ᐃᓄᖕᓄᑦ ᐅᒃᑯᓯᒃᓴᐃᑦ ᓴᓇᙳᐊᖅᑕᐅᔪᑦ ᐱᔭᐅᔪᒪᓂᖅᓴᑦᑎᐊᖑᓕᖅᑐᑦ ᐅᑉᓗᒥᐅᔪᖅ, ᓄᓇᕐᔪᐊᕐᒥᑦ ᐱᔭᐅᔪᒪᓂᖏᑦ ᐱᕈᖅᐸᓪᓕᐊᑉᓗᓂ ᐃᓄᖕᓄᑦ ᓴᓇᙳᐊᖅᑕᐅᖃᑦᑕᖅᑐᑦ.

ᐱᔭᐅᔪᒪᓕᖅᐸᓪᓕᐊᑎᓪᓗᒋᑦ, ᐱᑦᑕᐅᔪᓂᑦ ᐅᒃᑯᓯᒃᓴᓂᑦ ᓴᓇᙳᐊᖅᑕᐅᔪᒃᓴᓂᑦ ᓇᓂᓯᓂᖅ ᐊᔪᕐᓇᖃᑦᑕᖅᑐᖅ, ᐱᔭᐅᔪᖕᓇᕐᓂᖏᓪᓗ ᐊᒻᒪᓗ ᐱᐊᓚᔪᒃᑯᑦ ᐱᔭᐅᖃᑦᑕᖅᖢᑎᒃ.

ᐊᒥᓱᓄᑦ ᐅᑭᐅᓄᑦ, ᓄᓇᕗᒻᒥ ᒐᕙᒪᒃᑯᑦ[1] ᐱᓕᕆᓯᒪᔪᑦ ᒪᓂᒪᓂᖏᑦ ᓄᓇᓕᖕᓄᑦ ᑭᕙᓪᓕᕐᒥᑦ ᐱᑕᐅᔪᑦ ᐅᒃᑯᓯᒃᓴᐃᑦ – ᐱᓗᐊᖅᑐᒥᑦ ᖃᒪᓂᑦᑐᐊᕐᒥᑦ, ᐃᓄᖕᓄᑦ ᓴᓇᔭᐅᓯᒪᔪᓂᑦ ᐱᑕᖃᐅᖅᑐᖅ ᐊᒻᒪᓗ ᐊᖏᕐᕋᕆᔭᐅᔪᖅ ᐊᒥᓱᓄᑦ ᓄᓇᕐᔪᐊᕐᒥᑦ ᖃᐅᔨᒪᔭᐅᔪᓂᑦ ᓴᓇᙳᐊᖅᑎᓄᑦ[2].

170 ᑭᓛᒥᑕᓪᓗᐊᓂᑦ ᐅᐊᖕᓇᖅᐸᓯᖓᓂᑦ ᐱᖓᖕᓇᖅᐸᓯᖓᓂᑦ ᐅᖓᓯᒃᑎᒋᔪᖅ ᖃᒪᓂᑦᑐᐊᕐᒥᑦ ᐊᒡᓃᑯᒃᑯᑦ ᐊᒪᕈᕐᒥᑦ ᐱᑕᓕᖓᑦ, ᐃᓚᒋᔭᐅᔪᖅ ᐊᐳᖅᑎᓐᓈᖅᑐᒥᑦ ᐅᔭᕋᑦᑕᕆᐊᑉᑎᖕᓄᑦ.  ᓄᓇᕗᒻᒥᐅᑕᐅᔪᖅ ᐅᔭᖅᑲᓕᕆᔨ, ᒪᐃᒃ ᐴᕆᒑᑦ, ᖃᐅᔨᒋᐊᕐᕕᒋᓂᐊᓵᖅᑎᓪᓗᒍ, ᐊᒪᕈᕐᒥᑦ ᐅᔭᖅᑲᓕᕆᔩᑦ ᐱᑕᓕᒃᑕᓖᑦ ᐱᑕᖃᕐᒪᖔᑕ, ᐱᓕᐅᕆᕙᓪᓕᐊᓕᓚᐅᖅᑐᖅ 2019-ᒥᑦ, ᐱᑦᑕᐅᔪᒥᒃ ᐅᒃᑯᓯᒃᓴᓂᒃ.

ᐊᒡᓃᑯᒃᑯᑦ ᐅᔭᖅᑲᓕᕆᔭᖓᑦ ᔪᕉᒻ ᓚᕗᐃ (Jérôme Lavoie)  ᐅᖃᖅᑐᖅ, “ᕿᓂᖅᓴᐃᓂᒃᑯᑦ, ᓇᓂᓯᓚᐅᖅᑐᒍᑦ ᐱᑦᑕᐅᔪᓂᒃ ᐅᒃᑯᓯᒃᓴᑲᓪᓚᖕᓂᑦ ᐊᒪᕈᕐᒥᑦ ᐱᑕᓕᐅᑉ ᖃᓂᑕᖓᓂᑦ.  ᐱᔭᐅᔪᖕᓇᓚᐅᖅᑐᑦ ᑕᒪᐃᓐᓂᑦ ᓄᓇᐅᑉ ᖄᖓᓂᑦ ᐊᒻᒪᓗ ᓄᓇᐅᑉ ᐃᓗᐊᓂᑦ ᐊᐅᓛᖅᑎᑕᐅᔪᓂᑦ.”

ᔪᕌᒻ (Jérôme) ᐊᒻᒪᓗ ᐱᓕᕆᖃᑎᒋᔭᖓ ᐃᐅᕆᒃ ᒫᓯᐅᓪ (Eric Marcil) ᐱᓕᕆᖃᑎᖃᓚᐅᖅᑐᑦ ᒪᐃᒃᒥᑦ ᖃᐅᔨᓂᐊᕐᓗᑎᒃ ᐊᒻᒪᓗ ᐆᒃᑐᕋᕐᓗᒋᑦ[3] ᐅᒃᑯᓯᒃᓴᐃᑦ ᐱᒋᔭᐅᔪᒥᑦ.  ᒪᕐᕉᒃ ᓴᓇᙳᐊᖅᑏᒃ – ᓴᓗᒨᓂ ᐳᑐᒍᖅ ᐊᒻᒪᓗ ᑕᐃᕕᑎ ᐊᕐᓇᓱᖔᖅ – ᐊᒪᕈᕐᒧᙵᐅᓚᐅᖅᑐᑦ ᖃᐅᔨᓴᕐᓂᐊᕐᓗᒋᑦ ᐅᔭᖅᑲᐃᑦ ᐱᑦᑕᐅᓂᖏᓐᓂᒃ, ᐃᓱᒪᒋᓚᐅᖅᑕᖏᑦ ᐱᑦᑕᐅᔫᖕᒪᑕ.

ᐊᑯᓪᓕᕈᕐᕕᒃ (ᐋᒋᓯ) 2020-ᒥᑦ, ᐊᒡᓃᑯᒃᑯᑦ ᑐᓂᓯᓚᐅᖅᑐᑦ ᐅᒃᑯᓯᒃᓴᒥᒃ ᐱᔭᐅᔪᓂᒃ ᓴᓗᒨᓂᒧᑦ ᐊᒻᒪᓗ ᑕᐃᕕᑎᑦᒧ ᐊᑐᕐᓂᐊᖅᑕᖏᓐᓂᒃ ᓴᓇᙳᐊᖃᑦᑕᕐᓂᖏᓐᓄᑦ ᐊᒻᒪᓗ ᑭᕙᓪᓕᕐᒥᑦ ᓴᓇᙳᐊᖅᑎᓂᒃ.

ᐳᔾᔫᑦ ᑯᓱᒐᖅ, ᐊᒡᓃᑯᒃᑯᑦ ᐊᖓᔪᖅᑳᖓᑦ ᓄᓇᕗᒻᒥᑦ ᑲᒪᓂᕐᓄᑦ ᐅᖃᖅᑐᖅ “ᐅᒃᑯᓯᒃᓴᖅ ᐃᓅᓯᖓᓐᓃᑦᑐᖅ ᐊᒥᓱᑦ ᐃᓄᐃᑦ ᓴᓇᙳᐊᖅᑎᒋᔭᑉᑎᖕᓄᑦ ᐊᒻᒪᓗ ᓄᓇᓕᑉᑎᖕᓄᑦ. ᑕᑯᑎᑕᐅᑉᓗᑕ ᓴᓇᙳᐊᖅᓯᒪᔪᒃᑯᑦ ᓯᕗᓕᕆᓚᐅᖅᑕᑉᑕ ᐃᓅᓯᕆᕙᓚᐅᖅᑕᖏᓐᓂᒃ – ᓴᓇᙳᐊᕈᑎᒋᔭᕗᑦ, ᐅᓂᑉᑳᖑᔪᑦ, ᓂᕐᔪᑏᑦ ᐊᒻᒪᓗ ᕿᑎᒃᑕᐅᖃᑦᑕᖅᑐᑦ – ᐃᓄᐃᑦ ᓴᓇᙳᐊᖅᑎᒋᔭᑉᑕ ᐆᒪᑎᑕᖓᑦ ᐱᓐᓂᑯᐃᑦ ᐊᒻᒪᓗ ᐱᖅᑯᓯᒃᑯᑦ ᐃᓅᓯᕆᔭᐅᕙᓚᐅᖅᑐᑦ ᐆᒪᑎᖦᖢᒋᑦ.”

ᓄᓇᓕᒃ ᐱᒃᑲᓐᓂᕈᒪᔪᖅ ᐊᒪᕈᕐᒥᑦ ᐅᒃᑯᓯᒃᓴᓂᒃ ᐱᖅᑯᓯᖓᓐᓂᒃ ᑐᓂᓯᓂᐊᕐᓗᑎᒃ ᐊᒻᒪᓗ ᓴᓇᙳᐊᕐᓂᕐᒥᒃ ᐊᔪᙱᓐᓂᕐᓂᒃ ᑭᖑᕚᕆᔭᐅᔪᓄᑦ. ᐅᒃᑯᓯᒃᓴᖅ ᐱᒻᒪᕆᐅᔪᒥᒃ ᓄᓇᕗᒻᒥ ᐃᓅᖃᑎᒌᓄᑦ ᐊᑐᕐᓂᖃᑐᐃᓐᓇᙱᑦᑐᖅ, ᑭᓯᐊᓂ ᐱᒻᒪᕆᐅᖕᒥᔪᖅᑕᐅᖅ ᓄᓇᓕᖕᒥᑦ ᐊᒻᒪᓗ ᓄᓇᕗᒻᒥᑦ ᐱᕈᖅᐸᓪᓕᐊᑎᑦᑎᓂᕐᒧᑦ. ᐱᑕᖃᙱᑎᓪᓗᒍ, ᐊᒥᓱᑦ ᓴᓇᙳᐊᖅᑏᑦ ᑮᓇᐅᔭᓕᐅᕐᓂᖅ ᐊᔪᕋᔭᖅᑐᑦ ᐊᒻᒪᓗ ᐃᑲᔪᕐᓗᒋᑦ ᖃᑕᙳᑎᖏᑦ.

ᐳᔾᔫᑦ ᐅᖃᒃᑲᓐᓂᖅᑐᖅ, “ᒐᕙᒪᒃᑯᑦ ᐅᕙᑉᑎᖕᓂᒃ ᖃᐅᔨᑎᑦᑎᖕᒪᑕ ᑕᒫᓂ ᐅᒃᑯᓯᒃᓴᐃᕈᑎᓕᕐᓂᖓᓄᑦ, ᐊᓯᐊᙳᖅᑎᑦᑎᔪᖕᓇᕐᓂᑉᑎᖕᓂᒃ ᑕᑯᓚᐅᖅᑐᒍᑦ – ᐃᑲᔪᕈᖕᓇᖅᑕᕗᑦ ᐊᒥᓱᑦ ᐃᓄᐃᑦ ᐃᓅᓯᖏᓐᓂᑦ ᐊᒻᒪᓗ ᐃᓅᖃᑎᒌᓂᑦ ᐊᒻᒪᓗ ᐱᕈᖅᐸᓪᓕᐊᓂᖃᕐᓂᕐᒧᑦ ᖃᓄᐃᖏᑦᑎᐊᕐᓂᖏᓐᓄᑦ ᓄᓇᓕᖕᓂᑦ.  ᑕᐃᒪᑐᖅ ᐱᑦᑕᐅᔪᒥᒃ ᓴᓇᙳᐊᒐᒃᓴᓂᒃ ᐅᔭᕋᐅᓂᐊᖅᐳᖅ ᑭᕙᓪᓕᕐᒥᑦ. ᐃᑲᔪᖅᑐᕈᒪᔭᕗᑦ ᓄᓇᓕᖕᒥᑦ ᓴᓇᙳᐊᖅᑏᑦ ᐅᓂᑉᑳᖁᑉᓗᒋᑦ, ᐱᖅᑯᓯᑐᖃᖏᓐᓂᑦ ᐊᒻᒪᓗ ᐱᖅᑯᓯᕆᔭᖏᓐᓂᒃ ᑲᓇᑕᒥᐅᑕᓄᑦ ᐊᒻᒪᓗ ᓄᓇᕐᔪᐊᕐᒧᑦ. ᑕᐃᒪᓐᓇ ᐅᕙᑉᑎᖕᓂᓗᒃᑖᖅ ᐃᓕᓐᓂᐊᖅᑎᑦᑎᔪᖕᓇᖅᑐᖅ ᐊᑯᓂᐊᓗᒃ ᐃᓅᓯᕆᓚᐅᖅᑕᖏᓐᓂᒃ ᐅᑭᐅᖅᑕᖅᑐᒥᑦ.

ᓴᓗᒨᓂ ᐳᑐᒍᖅ ᐊᒻᒪᓗ ᑕᐃᕕᑎ ᐊᕐᓇᓱᖔᖅ ᐃᖕᒥᖕᓂᒃ ᓂᕈᐊᓚᐅᖅᑐᑦ ᓇᖕᒥᓂᖅ ᐅᒃᑯᓯᒃᓴᓂᒃ ᐱᓂᐊᖅᑕᖏᓐᓂᑦ ᐊᒪᕈᕐᒧᙵᐅᓯᒪᑎᓪᓗᒋᑦ.  ᓴᓗᒨᓂ ᐳᑐᒍᖅ ᑭᙵᕐᒥᐅᑕᑐᖃᖅ ᐊᒻᒪᓗ ᖃᐅᔨᒪᔭᐅᑦᑎᐊᖅᑐᖅ ᓴᓇᙳᐊᖅᑎᐅᓂᖓᓄᑦ. ᑕᐃᕕᑎ ᐊᕐᓇᓱᖔᖅ ᖃᒪᓂᑦᑐᐊᕐᒥᐅᑕᐅᔪᖅ ᐊᒻᒪᓗ ᓴᓇᙳᐊᕐᓂᕐᒥᒃ ᐊᑖᑕᖓᓂᑦ ᐃᓕᑦᑎᓯᒪᔭᖓ, ᐹᓇᐸᓯ ᐊᕐᓇᓱᖔᖅ, ᓴᓇᙳᐊᖅᑕᖏᑦ ᐃᓕᑕᕆᔭᐅᓯᒪᑦᑎᐊᖅᑐᑦ ᓄᓇᕐᔪᐊᕐᒥᑦ.  ᓴᓇᙳᐊᖅᑏᑦ, ᓄᓇᕗᒻᒥᐅᑕᐅᔪᖅ ᐅᔭᖅᑲᓕᕆᔨ ᒪᐃᒃ ᐴᕆᒑᑦ (Mike Beauregard), ᐊᒻᒪᓗ ᐊᒪᕈᕐᒥᑦ ᐅᔭᖅᑲᓕᕆᔩᑦ ᐱᓕᕆᖃᑎᒌᓚᐅᖅᑐᑦ ᖃᐅᔨᓴᕐᓂᐊᕐᓗᒋᑦ ᐅᒃᑯᓯᒃᓴᐃᑦ ᐱᑦᑕᐅᓂᖏᑦ.

____________________

[1]ᐊᒻᒪᓗ ᐊᓯᖏᑦ ᐃᓂᑖᖅᑎᑕᐅᓯᒪᔪᑦ ᓄᓇᕗᒻᒥ ᐱᓕᕆᖃᑎᒌᑦ ᐃᓚᐅᑉᓗᑎᒃ ᑭᕙᓪᓕᕐᒥᑦ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᐆᒪᔪᓕᕆᔨᐊᓛᖑᔪᑦ, ᐊᒻᒪᓗ ᓄᓇᕗᒻᒥᑦ ᑐᙵᕕᒃᑯᑦ.

[2] ᖃᐅᔨᒪᔭᐅᑦᑎᐊᖅᑐᑦ ᖃᒪᓂᑦᑐᐊᕐᒥᑦ ᓴᓇᙳᐊᖅᑎᓂᑦ ᐃᓚᐅᔪᑦ ᔨᐊᓯ ᐆᓇᖅ, ᓴᐃᒪᓐ ᑐᑯᒻᒥᖅ ᐊᒻᒪᓗ ᒥᐅᕆᔭᓐ ᑑ’ᓗᖅ.

[3] ᐅᒃᑯᓯᒃᓴᖅ ᑐᑭᐅᔪᖅ ᐱᔭᖃᖅᑐᓂᒃ ᓴᓇᙳᐊᖅᑕᐅᔪᖕᓇᖅᑐᓂᒃ ᐃᓄᖕᓄᑦ ᓴᓇᙳᐊᖅᑎᓄᑦ – ᐃᓚᐅᑉᓗᑎᒃ steatite, serpentinite ᐊᒻᒪᓗ argillite – ᐱᑦᑕᐅᔪᓂᒃ ᐱᑕᖃᕈᖕᓇᖅᖢᑎᒃ ᐱᔾᔪᑎᖃᖅᑐᓂᒃ ᐊᔅᐸᔅᑐᔅ-ᒥᒃ (asbestos), ᓴᓇᙳᐊᖅᑎᓄᑦ ᐊᓐᓂᐊᖃᖅᑕᐃᓕᒪᓂᕐᒧᑦ ᐅᓗᕆᐊᓇᕐᓂᖅᑕᖃᕈᖕᓇᖅᑐᑦ, ᐊᓂᖅᓵᓗᐊᖅᑕᐃᓕᔭᕆᐊᖃᖅᑕᖓᑦ ᐅᓗᕆᐊᓇᖅᑐᓕᒃ ᐳᔪᖃᑖᓕᐊᖑᔪᖅ ᐃᑯᒪᓅᖅᑐᑦ ᓴᓇᕐᕈᑎᓄᑦ. ᑕᒪᓗᒃᑖᕐᓚᒃ ᓴᓇᙳᐊᖅᑏᑦ ᓯᓚᒥᑦ ᐱᓕᕆᖃᑦᑕᖅᑐᑦ, ᐅᑭᐅᖑᒐᓗᐊᖅᐸᓪᓘᓐᓃᑦ.