ᖁᕕᐅᓲᑎᒋᔭᐅᓂᖓ ᓄᓇᕐᔪᐊᕐᒥᑦ ᐊᕐᓇᐃᑦ ᐅᔭᕋᒃᑕᕆᐊᕐᒥᑦ ᐱᓕᕆᔪᑦ: ᑐᓴᕐᕕᒋᒃᑭᑦ ᑕᓪᓕᒪᐃᑦ ᐊᕐᓇᐃᑦ ᐱᓕᕆᔪᑦ ᐊᒡᓃᑯᒃᑯᑦ ᓄᓇᕗᒻᒥ ᐊᐅᓛᖅᑎᑦᑎᓂᕝᕕᒋᔭᖏᑦ ᐅᔭᕋᒃᑕᕆᐊᓂᑦ

ᒪᓐᓃᑦ 15-ᒥᑦ, ᑐᒡᓕᐊᓂᑦ ᐅᑭᐅᖑᓕᖅᑐᒥᑦ, ᐅᔭᕋᒃᑕᕆᐊᓕᕆᔩᑦ ᖁᕕᐊᓲᑎᖃᖅᑐᑦ ᐊᕐᓇᐃᑦ ᐃᓚᒋᔭᐅᓚᐅᖅᑐᓂᑦ, ᐃᓚᒋᔭᐅᔪᓂᑦ, ᐊᒻᒪᓗ ᐃᓚᒋᔭᐅᓂᐊᖅᑐᓂᑦ ᐅᔭᕋᒃᑕᕆᐊᕐᓂᑦ. ᐃᓚᒋᔭᐅᑉᓗᓂ ᓄᓇᕐᔪᐊᕐᒥᑦ ᐊᕐᓇᐃᑦ ᐅᔭᕋᒃᑕᕆᐊᓃᑦᑐᓄᑦ ᖁᕕᐊᓲᑎᒋᔭᐅᓂᖏᓐᓄᑦ ᐊᒻᒪᓗ ᓴᙱᒃᑎᒋᐊᒃᑲᓐᓂᕐᓗᒋᑦ ᐊᕐᓇᐃᑦ ᑐᓂᓯᔪᖕᓇᕐᓂᐊᕐᓗᑎᒃ ᐱᓕᕆᔪᒪᓂᕆᔭᖏᑦ ᐅᔭᕋᒃᑕᕆᐊᕐᒥᑦ, ᐊᐱᖅᓱᓚᐅᖅᑐᒍᑦ ᑕᓪᓕᒪᓂᑦ ᐊᕐᓇᓂᑦ ᐊᒡᓃᑯᒃᑯᑦ ᓄᓇᕗᒻᒥ ᐊᐅᓛᖅᑎᑦᑎᕝᕕᒋᔭᖏᓐᓂᑦ ᐊᒻᒪᓗ ᖁᕕᐊᓱᒃᑐᒍᑦ ᑐᓂᓯᔪᖕᓇᕋᑉᑕ ᑖᑉᑯᓂᙵᑦ ᐊᕐᓇᓂᒃ ᐱᔾᔪᑎᖃᖅᑐᓂᒃ ᐃᓕᖕᓄᑦ!

ᐊᕐᓇᐃᑦ ᐱᓕᕆᖃᑦᑕᖅᑐᑦ ᐊᔾᔨᒌᙱᑦᑐᓂᑦ ᐃᓂᒦᑦᑐᓂᒃ ᐊᒻᒪᓗ ᐱᓕᕆᐊᖏᓐᓄᑦ ᐃᓂᐅᔪᓂᑦ: ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ, ᐊᐳᖅᑎᓐᓈᖅᑐᒥᑦ, ᕼᐆᑉ ᐸᐃ-ᒥᑦ, ᓄᓇᕗᒻᒥ ᐱᔨᑦᑎᕋᐃᔨᒃᑯᑦ ᐊᒻᒪᓗ ᖃᒪᓂᑦᑐᐊᖅ.

ᐅᖃᓕᒫᒃᑭᑦ ᓱᓇᓄᑦ ᐱᔪᒪᓕᖅᑎᑕᐅᓯᒪᓂᖏᑦ ᐊᒻᒪᓗ ᐱᒋᐊᕈᒪᓂᕆᔭᖏᑦ ᐊᕐᓇᐃᑦ ᐱᓕᕆᐊᖏᓐᓂᑦ, ᐅᖃᐅᔾᔨᓂᖏᑦ ᐊᒻᒪᓗ ᐃᓱᒪᒋᔭᖏᑦ ᐱᔾᔪᑎᖃᖅᑐᑦ ᐊᕐᓇᐅᒐᓗᐊᖅᐸᑦ ᐊᖑᑕᐅᒐᓗᐊᖅᐸᑦ ᐃᓚᐅᑎᑕᐅᓂᖏᑦ ᐅᔭᕋᒃᑕᕆᐊᓕᕆᓂᕐᒧᑦ ᐅᑉᓗᒥᒧᑦ ᑎᑭᖦᖢᒍ.

 

ᒥᐊᕆ ᓲᓴᓐ ᑖᐸᑕᐃ, ᖃᒪᓂᑦᑐᐊᕐᒥᑦ ᓄᓇᓕᖕᒥᑦ ᑲᒪᔨᐅᔪᖅ

ᒥᐊᕆ ᓲᓴᓐ ᑖᐸᑕᐃ ᐱᓕᕆᐊᓕᒃ ᓄᓇᓕᖕᒥᑦ ᑲᒪᔨᐅᓂᕐᒧᑦ ᖃᒪᓂᑦᑐᐊᕐᒥᑦ, ᐃᓅᓯᓗᒃᑖᕐᒥᓂᑦ ᖃᒪᓂᑦᑐᐊᕐᒥᐅᑕᐅᔪᖅ. ᐱᓕᕆᐊᕐᒥᑦ, ᑕᐃᒪᙵᓂᑦ 2018-ᒥᑦ ᐱᓕᕆᐊᕆᓕᖅᑕᖓ, ᒥᐅᕆ ᓲᓴᓐ ᓯᕗᓪᓕᖅᐸᐅᑎᔭᐅᖃᑦᑕᖅᑐᖅ ᑕᑯᔭᐅᔪᓂᑦ ᐊᑯᓐᓂᖏᓐᓂᑦ ᐊᒡᓃᑯᒃᑯᑦ ᐊᐳᖅᑎᓐᓈᖅᑐᒥᑦ ᐊᐅᓛᖅᑎᑦᑎᓃᑦ ᐊᒻᒪᓗ ᖃᒪᓂᑦᑐᐊᕐᒥᐅᓄᑦ ᐊᐱᖅᖁᑎᒃᓴᖃᖅᑐᓄᑦ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᖅᑐᓄᑦ ᐊᔾᔨᒌᙱᑦᑑᑎᓄᑦ ᖃᐅᔨᒋᐊᖃᑦᑕᖅᑐᓄᑦ-ᒥᑦ ᐱᓕᕆᐊᓂᒃ ᐆᒃᑐᖅᑐᓄᑦ-ᒧᑦ. ᒥᐅᕆ ᓲᓴᓐ ᐊᐳᖅᑎᓐᓈᖅᑐᒥᑦ ᐱᓕᕆᒋᐊᓚᐅᖅᑐᖅ ᑕᐃᒪᙵᓂᑦ 2012-ᒥᑦ, ᓯᕗᓪᓕᖅᐹᒥᑦ ᓄᓇᓕᐊᓛᓕᕆᔨᒃᑯᓐᓂᑦ, ᑭᖑᓂᐊᒍᑦ ᐃᓄᖕᓄᑦ ᐱᒋᐊᖅᖢᓂ 2014-ᒥᑦ ᐃᓄᓕᕆᔨᐅᓂᕐᒧᑦ.

ᓱᓇ ᐱᐅᒋᓛᕆᕕᐅᒃ ᐱᓕᕆᐊᖕᓂᑦ?

“ᖁᕕᐊᒋᔭᕋ ᑲᒻᐸᓂᒧᑦ ᐱᓕᕆᑉᓗᓂ ᐊᒻᒪᓗ ᓄᑖᓂᒃ ᐱᓕᕆᔨᑖᖑᔪᓂᒃ ᑲᑎᓯᖃᑦᑕᖅᖢᓂ, ᑭᓯᐊᓂ ᖁᕕᐊᒋᓛᕆᔭᕋ ᐱᓕᕆᖃᑎᒋᔭᒃᑲ ᐃᓄᐃᑦ ᐊᕕᒃᑐᖅᓯᒪᔪᑉᑎᖕᓂᑦ ᐊᒻᒪᓗ ᐃᓕᑦᑎᒃᑲᓐᓂᕈᖕᓇᕐᓂᕋ ᓄᑖᓂᒃ ᓱᓇᑐᐃᓐᓇᓂᒃ ᐃᓚᒋᔭᐅᔪᓂᒃ ᐱᓕᕆᐊᒻᓄᑦ.”

ᒥᐅᕆ ᓲᓴᓐ ᖁᕕᐊᓱᐃᓐᓇᓲᖅ ᐊᒻᒪᓗ ᒪᓂᒪᐃᓐᓇᖃᑦᑕᖅᑐᖅ ᐊᓯᖏᓐᓂᑦ ᐃᑲᔪᕐᓂᐊᕐᓗᓂ ᐅᔭᕋᒃᑕᕆᐊᕐᒥᑦ ᐱᓕᕆᐊᖅᑖᕈᒪᔪᓂᒃ. ᐊᓯᖏᓐᓄᑦ ᐊᕐᓇᓄᑦ, ᐱᖃᓐᓈᕆᔭᐅᔪᓄᑦ, ᐊᒻᒪᓗ ᖃᑕᙳᑎᖏᓐᓄᑦ, ᒪᓂᒪᐃᓐᓇᖃᑦᑕᖅᑐᖅ ᐊᒥᐅᕆ ᓲᓴᓐ ᐃᑲᔪᕋᓱᖕᓂᐊᕐᓗᓂ ᐊᒻᒪᓗ ᖃᐅᔨᑎᓪᓗᑎᑦ ᑐᓴᕈᓂ ᓱᓇᑐᐃᓐᓇᐃᑦ ᐱᓕᕆᐊᒃᓴᐃᑦ ᐅᒃᑯᐃᖅᑐᓂᒃ ᐅᔭᕋᒃᑕᕆᐊᒥᑦ (ᐱᓗᐊᖅᑐᒥᑦ ᐊᒡᓃᑯᒃᑯᓐᓂᑦ) ᐱᓕᕆᐊᕆᔪᒪᓇᔭᕐᒪᖔᕐᓂ.

ᓯᓖᓐ ᐴᓯᔪᐊᕐ (Céline Beauséjour), ᓄᓇᒃᑰᕈᑎᕐᔪᐊᓂᒃ ᐊᖁᒃᑎ CMAC-ᑯᓐᓄᑦ ᑕᓯᕐᔪᐊᕐᒥᑦ

ᓯᓖᓐ ᐴᓯᔪᐊᕐ  ᓄᓇᒃᑰᕈᑎᕐᔪᐊᓂᒃ ᐊᖁᒃᑎᐅᔪᖅ ᐱᓕᕆᑉᓗᓂ CMAC-ᑯᓐᓄᑦ ᐊᒡᓃᑯᒃᑯᑦ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖓᓂᑦ. ᓄᓇᒃᑰᕈᑎᕐᔪᐊᓂᒃ ᐊᖁᒃᑎᐅᓕᓚᐅᖅᑐᖅ 27-ᓂᒃ ᐅᑭᐅᖃᖅᖢᓂ. ᐅᔭᕋᒃᑕᕆᐊᓕᕆᔨᓂᑦ ᐱᓕᕆᔪᒪᐃᓐᓇᖃᑦᑕᓚᐅᖅᑑᒐᓗᐊᖅ, ᐱᓕᕆᒋᐊᖅᖃᐅᑕᐅᓚᐅᖅᑐᖅ ᓇᐹᖅᑐᓕᕆᔨᓂᑦ ᐱᓕᕆᓐᓂᑯᖃᓕᕈᒪᑉᓗᓂ ᐳᐊᕆᑎᓕᖕᓂᑦ ᐊᒻᒪᓗ ᒪᓂᒃᓴᐃᖃᑦᑕᖅᑐᓂᒃ, ᐊᒻᒪᓗ ᓴᓇᕙᓪᓕᐊᔨᓄᐊᓚᐅᖅᑐᖅ ᑕᐃᒪᓐᓇᒧᑦ ᓴᓇᕙᓪᓕᐊᔪᓄᐊᖅᖢᓂ ᐅᔭᕋᒃᑕᕆᐊᕐᒥᑦ ᕘᕐᒫᓐᑦ (Fermont), ᑯᐳᐊᐃᒃ-ᒥᑦ. ᑕᐃᒪᓐᓇᐃᑦᑐᓕᕆᓂᕐᒧᑦ ᐱᓕᕆᓂᑯᖃᓕᖅᖢᓂ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᐆᒃᑐᕈᖕᓇᖅᓯᓚᐅᖅᑐᖅ ᐊᒻᒪᓗ ᑕᐃᒪᙵᓂᑦ ᐳᐊᕆᑎᓕᖕᓂᑦ, ᓄᓇᐃᔭᐅᔾᔪᑎᓂᑦ, ᐊᒻᒪᓗ ᒫᓐᓇᐅᔪᖅ ᐅᑭᐅᕆᔭᕗᑦ ᐱᒋᐊᓵᖅᑎᓪᓗᒍ, ᓄᓇᐅᑉ ᐃᓗᐊᓂᑦ ᐱᓕᕆᓕᓚᐅᖅᑐᖅ!

ᓱᓇ ᐱᐅᒋᓛᕆᕕᐅᒃ ᐱᓕᕆᐊᕐᓂᑦ?

“ᐱᐅᓯᒋᐊᖅᓯᔪᖕᓇᕐᓂᖃᐃᓐᓇᖃᑦᑕᖅᑐᖅ ᐊᔪᙱᓐᓂᑉᑎᖕᓂᑦ, ᐅᕝᕙᓘᓐᓃᑦ ᐱᓕᕆᓗᓂ ᓄᑖᓂᒃ ᐊᑐᓚᐅᖅᓯᒪᙱᑕᕐᓂᑦ.”

ᐅᖃᐅᓯᒃᓴᖃᖅᐱᑦ ᐊᓯᖕᓄᑦ ᖃᐅᔨᒪᔭᐅᖁᔭᖕᓂᑦ?

“ᐅᔭᕋᒃᑕᕆᐊᕐᓂᖅ ᐱᑦᑕᐅᓛᖑᔪᖅ ᐱᓕᕆᕝᕕᐅᑉᓗᓂ ᐊᕐᓇᓄᑦ. ᐃᓚᐅᑎᑦᑎᓂᖅ ᐊᒻᒪᓗ ᐃᒃᐱᒍᓱᒡᕕᖃᕐᓂᖅ ᐱᒻᒪᕆᐅᔪᑦ ᐱᒋᔭᐅᔪᖕᓇᖅᑐᓂᑦ ᑕᒡᕙᓂ, ᑭᓯᐊᓂ, ᐱᓕᕆᕝᕕᒃ ᖁᕕᐊᒋᔭᖃᖅᑐᖅ ᐱᓕᕆᓂᑦᑎᐊᕙᐅᔪᓂᒃ ᐊᕐᓇᓄᑦ ᐅᔭᕋᒃᑕᕆᐊᓕᕆᓂᕐᒥᑦ ᐱᓕᕆᔪᑦ ᑐᓂᓯᔪᑦ ᐊᒻᒪᓗ ᐊᖏᒡᓕᒋᐊᖅᓯᑉᓗᑎᒃ ᐊᔾᔨᒌᙱᑦᑑᑎᐅᓂᕐᓂᒃ (ᐊᒻᒪᓗ ᐱᑦᑕᐅᔪᖅ ᐃᓚᒋᔭᐅᓕᕐᓂᖏᑦ) ᐊᑕᐅᑦᑎᒃᑯᑦ ᐊᖑᑏᓪᓗ ᐊᕐᓇᐃᓪᓗ ᐱᓕᕆᔨᐅᑉᓗᑎᒃ. ᐅᑭᐅᓂᑦ ᐊᓂᒍᖅᑐᓂᑦ, ᓈᒻᒪᒋᔭᐅᓂᖏᑦ ᐃᓚᐅᖃᑕᐅᓂᖏᓐᓄᑦ ᐊᕐᓇᐃᑦ ᐅᔭᕋᒃᑕᕆᐊᕐᒥᑦ ᐅᕙᑉᑎᖕᓄᑦ ᐊᔪᕐᓇᙱᓐᓂᖅᓴᑲᓪᓚᐅᑎᑦᑎᓯᒪᔪᑦ ᑕᒪᒃᑯᓄᙵ ᐱᐅᔪᓄᑦ ᐱᕕᖃᖅᑎᑦᑎᓂᐅᔪᓄᑦ!”

ᓄᓇᒃᑰᕈᑎᕐᔪᐊᓂᒃ ᐊᖁᒃᑎᐅᔪᒪᖃᑦᑕᖅᓯᒪᓐᓂᕈᕕᑦ ᑭᓯᐊᓂ ᐊᔪᖅᖢᑎᑦ, ᓯᓖᓐ ᐅᖃᐅᑎᔪᖕᓇᖅᑖᑎᑦ ᐊᔪᙱᑦᑎᐊᖅᑐᑎᑦ! ᐱᔪᒪᓕᖅᑎᑦᑎᓂᖃᕈᒪᔪᖅ ᐊᓯᖏᓐᓂᒃ ᐊᕐᓇᓂᑦ ᐆᒃᑐᖁᑉᓗᒋᑦ ᐊᒻᒪᓗ ᖃᐅᔨᑎᑦᑎᖃᑦᑕᕐᓂᐊᖅᑐᖅ ᐊᓯᖏᓐᓄᑦ ᐱᓕᕆᐊᓂᒃ ᐅᒃᑯᐃᖅᑐᖃᕌᖓᑦ ᐱᔪᒪᒃᐸᑕ. ᓯᓖᓐ ᐅᒃᐱᕈᓱᑦᑎᐊᖅᑐᖅ ᐃᑲᔪᖃᑦᑕᕐᓂᕐᒥᒃ ᐊᓯᖏᓐᓂᑦ ᐊᕐᓇᓂᑦ ᐊᒻᒪᓗ ᑕᑯᔪᒪᑦᑎᐊᖅᑐᖅ ᐊᒥᓱᓂᒃ ᐊᕐᓇᓂᒃ ᐱᓕᕆᔪᓂᒃ ᓴᓂᖓᓂᑦ ᐊᖏᒡᓕᓂᐊᕐᓗᑎᒃ!

ᑯᕇᔅᑏᓇ ᓚᔮᒻᐱ (Christina Lajambe) ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᓐᓂᕐᒧᑦ ᐃᓱᒪᑕᖅ ᐊᐳᖅᑎᓐᓈᖅᑐᒥᑦ

ᑯᕇᔅᑏᓇ ᓚᔮᒻᐱᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᖃᙱᓐᓂᕐᒧᑦ ᐃᓱᒪᑕᕆᔭᐅᔪᖅ ᐊᐳᖅᑎᓐᓈᖅᑐᒥᑦ. ᐊᒡᓃᑯᒃᑯᓐᓃᓕᖅᑐᖅ ᑕᐃᒪᙵᓂᑦ 2011-ᒥᑦ, ᑎᑭᐅᑎᑉᓗᓂᐅᒃ ᒫᓐᓇᐅᔪᖅ ᐱᓕᕆᐊᖓ ᐊᒃᓱᕈᖅᖢᓂ ᐱᓕᕆᓂᒃᑯᑦ ᐊᒻᒪᓗ ᐱᓕᕆᓐᓂᑯᖃᕐᓂᒃᑯᑦ ᐊᔾᔨᒌᙱᑦᑐᓂᑦ ᐊᕕᒃᑐᖅᓯᒪᔪᓂᑦ. ᐃᒪᓐᓇ ᐅᔭᕋᒃᑕᕆᐊᓕᕆᔨᓂᑦ ᐱᓕᕆᐊᖅᑖᓚᐅᖅᑐᖅ:

“ᐊᖓᔪᖅᖄᑐᐊᖃᖅᖢᖓ ᐃᒡᓗᒥᐅᖃᑎᒌᓂᑦ ᐱᕈᓚᐅᖅᑐᖓ ᐊᓈᓇᖃᖅᖢᖓ ᐃᓕᓐᓂᐊᖅᓯᒪᓂᕐᒧᑦ ᐊᔭᐅᖅᑐᐃᔪᒥᒃ. ᓯᓚᑦᑐᖅᓴᕐᕕᖕᒥᑦ ᐃᓕᑕᕆᔭᐅᔾᔪᑎᑖᓚᐅᖅᑐᖓ ᐊᑯᑉᓕᖅᑎᕈᑎᓄᑦ ᓱᓇᑐᐃᓐᓇᓕᐅᕆᓂᕐᒧᑦ ᐊᒻᒪᓗ ᖃᐅᔨᑲᐅᑎᒋᔭᐅᓂᖅ ᐊᔪᖅᑐᓂᒃ ᖃᐅᔨᓴᐃᔨᙳᕈᒪᓚᐅᖅᑐᖓ. ᐃᓂᑖᓚᐅᖅᑐᖓ ᐳᑭᖅᑕᓕᖕᓂᑦ ᖃᐅᔨᑲᐅᑎᒋᔭᐅᓂᖅ ᐊᔪᖅᑐᓂᒃ ᖃᐅᔨᓴᐃᔨᒃᑯᓐᓄᑦ ᑭᓯᐊᓂ ᑭᑐᓗᒃᑖᑦ ᑕᐅᑐᖃᑦᑕᕐᓂᖏᑦ CSI-ᒥᑦ ᐊᒻᒪᓗ ᑮᓇᐅᔭᖅᑑᑎᒧᑦ ᐊᑭᐅᔪᓄᑦ, ᐱᕕᖃᑦᑎᐊᖏᓐᓂᒻᓂᒃ ᖃᐅᔨᒪᓚᐅᖅᑐᖓ. ᐅᔭᕋᒃᑕᕆᐊᓄᐊᕈᒪᓕᓚᐅᖅᑐᖓ ᐊᖏᔪᒥᒃ ᐅᔭᕋᒃᑕᕆᐊᓕᕆᓂᕐᒥᑦ ᓄᓇᓕᐸᐅᔭᒦᖦᖢᖓ, ᓴᑦᐳᕆ-ᒥᑦ. ᐊᒥᓱᓂᒃ ᖃᐅᔨᓴᐃᕝᕕᖕᓂᑦ ᐱᓕᕆᓚᐅᖅᑐᖓ ᐅᔭᕋᒃᑕᕆᐊᓂᑦ ᓇᓂᑐᐃᓐᓇᖅ ᐃᓂᐅᔪᓂᑦ. ᑐᓴᒐᒃᓴᒥᑦ ᓴᖅᕿᔮᖅᑎᑕᐅᔪᒥᑦ ᑕᑯᒐᒪ ᖃᐅᔨᓴᐃᕝᕕᖕᒥᑦ ᐸᕐᓇᐃᓂᕐᒧᑦ ᑐᑭᒧᐊᒃᑎᕆᔨᒧᑦ ᐃᓂᐅᔪᒥᒃ ᐊᒡᓃᑯᒃᑯᓐᓂᑦ ᐆᒃᑐᓕᓚᐅᖅᑕᕋ ᐱᓕᕆᐊᖅ. ᐳᐃᒍᖅᓯᒪᑦᑎᐊᓕᖅᖢᒍ ᑭᓯᐊᓂ ᐅᖃᓗᒡᕕᐅᓕᕋᒪ ᐊᐱᖅᓱᖅᑕᐅᔪᒪᑉᓗᖓ ᐱᓕᕆᐊᒃᓴᐅᑉ ᒥᒃᓵᓄᑦ. ᑎᖕᒥᓲᒃᑯᑦ ᕚᓪᑐᐊᒧᙵᐅᓚᐅᖅᑐᖓ ᐊᒻᒪᓗ ᑭᖑᓂᑦᑎᐊᖓᒍᑦ ᖃᐅᔨᓕᖅᖢᖓ; ᑎᖕᒥᓲᕐᒦᓕᖅᖢᖓ ᓄᓇᕗᒻᒧᙵᐅᑉᓗᖓ. ᐅᒃᐱᕈᓱᓚᐅᖏᑦᑐᖓ ᐱᐊᓂᒍᖕᓇᕐᓂᐊᕋᒪ, ᑭᓯᐊᓂ 2011-ᒥᐅᓚᐅᖅᑐᖅ ᐊᒻᒪᓗ ᒫᓐᓇ ᐅᑉᓗᒥᐅᔪᖅ 2023-ᖑᓕᖅᑐᖅ.”

ᓱᓇᓂᒃ ᐱᓕᕆᓯᒪᕕᑦ ᐊᒡᓃᑯᒃᑯᓐᓂᑦ?

“ᐱᓕᕆᓚᐅᖅᑐᖓ ᖃᐅᔨᓴᐃᕝᕕᖕᒥᑦ ᑕᓪᓕᒪᐃᑦ ᐅᑭᐅᑦ ᓇᑉᐸᒥᒃ ᐃᓚᖃᖅᖢᒍ, ᐃᓚᒋᔭᐅᓚᐅᖅᑐᖓ ᖃᓄᖅᑑᕆᓂᖅ ᐱᐅᓯᒋᐊᖅᓯᓂᕐᒧᑦ ᐱᓕᕆᔨᓄᑦ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕐᒥᑦ ᐊᒻᒪᓗ ᐃᓚᐅᓕᓚᐅᖅᑐᖓ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓄᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑎᑦᑎᔨᓄᑦ. ᐅᒃᐱᕈᓱᒃᑐᖓ ᖁᕕᐊᒋᑦᑎᐊᖅᑕᕋ ᐱᓕᕆᐊᖅ ᓇᓂᒐᑉᑯ. ᐊᒃᓱᕈᖅᖢᓂ ᐱᓕᕆᑉᓗᓂ, ᐊᑦᑕᕐᓇᖅᑐᖃᙱᓐᓂᕐᒥᒃ ᐅᖃᐅᔾᔨᔨᐅᓂᕐᒥᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᑐᑭᒧᐊᒃᑎᑦᑎᔨᒧᐊᓚᐅᖅᑐᖓ ᐊᒻᒪᓗ ᐃᓱᒪᑕᖅ ᐋᓐᓂᐊᖃᙱᑦᑐᓕᕆᔨᒃᑯᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑎᑦᑎᔨᓄᑦ. ᐅᐱᓐᓇᖅᑐᖅ ᐅᑉᓗᐃᑦ ᐊᓂᒍᐊᓚᓴᑦᑎᐊᕐᓂᖏᑦ ᖁᕕᐊᓱᒃᑳᖓᕕᑦ!”

ᓱᓇ ᐱᐅᒋᓛᕆᕕᐅᒃ ᐱᓕᕆᐊᕐᓂᑦ?

“ᖃᐅᑕᒫᑦ ᓄᑖᖅ ᐅᑉᓗᖑᖃᑦᑕᖅᑐᖅ. ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᒻᒪᓗ ᐊᑦᑕᕐᓇᖅᑐᖃᙱᑦᑎᑦᑎᔨᓂᑦ ᐊᒥᓱᓂᒃ ᐊᓕᐊᓇᐃᑦᑐᓂᒃ ᐊᒻᒪᓗ ᐊᓕᐊᓇᖏᑦᑐᓂᒃ ᐱᖃᑦᑕᖅᑐᒍᑦ ᐊᒃᓱᕈᖕᓇᖅᑐᓂᒃ ᖃᐅᑕᒫᒥᑦ ᐊᔾᔨᒌᒃᑎᑦᑎᙱᖦᖢᓂ ᐊᓯᖏᓐᓂᑦ. ᐱᐅᓛᖑᔪᖅ ᑕᑯᑉᓗᒋᑦ ᐊᕕᒃᑐᖅᓯᒪᔪᑦ ᐱᓕᕆᖃᑎᒌᒃᑐᑦ ᑎᑭᐅᑎᓯᒪᓂᐊᕐᓗᑎᒃ ᐅᓗᕆᐊᓇᖅᑐᖃᙱᑦᑐᒥᒃ ᐊᕙᑎᖃᕐᓂᕐᒥᑦ. ᐃᓄᐃᑦ ᖁᕕᐊᓱᒐᔪᒃᑑᔪᑦ ᐊᒻᒪᓗ ᖁᖓᔮᖅᑎᖢᑎᒃ ᓄᓇᕗᒻᒥᑦ, ᐊᒃᓱᕈᕐᓇᖅᑐᒃᑰᖅᓯᒪᒐᓗᐊᖅᑎᓪᓗᑕᓘᓐᓃᑦ, ᐊᓂᒎᑎᕋᑕᖃᑦᑕᖅᑕᕗᑦ.”

ᐅᖃᐅᓯᒃᓴᖃᖅᐱᑦ ᐊᓯᖕᓄᑦ ᖃᐅᔨᒪᔭᐅᖁᔭᖕᓂᑦ?

“ᐅᒃᐱᕈᓱᒃᑐᖓ ᐊᒃᓱᕈᖅᖢᓂ ᐱᓕᕆᓗᓂ ᐊᒻᒪᓗ ᐃᓕᖕᓂᑦ ᖃᐅᔨᑎᓪᓗᑎᑦ ᓱᓇᑐᐃᓐᓇᒥᒃ ᐊᔪᙱᓐᓇᕕᑦ. ᑕᐃᒪᓐᓇ ᐃᓱᒪᖃᕐᓗᓂ, ᐱᓕᕆᐊᕆᔭᐃᑦ ᑕᑯᔭᐅᖃᑦᑕᖅᑐᖅ. ᖁᑦᑎᓛᒧᑦ ᑐᕌᑲᐅᑎᒋᙱᓪᓗᑎᑦ. ᑐᐊᕕᓗᐊᖏᑦᑐᒃᑯᑦ ᑐᑭᓯᐊᓕᕐᓗᒍ ᐅᔭᕋᒃᑕᕆᐊᓕᕆᓂᖅ, ᐃᓕᑦᑎᓂᐊᖅᑐᑎᑦ ᖁᕕᐊᒋᓗᒍ ᐱᓕᕆᐊᑦ ᐅᑎᖅᑕᖃᑦᑕᕐᓃᑦ ᐊᒻᒪᓗ ᐅᔾᔨᕆᔭᐅᓗᑎᑦ ᑕᒪᒃᑯᐊ ᐱᔾᔪᑎᓗᒋᑦ. ᑐᐊᕕᙱᓪᓗᑎᑦ ᐃᓕᓐᓂᐊᕐᓗᑎᑦ ᓄᑖᒥᒃ ᖃᐅᑕᒫᒃᑯᑦ ᐊᒻᒪᓗ ᐃᖢᕐᕆᕝᕕᒋᔭᕐᓂᑦ ᐊᓂᓗᑎᑦ. ᐅᔭᕋᒃᑕᕆᐊᓕᕆᓂᖅ ᒥᑭᔫᔪᖅ, ᐃᓕᖕᓄᑦ ᐊᑎᖅᑖᕆᑦ!”

ᓱᓇᑐᐃᓐᓇᓂᒃ ᐃᓱᒪᒋᔭᖃᖅᐱᑦ ᐱᔾᔪᑎᖃᖅᑐᓂᒃ ᐊᕐᓇᐅᓂᕐᒧᑦ ᐱᓕᕆᐊᕐᒥᑦ?

“ᐅᔭᕋᒃᑕᕆᐊᓕᕆᓂᖅ ᐊᖑᑎᓄᑐᐃᓐᓇᖅ ᑐᕌᖓᔫᖏᓪᓕᖅᑐᖅ. ᐊᒥᓱᙳᖅᐸᓪᓕᐊᑐᐃᓐᓇᖅᑐᑦ ᐊᕐᓇᐃᑦ ᐃᓚᐅᖃᑕᐅᓕᖅᑐᑦ ᐅᔭᕋᒃᑕᕆᐊᓕᕐᓂᕐᒥᑦ, ᓴᕆᒪᓱᒃᑐᖓ ᐃᓚᒋᔭᐅᒐᒪ. ᐱᖃᑦᑕᖅᓯᒪᔪᖓ ᐃᑲᔪᖅᑐᖅᑕᐅᓂᕐᒥᑦ ᐊᒻᒪᓗ ᐃᒃᐱᒍᓱᒡᕕᐅᓂᕐᒥᒃ ᐱᓕᕆᖃᑎᒋᔭᒻᓂᑦ ᓯᕗᒻᒧᒍᐊᖁᔭᐅᑉᓗᖓ ᐅᔭᕋᒃᑕᕆᓕᐊᓂᕐᒥᑦ ᐱᓕᕆᐊᓄᑦ. ᓴᕆᒪᓱᒃᑐᖓ ᐃᓚᒋᔭᐅᒐᒪ ᖃᑕᙳᑎᒌᓄᑦ ᐊᒻᒪᓗ ᐃᓚᒋᔭᐅᓂᕋ ᑲᔪᓯᓂᐊᖅᑐᖅ ᐅᔭᕋᒃᑕᕆᐊᓕᕆᓂᕐᒥᑦ. ᐆᒃᑐᕈᒃ ᐊᒃᓱᕈᕐᓇᖅᑐᖅ ᐊᒻᒪᓗ ᕿᐱᓗᖃᑦᑕᙱᓪᓗᑎᑦ ᐅᖃᐅᑎᔭᐅᔭᕌᖓᕕᑦ ᐊᔪᙱᑦᑐᑎᑦ.”

ᔨᐊᓯᑲ ᒪᒃᑖᓄᑦ (Jessica MacDonald), ᕿᓂᖅᓴᐃᓂᕐᒧᑦ ᐃᑲᔪᖅᑎ ᑐᑭᒧᐊᒃᑎᑦᑎᔨ ᕼᐋᑉ ᐸᐃ-ᒥᑦ

ᔨᐊᓯᑲ ᒪᒃᑖᓄᑦᕿᓂᖅᓴᐃᓂᕐᒧᑦ ᐃᑲᔪᖅᑎ ᑐᑭᒧᐊᒃᑎᑦᑎᔨᐅᔪᖅ ᕼᐋᑉ ᐸᐃ-ᒥᑦ. ᐱᓕᕆᔨᓂᑦ ᐃᓚᐅᓯᒪᓕᖅᑐᖅ ᒪᕐᕉᒃ ᐅᑭᐅᑦ ᐅᖓᑎᐊᕐᔪᐊᓄᑦ, ᐱᒋᐊᖅᖃᐅᑕᐅᑉᓗᓂ ᐅᔭᕋᒃᑕᖅᑕᐅᔪᓂᒃ ᖃᐅᔨᓴᖅᑕᐅᔪᓂᒃ ᑎᑎᕋᐃᓂᕐᒥᑦ ᑕᒪᐃᓐᓂᑦ ᑐᕇᔅ-ᒥᑦ ᐊᒻᒪᓗ ᒪᖑᑐᕆᑦᒥᑦ ᐱᑕᓕᖕᓂᑦ, ᕿᓂᖅᓴᐃᓂᕐᒧᑦ ᐅᔭᖅᖃᓂᒃ ᐊᔪᕈᖕᓃᖅᓴᓕᕋᑕᖅᖢᓂ ᒫᓐᓇᐅᔪᖅ ᐱᓕᕆᐊᖓᓄᐊᕐᓂᐊᓵᖅᖢᓂ.

ᔨᐊᓯᑲ ᐃᓕᓐᓂᐊᕈᑎᒥᒃ ᐃᓕᑕᕆᔭᐅᔾᔪᑎᖃᖅᑐᖅ ᓄᓇᒥᑦ ᐊᒻᒪᓗ ᑕᕆᐅᕐᒥᑦ ᖃᐅᔨᓇᓱᖕᓂᕐᒧᑦ ᓯᒪᑦᑐᖅᓴᕐᕕᒡᔪᐊᖅ ᕕᒃᑐᕆᔭ ᐳᕆᑎᔅ ᑲᓚᒻᐱᔭᒥᑦ.

ᖃᓄᖅ ᐅᔭᕋᒃᑕᕆᐊᓕᕆᔨᓄᐊᓚᐅᖅᐱᑦ?

“ᐱᓕᕆᐊᖅᑖᖅᖢᖓ ᐅᔭᖅᖃᓕᕆᓂᕐᒥᒃ ᐱᓇᓱᓚᐅᖅᓯᒪᙱᑕᕋ. ᖃᑉᓯᐊᕐᔪᐃᑦ ᐅᑭᐅᓂᑦ ᐃᓕᓐᓂᐊᓚᐅᖏᑦᑐᖓ ᖁᑦᑎᖕᓂᖅᓴᒥᑦ ᐃᓕᓐᓂᐊᕐᕕᖕᒥᑦ ᐊᒻᒪᓗ ᓯᓚᑦᑐᖅᓴᕐᕕᒡᔪᐊᕐᒥᑦ ᐱᓕᕆᑉᓗᖓ ᐊᒻᒪᓗ ᐃᖏᕐᕋᔭᖃᑦᑕᖅᖢᖓ, ᖃᐅᔨᒪᑉᓗᖓ ᐅᑎᕋᑕᓛᕋᒪ ᐊᒻᒪᓗ ᐱᐊᓂᒡᓗᒍ ᐃᓕᓐᓂᐊᖅᑕᕋ. ᐱᒋᐊᓚᐅᖅᑐᖓ ᐃᓕᓐᓂᐊᖅᑕᒻᓂᑦ 2016-ᒥᑦ ᐆᒪᔪᓕᕆᓂᕐᒧᑦ ᑭᓯᐊᓂ ᖃᐅᔨᑲᐅᑎᒋᓚᐅᖅᑐᖓ ᑕᐃᒪᓐᓇᐃᑦᑐᓕᕆᔨᐅᔪᒪᙱᓐᓇᒪ. ᐃᓚᖓᑦ ᓄᕈᐊᖅᑕᕋ ᑐᒡᓕᐊᓂᑦ ᐅᑭᐅᕐᒥᑦ ᑐᑭᓯᑎᑕᐅᓂᖅ ᐅᔭᖅᖃᓕᕆᓂᕐᒥᑦ ᐃᓕᓐᓂᐊᕈᑎᒥᑦ, ᐊᒻᒪᓗ ᖁᕕᐊᒋᑦᑎᐊᓚᐅᖅᑕᕋ ᖃᐅᔨᓇᓱᖃᑦᑕᕐᓂᖅ. ᐱᓕᕆᓚᐅᖅᑐᖓ ᐹᑯᕕᐅᓪ (Barkerville) ᒎᓗᒧᑦ ᐅᔭᕋᒃᑕᕆᐊᓂᑦ ᐳᕆᑎᔅ ᑲᓚᒻᐱᔭᒥᑦ ᐊᐅᔭᐅᑎᓪᓗᒍ ᐱᓕᕝᕕᐅᔪᒥᑦ ᐱᓕᕆᑉᓗᖓ ᐊᒻᒪᓗ ᓴᙱᒃᑎᑎᖦᖢᒍ ᐊᑉᖁᑎᒋᓂᐊᖅᑕᕋ. ᑕᐃᒪᙵᓂᑦ, ᐱᓕᕆᔪᖕᓇᖅᓯᓚᐅᖅᑐᖓ ᐊᔾᔨᒌᙱᑦᑐᓂ ᐃᓚᖓᓃᑦᑐᓂᒃ ᐳᕆᑎᔅ ᑲᓚᒻᐱᔭᒥᑦ, ᑯᐸᐃᒃᒥᑦ ᐊᒻᒪᓗ ᒫᓐᓇᐅᓕᖅᑐᖅ ᓄᓇᕗᒻᒥᑦ.”

ᓱᓇ ᐱᐅᒋᓛᕆᕕᐅᒃ ᐱᓕᕆᐊᕐᓂᑦ?

“ᐅᕙᒻᓄᑦ, ᐊᓯᖏᑎᑐᑦ ᐊᒥᓱᐃᑦ ᐅᔭᖅᖃᓕᕆᔨᐅᔪᑐᑦ, ᐃᓚᒋᔭᐅᓂᕋ ᐱᓕᕆᔨᓄᑦ ᓄᑖᓂᒃ ᖃᐅᔨᓐᓇᖅᑎᑦᑎᑉᓗᓂ ᐊᖏᔪᒥᑦ ᐱᑎᑦᑎᓂᖃᖅᑐᖅ. ᐆᒻᒪᑎᒃᑯᑦ ᕿᓂᖅᓴᐃᔨᐅᔪᖓ, ᐊᓕᐊᓇᐃᒋᔭᕋ ᓄᑖᓂᒃ ᑕᑯᖃᑦᑕᕐᓂᖅ, ᑲᑎᓯᔭᕌᖓᒪ ᑕᑯᓚᐅᖅᓯᒪᙱᑕᒻᓂᒃ ᐃᓄᖕᓂᑦ, ᐊᒻᒪᓗ ᕿᓂᖅᓴᐃᔪᒪᓂᖅ ᐱᓕᕆᐊᒻᓄᐊᖅᑎᖦᖢᒍ.”

ᖃᓄᑐᐃᓐᓇᖅ ᑭᓇᑐᐃᓐᓇᒧᑦ ᐅᖃᐅᔾᔨᔪᒪᕕᑦ (ᐱᓗᐊᖅᑐᒥᑦ ᐊᕐᓇᓄᑦ) ᐃᓱᒪᒋᔭᖃᖅᑐᓂᒃ ᐅᔭᕋᒃᑕᕆᐊᕐᒥᑦ ᐱᓕᕆᐊᖅᑖᕈᒪᑉᓗᑎᒃ?

“ᐃᓱᒪᒍᕕᑦ ᐅᔭᕋᒃᑕᕆᐊᕐᒥᑦ ᐱᓕᕆᐊᖅᑖᕈᒪᑉᓗᑎᑦ, ᐱᓕᕆᐊᖅᑖᕆᑦ! ᐱᑦᑕᐅᑦᑎᐊᖅᑐᖅ ᐅᔭᕋᒃᑕᕆᐊᓕᕆᓂᖅ ᐊᒥᓱᓂᒃ ᐱᓕᕆᐊᒃᓴᓄᑦ ᐊᑉᖁᑎᖃᖅᖢᓂ, ᐊᑐᓂ ᐊᑉᖁᑎᐅᔪᑦ ᐃᓕᑦᑎᕙᓪᓕᐊᑎᑦᑎᑉᓗᓂ ᐊᒻᒪᓗ ᐱᕈᖅᐸᓪᓕᐊᓂᕐᒧᑦ ᐱᕕᖃᖅᑎᑦᑎᑉᓗᓂ. ᐃᓱᒪᒋᔭᕋ ᐃᓚᖓᑦ ᐃᓱᒪᒋᔭᐅᔭᕆᐊᖃᖅᑐᖅ ᑲᙳᓱᙱᓪᓗᑎᑦ, ᐊᐱᖅᖁᑎᓂᒃ ᐊᐱᖅᓱᖃᑦᑕᕐᓗᑎᑦ, ᐊᒻᒪᓗ ᑐᓴᖅᑕᐅᑎᓪᓗᒋᑦ ᐃᓱᒪᒋᔭᑎᑦ. ᐱᒻᒪᕆᐅᖕᒥᔪᖅ ᓇᓂᓯᓗᓂ ᑲᒻᐸᓂᒥᒃ ᐊᒻᒪᓗ ᐱᓕᕆᐊᕐᒥᑦ ᐱᐅᔪᒥᒃ ᐱᖅᖁᓯᖃᖅᑐᒥᒃ ᑎᑯᓕᐊᖅᑐᓂᒃ ᐱᒻᒪᕆᐅᒋᔭᕐᓄᑦ ᐊᒻᒪᓗ ᑐᕌᒐᕆᔭᖕᓄᑦ. ᐱᓕᕆᑎᓪᓗᑎᑦ ᐱᖃᓐᓈᓕᐅᕐᓂᐊᖅᑐᑎᑦ ᐃᓅᓯᓗᒃᑖᒥᑦ ᐱᖃᓐᓈᕆᓂᐊᖅᑕᖕᓂᑦ ᐊᒻᒪᓗ ᑲᑎᓯᒪᓂᖃᕐᓗᑎᑦ ᐃᓄᖕᓄᑦ ᑲᑎᓐᓇᔭᓚᐅᖏᑕᖕᓂᑦ, ᐊᑕᐅᑦᑎᒃᑯᑦ ᓇᒧᙵᐅᑲᑕᖃᑦᑕᕐᓗᑎᑦ ᓄᓇᕐᔪᐊᕐᒥᑦ ᐃᖏᕐᕋᔭᒡᕕᒋᓚᐅᖅᓯᒪᙱᑕᖕᓄᑦ.”

ᐃᓱᒪᒋᔭᖃᖅᐱᑦ ᐊᕐᓇᐅᓂᕐᓄᑦ ᐱᓕᕆᐊᕐᒥᑦ ᐱᓕᕆᓂᕆᔭᖕᓂᑦ?

“ᐊᒥᓱᓄᑦ ᐅᑭᐅᓄᑦ, ᐅᔭᖅᖃᓕᕆᓂᖅ ᖃᐅᔨᒪᔭᐅᖃᑦᑕᖅᓯᒪᔪᖅ ‘ᐃᓐᓇᐅᓂᖅᓴᐃᑦ ᐊᖑᑎᓄᑦ ᑐᕌᖓᔪᖅ’-ᖑᑉᓗᓂ ᐊᒻᒪᓗ ᐃᓱᒪᒋᔭᕋ ᐃᓱᒪᒋᔭᐅᔪᖅ ᐊᓯᐊᙳᖅᐸᓪᓕᐊᔪᖅ ᖃᑉᓯᐊᕐᔪᐃᑦ ᐅᑭᐅᓂᐅᓕᖅᑐᖅ. ᐊᔾᔨᒌᙱᑦᑑᑎᐅᔪᑦ ᐅᔭᖅᖃᓕᕆᔩᑦ ᐊᒻᒪᓗ ᐊᖏᓂᖅᓴᐅᔪᒥᑦ, ᐅᖓᓯᒃᑐᒥᑦ ᐱᓕᕆᔩᑦ. ᐊᔾᔨᒌᙱᑦᑑᑕᐅᓂᖅ ᐱᓕᕆᕝᕕᖕᒥᑦ ᐱᒋᐊᖅᑎᑦᑎᖃᑦᑕᖅᑐᖅ ᐊᒥᓱᑲᓪᓚᖕᓂᒃ ᓄᑖᓂᒃ ᐃᓱᒪᒋᔭᐅᔪᓂᒃ ᐊᒻᒪᓗ ᖃᓄᖅᑑᕈᑕᐅᔪᓂᒃ ᐃᑲᔪᐃᓂᖃᑐᐃᓐᓇᖅᑐᑦ ᐱᓕᕆᔨᓂᒃ ᐃᓗᐃᑦᑑᖓᑉᓗᒋᑦ.”

ᒧᕇ-ᑯᕆᔅᑏᓐ ᓛᒻᐳᑦ (Marie-Christine Lambert) ᑮᓇᐅᔭᓕᕆᔨᒃᑯᓐᓄᑦ ᐊᖓᔪᖅᖄᖅ ᑕᓯᕐᔪᐊᕐᒥᑦ ᓄᓇᕗᒻᒥ ᐱᔨᑦᑎᕋᐃᔨᒃᑯᓐᓄᑦ

ᒧᕇ-ᑯᕆᔅᑏᓐ ᓛᒻᐳᑦᑮᓇᐅᔭᓕᕆᔨᒃᑯᓐᓄᑦ ᐊᖓᔪᖅᖄᖑᔪᖅ ᑕᓯᕐᔪᐊᕐᒥᑦ ᓄᓇᕗᒻᒥ ᐱᔨᑦᑎᕋᐃᔨᒃᑯᓐᓄᑦ ᐊᒻᒪᓗ ᐊᒡᓃᑯᒃᑯᓐᓂᑦ ᐱᓕᕆᓕᖅᑐᖅ ᑕᐃᒪᙵᓂᑦ 2016-ᒥᑦ. ᓯᓚᑦᑐᖅᓴᕐᕕᒡᔪᐊᕐᒥᑦ ᐃᓕᓐᓂᐊᕌᓂᒃᓯᒪᓂᕐᒧᑦ ᐃᓕᑕᕆᔭᐅᔾᔪᑎᖃᖅᑐᖅ ᐊᒻᒪᓗ ᐱᓕᕆᐊᖃᖅᑐᖅ ᓈᓴᐅᓯᕆᓂᕐᒥᒃ ᐊᒻᒪᓗ ᑭᑐᑐᐃᓐᓇᓄᑦ ᑐᕌᖓᔪᓂᒃ ᐱᓕᕆᐊᖃᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᖅ ᑯᐸᐃᒃ-ᒥᑦ ᐊᐱᑎᐱ-ᑎᐊᒥᔅᑲᒦᖕ-ᒥᑦ ᐊᒻᒪᓗ ᓈᓴᐃᔨᑖᖑᖃᑦᑕᖅᑐᑦ ᐊᔪᙱᓐᓂᓕᒃ ᓈᓴᐅᓯᕆᓂᕐᒧᑦ (CPA) ᑮᓇᐅᔭᓂᒃ ᓈᓴᐃᔨᐅᓂᕐᒧᑦ ᑕᐃᒪᙵᓂᑦ 2013-ᒥᑦ. ᑮᓇᐅᔭᓂᒃ ᐊᐅᓚᑦᑎᔨᐅᓯᒪᔪᖅ ᒎᓪᑎᐊᒃᔅ-ᑯᓐᓄᑦ (Goldex) ᓄᓇᕗᒻᒥ ᐱᔨᑦᑎᕋᐃᔨᒃᑯᓐᓄᐊᖅᖄᖅᑎᓐᓇᒍᑦ ᑮᓇᐅᔭᓕᕆᓂᕐᒧᑦ ᑎᑯᓕᐊᖅᑎᑦᑎᔨᐅᑉᓗᓂ, ᐊᒻᒪᓗ ᐃᓱᒪᑕᕆᔭᐅᓕᖅᖢᓂ ᑮᓇᐅᔭᓕᕆᔨᒃᑯᓐᓄᑦ, ᐊᐳᖅᑎᓐᓈᖅᑐᒧᑦ ᐊᒻᒪᓗ ᑕᓯᕐᔪᐊᕐᒧᑦ. 2022-ᒥᑦ, ᓯᕗᓂᐊᒍᑦ ᒫᓐᓇᐅᔪᖅ ᐱᓕᕆᐊᕆᓕᖅᑕᖓᓂᑦ, ᐅᔭᕋᒃᑕᕆᐊᕐᒥᑦ ᐊᐅᓚᑦᑎᔨᐅᑉ ᐱᓕᕆᐊᖓᓄᐊᓚᐅᖅᑐᖅ ᑏᑐᐊ ᑕᓯᖅ ᐅᔭᕋᒃᑕᕆᐊᕐᒥᑦ ᑲᑎᑎᑕᐅᖅᖄᖅᑎᓪᓗᒋᑦ ᐊᔾᔨᒌᒃᑎᑦᑎᓂᖅ ᑰᒃᓚᓐ ᑕᓯᖅ ᒎᓗ-ᑯᓪᓗ.

ᓱᓇᒧᑦ ᐅᔭᕋᒃᑕᕆᐊᓕᕆᔨᒃᑯᓐᓄᐊᖅᐱᑦ?

“ᐱᓕᕆᐊᕆᖅᖃᐅᑕᐅᓚᐅᖅᑕᕋ ᓈᓴᐃᓂᕐᒧᑦ ᐱᓕᕆᐊᓕᖕᓂᑦ, ᐊᒥᓱᓂᒃ ᐃᓄᖕᓂᒃ ᐱᔾᔪᔾᔨᖃᑦᑕᓚᐅᖅᑐᑦ ᐊᒻᒪᓗ ᖃᐅᔨᓚᐅᖅᑐᑦ ᐊᒥᓱᓂᒃ ᐱᓕᕆᕝᕕᐅᔪᓂᒃ ᐅᕙᒻᓄᑦ ᐱᓕᕆᐊᒃᓴᐅᑎᑕᐅᔪᒃᑯᑦ. ᐊᓯᐊᓄᐊᕆᐊᖃᖅᑑᔭᓚᐅᖅᑕᕋ ᐱᓕᕆᐊᕋ ᐊᒻᒪᓗ ᐊᑕᐅᓯᕐᒥᑦ ᐱᓕᕆᓂᕐᒧᐊᕐᓗᖓ ᐱᕈᖅᐸᓪᓕᐊᔪᖕᓇᕐᓂᐊᕋᑉᑯ ᐊᔪᙱᓐᓂᕋ ᐊᑕᐅᓯᐅᖓᓗᓂ ᑲᒻᐸᓂᑎᑐᑦ ᐅᕙᒻᓂᒃ ᐱᓕᕆᑎᑦᑎᔪᖅ. ᐅᔭᕋᒃᑕᕆᐊᓕᕆᓂᖅ ᐱᔪᒪᓂᖃᕐᕕᒋᓯᑲᐅᑎᒋᓚᐅᖅᑕᕋ, ᐅᔭᕋᒃᑕᕆᐊᑦ ᑕᒡᕙᐅᓂᖏᓐᓄᑐᐃᓐᓇᐅᖏᑦᑐᖅ ᖃᓂᑕᖓᓂᑦ ᓄᓇᖃᕐᕕᒋᔭᒻᓂᑦ, ᑭᓯᐊᓂ ᐅᔭᕋᒃᑕᕆᐊᖅ ᐅᕙᒻᓂᒃ ᑐᓂᓯᓚᐅᕐᒪᑦ ᐊᒥᓱᓂᒃ ᐆᒃᑐᒐᒃᓴᓂᒃ ᐊᒻᒪᓗ ᐱᕕᖃᖅᑎᑦᑎᓂᐅᔪᒥᒃ ᓇᐃᑦᑑᔪᒥᑦ ᐊᒻᒪᓗ ᐊᑯᓂᐅᔪᒥᑦ. ᐅᒃᑯᐃᖅᑐᖃᕌᖓᑦ ᐱᕕᖃᖅᑎᑦᑎᔪᒥᒃ ᐊᒡᓃᑯᒃᑯᓐᓂᑦ ᐱᒋᐊᖃᑦᑕᓚᐅᖅᑕᕋ, ᐊᒻᒪᓗ ᐅᒡᒍᐊᖏᑦᑎᐊᖅᑐᖓ ᐃᓱᒪᓕᐅᕆᓚᐅᖅᑕᒻᓂᒃ!”

ᐱᓕᕆᐊᖕᓂᑦ ᓱᓇ ᐊᓕᐊᓇᐃᒋᓛᕆᕕᐅᒃ?

“ᑮᓇᐅᔭᓕᕆᔨᐅᓂᖅ ᐅᔭᕋᒃᑕᕆᐊᕐᒥᑦ ᐊᒃᓱᕈᕐᓇᖅᑐᓂᒃ ᐱᑕᖃᐅᖅᑐᖅ ᑕᒪᕐᒥᓗᒃᑖᖅ ᐊᔾᔨᐅᖏᖦᖢᑎᒃ ᐱᖃᑖᓄᑦ. ᐊᔾᔨᒌᙱᓐᓂᖏᓐᓄᑦ ᐱᕙᓪᓕᐊᓂᐅᔪᑦ ᐅᔭᕋᒃᑕᕆᐊᑉ ᐊᐅᓛᕐᓂᖓᓄᑦ ᐅᑎᖅᑕᖅᑐᖅ, ᐊᑭᐅᔪᓄᑦ ᐊᒃᑐᐊᓂᖃᕐᕕᒋᔭᖏᑦ, ᐱᑖᖅᑐᖅᓯᒪᔭᖏᑦ ᐊᒻᒪᓗ ᐱᕈᖅᐸᓪᓕᐊᓂᖓ ᐅᕝᕙᓘᓐᓃᑦ ᐅᒃᑯᐊᖅᐸᓪᓕᐊᓂᕐᒧᑦ ᐱᓕᕆᐊᑦ, ᐊᒥᓱᓂᒃ ᐊᑐᖃᑦᑕᖅᑐᑦ ᓈᓴᐅᓯᕆᓂᕐᒧᑦ ᒪᓕᒐᓂᒃ ᐊᒻᒪᓗ ᐱᒻᒪᕆᐅᔪᒥᒃ ᑐᓂᓯᓗᓂ ᐃᓱᒪᓕᐅᕆᓂᕐᒧᑦ. ᐱᓕᕆᐊᒻᓂᑦ, ᐊᐅᓚᑦᑎᓂᖅ ᖁᕕᐊᒋᔭᕋ ᐊᔾᔨᒌᙱᑦᑑᑎᓂᒃ ᐊᔪᙱᓐᓂᐅᔪᑦ ᓈᓴᐃᔨᑖᖑᖃᑦᑕᖅᑐᑦ ᐊᔪᙱᓐᓂᓕᒃ ᓈᓴᐅᓯᕆᓂᕐᒧᑦ (CPA), ᐅᕙᒻᓂᒃ ᐱᓕᕆᖃᑎᖃᖅᑎᑦᑎᑉᓗᓂ ᐊᒥᓱᓂᒃ ᐊᔾᔨᒌᙱᑦᑐᓂᒃ ᑲᑎᕐᒪᔪᓂᒃ ᐊᒻᒪᓗ ᐊᕕᒃᑐᖅᓯᒪᔪᓂᑦ ᐅᔭᕋᒃᑕᕆᐊᕐᒥᑦ. ᐊᒻᒪᓗ ᑕᐃᒪᓐᓇᒧᑦ, ᐊᓕᐊᓇᐃᒋᔭᕋ ᐱᓕᕆᐊᒻᓂᑦ ᐊᒡᓃᑯᒃᑯᓐᓂᑦ ᐃᓄᐃᑦ ᐱᓕᕆᖃᑎᒋᔭᒃᑲ. ᖁᔭᓕᔪᖓ ᐱᒻᒪᕆᐅᓂᒃ ᐱᓕᕆᖃᑎᖃᕋᒪ ᐊᒻᒪᓗ ᐱᓪᓗᕆᒃᑐᓂᑦ ᐊᒻᒪᓗ ᐊᔪᙱᑦᑐᓂᒃ ᐱᓕᕆᔨᓂᒃ ᐱᕈᕈᒪᓂᖃᖅᖢᑎᒃ.”

ᖃᓄᑐᐃᓐᓇᖅ ᐅᖃᐅᔾᔨᔪᒪᕕᑦᐃᓱᒪᒋᔭᖃᖅᑐᓂᒃ ᐅᔭᕋᒃᑕᕆᐊᕐᒥᑦ ᐱᓕᕆᐊᖅᑖᕈᒪᑉᓗᑎᒃ?

“ᐅᔭᕋᒃᑕᕆᐊᓕᕆᓂᕐᒥᔩᑦ ᐱᓕᕆᖃᑎᒌᖕᓂᖃᑦᑎᐊᖅᑐᖅ ᐱᓕᕆᔩᑦ ᐱᓕᕆᖃᑎᒌᖕᓂᖏᑦ ᐱᒻᒪᕆᐅᒋᔭᐅᑉᓗᓂ. ᑕᒪᓐᓇᐅᑎᓪᓗᒍ, ᐅᓗᕆᐊᓱᖕᓂᖃᙱᓪᓗᓂ ᐃᓱᒪᒋᔭᕐᓄᑦ ᐊᒻᒪᓗ ᐊᒃᑐᖅᓯᓂᖓ ᐊᑐᓂ ᐃᓄᐃᑦ ᑐᓂᓯᔪᑦ ᐱᓕᕆᖃᑎᒌᒃᑐᓄᑦ ᐱᒻᒪᕆᐅᔪᖅ. ᐱᓕᕆᖃᑎᒋᔭᕗᑦ ᑐᓴᕈᒪᔪᑦ ᐃᓱᒪᒋᔭᕐᓂᑦ, ᑕᐃᒪᓐᓇᒧᑦ ᐃᒡᕕᐅᑦᑕᐃᓕᖃᑦᑕᙱᓪᓗᑎᑦ, ᐅᒃᐱᕆᓗᒋᑦ ᐃᓱᒪᒋᔭᑎᑦ ᐊᒻᒪᓗ ᖃᐅᔨᔭᐅᑎᓪᓗᒋᑦ. ᐊᓯᖓᑦᑕᐅᖅ, ᐱᔾᔪᑎᖃᖅᑐᖅ ᓯᕗᓪᓕᐅᖅᖃᐅᔪᒥᑦ, ᐃᓂᒋᔭᖓ ‘ᐃᓅᑉ’ ᐅᔭᕋᒃᑕᕆᐊᓕᕆᔪᓂᑦ. ᐱᑦᑕᐅᒋᑦᑎᐊᖅᑕᕋ ᐊᒻᒪᓗ ᖁᕕᐊᒋᔭᕋ ᑕᑯᑉᓗᓂ ‘ᐃᓄᒃ’-ᒥᑦ ᐱᔾᔪᑎᖃᖅᑐᖅ ᐃᓂᖃᑦᑎᐊᖅᑐᖅ ᐊᐅᓚᑦᑎᔨᐅᔪᓂᑦ ᐊᖏᔫᔪᒥᑦ, ᐊᕗᖓᑲᓪᓚᐅᔪᒥᑦ ᐊᒻᒪᓗ ᐋᖅᕿᐅᒪᔪᒥᑦ ᐅᔭᕋᒃᑕᕆᐊᑉᑎᑐᑦ. ᐃᓅᔪᒍᑦ ᑕᒻᒪᖃᑦᑕᖅᑕᑉᑎᖕᓂᑦ ᐊᒻᒪᓗ ᐋᖅᕿᐅᒫᓂᓗᐊᖏᓐᓂᕆᔭᑉᑎᓐᓂᑦ; ᐅᖃᐅᑎᔪᒪᔭᒃᑲ ᐃᓕᖕᓂᑦ ᐱᔪᖕᓇᐅᑎᖃᖅᑎᓪᓗᑎᑦ ᐋᖅᕿᐅᒫᓂᖏᓐᓂᖃᕈᖕᓇᕐᓂᕐᒥᒃ ᐊᒻᒪᓗ ᑕᒻᒪᖃᑦᑕᕐᓂᕐᒥᒃ. ᐃᒃᐱᒍᓱᒃᑐᑐᖃᐅᔪᖓ ᐊᒡᓃᑯᒃᑯᑦ ᐱᖃᖅᑎᑖᑎᒍᑦ ᑖᑉᓱᒥᙵᑦ ᐱᔪᖕᓇᐅᑎᒥᑦ. ᐱᒻᒪᕆᐅᓛᖑᔪᖅ ᑕᒡᕙᙵᑦ ᐃᓕᑦᑎᓗᓂ ᐊᒻᒪᓗ ᐱᕈᖅᐸᓪᓕᐊᓗᓂ ᐊᑐᖅᓯᒪᓂᑯᒋᔭᕐᓂᑦ. ᐱᐊᓂᒃᐸᓪᓕᐊᓗᖓ, ᑭᖑᓪᓕᖅᐹᖅ ᐃᓱᒪᒋᔭᕋ ᐅᖃᐅᔾᔨᓗᖓ ᐃᓱᒪᒋᙱᓪᓗᒋᑦ ᒫᓐᓇᐅᔪᖅ ᖃᓄᐃᖓᓂᐅᔪᖅ; ᐅᕙᑉᑎᓐᓂᐅᖓᓂᑦ ᐱᑦᑕᐅᓂᖅᓴᙳᕆᐊᖏᓐᓇᐅᔭᕐᓗᑕ ᐊᒻᒪᓗ ᐆᒃᑐᕐᓗᒋᑦ ᑎᑭᐅᑎᓂᐅᔪᑦ. ᐃᑲᔪᖅᑕᐅᓂᖃᖅᑐᒍᑦ ᑕᐃᒪᓐᓇᐃᑦᑐᒥᑦ ᐊᐅᓚᑦᑎᔨᖃᖅᖢᑕ ᐱᑦᑕᐅᔪᓂᒃ ᐊᔪᙱᓐᓂᖃᖅᑐᑦ ᐃᓅᔪᑦ ᐊᒥᓱᓂᒃ ᐃᓕᓐᓂᐊᖅᑎᑦᑐᖕᓇᖅᖢᓂᑎᒍᑦ ᐊᒻᒪᓗ ᖁᑦᑎᖕᓂᖅᓴᐅᒋᐊᖅᑐᒧᑦ ᐋᖅᕿᒃᓯᓯᒪᖃᑦᑕᖅᑐᑦ, ᖄᖏᐅᑎᓂᐊᕐᓗᑕ ᐅᕙᑉᑎᖕᓂᑦ. ᑐᖔᒍᑦ ᑕᐅᑐᒃᑕᐃᓕᓗᒍ ᐱᒻᒪᕆᐅᓂᖓᑕ ᐃᓅᑉ ᐊᔪᙱᓐᓂᕆᔭᖓ; ᑐᓴᐅᒪᖃᑦᑕᐅᑎᓂᖅ, ᐱᓕᕆᖃᑎᒌᖕᓂᖅ ᐊᒻᒪᓗ ᓯᕗᓕᐅᖅᑎᐅᓂᖅ.”

ᐃᓱᒪᒋᔭᖃᖅᐱᑦ ᐊᕐᓇᐅᓂᕐᓄᑦ ᐱᓕᕆᐊᕐᒥᑦ ᐱᓕᕆᓂᕆᔭᖕᓂᑦ?

“ᐃᓱᒪᒋᔭᐅᖃᑦᑕᕐᓂᖓ ᐊᕐᓇᐃᑦ ᐃᓂᖃᓗᐊᖏᑦᑐᑦ ᐅᔭᕋᒃᑕᕆᐊᓂᑦ ᑕᒻᒫᔭᖅᑐᖅ ᐊᒻᒪᓗ ᖃᖓᑐᖃᒥᑦ ᐱᖅᖁᓯᕆᔭᐅᔪᖅ. ᓱᓕᙱᑦᑐᒃᑯᑦ ᐃᓱᒪᒋᔭᐅᓂᖓ ᑐᓂᐅᑕᐅᖃᑦᑕᖅᑐᖅ ᑕᐅᑐᒐᐅᔪᒧᑦ ᐊᒻᒪᓗ ᐃᓚᓕᐅᑎᓂᖅ ᐊᔪᕐᓇᕐᓂᖅᓴᐅᔪᖅ ᐊᖑᑎᑕᖃᐅᑦᑎᐊᖅᑐᒥᑦ ᐊᕙᑎᖃᖅᑐᒥᑦ. ᐃᒪᓐᓇᐃᒻᒪᓪᓘᓐᓃᑦ, ᐃᓚᒃᓯᔭᐅᖏᓐᓇᖃᑦᑕᖅᑐᖓ ᐃᒃᐱᒍᓱᒡᕕᐅᓂᖃᑦᑎᐊᖅᖢᖓ ᐊᒻᒪᓗ ᐃᓱᒪᒋᔭᐅᑦᑎᐊᖅᖢᖓ ᐱᓕᕆᖃᑎᒋᔭᒻᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᖃᑕᐅᔪᓄᑦ. ᐃᓱᒪᒋᔭᒃᑲ ᐊᒻᒪᓗ ᐅᖃᐅᓯᕆᔭᒃᑯᑦ ᑐᓵᔭᐅᖃᑦᑕᖅᑐᑦ ᐊᒻᒪᓗ ᐱᒋᐊᖅᑎᑦᑎᓂᖃᖅᑐᑦ. ᐱᐊᓂᑦᑎᐊᖅᓯᒪᓂᒃᑲ ᐊᒻᒪᓗ ᑎᑭᐅᑎᓯᒪᓂᕆᔭᒃᑲ ᐃᓕᑕᕆᔭᐅᖃᑦᑕᖅᑐᑦ ᖃᐅᔨᒪᔭᒻᓄᑦ ᐊᒻᒪᓗ ᖃᓄᑐᐃᓐᓇᖅ ᐃᓱᒪᒋᔭᐅᓂᕋ ᐃᒃᐱᒍᓱᓚᐅᖅᓯᒪᙱᑦᑐᖓ ᐅᕝᕙᓘᓐᓃᑦ ᐊᔾᔨᐅᖏᑎᑕᐅᓂᕐᒥᒃ ᐊᕐᓇᐅᓂᒻᓄᑦ. ᖃᐅᔨᒪᔪᖓ ᐃᓂᐅᔪᖅ ᐊᕐᓇᓄᑦ ᐅᔭᕋᒃᑕᕆᐊᕐᒥᑦ ᐱᒻᒪᕆᐅᔪᖅ ᐊᒻᒪᓗ ᐱᔭᕆᐊᖃᖅᖢᓂ. ᐊᒡᓃᑯᒃᑯᑦ ᐱᓕᕆᐊᕆᓯᒪᔭᖏᑦ ᐱᓕᕆᕝᕕᖏᑦ ᐊᔾᔨᒌᙱᑦᑑᑕᐅᓕᖅᑎᓪᓗᒋᑦ ᐊᒻᒪᓗ ᐃᓚᐅᑎᑦᑎᓗᑎᒃ ᐃᓕᑕᕆᔭᐅᓯᒪᔪᑦ ᐊᒻᒪᓗ ᖁᕕᐊᒋᔭᕋ ᐅᒃᑯᐃᖓᓂᒃᑰᖓᓂᖅ.”

 

ᖁᔭᓐᓇᒦᖅᑕᕗᑦ ᐅᐱᓐᓇᖅᑐᑦ ᐊᕐᓇᐃᑦ ᐱᕕᖃᕈᖕᓇᓚᐅᕐᒪᑕ ᐊᒻᒪᓗ ᐃᓱᒪᒋᔭᖏᓐᓂᒃ ᐅᕙᑉᑎᖕᓄᑦ ᑐᓂᓯᑉᓗᑎᒃ ᐊᒻᒪᓗ ᖁᔭᓐᓇᒦᒃ ᐊᓯᓗᒃᑖᖏᓐᓄᑦ ᐊᕐᓇᓄᑦ ᐊᒃᓱᕈᖅᖢᑎᒃ ᐱᓕᕆᓂᖏᑦ ᐃᑲᔪᐃᓂᖃᖅᓯᒪᔪᑦ ᓄᓇᕗᒻᒥ ᐊᐅᓛᖅᑎᑦᑎᓂᑉᑎᖕᓄᑐᐃᓐᓇᐅᖏᑦᑐᖅ ᑭᓯᐊᓂᑦᑕᐅᖅ ᐅᔭᕋᒃᑕᕆᐊᓕᕆᔨᓂᑦ ᐃᓗᐃᑦᑑᖓᑉᓗᓂ. ᓴᕆᒪᒋᓱᒃᑐᒍᑦ ᐱᓕᕆᖃᑎᒋᒐᑉᑎᒋᑦ!

ᐅᖃᓕᒫᒃᑲᓐᓂᕈᒪᒍᕕᑦ ᐃᓚᖏᓐᓂᒃ ᐱᔪᒪᓕᖅᑎᑦᑎᓂᖃᖅᑐᓂᒃ ᐊᕐᓇᓂᑦ ᐱᓕᕆᐊᓖᑦ ᐊᒡᓃᑯᒃᑯᓐᓂᑦ, ᐅᖃᓕᒫᕐᓗᒍ ᒫᓐᓇᓵᖑᓛᖑᔪᑦ ᐅᖃᐅᓯᐅᔪᑦ ᐅᑭᐅᖑᔪᒧᑦ ᐱᓕᕆᔨᓂᒃ ᐱᔾᔪᑎᖃᖅᑐᓂᒃ. ᓕᖔᓐ ᐲᑯ, ᐃᓕᓐᓂᐊᖅᑎᐅᓂᕐᒧᑦ ᐱᑖᖅᑎᑕᐅᔪᑦ, ᓯᐅᕋ ᓴᕗᐃ (Sara Savoie) ᐊᒻᒪᓗ ᐄᕆᐊᓐ ᐸᓪᓚᑦ (Ariane Ballard).