮᓐ-ᐹᓪ ᓚᑦᐅᐃᒃ, ᓴᕕᒐᐅᔭᓕᕆᓂᕐᒧᑦ.

ᑖᓂᐅᓪ ᑖᐸᑕᐃ, ᖁᑦᑎᖕᓂᓕᒃ 11-ᒥᑦ ᐃᓕᓐᓂᐊᖅᑎ ᐊᑎᓕᐅᓚᐅᖅᑐᖅ ᓂᐱᐅᓯᖅᑐᐃᓂᕐᒧᑦ, ᖁᕕᐊᒋᓚᐅᖅᑕᖓ ᐱᓇᓱᐊᕈᓯᕐᒥᑦ ᐃᓕᓐᓂᐊᖅᖢᓂ ᓄᑖᒥᒃ ᐊᔪᙱᓐᓂᐅᔪᓂᒃ. “ᐱᓇᓱᐊᕈᓯᖃᖅᑎᑦᑎᓂᖅ ᐃᓕᓐᓂᐊᖅᑎᓄᑦ ᓯᕗᓂᒃᓴᒧᑦ ᐱᒻᒪᕆᐅᑦᑎᐊᖅᑐᖅ,” ᐅᖃᖅᑐᖅ.

8-ᒋᓕᖅᑕᖓᓂᑦ ᐅᑭᐅᒥᑦ, ᐸᑐᕆᓯᐅ ᐃᒡᓖᓯᐊᔅ, ᐃᒐᔨᐅᔪᖅ ᐊᐳᖅᑎᓐᓈᖅᑐᒥᑦ ᐃᓕᓐᓂᐊᖅᑎᑦᑎᓚᐅᖅᑐᖅ ᐃᒐᓂᕐᒥᑦ. ᐃᓕᓐᓂᐊᖅᑎᑦᑎᓂᖓᒍᑦ, ᐃᓕᓐᓂᐊᖅᑏᑦ ᐃᓕᓐᓂᐊᓚᐅᖅᑐᑦ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓂᒃ ᐃᒐᓂᕐᒧᑦ ᐊᒻᒪᓗ ᐃᒐᔭᖏᑦ ᓂᖀᑦ ᐊᖏᕐᕋᐅᑎᔪᖕᓇᓚᐅᖅᑕᖏᑦ. ᐃᓱᐊᓂᑦ ᐱᓇᓱᐊᕈᓯᐅᑉ, ᐃᒐᓂᕐᒧᑦ ᐃᓕᓐᓂᐊᖅᑏᑦ ᓂᕐᖠᐅᓚᐅᖅᑐᑦ ᐊᒻᒪᓗ ᑐᓂᐅᖅᖃᐃᑉᓗᑎᒃ ᐅᒃᑯᐊᖅᐸᓪᓕᐊᓂᕐᒥᑦ ᐅᓐᓄᒃᑯᑦ ᓂᕆᑎᓪᓗᒋᑦ 150 ᖃᓂᑖᓂᑦ ᐃᓄᖕᓄᑦ ᑕᐃᑲᓃᑦᑐᓄᑦ.

ᖁᕕᐊᒋᕙᕗᑦ ᐃᓕᓐᓂᐊᖅᑏᑦ ᐃᓕᑕᕆᔭᐅᓚᐅᖅᑐᑦ ᐅᒃᑯᐊᖅᐸᓪᓕᐊᓂᕐᒧᑦ ᐅᓐᓄᒃᑯᑦ ᓂᕆᑎᓪᓗᒋᑦ ᐊᔾᔨᐅᖏᑦᑐᒥᒃ ᐃᓕᑕᕆᔭᐅᔾᔪᑎᑖᖅᖢᑎᒃ ᓂᕈᐊᖅᑕᖏᓐᓄᑦ ᐱᓕᕆᐊᕐᒧᑦ:

  • ᐋᒻᐳ ᑐᑲᓇᑦᓯᐊᖅ – ᓂᐱᐅᓯᖅᑐᐃᔨ
  • ᓯᑦᓂ ᑲᑕᓗᒃ – ᒥᖅᓱᖅᑎ
  • ᑖᓪᓗᒃ ᓂᐅᖅᑐᖅ – ᐃᑯᒪᓕᕆᔨ
  • ᓇᐃᕐᕉᖅ ᕿᓪᓗᓛᖅ – ᓄᔭᓕᕆᔨ
  • ᔨᐊᓯ ᔭᐃᒥᓯ ᐴᑭᓴᓐ – ᓴᕕᒐᐅᔭᓕᕆᔨ
  • ᑐᕆᒃᓯ ᖃᕐᓕᐊᖅᓴᖅ – ᕿᔪᓕᕆᔨ
  • ᑳᓯᑎ ᑭᓕᖑ – ᐃᒐᔨᐅᓂᕐᒧᑦ

ᐊᒻᒪᓗ ᐊᔾᔨᐅᖏᑦᑐᒃᑯᑦ ᐅᖃᐅᓯᕆᓗᒍ ᑭᒻᐳᓕ ᖁᐃᓇᖕᓇᖅ, ᔫᓇ ᐊᒥᑦᓈᖅ-ᒥᑦ ᐃᓕᓐᓂᐊᖅᑎ, TASK ᐱᓇᓱᐅᕈᓯᕐᒧᑦ ᓇᓗᓇᐃᒃᑯᑕᓕᐅᖅᑕᖓ ᓵᓚᒃᓴᓚᐅᖅᑐᖅ ᐊᒻᒪᓗ ᐃᓕᔭᐅᓯᒪᑉᓗᓂ ᐅᑭᐅᖑᔪᒥᑦ ᐊᑎᒋᒋᔭᐅᔪᓄᑦ.

“ᐊᔪᕐᓇᖅᑐᖅ ᐃᓕᓐᓂᐊᖅᑐᓄᑦ ᐃᖅᖃᐅᒪᓂᐊᕐᓗᒋᑦ ᓱᓇᓗᒃᑖᑦ ᐱᓕᕆᓂᕆᔭᖏᑦ ᐅᑭᐅᓗᒃᑖᕐᒥᑦ, ᐊᒻᒪᓗ ᐃᓚᖏᑦ ᐃᓕᓐᓂᐊᖅᑕᖏᑦ ᖁᕕᐊᓇᖅᑐᐊᓘᖏᖦᖢᑎᒃ, ᑭᓯᐊᓂ ᖃᐅᔨᒪᔪᖓ ᐃᓕᓐᓂᐊᖅᑏᑦ ᐃᖅᖃᐅᒪᓗᒃᑖᕐᓂᐊᕐᒪᒋᑦ ᐃᓕᓚᐅᖅᑕᖏᑦ TASK ᐱᓇᓱᐊᕈᓯᖃᖅᑎᓪᓗᒋᑦ,” ᐅᖃᖅᑐᖅ ᑕᐃᕕᑎ ᐋᐳᓪᐹᒻ.

ᐊᒡᓃᑯᒃᑯᑦ ᐃᑲᔪᕐᓂᐊᖅᑐᑦ ᓄᓇᓕᖕᓂᑦ ᐊᐅᓛᖅᑎᑦᑎᓂᖃᕐᕕᒋᔭᑉᑎᖕᓂᑦ, ᐊᒻᒪᓗ ᓴᕆᒪᓱᒃᑐᒍᑦ ᐱᔾᔪᔾᔨᓂᐊᕐᓗᑕ ᐃᓕᓐᓂᐊᕈᑎᓄᑦ ᐱᓕᕆᐊᒃᓴᓂᒃ ᑐᕌᖓᔪᑦ ᒪᒃᑯᒃᑐᓄᑦ ᐊᒻᒪᓗ ᐱᔪᒪᓕᖅᑎᑦᑎᓂᖃᕐᓂᐊᖅᐳᖅᑐᖅ ᑕᐃᒪ ᓯᕗᓂᒃᓴᒥᑦ ᓯᕗᓕᐅᖅᑎᒃᓴᕆᔭᑉᑎᖕᓄᑦ.

ᒪ’ᓈᖅᑕᕗᑦ ᑭᑐᓗᒃᑖᑦ ᐃᑲᔪᓚᐅᖅᑐᑦ ᐱᓇᓱᐊᕈᓯᖅ ᐱᐊᓂᑦᑎᐊᖅᓯᒪᓂᐊᕐᓗᓂ!

ᒪ’ᓇ ᐃᓕᓐᓂᐊᖅᑎᑦᑎᔨᓗᒃᑖᑦ ᐱᕕᖃᕈᖕᓇᓚᐅᕋᑉᓯ ᐱᓕᕆᐊᕆᔭᑉᓯ ᒥᒃᓵᓄᑦ, ᐊᒻᒪᓗ ᔫᓇ ᐊᒥᑦᓈᖅ ᐃᓕᓐᓂᐊᕐᕕᖕᒥᑦ ᐱᓕᕆᔨᐅᔪᓗᒃᑖᑦ ᐱᓂᐊᕐᓂᕆᔭᑉᓯᖕᓄᑦ ᐊᒻᒪᓗ ᐃᓂᖃᖅᑎᑦᑎᔪᖕᓇᓚᐅᕋᑉᓯ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒥᑦ ᑕᒪᑐᒧᙵ. ᒪ’ᓈᖅᑕᕗᑦ ᒪᕐᕉᒃ ᓄᓇᓕᖕᒥᑦ ᓇᖕᒥᓂᖅ ᐱᓕᕆᐊᖃᖅᑐᑦ, ᐲᑕ ᐊᒡᔭᖅᑐᐃᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐅᖅᓱᐊᓗᓕᕆᔨᒃᑯᑦ, ᐃᑲᔪᓚᐅᕐᒪᑕ ᑐᓂᓯᑉᓗᑎᒃ ᐱᕕᖃᕐᓂᕐᒥᒃ ᐊᒻᒪᓗ ᐊᑐᖅᑕᐅᔪᓂᒃ, ᕼᐋᒻᓚᒃᑯᓐᓄᑦ ᑐᓂᓯᓯᒪᓚᐅᖅᑐᑦ ᒥᑦᑕᕐᕕᖕᒥᑦ ᓄᓇᒃᑰᕈᑕᐅᓯᕝᕕᖕᒥᑦ, ᐊᒻᒪᓗ ᐊᒡᓃᑯᒃᑯᑦ ᐱᓕᕆᔨᖏᑦ ᐃᑲᔪᓚᐅᖅᑐᑦ ᐋᖅᕿᒃᑐᐃᑉᓗᑎᒃ ᐱᓇᓱᐊᕈᓯᕐᒥᒃ.

ᑭᖑᓪᓕᖅᐹᖅ, ᒪ’ᓈᕈᒪᔭᕗᑦ ᐃᓕᓐᓂᐊᖅᑏᑦ ᔫᓇ ᐊᒥᑦᓈᖅ-ᒥᑦ, ᐱᓇᓱᐊᕈᓯᐅᖅᖃᐅᔪᒥᑦ ᓂᕆᐅᒋᔭᐅᔪᖕᓇᖅᓯᑎᑦᑎᔪᑦ ᐅᑭᐅᑕᒫᒃᑯᑦ.